Lēsoni 138: Tokāteline mo e Ngaahi Fuakava 125–128

Tokāteline mo e Ngaahi Fuakava 127–128, Konga 2

“Papitaiso ki Homou Kau Pekiá”

Naʻe fai ʻe Siosefa Sāmita ha ngaahi tohi ki he Kāingalotú fekauʻaki mo e tokāteline ʻo e papitaiso maʻá e kau pekiá. Naʻá ne fakamatala ki he ngaahi kikite fakatohitapú ke tokoni ke mahino ki he Kāingalotú ʻa e mahuʻinga ʻo e papitaiso maʻa honau kāinga kuo pekiá. ʻE lava ke tokoni ʻa e lēsoni ko ʻení ke maʻu ʻe he kau akó ha fakamatala fekauʻaki mo ʻenau ngaahi kui kuo pekiá pea teuteu ke fakahoko ha ngaahi ouau maʻanautolu ʻi he temipalé.

Ngaahi ʻEkitivitī Ako ʻOku Ala Fakahokó

Ko hoʻo ngaahi kuí

Fakakaukau ke kamata ʻa e kalasí ʻaki hono tokoniʻi ʻa e kau akó ke nau fakakaukau ki heʻenau ngaahi kuí. Te ke lava ʻo fakaafeʻi ʻa e kau akó ke lisi ʻenau ngaahi kuí ki he lahi taha te nau lava ʻo fakakaukau ki aí. ʻE lava ke fakahaaʻi ʻe he kau akó pe ko e ngaahi kui fē kuo nau maʻu ʻa e ouau ʻo e papitaiso ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo e niʻihi ʻoku teʻeki aí.

• ʻOku fēfē hoʻo loto-falala ki hoʻo malava ke fakahoko ʻa e hisitōlia fakafāmilí mo e ngāue faka-temipalé maʻa hoʻo ngaahi kuí?

Fakaafeʻi ʻa e kau akó ke vahevahe ʻa e meʻa ʻoku nau manatuʻi fekauʻaki mo e puipuituʻa ʻo e Tokāteline mo e Ngaahi Fuakava 127–128. Te ke lava foki ʻo vahevahe ʻa e fakaʻuhinga kehe ko ʻení.

Naʻe tukuakiʻi ʻe he kau maʻu mafai ʻo Mīsulí naʻe tokoni ʻa Siosefa Sāmita ki hono palani ha ʻohofi ʻo e kōvana mālōlō ko Lilipeni W. Pōkisí. Naʻe mahamahalo ʻa Siosefa kapau te ne foki ki Mīsuli, ʻe tāmateʻi ia. Lolotonga ʻa e toitoi ʻa Siosefa ʻi he ʻapi ʻo ʻEtuate Hanitaá, naʻá ne maʻu ha ngaahi fakakaukau lahi mo ha ngaahi ongo fekauʻaki mo e papitaiso maʻá e kau pekiá (vakai, Tokāteline mo e Ngaahi Fuakava 128:1). Naʻe fai ʻe Siosefa Sāmita ha tohi ki he Kāingalotú ke akoʻi kiate kinautolu ʻa e tokāteline mahuʻinga fekauʻaki mo e ouau ʻo e papitaiso maʻá e kau pekiá (vakai, Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 [2018], 514–15).

Papitaiso ki homou kau pekiá

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē ʻoku ʻi ai hotau fatongia ke fakahoko ʻa e ngaahi ouau ʻo e temipalé maʻa ha kakai pau:

