Lēsoni 136: Tokāteline mo e Ngaahi Fuakava 125–128

Tokāteline mo e Ngaahi Fuakava 126

Naʻe Tali ʻe he ʻEikí e Ngāue ʻa Pilikihami ʻIongí

ʻI he ʻaho 9 ʻo Siulai 1841, naʻe foaki ai ʻe he ʻEikí ha fakahā kia Pilikihami ʻIongi ʻo fakafou ʻi he Palōfita ko Siosefa Sāmitá. Hili ʻa e ngāue fakafaifekau tuʻo lahi ʻa Pilikihami ʻi he ʻIunaiteti Siteití, Kānata, mo ʻIngilaní, naʻe folofola ʻa e ʻEikí ʻoku fakahōifua ʻene ngaahi ngāue fakafaifekaú kiate Ia. Naʻá Ne folofola kuo taimi ke tokanga makehe ʻa Pilikihami ki hono fāmilí. ʻE lava ke tokoni ʻa e lēsoni ko ʻení ke fakatupulaki ʻe he kau akó ʻenau holi ke ngāue faivelenga maʻá e ʻEikí ʻo hangē ko ia ne fai ʻe Pilikihami ʻIongí.

Ngaahi ʻEkitivitī Ako ʻOku Ala Fakahokó

Ngāue maʻá e ʻEikí

Hiki ʻa e kupuʻi lea Ngāue maʻá e ʻEikí ʻi he palakipoé, pea fakaafeʻi ʻa e kau akó ke nau fai ʻeni:

Fakakaukauloto naʻe saveaʻi ʻe ha taki fakasiteiki pe fakavahefonua ʻa e kāingalotu toʻu tupu ʻo e Siasí ʻi homou feituʻú peá ne fai ange ʻa e ngaahi fehuʻi ko ʻení. Ko e hā nai haʻanau ngaahi tali?

• Ko e hā ha ngaahi founga ʻokú ke feinga ai ke ngāue maʻá e Tamai Hēvaní mo Sīsū Kalaisí? Ko e hā ʻa e ʻuhinga ʻokú ke ngāue ai Maʻanauá?

• Ko e hā e meʻa ʻokú ne fakafeʻātungia ʻa e ngāue maʻá e ʻEikí? Ko e hā nai e ʻuhinga ka ʻikai ke tau fie ngāue maʻu ai pē Maʻaná?

Hili ʻa e vahevahe ʻa e kau akó, kole ange ke nau fakalaulauloto ki he founga te nau lava fakataautaha ai ʻo tali ʻa e ngaahi fehuʻi ʻi ʻolungá.

ʻI heʻenau ako fekauʻaki mo e sīpinga ʻa Pilikihami ʻIongi lolotonga ʻa e lēsoni ko ʻení, fakaafeʻi ʻa e kau akó ke nau fekumi ki he Laumālie Māʻoniʻoní ke tokoniʻi kinautolu ke ikunaʻi ha faʻahinga faingataʻa pē ke ngāue faivelenga maʻá e ʻEikí.

Ko e ongo ne maʻu ʻe he ʻEikí fekauʻaki mo Pilikihami ʻIongí

Fakakaukau ke ʻoange ʻa e fakamatala ko ʻení ki ha niʻihi ʻo e kau akó ʻi he kamataʻanga ʻo e kalasí. Fakaafeʻi kinautolu ke fakamatalaʻi fakanounou ʻa e meʻa naʻe ʻuhingamālie pe makehe kiate kinautolu fekauʻaki mo Pilikihami ʻIongí.

• Naʻe tupu masiva hake ʻa Pilikihami ʻIongi, ko e fika hiva mei ha fānau ʻe toko hongofulu mā taha.

• Naʻe mālōlō ʻene faʻeé ʻi hono taʻu 14.

• ʻI hono taʻu 16, naʻá ne mavahe atu ke kumi haʻane moʻui ʻi he māmaní, ʻo hoko ko ha taha tufunga akoako, tokotaha ngāue sioʻata, mo vali.

• ʻI hono taʻu 23, naʻá ne mali mo Meliame Uoka, pea ʻi ai hona ongo ʻofefine kimui ange.

