“Leksiyon 161—Pagbansay 10 sa Doktrinal nga Kahanas: Gamita ang mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Doktrina ug mga Pakigsaad (2025)
“Pagbansay 10 sa Doktrinal nga Kahanas,” Manwal sa Magtutudlo sa Seminary sa Doktrina ug mga Pakigsaad
Leksiyon 161: “Ang Pamilya: Usa ka Pamahayag ngadto sa Kalibotan”
Pagbansay 10 sa Doktrinal nga Kahanas
Gamit og mga Baroganan sa Pag-angkon og Espirituhanong Kahibalo
Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon mohatag og kahigayonan sa mga estudyante nga ipakigbahin ang mga tudling sa doktrinal nga kahanas nga makahuloganon sa ilang mga kinabuhi ug makatabang nila sa pagtuon ug paggamit sa balaang mga baroganan sa pag-angkon og espirituwal nga kahibalo.
Posibleng mga Kalihokan sa Pagkat-on
Pagrebyo sa doktrinal nga kahanas: Ipakigbahin
Aron tabangan ang mga estudyante nga rebyohon kadali ang ilang nakat-onan niining tuiga ug andamon sila sa pagpakigbahin sa mga tudling sa doktrinal nga kahanas nga nakaapektar sa ilang kinabuhi, ikonsiderar ang pagsulat sa dili kompletong hugpong sa mga pulong nga Usa sa akong paborito ang … diha sa pisara.
Pwede nimong kompletohon ang hugpong sa mga pulong sa lainlaing paagi, sama sa mga tawo sa kasaysayan sa Simbahan, mga istorya nga atong nakat-onan niining tuiga, o mga butang nga akong nakat-onan gikan sa usa ka klasmeyt. Para sa matag paagi nga ilang gikompleto ang hugpong sa mga pulong, tugoti ang mga estudyante nga ipakigbahin kadali uban sa ilang pares ang ilang mga tubag ug kon nganong kana ang ilang gipili.
Sa kataposan, kompletoha ang hugpong sa mga pulong gamit ang mga tudling sa doktrinal nga kahanas. Hatagi og panahon ang mga estudyante nga irebyo ang listahan sa mga tudling sa doktrinal nga kahanas diha sa Mahinungdanon nga Dokumento sa Doktrinal nga Kahanas (2023). Dapita sila sa pagpakigbahin uban sa ilang pares sa tudling nga ilang gipili ug kon unsay ipasabot niini kanila. Seguroa nga magbilin og igong panahon para sa mosunod nga kalihokan sa pagpraktis sa paggamit.
Pagkat-on ug paggamit sa mga baroganan sa pag-angkon og espirituhanong kahibalo
Sa dili pa nimo ipaila ang mosunod nga asoy, makatabang tingali ang pagtugot sa mga estudyante nga irebyo kadali ang mga baroganan sa parapo 5–12 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas. (Ang gisugyot nga kalihokan sa pagrebyo naglakip sa “Mga Kalihokan sa Pagrebyo sa Doktrinal nga Kahanas” diha sa apendiks niini nga manwal.)
Timan-i: Ang gisugyot nga hilisgotan niini nga leksiyon mahimong sensitibo kaayo ug personal tingali para sa daghang estudyante. Samtang hisgotan sa klase ang mosunod nga asoy, pahinumdomi sila sa gugma sa Dios para sa tanan Niyang anak ug sa Iyang tinguha nga trataron nato ang tanang tawo uban ang pagtahod ug gugma.
Tan-awa ang seksiyon nga “Alternatibo nga senaryo” diha sa “Dugang nga mga Kalihokan sa Pagkat-on” kon gibati nimo nga mas maayo para sa mga estudyante nga magpraktis sa paggamit sa mga baroganan sa pag-angkon og espirituhanong kahibalo sa laing sitwasyon.
Si Elder Jeffrey R. Holland sa Korum sa Napulog Duha ka Apostoles naghulagway sa usa ka batan-ong lalaki nga nag-atubang og lisod kaayo nga hagit. Samtang basahon nimo ang sitwasyon niining batan-ong lalaki, pamalandongi kon nganong importante kaniya ang pag-angkon og espirituhanong kahibalo.