ʻOku mahino ʻa e tokāteline ʻo e fāmilí ʻi heʻene fekauʻaki mo e hisitōlia fakafāmilí mo e ngāue fakatemipalé. Naʻe ʻuhinga ʻa e ʻEikí ʻi he ngaahi ʻuluaki fakahinohino ʻo e fakahaá ki he “papitaiso ki homou kau pekiá” [Tokāteline mo e Ngaahi Fuakava 127:5; tānaki atu hono fakamamafaʻí]. Ko hotau tufakanga fakatokāteline ki heʻetau ngaahi kuí. ʻOku tupu ʻeni he ko e faʻunga fakasilesitiale ʻo e langí ʻoku makatuʻunga ia ʻi he ngaahi fāmilí. (Quentin L. Cook, “Ngaahi Aká mo e Vaʻá,” Liahona, Mē 2014, 45)

Lau ʻa e Tokāteline mo e Ngaahi Fuakava 127:5–6, pea fakakaukau ke fakaʻilongaʻi ʻa e kupuʻi lea “papitaiso ki homou kau pekiá” naʻe fakamahinoʻi mai ʻe ʻEletā Kukí.

• ʻOkú ke pehē ʻe fēfē kapau te ke feʻiloaki mo hoʻo ngaahi kui kuo pekiá? Ko e hā haʻanau tali ki he ngāue fakatemipale mo e hisitōlia fakafāmili kuó ke faí?

Fakakaukau ke huluʻi ʻa e vitiō “Hearts Bound Together” ʻi he ChurchofJesusChrist.org mei he taimi 14:30 ki he 15:02. ʻOku vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻi he foʻi vitiō ko ʻení ʻa e tuʻunga ʻe lava ke ʻi ai ʻetau feʻiloaki mo hotau kāinga kuo pekiá.

ʻOku mahuʻinga honau fakamoʻuí ki hotau fakamoʻuí

Lau ʻa e Tokāteline mo e Ngaahi Fuakava 128:15–18, ʻo kumi ʻa e ngaahi meʻa naʻe akoʻi ʻe he kau palōfitá fekauʻaki mo e tokāteline ʻo e ngaahi fāmili taʻengatá pea mo e papitaiso maʻá e kau pekiá.

Ke ako ʻa e Tokāteline mo e Ngaahi Fuakava 128:15–18, ʻe lava ke vahevahe ʻa e kau akó ki ha kulupu ʻe tolu ke nau ʻiloʻi ʻa e meʻa naʻe akoʻi ʻe he kau palōfita ko ʻení. Fakaafeʻi ha tokotaha ako ʻi he kulupu takitaha ke hoko ko e taki ʻo e kulupú. ʻE lava ke vahevahe ʻe he tokotahá ni ʻa e ngaahi fatongiá. Ko e fatongia ʻe taha ko hono fakamatalaʻi fakanounou ki he kalasí ʻa e meʻa naʻe ako ʻe he kulupú ʻi he folofolá.

• Siosefa Sāmita—veesi 15, 18

• Ko e ʻAposetolo ko Paulá—veesi 15–16

• Ko e palōfita ko Malakaí—veesi 17

Hili hono lau ʻe he kau akó ʻa e ngaahi veesi ko ʻení, fakaafeʻi ʻa e kulupu takitaha ke fakamatalaʻi fakanounou ʻa e ngaahi vēsí. Te mou lava foki ʻo aleaʻi ha ngaahi fehuʻi te nau ala maʻu pe kupuʻi lea ʻoku nau pehē ʻoku mahuʻinga.

• Ko e hā naʻe akoʻi ʻe he palōfita takitaha fekauʻaki mo e fakamoʻui ʻo ʻetau ngaahi kuí?

  ʻI he vahevahe ʻa e kau akó, te nau lava ʻo ʻiloʻi ha ngaahi moʻoni lahi, kau ai ʻeni:

  • ʻOku mahuʻinga ʻa e fakamoʻui ʻo ʻetau ngaahi kui kuo pekiá ki hotau fakamoʻuí.

  • He ʻikai lava ʻetau ngaahi kui kuo mālōlō teʻeki ke nau maʻu ʻa e ongoongoleleí ʻo fakalakalaka ki he haohaoá kae ʻoua kuo fakahoko ʻa e ngaahi ouau fakatemipalé maʻanautolu.