• Naʻe ako ʻe Pilikihami ʻa e Tohi ʻa Molomoná ʻi ha taʻu ʻe ua, ʻo fakafehoanaki ia ki he Tohi Tapú, kimuʻa peá ne kau ki he Siasí. Naʻá ne pehē kimui ange, “Na‘á ku ‘ilo‘i ko e tohi mo‘oni ia ‘o hangē pē ko ‘eku ‘ilo‘i ko ia ‘oku ou lava ke mamata ‘aki ‘a hoku ongo matá, pe ke u ongo‘i ‘i he‘eku ala ‘aki ‘a hoku ngaahi louhi‘inimá” (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 2).

• Naʻe ngāue fakafaifekau tuʻo 10 ʻa Pilikihami ʻi he ʻIunaiteti Siteití, Kānata, mo ʻIngilani.

• Naʻá ne hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi hono taʻu 33.

• ʻI he ʻaho 9 ʻo Siulai 1841, naʻe foaki ai ʻe he ʻEikí ha fakahā kia Pilikihami ʻIongi ʻo fakafou ʻi he Palōfita ko Siosefa Sāmitá.

Lau ʻa e Tokāteline mo e Ngaahi Fuakava 126:1–3, ʻo kumi ʻa e meʻa naʻe folofola ʻaki ʻe he ʻEikí kia Pilikihami fekauʻaki mo ʻene ngāué.

• Ko e hā naʻá ke saiʻia ai pe ako mei he ngaahi veesi ko ʻení?

  Fakafanongo fakalelei ki he vahevahe ʻa e kau akó. Kapau ʻokú ke pehē ʻe ʻaonga, fai ha ngaahi fehuʻi vakaiʻi hangē ko ʻení: “Ko e hā ha ngaahi lea ʻoku fakaʻaongaʻi ʻi he fakahaá ke ʻuhinga kia Pilikihami?” “ʻOkú ke pehē ko e hā ʻa e ongo ʻe maʻu ʻe Pilikihami ʻi he ngaahi lea ko ʻení?” “Ko e hā ʻoku akoʻi atu ʻe he ngaahi veesi ko ʻení fekauʻaki mo e ʻEikí?”

  Kapau he ʻikai ʻiloʻi ʻe he kau akó ha tefitoʻi moʻoni ʻiate kinautolu pē, fakakaukau ke fehuʻi ange, “ʻE founga fēfē ha ʻaonga kiate kitautolu ʻa e ngaahi fakahinohino ʻa e ʻEikí kia Pilikihamí?” (ʻE ala fakaʻaongaʻi ʻe he kau akó ha ngaahi lea kehe, ka ʻoku totonu ke nau ʻiloʻi ha tefitoʻi moʻoni hangē ko ʻení: Kapau te tau ngāue faivelenga maʻá e ʻEikí, te Ne tali ʻetau foaki māʻoniʻoní. Mahalo te ke fie fokotuʻu ange ke lekooti ʻe he kau akó ʻa e tefitoʻi moʻoni ko ʻení ʻi heʻenau folofolá.

• ʻOkú ke pehē ko e hā ʻoku ʻilo ʻe he kakai hangē ko Pilikihami ʻIongí ʻokú ne fakaʻaiʻai kinautolu ke nau ngāue faivelenga maʻá e ʻEikí? ʻE tokoni fēfē nai ia kiate kitautolú?

Ko e sīpinga ʻa Pilikihami ʻIongí

ʻOku ʻi ai ha fealēleaʻaki ʻe tolu ʻi he laʻipepa tufa ko ʻení ke tokoni ki he kau akó ke nau ako fekauʻaki mo e ngāue faivelenga maʻá e ʻEikí mei he sīpinga ʻa Pilikihami ʻIongí. Kimuʻa pea kamata ʻa e kalasí, fakaafeʻi ha kau ako ʻe toko tolu ke tokoni ki he kalasí ʻaki hano tataki ha taha ʻo e ngaahi fealēleaʻaki ko ʻení. Pe vahevahe ʻa e kalasí ki ha ngaahi kulupu tautau toko tolu pea fakaafeʻi ʻa e kau mēmipa takitaha ʻo e kulupú ke nau tataki ha taha ʻo e ngaahi fealēleaʻakí. Talaange ki he kau akó te nau lava ʻo liliu ha taha pē ʻo e ngaahi fehuʻí ke ʻuhingamālie pe ʻaonga ange ai ʻa e fealēleaʻakí ki honau kaungāakó.

Ko e Sīpinga ʻa Pilikihami ʻIongí

Alēlea 1

Ko e Pole ʻo e Lea ʻi he Kakaí

Kamata ʻaki hano ʻeke ha ngaahi fehuʻi peheni:

• Ko e hā hoʻo ongo fekauʻaki mo e lea ʻi he kakaí? Ko e hā hono ʻuhingá?

