Ngaahi Tefitoʻi Moʻoni ʻo e Faiako Faka-Kalaisí: ʻOfa ʻi he Niʻihi ʻOkú ke Akoʻí

Kumi ha ngaahi founga taau ke fakahaaʻi ʻaki hoʻo ʻofá.

Pōtoʻi Ngāué

ʻAve ha pōpoaki ki he mātuʻa ʻa ha tokotaha ako fekauʻaki mo ha meʻa lelei kuó ke fakatokangaʻi fekauʻaki mo ʻena tamá.

Fakamatalaʻi

Ko ha founga mālohi ke fakahaaʻi ʻaki hoʻo ʻofa ki ha tokotaha akó ko hono ʻave ha pōpoaki lelei ki ha mātuʻa pe tauhi fānau fekauʻaki mo ha meʻa pau kuó ke fakatokangaʻi fekauʻaki mo e tokotaha ako ko iá. ʻE lelei ange ʻa e pōpoakí kapau te ke:

1. Lotua ha fakahinohino pe ko hai ʻa e tokotaha ako ʻoku totonu ke ke tokanga taha ki aí pea mo e meʻa ʻoku totonu ke ke vahevahe mo e mātuʻá pe tauhí.

2. Fakafeʻiloaki nounou koe ke kamata hoʻo pōpoakí.

3. Fakahaaʻi fakamātoato hoʻo houngaʻia ʻi he faingamālie ke maʻu ʻa e tokotaha akó ʻi he kalasí.

4. Fakamatalaʻi mahino mo mahinongofua ha meʻa lelei mo pau kuó ke mamata ai.

ʻI hoʻo fakahoko ʻi he fakamātoato mo e faʻa lotu ha ngaahi fakakaukau lelei ki he mātuʻá, ʻe ongoʻi ʻe he tokotaha akó hoʻo ʻofá ʻi ha ngaahi founga mālohi fau.

Fakatātaaʻi

ʻOku ʻofa ʻa Brother Kamako ʻi heʻene kau akó pea ʻokú ne loto-moʻoni ke fakahaaʻi ʻa e ʻofa ko iá ʻi ha ngaahi founga ʻoku totonú. ʻOkú ne lotua ke ʻiloʻi pe ko hai te ne lava ʻo vahevahe mo ʻene mātuʻá ha pōpoaki lelei fekauʻaki mo iá peá ne ongoʻi ʻoku ueʻi ia ke tohi ki he ongomātuʻa ʻa Siakisoní. ʻOkú ne fakatokangaʻi kuo teʻeki ai fiemaʻu ke ne kole kia Siakisoni ke haʻu mo ʻene folofolá pea ʻoku loto-fiemālie maʻu pē ʻa Siakisoni ke tokoni. ʻOku ʻave ʻe Brother Kamako ha ʻīmeili ʻoku pehē:

• Siʻi Brother mo Sisitā Tūvola,

• Ko hoku hingoá ko Brother Kamako, pea ko e faiako semineli au ʻa Siakisoní. ʻOku ou houngaʻia ke maʻu ia ʻi heʻeku kalasí. ʻOku ou loto pē ke mo ʻiloʻi ʻoku haʻu maʻu pē ʻa Siakisoni mo ʻene folofolá pea ʻokú ne loto-fiemālie ke tokoni ʻi ha faʻahinga meʻa pē te u fiemaʻu. Fakamālō atu ʻi he meʻa kotoa pē ʻokú mo fai ke tokoni mo poupou kiate iá.

• Fakaʻapaʻapa atu,

• Brother Kamako

Akoako

Tohi ha pōpoaki lelei ki ha mātuʻa ʻi he ngaahi tūkunga ko ʻení:

1. ʻOku ngali fakalongolongo ʻa Sūsana ʻi he kalasí, pea ʻokú ke fie fakahaaʻi hoʻo ʻofá kiate ia. ʻI hoʻo lotua iá, ʻokú ke fakatokangaʻi ʻokú ne tokoniʻi loto-fiemālie ha tokotaha ako ʻoku fāifeinga ke maʻu ʻa e ngaahi veesi folofolá.

2. Fakakaukau ki ha taha ʻo hoʻo kau akó ʻokú ne fakamālohia maʻu pē hoʻo kalasí. Fakakaukauʻi ʻi he faʻa lotu pea talaange ki he tokotaha akó ha meʻa kuó ke fakatokangaʻi fekauʻaki mo ia.

Aleaʻi pe Fakalaulauloto

• Ko e hā hano ʻaonga ʻo e meʻá ni ki he kau akó fakafoʻituitui mo honau vā fetuʻutaki mo e Fakamoʻuí hili ha ngaahi taimi? Te ne liliu fēfē ʻa e kau mai ʻa e tokotaha akó pe ongoʻi ʻoku kau ki he kalasí?

• Fakakaukau ki ha taimi naʻe fakamālohia ai ho vā fetuʻutaki mo e Fakamoʻuí ʻe hano fakahaaʻi atu ʻe ha taha ʻene ʻofá pe houngaʻiá.

Fakakau

• Kamata ʻaki hano fili ha toko taha pe toko ua ʻo e kau akó ʻi ha ʻaho, ʻa ia ʻokú ke ongoʻi ke fakaʻaongaʻi ai ʻa e taukei ko ʻení. Hokohoko atu ʻeni kae ʻoua kuo fakanatula pē, ʻo fakatatau mo e fakahinohino ʻa e Laumālié.

Fie ako lahi ange?