  Tokoni ke mahino ki he kau akó ʻa e ʻuhinga ʻoku mahuʻinga ai ʻi he ʻahó ni ʻa e ngaahi moʻoni ko ʻení. ʻE lava ke tokoni ha niʻihi ʻo e ngaahi fehuʻi ko ʻení.

• Ko e hā ha ngaahi founga ʻoku hanga ai ʻe Sīsū Kalaisi ʻo ʻai ke malava ʻa e fakamoʻui ʻo ʻetau ngaahi kui kuo pekiá?

• ʻOkú ke pehē ʻe tokoni fēfē hoʻo kau ki he ngāue fakatemipalé mo e hisitōlia fakafāmilí ke ke muimui ki he sīpinga ʻa e Fakamoʻuí?

Naʻe fakamoʻoni ʻa Palesiteni Henelī B. ʻAealingi ʻo e Kau Palesitenisī ʻUluakí fekauʻaki mo hotau fatongia mahuʻingá:

Naʻe ʻikai ke maʻu ʻa e ngaahi ouau ko iá ʻe ha tokolahi hoʻo ngaahi kuí. Ka naʻá ke maʻu ia ʻi he founga ʻa e ʻOtuá. Pea naʻe ʻafioʻi ʻe he ʻOtuá te ke toe ʻofa ange ki hoʻo ngaahi kuí, pea te ke maʻu e tekinolosia ʻoku fie-maʻú ke ʻiloʻi ʻaki kinautolu. Naʻá ne ʻafioʻi foki te ke moʻui ʻi ha kuonga ʻoku ofi e ngaahi temipale ke ke lava ʻo hū ki aí, ke fakahoko e ngaahi ouau, ʻo lahi ange ʻi ha toe taimi he hisitōliá. Pea naʻá Ne ʻafioʻi te Ne lava ʻo falala atu ke ke lavaʻi e ngāué ni ʻo fakafofongaʻi hoʻo ngaahi kuí. …

… ʻOku tokolahi ha toʻu tupu kuo nau foaki honau taimí ke fai ha fekumi he hisitōlia fakafāmilí pea kuo hanga ʻe he ngāue fakatemipalé ʻo fakamālohia ʻenau fakamoʻoni ki he palani ʻo e fakamoʻuí. Kuó ne fakatupulaki ʻenau ongoʻi e Laumālié ʻi heʻenau moʻuí kae holoki e ivi tākiekina ʻo e filí. Kuo tokoni ia ke nau ongoʻi ofi ange ki honau fāmilí pea mo e ʻEiki ko Sīsū Kalaisí. Kuo nau ako ʻoku ʻikai ngata pē ʻi hono fakahaofi ʻe he ngāué ni e kau pekiá, ka ʻokú ne fakahaofi kotoa kitautolu [vakai, Tokāteline mo e Ngaahi Fuakava 128:18]. (Henry B. Eyring, “Ko Hono Tānaki e Fāmili ʻo e ʻOtuá,” Liahona, Mē 2017, 21, 22)

• Ko e hā kuó ke fai ke kau ʻi he ngāue fakatemipalé mo e hisitōlia fakafāmilí? Kuo tāpuekina fēfē koe ʻe he ʻEikí ʻi hoʻo fai iá?

• ʻE tokoni fēfē hoʻo kau ʻi he ngāue ko ʻení ke ke ongoʻi ofi ange kia Sīsū Kalaisi?