Lau pe fakamatalaʻi fakanounou ʻeni:

Ko e taha ʻo e ngaahi pole lahi taha ʻo Pilikihami ʻIongí ko e lea ʻi he kakaí. Naʻá ne pehē, “Naʻe hangē tofu pē ʻeku ngutu tamu leá mo e pōtoʻi lea ʻa ha tangata” (ʻi he Journal of Discourses, 5:97). Naʻá ne manatu ki ha taimi ʻi ha uike ʻe taha hili hono papitaisó, naʻe totonu ai ke ʻi ai ha kau lea taukei ʻe toko fā ʻi he Siasí ke malanga, ka naʻe ʻikai ke nau malanga. Naʻá ne pehē:

Naʻá ku kei siʻi, naʻe ʻikai ke u faʻa lava ʻa e lea ʻi he kakaí mo maʻu ha ʻilo ki he māmaní; ka naʻe ʻiate au ʻa e Laumālie ʻo e ʻEikí, pea naʻá ku ongoʻi ʻo hangē ka ʻauha hoku ngaahi huí ʻi hoku sinó kae ʻoua kuó u lea ki he kakaí ʻo fakahā kiate kinautolu ʻa e meʻa ne u mamata, fanongo mo ʻiló—ʻa e meʻa kuó u aʻusia mo fiefia aí; pea ko e fuofua malanga ne u fakahokó ne laka hake ia ʻi he houa ʻe tahá. Ne u fakaava hoku ngutú pea naʻe fakafonu ia ʻe he ʻEikí. (Brigham Young, ʻi ha Journal of Discourses, 13:211)

• Ko e hā naʻe faingataʻa fekauʻaki mo e meʻa naʻe fai ʻe Pilikihami ʻIongí?

Fakaafeʻi ʻa e kau akó ke lau ʻa e Tokāteline mo e Ngaahi Fuakava 100:5–6 (vakai foki, ʻEkesōtosi 4:12; Lea Fakatātā 16:1). Fehuʻi ange leva:

• Naʻe fekauʻaki fēfē ʻa e aʻusia ʻa Pilikihami ʻIongí mo e ngaahi veesi ko ʻení?

• Ko e hā ha meʻa ʻokú ke ako fekauʻaki mo e ʻEikí ʻe lava ʻo tokoni kiate koe?

Vahevahe ʻa e ongo ʻokú ke maʻu fekauʻaki mo e falala ki he ʻEikí mo hoʻo loto-fiemālie ke vahevahe ʻa e meʻa ʻokú ke ʻiló.

Alēlea 2

Ko e Feilaulau ʻa Pilikihami ke Ngāué

Kamata ʻaki haʻo ʻeke ha fehuʻi hangē ko ʻení:

• Ko e hā ʻa e ngaahi feilaulau ʻoku fiemaʻu ke ke fakahoko ke ʻalu ʻo ngāue fakafaifekaú?

Lau pe fakamatalaʻi fakanounou ʻeni:

Naʻe mālōlō ʻa e uaifi ʻo Pilikihami ʻIongí ʻi he taʻu tatau naʻá ne papitaiso aí. ʻI ha feilaulau lahi, naʻá ne fokotuʻutuʻu ke tokangaʻi ʻene ongo kiʻi fānaú pea ngāue fakafaifekau ki Niu ʻIoke mo e faka-tokelau ʻo Kānatá, ʻa ia naʻá ne papitaiso ai ha kakai tokolahi.

Hili ʻa e ngāue fakafaifekau ʻa Pilikihami ʻi ha taʻu nai ʻe taha, naʻá ne fakamatalaʻi ʻene tūʻuta ki Ketilani, ʻOhaioó:

Kapau ne ʻi ai ha tangata ne kau atu ki he Kāingalotú naʻe toe masiva ange ʻiate au—naʻe tuʻunga ia he naʻe hala pē ke toe ʻi ai haʻane meʻa ʻaʻana. … Naʻe toko ua siʻeku fānau ke tauhí. … Ne mālōlō foki hoku malí. … [Naʻe] halaʻatā ha motuʻi sū ke u tui, tukukehe pē ha motuʻi sū puti ne u kole. Naʻe halaʻatā haku vala māfana, tukukehe pē haku kote ne tuitui ʻa ia ko hono taʻu ʻaki ʻeni ʻe tolu pe fā. … Naʻá ku fononga ʻo malanga mo foaki ʻa e kihiʻi paʻanga mo e koloa kotoa pē naʻá ku maʻú. (Ngaahi Akonaki ʻa e Kau Palesiteni ʻo e Siasí: Pilikihami ʻIong [1997], 281)

Fakaafeʻi ha tokotaha ako ke lau ʻa e Luke 18:18–23, ʻo kumi ʻa e founga naʻe kehe ai ʻa e tali ʻa Pilikihami ʻIongi ki he ngaahi fakaafe ke ngāué mei he tangata naʻe fefolofolai mo e Fakamoʻuí ʻi he fakamatala ko ʻení.

