Leksiyon 163: Ang Buhi nga Kristo

Ang Buhi nga Kristo, Bahin 2

“Kita Mohalad sa Atong Pagpamatuod sa Pagkatinuod sa Iyang Dili Katupngan nga Kinabuhi”

Sama nga nagpamatuod ang Unang Kapangulohan ug Korum sa Napulog Duha ka Apostoles bahin sa buhing Kristo, makapahayag usab kita nga si Jesukristo buhi! Kini nga leksiyon makatabang sa mga estudyante sa pagpakigbahin sa ilang mga hunahuna ug mga pagbati bahin kang Jesukristo ngadto sa uban.

Posibleng mga Kalihokan sa Pagkat-on

Mga rason sa pagpakigbahin

Aron tabangan ang mga estudyante nga mangandam sa pagkat-on, pwede kang magdala og usa ka butang nga ganahan kaayo nimo ug gustong ipakigbahin sa imong klase. Kini pwedeng usa ka litrato, kasinatian, o paboritong pagkaon. Dapita ang mga estudyante sa paghunahuna sa mga butang nga bag-ohay lang nilang gipakigbahin o gustong ipakigbahin ngadto sa usa ka tawo.

• Unsay gusto nimong ipakigbahin?

• Nganong gusto man nimo kining ipakigbahin?

  Diha sa pisara paghimo og listahan sa mga rason nga gustong ipakigbahin sa mga estudyante ang usa ka butang.

• Hain sa mga rason sa listahan ang magamit sa pagpakigbahin og kasinatian o pamatuod bahin kang Jesukristo ngadto sa uban?

• Unsa pay madugang nimo sa listahan isip usa ka piho nga rason sa pagpamatuod bahin kang Jesukristo?

Dapita ang mga estudyante nga hunahunaon ang ilang gibati bahin sa pagpakig-istorya og dugang bahin kang Jesukristo ngadto sa uban ug kon nganong kana ang ilang gibati.

Pagpangadam sa pagpamatuod bahin kang Jesukristo

Dapita ang usa ka estudyante sa pagbasa sa mosunod nga pamahayag.

Si Elder Neil L. Andersen sa Korum sa Napulog Duha ka Apostoles mitudlo:

Adunay daghang tawo dinhi sa yuta nga gamay ra kaayo og nahibaloan ni Jesukristo, ug sa pipila ka bahin sa kalibotan diin ang Iyang ngalan gipahayag sulod sa gatosan ka tuig, ang [hugot nga] pagtuo diha ni Jesukristo nagkawala. … [Ang] tibuok kalibotan … [nga] pagtuon ang nanagna nga sa mga dekada nga moabot, labaw sa kaduhaon ang gidaghanon ang mobiya sa Kristiyanismo kay sa modawat niini. …

… Kon ang kalibotan dili kaayo maghisgot mahitungod Kaniya, kinsa ang maghisgot og dugang mahitungod Kaniya? Kita! (Neil L. Andersen, “Kita Naghisgot Kang Kristo,” Liahona, Nob. 2020, 88–89)

• Unsay imong gihunahuna o gibati bahin niini nga pahayag ni Elder Andersen?

Ang Unang Kapangulohan ug Korum sa Napulog Duha ka Apostoles maoy mga pananglitan sa pagpakigbahin bahin kang Jesukristo. Ang usa ka pananglitan mao ang proklamasyon nga “Ang Buhi nga Kristo.” Paggahin og pipila ka minuto sa pagrebyo niini nga dokumento, nga pamalandongan ang mga kaayohan nga atong masinatian tungod sa ilang pagpakigbahin sa ilang pamatuod kang Jesukristo.

Dapita ang mga estudyante sa pagpakigbahin sa bisan unsang kaayohan nga ilang mahunahunaan.

Dako tingali og kalainan ang mga hunahuna ug mga pagbati sa mga estudyante bahin sa pagpakig-istorya og dugang bahin sa Manluluwas. Makatabang nila ang pag-ila og baroganan gikan sa kasulatan aron masabtan kon unsa ka importante ang pagbuhat niini. Pwede nimong gamiton ang mosunod nga kasulatan.

Basaha ang 2 Nephi 25:26, nga pangitaon ang dugang rason sa pagpamatuod kang Jesukristo.

• Unsa nga mga kamatuoran ang atong makat-onan gikan sa rason ni Nephi?

  Usa sa mga kamatuoran nga mailhan tingali sa mga estudyante mao nga samtang nag-istorya ug naglipay kita bahin kang Jesukristo, ang uban makahibalo nga Siya makaluwas nila gikan sa ilang mga sala.