Ko e kau ʻi he ngāue fakatemipalé mo e hisitōlia fakafāmilí

ʻOku fakataumuʻa ʻa e konga ko ʻeni ʻo e lēsoní ke tokoniʻi ʻa e kau akó ke nau kau ʻi he ngāue hisitōlia fakafāmilí pea mo lava ʻo teuteu ke fakahoko ʻa e ngaahi ouaú ʻi he temipalé. ʻOku lahi ha ngaahi founga te ke lava ʻo fakaafeʻi ai ʻa e kau akó ke nau kau mai. Ko ha ngaahi sīpinga ʻeni ʻe niʻihi:

• Fakaʻaliʻali ʻa e lisi ko ʻeni ʻo e ngaahi ʻekitivitií, pea kole ki he kau akó pe te nau lava ʻo akoʻi ʻa e kalasí fekauʻaki mo kinautolu. Hili iá ʻe lava ke fakatātaaʻi ʻe he kau akó ʻa e founga ke fakahoko ai ʻa e ngaahi ngāué.

• Vahevahe ʻa e kalasí ki ha fanga kiʻi kulupu iiki pea fakaafeʻi ʻa e kau akó ke nau ngāue fakataha ki he ngaahi ʻekitivitií. ʻE lava ke tokoniʻi ʻe he kau ako taukeí ʻa e kau ako ʻoku ʻikai taukeí.

• Faʻu ha ngaahi kulupu ako ki ha niʻihi ʻo e ngaahi ʻekitivitií. Fakaafeʻi ha tokotaha ako ʻoku maheni mo e ʻekitivitií ke ne tataki ʻa e kulupu akó. ʻE lava ke vilo ʻa e kau akó ʻi he ngaahi feituʻu ʻoku nau filí.

Fakakaukau ke fakaafeʻi ha tokotaha faifaleʻi ki he temipalé mo e hisitōlia fakafāmilí mei ho uōtí ke tokoni. Kapau ʻoku fakangatangata pē ʻa e hū ki he tekinolosiá, ʻe lava ke mou tokanga taha pē ki he ʻuluaki ʻekitivitī ʻoku hiki atu ʻi laló.

• Fakakakato ha ngaahi ʻekitivitī kehekehe ʻi he kiʻi tohi Ko Hoku Fāmilí: Ngaahi Talanoa ʻOkú ne Fakatahatahaʻi Kimautolú.

• ʻAi ke ke maheni mo hoʻo ʻakau fakafāmilí ʻi he FamilySearch.

• Fakaʻaongaʻi ʻa e “Ngaahi Ouau Kuo Māú” ʻi he FamilySearch ke kumi ha ngaahi hingoa ke ʻave ki he temipalé.

• Fokotuʻu ha‘o ʻApoinimeni ke ʻalu ki he temipalé ʻi he temples.ChurchofJesusChrist.org.

• ʻAi ke ke maheni mo e founga ke tānaki ai ha kakai pe fakapipiki ha ngaahi lekooti fakahisitōlia ki hoʻo fuʻu ʻakau fakafāmilí ʻi he FamilySearch.

• Tānaki atu ʻa e ngaahi manatu melie ki he kakai ʻi hoʻo fuʻu ʻakau fakafāmilí ʻi he FamilySearch.

• Vakaiʻi ʻa e konga ki he “Ngaahi ʻEkitivitií” ʻi he FamilySearch.org.

• Vakaiʻi ʻa e konga ki he “Temipalé pea mo e Hisitōlia Fakafāmilí” ʻi he Gospel Library.

Hili ha taimi feʻunga, fakaafeʻi ha kau ako ke vahevahe mo e kalasí ʻa e meʻa naʻa nau faí pe ʻiló. ʻE lava foki ke aleaʻi ʻe he kau akó ʻa e founga kuo tupulaki ai ʻenau loto-falala ke kau ʻi he ngāue fakatemipalé mo e hisitōlia fakafāmilí.