• Ko e hā ʻokú ke ʻilo fekauʻaki mo e ʻEikí ʻe ala tokoni ke tau loto-fiemālie ke fai ha ngaahi feilaulau hangē ko ia naʻe fakahoko ʻe Pilikihami ʻIongí?

• Makehe mei he ngāue fakafaifekaú, ko e hā ha ngaahi founga kehe ʻoku finangalo ʻa e ʻEikí ke tau feilaulau ai ke tauhi kiate Iá?

Vahevahe ʻa e ongo ʻokú ke maʻu fekauʻaki mo e loto-fiemālie ke feilaulau ke tauhi ki he ʻEikí.

Alēlea 3

Ngāue Fakafaifekau ʻa Pilikihami ki ʻIngilaní

Kamata ʻaki haʻo ʻeke ha fehuʻi hangē ko ʻení:

• Ko e hā ha ngaahi ʻuhinga ʻoku fiemaʻu ai ʻe ha faifekau ʻa e tokoni ʻa e ʻEikí?

Lau pe fakamatalaʻi fakanounou ʻeni:

Hili ʻa e toe mali mo ngāue fakafaifekau tuʻo nima kehe ʻa Pilikihamí, naʻe ui ia mo ha kau ʻAposetolo kehe, ke ngāue fakafaifekau ki ʻIngilani.

Naʻe fakamatalaʻi ʻe Pilikihami ʻene ngāue fakafaifekaú ʻo pehē:

Naʻa mau tūʻuta atu … ko e kau ʻāuhē ʻi ha fonua muli pea ʻikai haʻamau paʻanga, ka koeʻuhí ko e ʻaloʻofa ʻa e ʻOtuá naʻe lava ke maʻu ai hamau ngaahi kaumeʻa, pea mau fokotuʻu ʻa e Siasí ʻi he meimei kolo lalahi kotoa pē ʻi Pilitānia Lahi, mo mau papitaiso ha kakai ʻi he vahaʻa ʻo e toko fituafé ki he valuafé, paaki ha tatau ʻe 5,000 ʻo e Tohi ʻa Molomoná, … pea kuo ʻosi fakatō ki he loto ʻo e toko lau afe ʻa e ngaahi tenga ʻo e moʻoni taʻengatá … : pea ʻoku ou pehē ʻoku hā ʻa e toʻukupu ʻo e ʻOtuá ʻi he ngaahi meʻa kotoa ko ʻení. (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 7)

Fakaafeʻi ha tokotaha ako ke lau ʻa e ngaahi lea ʻa ʻĀmoni ʻi he ʻAlamā 26:12–13. Fehuʻi ange leva:

• ʻOku tatau fēfē ʻa e lea ʻa Pilikihami ʻIongí mo e lea ʻa ʻĀmoní?

• ʻOkú ke pehē ko e hā ʻoku mahuʻinga ai ʻa e falala ki he ʻEikí ʻi he taimi ʻoku tau feinga ai ke tauhi kiate Iá?

• Kuó ke feinga fēfē ke falala ki he ʻEikí ʻi hoʻo tauhi kiate Iá?

Vahevahe hoʻo ngaahi fakakaukau pe ongo fekauʻaki mo e falala ki he ʻEikí ʻi hoʻo tauhi kiate Iá.

Ko e meʻa kuó ke akó

Hili ʻa e alēleá, te ke lava ʻo poupouʻi ʻa e kau akó ke nau fekumi ki he tataki ʻa e Laumālie Māʻoniʻoní pea hiki ʻa e meʻa ʻoku nau ako mo ongoʻi fekauʻaki mo e tauhi ki he ʻEikí. ʻE lava ke nau tali ʻa e ongo fehuʻi ko ʻení:

• Ko e hā kuó ke ako mei he sīpinga ʻa Pilikihami ʻIongí mo e founga naʻe tokoniʻi ai ia ʻe he ʻEikí?

