Ang Buhi nga Kristo

Ang Buhi nga Kristo

Kinatibuk-ang Pagpasabot

Niadtong 2000, ang Unang Kapangulohan ug ang Korum sa Napulong Duha ka Apostoles nag-isyu og deklarasyon nga “Ang Buhi nga Kristo: Ang Pagpamatuod sa mga Apostol” sa paghandom sa ika-2,000 nga anibersaryo sa pagkatawo sa Manluluwas. Nagpahayag kini og importanteng mga kamatuoran bahin sa Manluluwas nga makatabang ug magpanalangin nato.

Tabangi ang mga estudyante nga mailhan si Jesukristo: Samtang mailhan sa mga estudyante ang Manluluwas nga silasila ra, makakat-on sila gikan Kaniya ug tuyoon sa pagpaningkamot nga mahisama Niya. Mas dako ang kahigayonan nga modangop sila Kaniya alang sa tabang, paglaom, ug pag-ayo sa tibuok nilang kinabuhi. Mabati nila ang gugma sa Dios. Alang sa dugang nga impormasyon kon unsaon pagtabang ang mga estudyante nga mas mapalawman ang ilang pagsabot kang Kristo, tan-awa sa “Pagtudlo mahitungod sa mga Titulo, mga Tahas, ug mga Hiyas ni Jesukristo” sa Pagtudlo Sumala sa Pamaagi sa Manluluwas. Makakita usab ka og ehemplo kon unsaon sa pagbuhat niini diha sa leksiyon karong semanaha nga giulohan og “Ang Buhi nga Kristo, Bahin 1.”

Pangandam sa Pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Ang Buhi nga Kristo, Bahin 1

Katuyoan sa leksiyon: Aron tabangan ang mga estudyante nga mapalawman ang ilang pagsabot kang Jesukristo.

• Pagpangandam sa estudyante: Dapita ang mga estudyante nga basahon ang “Ang Buhi nga Kristo: Ang Pagpamatuod sa mga Apostol” ingon nga bahin sa ilang personal nga pagtuon sa kasulatan, nga pangitaon ang importanteng mga kamatuoran bahin sa Manluluwas.

• Mga imahe: Jesukristo; ang kalibotan

• Mga Materyal: Mga kopya sa “Ang Buhi nga Kristo: Ang Pagpamatuod sa mga Apostol” (O, dapita ang mga estudyante nga pangitaon kini diha sa ilang mga journal sa pagtuon.)

• Mga bidyo: “Kinatibuk-ang Komperensiya: Paglig-on sa Pagtuo ug Pagpamatuod” (15:49; tan-awa gikan sa time code 6:13 hangtod 6:56); “Mga Kinutlo gikan sa ‘Ang Buhi nga Kristo: Ang Pagpamatuod sa mga Apostol’” (2:45)

Ang Buhi nga Kristo, Bahin 2

Katuyoan sa leksiyon: Aron tabangan ang mga estudyante sa pagpakigbahin ngadto sa uban sa ilang hunahuna ug pagbati bahin kang Jesukristo.

• Pagpangandam sa estudyante: Dapita ang mga estudyante sa pagrebyo sa “Ang Buhi nga Kristo: Ang Pagpamatuod sa mga Apostol” ug ilha ang hugpong sa mga pulong nga gusto nilang ipakigbahin sa uban. Dasiga sila nga sundon ang bisan unsang pag-aghat nga ilang madawat bahin sa kon unsay ipakigbahin ug kon kang kinsa kini ipakigbahin.

• Item nga ipakita: Usa ka butang nga ganahan kaayo nimo ug gustong ipakigbahin sa imong klase, sama sa usa ka litrato, kasinatian, o paboritong pagkaon

• Mga materyal: Papel ug mga gamit pangsulat; karaang mga magasin sa Simbahan, kung anaa, aron guntingon sa mga estudyante ang mga litrato o pulong nga himoong collage

• Bidyo: “Memoryaha ‘Ang Buhi nga Kristo’: Mga Ideya sa Pagtakda og Tumong” (2:05)