Tokoniʻi ʻa e kau akó ke nau ongoʻi ʻoku fakaʻapaʻapaʻi mo fakamahuʻingaʻi kinautolu: Ke ʻilo lahi ange fekauʻaki mo hono fakahaaʻi ki he kau akó ʻokú ke fakaʻapaʻapaʻi mo fakamahuʻingaʻi kinautolú, vakai ki he ako “ʻAve ha pōpoaki ki he mātuʻa ʻa ha tokotaha ako fekauʻaki mo ha meʻa lelei kuó ke fakatokangaʻi fekauʻaki mo ʻena tamá.” ʻOku maʻu ʻa e ako ko ʻení ʻi he Fakatupulaki ʻa e Ngaahi Taukei ʻa e Faiakó: ʻOfa ʻi he Niʻihi ʻOkú ke Akoʻí.

Lau ʻa e Tokāteline mo e Ngaahi Fuakava 128:24, ʻo kumi ʻa e feilaulau te tau lava ʻo fakahoko maʻá e ʻEikí.

• ʻOkú ke pehē ko e hā ʻa e founga ʻoku hoko ai ʻa e ngāue fakatemipalé mo e hisitōlia fakafāmilí ʻoku tau fakahokó ko ha feilaulau māʻoniʻoni ki he ʻEikí?

• Ko e hā ʻa e feilaulau ʻo e ngāue fakatemipalé mo e hisitōlia fakafāmilí ʻokú ke ongoʻi ʻoku ueʻi koe ke fakahoko maʻá e ʻEikí?

Fakaafeʻi ʻa e kau akó ke ngāueʻi ʻa e ngaahi ueʻi fakalaumālie kuo nau maʻú. Poupouʻi ʻa e kau akó ke nau kau ʻi he ngāue fakatemipalé mo e hisitōlia fakafāmilí ʻi ʻapi mo honau ngaahi fāmilí.

Ngaahi Maʻuʻanga Tokoni Kehé

Tokāteline mo e Ngaahi Fuakava 128:20. Ko e hā ʻa e “kuonga ʻo e kakato ʻo e ngaahi kuongá”?

Ko e kuonga fakakosipelí, ko ha vahaʻataimi ia ʻoku fakahā mai ai ʻe he ʻEikí ʻEne ngaahi tokāteliné, ouaú mo e lakanga fakataulaʻeikí. Naʻe kamata ʻa e kuonga fakakosipeli lolotongá ʻia Siosefa Sāmita pea ʻoku ui ia ko e kuonga ʻo e kakato ʻo e ngaahi kuongá. Naʻe akoʻi ʻe he Palōfita ko Siosefa Sāmitá (1805–44) ʻo pehē: “ʻE ʻomi ʻe he kuonga ʻo e kakato ʻo e ngaahi kuongá ʻa e ʻilo ʻo e ngaahi meʻa naʻe fakahā ʻi he ngaahi kuonga fakakosipeli kotoa ki muʻá; pea mo ha toe ngaahi meʻa kehe naʻe teʻeki ai ke fakahā mai ki muʻa. Te Ne fekauʻi mai ʻa ʻIlaisiā, ko e Palōfitá, mo e alā meʻa ko iá, pea fakafoki mai ʻa e meʻa kotoa pē ʻia Kalaisi” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 590; vakai foki, Tokāteline mo e Ngaahi Fuakava 128:18).

ʻE tokoni fēfē hono fakahoko ʻa e ngaahi ouaú maʻa ʻetau ngaahi kuí ke tau hoko ʻo hangē ko Sīsū Kalaisí?

Naʻe fakamahinoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku foaki ʻe he ʻEikí kiate kitautolu ha faingamālie fakalangi ke hoko ʻo tatau ange mo Ia ʻi heʻetau fakahoko ʻa e ngaahi ouau fakamoʻui fakafofonga ʻi he temipalé ʻoku fiemaʻu ʻe he niʻihi kehé, ka ʻoku ʻikai ke nau lava ʻo fakahoko maʻanautolú. ʻOku tau hoko ʻo kakato mo haohaoa ange ʻi heʻetau hoko ko e “kau fakamoʻui ki he Moʻunga ko Saioné” [ʻOpataia 1:21]. (Gerrit W. Gong, “Fiefia Taʻengatá,” Liahona, Nōvema 2022, 84–85)