• Ko e hā kuó ne fakalahi hoʻo loto-holi ke ngāue maʻá e ʻEikí?

Fakaʻosi ʻaki haʻo fakaafeʻi ʻa e kau akó ke vahevahe ha konga ʻo e ngaahi fakakaukau mo e ongo ne nau hikí. Te ke lava foki ʻo vahevahe.

Ngaahi Maʻuʻanga Tokoni Kehé

Ko e hā mo ha toe meʻa ʻoku tau ʻilo fekauʻaki mo e fononga ʻa Pilikihami ʻIongi ki ʻIngilaní?

Naʻe muimui ʻa Pilikihami mo e kau ʻAposetolo kehé ki he fakahinohino ʻa e ʻEikí ke nau mavahe ki he misiona ʻIngilaní mei Hihifo Mamaʻo, Mīsuli, ʻi he ʻaho 26 ʻo ʻEpeleli, 1839 (vakai, Tokāteline mo e Ngaahi Fuakava 118). Naʻa nau nofo ʻi he ngaahi uike siʻi naʻe hokó ʻi ʻAiouā mo ʻIlinoi, ʻo fai ha ngaahi teuteu lahi ange ki heʻenau fononga ki Pilitānia Lahí. ʻI he faʻahitaʻu māfana ʻo e 1839, naʻe tō ha toʻu mahaki ʻo e malēliá ʻi he feituʻu ko iá pea naʻa nau puke ai. Naʻe puke lahi ʻaupito ʻa Pilikihami, pea naʻe ʻikai ke ne lava ʻo heka ki ha saliote taʻe ʻi ai ha tokoni. Naʻá ne lekooti:

Naʻá ku ʻosi fakapapauʻi pē kuo pau ke u ʻalu ki ʻIngilani, pea kapau te u mate ai, teu kei feinga pē. Naʻá ku fakapapauʻi ʻi hoku lotó te u fai kotoa ʻa ia naʻe fiemaʻu ke u fakahoko ʻi he Ongoongolelei ʻo e moʻuí pea mo e fakamoʻuí, pe ko haʻaku mate ʻi heʻeku feinga ke fakahoko iá. (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 6)

Hili ʻa e mālōlō hono ʻuluaki uaifí, naʻe mali ʻa Pilikihami mo Mele ʻAna ʻEniselo ʻi he 1834. Naʻá ne poupouʻi ia, neongo naʻá ne puke mo toki fanauʻi ha pēpē valevale. Ko e misiona ʻeni hono nima naʻe ngāue ai ʻa Pilikihami talu ʻena malí. Te ne ngāue ʻi ha misiona fakakātoa ʻe 10.

Lolotonga ha fononga ʻa Pilikihami ʻi ha vaka sitima mei Feapooti, ʻOhaiō, ki Pafalō, Niu ʻIoké, naʻe tō ha matangi ʻo ne fakatuaiʻi ʻa e folau ʻa e vaká. Naʻá ne vahevahe ʻa e meʻá ni:

Naʻe tō ʻa e matangí ʻi he hoko ʻa e tahá ʻi he pongipongí. Naʻá ku ʻalu ki he kaokao ʻo e vaká peá u ongoʻi ʻi he laumālié ke u lotu ki he Tamaí ʻi he huafa ʻo Sīsuú, ke maʻu ha fakamolemole ʻo ʻeku ngaahi angahalá kotoa, pea naʻá ku ongoʻi ke fekau ki he ngaahi matangí ke tuʻu, pea tuku ke mau fononga ʻi he malu. Naʻe holo e matangí, peá u ongoʻi ke tuku ʻa e lāngilangí mo e fakafetaʻí ki he ʻOtua ko ia ʻokú Ne puleʻi ʻa e meʻa kotoa pē. (Brigham Young, “History of Brigham Young,” Millennial Star, Oct. 17, 1863, 663–64)

Tokāteline mo e Ngaahi Fuakava 126:3. Naʻe “tokangaʻi” fēfē ʻe Pilikihami ʻIongi hono fāmilí?

Hili ʻa e ngāue fakafaifekau ʻa Pilikihami ʻIongi ki Pilitānia Lahí, naʻá ne muimui ki he fekau ʻa e ʻEikí ke “tokangaʻi makehe ʻa [hono] fāmilí” (Tokāteline mo e Ngaahi Fuakava 126:3). Naʻá ne fakaʻaongaʻi ha taimi ke akoʻi fakaʻaho mo lotu fakataha mo ʻene fānaú.