• Sa unsang paagi ang pagkahibalo kon unsay mahimo ni Jesukristo para sa uban makaimpluwensiya sa imong tinguha sa pagpamatuod o pagpakigbahin sa imong mga hunahuna ug mga pagbati bahin Niya?

Hinumdomi ang mga kamatuoran nga imong nakita bahin sa Manluluwas diha sa “Ang Buhi nga Kristo”” sa miaging leksiyon. Pwede kang magpili og usa nga tutokan niana nga leksiyon o pagpili og lain nga gusto nimong ipakigbahin sa uban.

Niay pipila sa mga pananglitan sa daghang kamatuoran nga pwede mailhan sa mga estudyante:

• Ubos sa direksyon sa Amahan, gilalang ni Jesukristo ang kalibotan.

• Gihatag ni Jesukristo ang Iyang kinabuhi aron sa pagtubos sa mga sala sa tanang katawhan.

• Si Jesukristo nabanhaw ug buhi karon.

• Si Jesukristo mao ang kahayag, ang kinabuhi, ug ang paglaom sa kalibotan.

• Ang paagi ni Jesukristo mao ang dalan paingon sa kalipay dinhi niini nga kinabuhi ug sa kinabuhing dayon sa kalibotan nga moabot.

Ang mosunod nga kalihokan pwedeng himoon sa nahibiling oras sa klase ug makatabang sa mga estudyante nga mangandam sa pagpakigbahin. Pagpili og usa ka kalihokan nga para nimo makatabang sa imong mga estudyante, o ihatag ang kada kalihokan isip mga opsyon nga kapilian sa mga estudyante. Aron tabangan ang mga estudyante nga pilion ang labing magamit nga kalihokan, pwede nilang hunahunaon kon kang kinsa nila gustong ipakigbahin ang ilang pagpamatuod.

Kalihokan A: Pagmemorya

Ang usa ka paagi sa pagpangandam sa pagpakigbahin bahin kang Jesukristo mao ang pagmemorya sa usa ka bahin sa “Ang Buhi nga Kristo.”

Paggahin og pipila ka minuto sa pagmemorya og usa ka bahin nga nagtudlo sa kamatuoran nga imong gipili. Pwede nimo kining isulat, balik-balikon og kadaghan, o irekord ang imong kaugalingon nga nagbasa niini ug paminawa kini og kadaghan. (Pwede usab kang magmemorya og mga kinutlo sa kasulatan nga nakita nimo sa miaging leksiyon nga nagpamatuod sa sama nga kamatuoran.)

Aron tabangan ang mga estudyante nga madasig nga memoryahon ang bahin sa “Ang Buhi nga Kristo,” pwede nimong ipasalida ang “Memoryaha ang Buhi nga Kristo: Mga Ideya sa Pagtakda og Tumong” (2:05).

Dayon isulat kon kanus-a ug unsaon nimo pagpakigbahin sa usa ka tawo ang imong namemorya. I-apil kon nganong importante para nimo ang hugpong sa mga pulong nga imong gipili ug kon sa unsang paagi ka naglaom nga makatabang sa uban nga modangop kang Jesukristo.

Kalihokan B: Paghimo og poster, meme, o digital nga imahe

Ang usa ka paagi sa pagpakigbahin sa imong mga hunahuna ug pagbati bahin kang Jesukristo mao ang paghimo og poster, meme, o digital nga imahe.

Ikonsiderar ang pagpili og lainlaing imahe nga nagpakita sa kahulogan sa kamatuoran nga imong gipili. Pananglitan, pilion tingali nimo ang pagpakigbahin sa kamatuoran ug kaimportante sa bunyag ni Jesukristo. Gipakita kini sa mosunod nga hugpong sa mga pulong gikan sa “Ang Buhi nga Kristo”: “Bisan og walay sala, Siya gibunyagan aron sa pagtuman sa tibuok pagkamatarong.” Pwede nimong iapil kining linya diha sa imong proyekto uban sa paboritong imahe nga nagpakita sa bunyag sa Manluluwas. Pwede usab nimong ilakip ang mga linya gikan sa kasulatan nga nagpalawom sa imong pagsabot.

Dayon idugang ang imong pagpasabot kon nganong importante nimo kini nga kahibalo.

Kon gusto sa mga estudyante nga himoon kini diha sa ilang mga selpon, pwedeng tudloan niadtong makamaong mogamit sa media library sa Simbahan ang uban kon unsaon pagpangita og mga imahe. Kon gustong himoon sa mga estudyante diha sa papel ang ilang mga proyekto, pwede kang magdala og magasin sa Simbahan ug tugotan ang mga estudyante sa paggunting og mga imahe o mga pulong.