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

ʻE hokosia mai leva ʻa e ʻaho ʻi heʻenau kei toʻu tupú, te nau maʻu ai ha lekomeni temipale ke fakahoko ʻa e ngaahi papitaiso fakafofonga maʻá e kau pekiá ʻi he temipalé. ʻI he aʻusia ko iá, ʻe lava ke tupulaki ʻenau ongo ʻoku fakataumuʻa maʻu pē ʻa e ngaahi ouau ʻo e temipalé ki he Fakamoʻuí mo ʻEne Fakaleleí. ʻI heʻenau ongoʻi ʻoku nau foaki ki ha taha ʻi he maama tataliʻanga ʻo e ngaahi laumālié ha faingamālie ke fakamaʻa mei he angahalá, ʻe tupulaki ʻenau ongo ki hono tokoniʻi ʻa e Fakamoʻuí ʻi Heʻene ngāue toputapu ko hono tāpuekina ha fānau ʻa ʻetau Tamai Hēvaní. (Henry B. Eyring, “Fie Siofia ha Temipalé,” Liahona, Mē 2021, 30–31)

Ko e hā ʻa e ngaahi tāpuaki ʻoku talaʻofa maʻanautolu ʻoku kau ki he ngāue fakatemipalé mo e hisitōlia fakafāmilí?

Naʻe palōmesi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ʻikai tupukoso pē hono ʻomi ʻo e FamilySearch mo e ngaahi meʻangāue kehe ʻi ha kuonga ʻoku maheni ai ʻa e toʻu tupú mo e ngaahi tekinolosia kehekehe ʻo e fakamatalá mo e fetuʻutakí. Kuo mou ako ke ʻave (text) ʻa e ngaahi pōpoaki ʻi hoʻomou telefoni toʻotoʻó mo tweet ke toe vave mo fakalakalaka ange ʻa e ngāue ʻa e ʻEikí—kae ʻikai ke fetuʻutaki vave ange mo homou ngaahi kaungāmeʻá. ʻOku hā mahino ʻa e ngaahi pōtoʻi ngāue mo e mohu founga ʻa ha toʻu tupu tokolahi ʻi he ʻahó ni ko ha teuteu ia ke tokoni ki he ngāue faifakamoʻuí.

ʻOku ou fakaafeʻi atu ʻa e toʻu tupu ʻo e Siasí ke mou ako mo maʻu ʻa e Laumālie ʻo ʻIlaisiaá. ʻOku ou poupou atu ke mou ako, mo kumi ki hoʻomou ngaahi kuí, pea teuteuʻi kimoutolu ke fai ʻa e papitaiso fakafofonga ʻi he fale ʻo e ʻEikí maʻa hoʻomou kāinga kuo pekiá (vakai, T&F 124:28–36). Pea ʻoku ou naʻinaʻi atu ke mou tokoni ki he kakai kehé ke nau ʻiloʻi honau ngaahi hisitōlia fakafāmilí.

ʻI hoʻomou tali ʻa e fakaafe ko ʻení ʻi he loto-tuí, ʻe liliu ai homou lotó ki he ngaahi tamaí. ʻE tō ʻi homou lotó ʻa e ngaahi talaʻofa ko ia naʻe fai kia ʻĒpalahame, ʻAisake, mo Sēkopé. ʻE fakafehokotaki kimoutolu ʻe homou tāpuaki fakapēteliaké, ʻa ia ʻokú ne ʻoatu ʻa e hohoko homou hakó, ʻokú ne fakafehokotaki kimoutolu ki he ngaahi tamai ko ʻení pea ʻe mahuʻinga mālie leva kiate kimoutolu. ʻE tupulaki ʻa hoʻomou ʻofa mo e houngaʻia ʻi hoʻomou ngaahi kuí. ʻE loloto mo tolonga hoʻomou fakamoʻoní mo e ului ki he Fakamoʻuí. Pea ʻoku ou palōmesi atu ʻe maluʻi ʻa kimoutolu mei he ivi tākiekina mālohi ʻo e filí. ʻI hoʻomou kau pea ʻofa ʻi he ngāue māʻoniʻoni ko ʻení, ʻe maluʻi ai kimoutolu ʻi hoʻomou kei talavoú pea ʻi hono kotoa hoʻomou moʻuí. (David A. Bednar, “ʻE Liliu ʻa e Loto ʻo e Fānaú,” Liahona, Nōvema 2011, 26–27)