Naʻa mo e kimuʻa pea fanongo ʻa Pilikihami ki he fakahā ʻi he Tokāteline mo e Ngaahi Fuakava 126 ʻi hono taʻu 40, naʻá ne ʻosi līʻoa pē ki hono fāmilí. ʻOku fakamatalaʻi ʻeni ʻi he talanoá ni:

Naʻá ne mali mo Meliame ʻEniseline Uekisī ʻi hono taʻu 23. Naʻá na maʻu ha ongo fānau fefine ʻe toko ua. Naʻe tauhi mo tokoniʻi ʻe Pilikihami hono fāmilí ʻaki ʻene ngaohi mo fakaleleiʻi ʻo e ʻū seá, ʻū tēpile mo e ʻū kopate kuo maumaú pea mo hono fokotuʻu ʻo e ʻū matapā sioʻatá, matapā lalahí, sitepú pea mo e ngaahi teuteu takai ko ia ʻi he tafuʻanga afi ʻi falé. …

ʻI he taimi naʻe moʻua ai ʻa Meliame ʻi he mahaki fatafatá, naʻe fai ʻe Pilikihami ʻa e konga lahi ʻo ʻene ngaahi ngāué fakataha mo hono ngaahi fatongia pē ʻoʻoná. Pea ʻi he fakaʻau ke siʻi ange ʻene toe lava ke mavahe mei hono mohengá, naʻe hanga leva ʻe Pilikihami ʻo teuteuʻi maʻu pē ʻa e meʻatokoni pongipongi ʻa e fāmilí, teuteuʻi hono ongo ʻofefiné, fakamaau ʻa e falé, peá ne ‘fua ʻa hono uaifí ʻo fakatangutu ʻi he sea sēlue ʻi he veʻe tafuʻanga afí ʻo tuku ai kae ʻoua kuó ne toki foki mai ʻi he taimi efiafí,’ ʻo teuteuʻi e meʻatokoni efiafí, sio kuo mohe hono fāmilí, peá ne fakaʻosi leva ʻa e ngaahi ngāue fakaʻapí. (Ngaahi Akonaki ʻa e Kau Palesiteni ʻo e Siasí: Pilikihami ʻIongi [1997], 2)

Ko e hā mo ha ngaahi tāpuaki kehe naʻe maʻu ʻe Pilikihami mei heʻene muimui ki he fakahā ko ʻení?

Hili ʻa e fakahā ko ʻení, naʻe lava foki ʻa Pilikihami ʻIongi ʻo fakaʻaongaʻi ha taimi lahi ange mo hono fāmilí. Naʻá ne toe ofi foki ki he Palōfita ko Siosefa Sāmitá ʻi ha māhina ʻe 28 ʻo e māhina fakamuimui ʻe 36 ʻo e moʻui ʻa Siosefá. Naʻe tokoni ʻeni kia Pilikihami ke hoko ko e palesiteni ʻo e Siasí hili ʻa e pekia ʻa Siosefá.

Ngaahi ʻEkitivitī Fakalahi ki he Akó

Founga ʻe taha ke kamata ʻakí

Fakaafeʻi ʻa e kau akó ke fakakaukau ʻoku nau mavahe mei honau fāmilí ke ngāue fakafaifekau maʻá e ʻEikí lolotonga ʻa e faʻahitaʻu māfana ʻe nima hono hokó pea toe ui ke ʻalu ʻo ngāue fakafaifekau ʻi ha fonua muli ʻi ha meimei taʻu ʻe ua. ʻEke ange ʻa e ongo fehuʻi ko ʻení:

• Ko e hā nai te ke ongoʻi ʻo kapau te ke toutou mavahe mei ho fāmilí?

• Te ke ongoʻi fēfē fekauʻaki mo e ngaahi misiona ngāue fakafaifekau ko ʻení kapau ko koe naʻe fatongia ʻaki ʻa e tokonaki maʻá e ngaahi fiemaʻu ho fāmilí?

Ko ha vitiō

Kapau ʻe ʻaonga ke mamata ʻi ha vitiō ʻokú ne fakatātaaʻi ʻa e mavahe ʻa Pilikihami ʻIongi mo Hiipa C. Kimipolo ʻi heʻena ngāue fakafaifekau ki ʻIngilaní, huluʻi ʻa e “The Heart and a Willing Mind” mei he taimi 4:08 ki he 7:57.

The Heart and a Willing Mind