Kalihokan C: Pag-andam og pakigpulong

Ang usa ka paagi sa pagsulti sa uban bahin kang Jesukristo mao ang paghatag og pakigpulong.

Hunahunaa nga misugot ka nga mamulong sa Dominggo diha sa imong ward o branch. Pwede nimong ipakigbahin ang imong nakat-onan bahin kang Jesukristo ug kon nganong importante kini para nimo. Pagsulat og pipila ka parapo nga magamit nimo sa imong pakigpulong. Seguroa ang paglakip og mga pamahayag gikan sa “Ang Buhi nga Kristo,” mga tudling sa kasulatan, ug kon nganong mahinungdanon kini para nimo.

Panahon sa pagpakigbahin

Hatagi og panahon ang mga estudyante sa pagpakigbahin sa unsay ilang nakat-onan. Dasiga ang daghang estudyante nga moapil. Ikonsiderar ang pagpangutana usahay sa mga estudyante sa ilang ganahan o gihunahuna nga makahuloganon bahin sa unsay gipakigbahin sa ilang mga klasmeyt. Hatagi og pagtagad nga kini nga mga panabot mga panalangin sa paghisgot ug pagpamatuod sa Manluluwas.

Dasiga ang mga estudyante nga mangita og mga paagi sa pagpakigbahin niini nga mga butang sa gawas sa klase. Kon haom, pwede nimong ipakigbahin ang mga panalangin nga imong nadawat tungod sa pagpakig-istorya sa uban bahin kang Jesukristo. O pwede nimong ipakigbahin ang gipamatuod sa uban diha kanimo. Ikonsiderar ang pagtapos sa klase pinaagi sa pagpangutana sa mosunod:

• Sa unsang paagi miuswag ang imong relasyon kang Jesukristo samtang imong gipakigbahin ngadto sa uban ang imong mga hunahuna ug pagbati bahin Kaniya?

Dugang nga mga Kapanguhaan

Kinsa ang gidapit ni Jesukristo sa pagpamatuod bahin Kaniya?

Si Elder Gary E. Stevenson sa Korum sa Napulog Duha ka Apostoles mipakigbahin sa mosunod:

Handurawa ninyo uban kanako, sa daklit, nga nagbarog sa ibabaw sa bungtod sa Galilea, nagsaksi sa kaanindot ug himaya sa nabanhaw nga Manluluwas nga nagduaw sa Iyang mga disipulo. Makadasig kaayo ang paghunahuna nga makadungog sa personal mismo niini nga mga pulong, nga Iyang gipakigbahin ngadto kanila, sa Iyang ligdong nga mando nga, “busa panglakaw kamo ug himoa ninyong mga tinun-an ang tanang kanasoran, sa pagpamautismo kanila sa ngalan sa Amahan, ug sa Anak, ug sa Espiritu Santo” [Mateo 28:19]. Segurado gayod kini nga mga pulong makahatag og gahom, makadasig, ug makatandog sa matag usa kanato, ingon nga kini nakatandog sa Iyang Apostoles. Sa tinuod, sila mihalad sa tibuok nilang kinabuhi ngadto sa pagbuhat lamang niini.

Ang makapaikag, dili lamang ang Apostoles maoy naminaw sa mga pulong ni Jesus sa kinasingkasing. Ang mga miyembro sa unang Simbahan, gikan sa labing bag-o ngadto sa labing hanas, misanong sa dako nga mando sa Manluluwas, mipakigbahin sa maayong balita sa ebanghelyo ngadto niadtong ilang nahimamat ug nakaila. Ang determinasyon sa pagpaambit sa ilang pagpamatuod ni Jesukristo nakatabang sa Iyang bag-ong giestablisar nga Simbahan aron molambo og maayo.

Kita usab, isip mga disipulo ni Jesukristo, gidapit sa pagpatalinghog sa Iyang mando karon, sama nga kita anaa didto sa bungtod sa Galilea dihang una niya kining gipahayag. (Gary E. Stevenson, “Paghigugma, Pagpaambit, Pagdapit,” Liahona, Mayo 2022, 84–85)

Dugang nga mga Kalihokan sa Pagkat-on

Pagpamatuod diha sa lainlaing kahimtang

Tabangi ang mga estudyante nga makakat-on kon unsaon pagpamatuod sa pormal ug dili pormal nga kahimtang. Pwede nimong ipakigbahin ang mosunod nga pahayag ni Elder Gary E. Stevenson sa Korum sa Napulog Duha ka Apostoles.