Naʻe palōmesi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ka, ʻi heʻetau kau ʻi he ʻahó ni ʻi he hisitōlia fakafāmilí mo e ngāue fakatemipalé, ʻoku tau feʻunga foki ai ki he ngaahi tāpuaki “fai fakamoʻui” ne talaʻofa ʻe he kau palōfitá mo e kau ʻaposetoló. ʻOku toe mātuʻaki fakaofo foki ʻa e ngaahi tāpuakí ni koeʻuhí ko hono lahí, natula paú, pea mo e ola ʻi he moʻui fakamatelié. ʻOku kau ʻi he lisi lōloá ni ʻa e ngaahi tāpuakí ni:

• Mahino lahi ange ki he Fakamoʻuí mo ʻEne feilaulau fakaleleí;

• Ivi tākiekina lahi ange ʻo e Laumālie Māʻoniʻoní ke fakamālohia mo ʻomi ha fakahinohino ki heʻetau moʻuí;

• Tui lahi ange, kae hoko ʻo loloto mo tolonga ʻa e ului ki he Fakamoʻuí;

• Lahi ange ʻetau malava mo e fakaʻaiʻai ke ako mo fakatomalá koeʻuhi ko e mahino ko hai kitautolu, feituʻu naʻa tau haʻu mei aí, mo ha vīsone mahino ange ʻo e feituʻu ʻoku tau fakataumuʻa ki aí;

• Tupulaki ʻa e ngaahi ivi tākiekina ʻo e fakaleleí, fakamāʻoniʻoniʻí, mo e mapuleʻí ʻi hotau lotó;

• Tupulaki ʻa e fiefiá ʻi he malava lahi ange ke ongoʻi ʻa e ʻofa ʻa e ʻEikí;

• Tupulaki ʻa e ngaahi tāpuaki fakafāmilí, neongo pe ko e hā hotau tūkunga fakafāmili ʻi he lolotongá, kuohilí, mo e kahaʻú pe ko e hā e lahi e taʻe-kakato ʻetau fuʻu ʻakau fakafāmilí;

• Tupulaki ʻa e ʻofa mo e fakahoungaʻi ʻetau ngaahi kuí mo e kāinga kei moʻuí, koeʻuhí ke ʻoua naʻa tau toe ongoʻi taʻelata;

• Tupulaki ʻa e mālohi ke ʻiloʻi ʻa e taha ʻoku fie-maʻu ke fakamoʻuí, pea ʻi he tokoni ʻa e ʻEikí, tokoniʻi ʻa e niʻihi kehé;

• Tupulaki ʻa e maluʻi mei he ngaahi ʻahiʻahí pea mo e ivi tākiekina lahi fau ʻa e filí; pea mo e

• Tokoni lahi ange ke fakaleleiʻi ʻa e ngaahi loto palopalemá, laveá, pe hohaʻá pea mo fakamoʻui ʻa e kafó.