• Jean B. Bingham, “Akoʻi ʻa e Moʻoní ʻi he Lea ʻo e ʻOfá” (Fakamafola ʻo e ako fakataʻu ʻa e Seminelí mo e ʻInisititiuti Fakalotú, 19 Sānuali 2021), broadcasts.ChurchofJesusChrist.org

Pōtoʻi Ngāué

Fakamoʻoni ki he ʻofa ʻa e ʻOtuá ʻi he taimi ʻoku faingataʻa ai ke ke ongoʻi pe fakahaaʻi ha ʻofa kiate kinautolu ʻokú ke akoʻí.

Fakamatalaʻi

ʻE faingataʻa ʻi he taimi ʻe niʻihi ki he kau faiakó ke nau ongoʻi pe fakahaaʻi ha ʻofa kiate kinautolu ʻoku nau akoʻí. ʻI he ngaahi taimi ko ʻení, ʻoku totonu ke feinga ʻa e kau faiakó ke fakamoʻoni ki he ʻofa ʻa e Tamai Hēvaní mo Sīsū Kalaisi ki he kau akó. Ke fai ʻení, ʻe kolea ʻe he kau faiakó ʻa e tokoni ʻa e ʻEikí ʻaki haʻanau lotu pe lotu ʻi honau lotó, ʻo sio ki he tokotaha akó ʻi honau fofongá, pea fakahā fakamātoato ʻoku ʻofaʻi ʻa e tokotaha akó ʻe he Tamai Hēvaní pea mo e Fakamoʻuí. ʻE fakaʻatā ʻe hono fakahoko ʻo e ʻofa fakalangi ko ʻení ke ongoʻi ʻe he kau faiakó ha niʻihi ʻo e ngaahi meʻa ʻoku ongoʻi ʻe he Tamai Hēvaní mo Sīsū Kalaisi ki he tokotaha akó, ʻa ia ʻe tokoni ke kamata ongoʻi ai ʻe he kau faiakó ha ʻofa fakataautaha tatau ki he tokotaha akó.

Fakatātaaʻi

• Kuo fefaʻuhi ʻa Sisitā Kolosoni mo e tōʻonga moveuveu ʻa Tomi ʻi he kalasí pea ʻokú ne hohaʻa ki he founga kuo liliu ai ʻe he meʻá ni ʻene ngaahi ongo fakataautaha fekauʻaki mo iá. ʻOkú ne fai ha lotu ʻo fekumi ki he tokoni ʻa e ʻEikí kimuʻa pea toki kamata ʻa e kalasí. ʻI he aʻu atu ʻa Tomí, ʻoku lulululu ʻa Sisitā Kolosoni mo sio kiate ia mo pehē ange, “Tomi, ʻofa pē ʻokú ke ʻiloʻi ʻa e lahi e ʻofa ʻa e Tamai Hēvaní ʻiate koé.”

• Kuo fehangahangai ʻa Brother Sitouni mo ha ngaahi palopalema fakamafasia ʻi hono fāmilí pea ʻokú ne ongoʻi mafasia. ʻI heʻene kamata ʻa e kalasí, ʻokú ne pehē ʻi ha lotu ʻi hono lotó, “ʻE ngaahi tuofāfine mo e ngaahi tokoua, ʻoku ou ʻiloʻi ʻoku ʻofa lahi ʻaupito ʻa e Tamai Hēvaní mo Sīsū Kalaisi ʻiate kimoutolu kotoa.” ʻI hono lea ʻaki ʻeni ʻe Brother Sitouní, ʻokú ne ongoʻi ha ʻofa lahi ange ki heʻene kau akó mo ha kiʻi konga siʻi ʻo ʻene loto-mafasiá ʻi heʻene hoko atu ki he lēsoní.

Lomiʻi heni ke vakai ki ha vitiō ʻo e fakatātaaʻi ko ʻení.

Akoako

• Fakakaukau ki hoʻo kau akó pea feinga ke ʻiloʻi ha toko taha pe toko ua ʻe faingataʻa ke ke fakahaaʻi ki ai hoʻo ʻofá. Hiki ʻa e meʻa te ke ala lea ʻaki ki he tokotaha akó ke fakahaaʻi ange ʻa e ʻofa fakalangi ʻa e Tamai Hēvaní mo Sīsū Kalaisí. Ko hoʻo hiki pē ʻa e meʻa te ke ala lea ʻakí, akoako ʻaki haʻo lea leʻo lahi ʻaki ʻa e ngaahi leá.

Aleaʻi pe Fakalaulauloto

• Ko e hā kuó ke ako ʻi hoʻo akoako kumi ha ngaahi founga ke fakafetuʻutaki ai ʻa e ʻofa fakalangí ki hoʻo kau akó?

• Ko e hā ha ngaahi founga ʻe fakatou liliu ai ʻe hono fakahaaʻi ʻo e ʻofa fakalangí ʻa e tokotaha ʻokú ne fakahokó mo e tokotaha ʻoku fakahoko ki aí.

Fakakau

• Vakai ki hoʻo lisi kalasí pea feinga ke ʻiloʻi ha tokotaha ako ʻe taha pe lahi ange te ke lava ʻo fakahaaʻi ki ai ʻa e ʻofa ʻa e Tamai Hēvaní mo Sīsū Kalaisí ʻi he uiké ni. Hokohoko atu hono fai maʻu pē ʻení kae ʻoua kuó ke fai ʻeni ki hoʻo kau akó kotoa. Pea hokohoko atu pē hoʻo fakahoko iá.

Fie Ako Lahi Ange?

• Susan H. Porter, “ʻOfa ʻa e ʻOtuá: Ko ha Fakafiefia Taha ia ki he Laumālié,” Liahona, Nōvema 2021, 33–35

• Dieter F. Uchtdorf, “Ko e ʻOfa ʻa e ʻOtuá,” Liahona, Nōvema 2009, 21–24