Isip usa ka miyembro sa Simbahan, ang mga oportunidad sa paghatag sa inyong gipamulong nga pagpamatuod moabot diha sa pormal nga mga miting sa Simbahan o sa dili kaayo pormal, sa tinagsa nga pakig-istorya sa pamilya, mga higala, ug sa uban. …

Matag higayon nga kamo motingog sa pagsaksi o mopakita pinaagi sa inyong mga aksiyon sa inyong pasalig sa pagsunod ni Jesukristo, kamo nagdapit sa uban sa “pagduol ngadto ni Kristo.” [Moroni 10:32]. (Gary E. Stevenson, “Pag-alima ug Paghatag sa Inyong Pagpamatuod,” Liahona, Nob. 2022, 112)

Dapita ang mga estudyante sa paglista sa lainlaing kahimtang diin pwede silang makapamatuod kang Jesukristo ngadto sa uban. Pwedeng makapili og makahuloganong mga linya ang mga estudyante gikan sa “Ang Buhi nga Kristo”” ug hunahunaon ang mga kahimtang diin ila tingaling ipakigbahin kini nga mensahe.

Napalig-on pinaagi sa mga pagpamatuod sa Apostoles ni Jesukristo

Dapita ang mga estudyante nga ipasabot kon sa unsang paagi napalig-on ang ilang mga pagpamatuod tungod sa pagkadungog sa pagpamatuod sa Apostoles ni Jesukristo. Pwede silang motan-aw og mga bidyo sa mga lider sa Simbahan nga nagpamatuod kang Jesukristo. Pwede nilang ipakigbahin ang usa niini nga mga bidyo diha sa social media o ipasalida kini para sa mga sakop sa pamilya o mga higala. Dasiga ang mga estudyante nga idugang ang kaugalingon nilang pagsaksi sa Manluluwas. Ang mosunod nga mga bidyo maoy mga ehemplo sa Apostoles ni Jesukristo nga mipakigbahin sa ilang pagsaksi.

“Buhing Apostoles Nagpamatuod kang Jesukristo” (2:16)

Mga bidyo diha sa pahina sa “Espesyal nga mga Saksi ni Kristo” sa ChurchofJesusChrist.org

Pag-asoy sa mga istorya ni Jesus gamit ang mga bidyo sa Biblia ug sa Basahon ni Mormon

Kon interesado ang mga estudyante sa pag-asoy sa istorya bahin kang Jesus, pwede silang mapamilyar sa mga detalye pinaagi sa pagtuon sa mga bersikulo sa kasulatan ug pagtan-aw og mga bidyo. Pwede nilang gamiton ang Mga Bidyo sa Biblia sa Kinabuhi ni Jesukristo (serye sa mga bidyo) o Mga Bidyo sa Basahon ni Mormon nga nagpakita sa 3 Nephi.

Ikonsiderar ang pagdapit sa mga estudyante sa pagpili og linya gikan sa “Ang Buhi nga Kristo” ug sa pagpangita og bidyo nga nagpakita sa maong linya. Pwedeng ipakigbahin sa mga estudyante ang bidyo uban sa ilang personal nga pagpamatuod bahin sa Manluluwas.

• Mga Bidyo sa Biblia—Ang Kinabuhi ni Jesukristo

• Mga Bidyo sa Biblia sa mga Bata

• Mga Bidyo sa Basahon ni Mormon

Pagpakigbahin kon unsaon paghinumdom kanunay kang Jesukristo

Usa ka importante nga linya diha sa “Ang Buhi nga Kristo” nagpamatuod nga “[si Jesukristo] mitukod sa sakramento isip usa ka handomanan sa Iyang labing dako nga sakripisyo sa pag-ula.” Pwedeng mangandam ang mga estudyante sa pagtabang sa usa ka tawo nga hinumdoman kon unsay gihimo ni Jesukristo para nato pinaagi sa Iyang Pag-ula. Dapita ang mga estudyante nga tan-awon ang Mga Hilisgotan ug Mga Pangutana, “Pag-ula ni Jesukristo,” ChurchofJesusChrist.org. Pwede nilang gamiton ang nakalista nga mga kapanguhaan sa kataposan sa pahina aron mamili kon unsay ipakigbahin ngadto sa uban. Usa ka opsiyon mao ang paghimo og gamayng libro para sa mga bata sa Primary nga naay mga imahe ug mga mensahe aron tabangan sila nga hilom nga tutokan ang ilang mga hunahuna ug kasingkasing diha sa Manluluwas. Ang laing opsiyon mao ang paghimo og usa ka butang para sa mga tin-edyer nga naay mga kasulatan, mga himno, mga imahe, ug mga pagpamatuod. Tabangi ang mga estudyante nga maghunahuna og makahuloganong mga paagi sa pagpakigbahin sa ilang mga hunahuna ug mga pagbati bahin kang Jesukristo ug sa Iyang maulaong sakripisyo.