Kapau ne ke lotua ha taha ʻo e ngaahi tāpuaki ko ʻení, kau ʻi he hisitōlia fakafāmilí mo e ngāue fakatemipalé. ʻI hoʻo fai iá, ʻe tali leva hoʻo ngaahi lotú. Ko e taimi ʻoku fakahoko ai ʻa e ngaahi ouaú maʻá e kau pekiá, ʻoku fakamoʻui ai ʻa e fānau ʻa e ʻOtuá ʻi he māmaní. (Dale G. Renlund, “Hisitōlia Fakafāmilí mo e Ngāue Fakatemipalé: Silá mo e Fakamoʻuí,” Liahona, Mē 2018, 47)

Ngaahi ʻEkitivitī Fakalahi ki he Akó

Ko e ngaahi tāpuaki ʻo e hisitōlia fakafāmilí mo e ngāue fakatemipalé

Kapau ʻokú ke ongoʻi ʻe ʻaonga ki hoʻo kau akó hano ako ha niʻihi ʻo e ngaahi tāpuaki kuo talaʻofa mai ʻi he kau atu ki he hisitōlia fakafāmilí mo e ngāue fakatemipalé, te ke lava ʻo huluʻi ha taha ʻo e ongoʻi foʻi vitiō ko ʻení pe fakatouʻosi kinaua: “The Promised Blessings of Temple and Family History Work” (3:26); “The Promised Blessings of Temple and Family History Work 2” (4:04).

Te ke lava foki ʻo fakaafeʻi ʻa e kau akó ke nau lau mo fakatokangaʻi ʻa e ngaahi tāpuaki naʻe talaʻofa ʻi he ngaahi fakamatala ʻi he “Ngaahi Maʻuʻanga Tokoni Kehé.” Aleaʻi pe ko e ngaahi tāpuaki fē kuo aʻusia ʻe he kau akó ʻi heʻenau moʻuí pea mo e ngaahi tāpuaki ʻoku nau fiemaʻú.

Ko e ako ke fakaʻaongaʻi ʻa e FamilySearch

ʻI he ngāue ʻa e kau akó ki he ngaahi ʻekitivitī ʻi he kalasí, ʻe lava ke nau fakaʻaongaʻi ʻa e peesi “Video Tutorials on How to Use FamilySearch.”

Tokāteline mo e Ngaahi Fuakava 128:18. Ko ha fehokotakiʻanga mālohi

ʻE lava ke tokoni ʻa e ʻekitivitī ko ʻení ke mahino ki he kau akó ʻa e akonaki fekauʻaki mo ha fehokotakiʻanga mālohí. Te ke lava ʻo fakaʻaliʻali ha sēini ʻi hoʻomou aleaʻi ʻa e founga ʻoku hanga ai ʻe hono fakahoko ʻo e ngaahi ouau fakatemipalé maʻá e kau mēmipa hotau fāmilí kuo pekiá ʻo faʻu ha fehokotakiʻanga mālohi ʻi hotau vā mo kinautolú. ʻE lava foki ke faʻu ʻe he kau akó ha sēini pepa pea hiki ʻa e hingoa ʻo e kau mēmipa honau fāmilí mo e ngaahi kuí ʻi he fehokotakiʻanga takitaha. ʻE lava foki ke vahevahe ʻe he kau akó ʻa e founga ʻoku tokoniʻi ai kinautolu ʻe hono fakahoko ʻo e ngaahi ouau fakatemipalé ke nau ongoʻi ofi ki heʻenau ngaahi kuí.

Ngaahi Vitioó

ʻOku fakahaaʻi ʻe he ongo vitiō ko ʻení ha ngaahi aʻusia ʻa ha toʻu tupu kuo tāpuekina ʻi heʻenau kau atu ki he ngāue fakatemipalé mo e hisitōlia fakafāmilí. ʻE lava ʻe he sio ʻa e kau akó ʻi he ongo foʻi vitioó ʻo teuteu kinautolu ke vahevahe ʻenau ngaahi aʻusiá.

• “Improve Your Temple Experience; Change Your Life” (3:21)

• Ngaahi vitiō ʻi he tānakiʻanga vitioó “Personal Stories: Temple and Family History”