Nakigsulti ko sa usa ka batan-ong lalaki nga misulod sa misyon nga takos apan pinaagi sa iyang kaugalingong pagpili miuli og sayo tungod sa kaibog sa sama nga sekso ug sa truma nga iyang nasinati kalabot niana. Takos gihapon siya, apan hilabihan ang pagkwestyon sa iyang pagtuo, ang iyang emosyonal nga palas-anon nag-anam gayod kabug-at, ug ang iyang espirituhanong kasakit nag-anam kagrabe. Ang iyang emosyon puli-pulihan lang og kasakit, kalibog, kasuko, ug pag-inusara. (Jeffrey R. Holland, “Tan-awa ang Imong Inahan,” Liahona, Nob. 2015, 49)
Pwede nimong tabangan ang mga estudyante nga makapangandam aron makita ang kaimportante niini nga leksiyon pinaagi sa pagtugot nila sa pagproseso sa ilang mga pagsabot ug pagbati nga konektado sa mga sitwasyon nga sama niini. Pwede nimong dasigon ang mga estudyante nga isulat ang ilang mga hunahuna diha sa ilang mga journal sa pagtuon pinaagi sa pagpakita og mga pangutana nga sama sa mosunod:
-
Unsang mga pangutana o kabalaka bahin sa plano sa Langitnong Amahan o bahin sa Simbahan ang para nimo gihunahuna sa batan-ong lalaki?
-
Sa unsang paagi naapektohan ang iyang relasyon sa Langitnong Amahan tungod niini nga mga pangutana o mga kabalaka?
-
Nganong importante para sa mga tawo nga naa sa samang sitwasyon nga masabtan ug magamit ang mga baroganan sa pag-angkon og espirituhanong kahibalo? Nganong importante para sa ilang mga higala ug pamilya nga gamiton usab ang maong mga baroganan?
Hinumdomi nga dili matubag niini nga leksiyon ang tanang pangutana sa mga estudyante. Ang Ginoo wala pa mipadayag sa tanang tubag. Gituyo kini nga leksiyon aron tabangan ang mga estudyante nga mahimong matinud-anong mga disipulo ni Jesukristo pinaagi sa paggamit sa mga baroganan sa pag-angkon og espirituhanong kahibalo samtang nag-atubang sila og mga pangutana ug kabalaka sa ilang kinabuhi.
Dapita ang mga estudyante nga ipakigbahin sa klase ang ilang nakat-onan bahin sa mga baroganan sa pag-angkon og espirituhanong kahibalo nga para nila labing makatabang niining batan-ong lalaki, sa iyang mga higala, o sa iyang pamilya. Paghatag og dakong panahon alang niini nga panaghisgot.
Depende sa nahibiling oras human sa panaghisgot, makapili ka sa nahabiling materyal sa leksiyon nga makatabang sa mga estudyante nga mas masabtan kini nga mga baroganan.
Unsay gibuhat sa batan-ong lalaki?
Ikonsiderar ang paghangyo sa mga sakop sa klase nga mangita og pares ug hatagi og kopya ang matag pares sa nahabiling bahin sa istorya ni Elder Holland. Dapita sila nga linyahan ang mga ebidensya kon sa unsang paagi kining batan-on nga lalaki ug ang uban pa nga migamit sa mga baroganan sa pag-angkon og espirituhanong kahibalo.
Dayon ikonsiderar ang pagpakita sa mga pangutana sa ubos aron hisgotan sa magkapares.
Ang iyang presidente sa misyon, presidente sa stake, ug bishop migahin og daghang oras sa pagpangita ug pagbakho ug pagpanalangin kaniya. … [Ang iyang inahan] mipamatuod ngadto sa iyang anak bahin sa gahom sa Dios, sa Iyang Simbahan, apan ilabi na sa Iyang gugma alang niini nga anak. Sa samang higayon siya mipamatuod usab sa iyang kaugalingong dili makompromiso, walay paglubad nga gugma alang kaniya. …
Kining sekswal nga suliran [niining batan-ong lalaki] wala mausab sa milagrosong paagi—walay makaingon nga ingon niana. Apan sa hinay-hinay, ang iyang kasingkasing nausab.
Mibalik na siya sa pagsimba. Mipili siya nga moambit sa sakrament nga andam ug takus. Nakabaton na usab siya og temple recommend ug midawat og tawag nga moserbisyo isip magtutudlo sa early-morning seminary, diin nagmalampuson siya sa talagsaong paagi. Ug karon, human sa lima ka tuig, siya, sa iyang kaugalingong paghangyo ug pinaagi sa tabang sa Simbahan, nagmisyon og balik aron kompletohon ang iyang pagserbisyo sa Ginoo. Naghilak ko tungod sa kaisug, kaligdong, ug determinasyon niining batan-ong lalaki. (Jeffrey R. Holland, “Tan-awa ang Imong Inahan,” Liahona, Nob. 2015, 49)
-
Sa unsang paagi ang mga pagpili niining batan-ong lalaki nagpakita sa iyang hugot nga pagtuo kang Jesukristo? Sa imong hunahuna, sa unsang paagi nakaapektar ang iyang mga pagpili sa iyang relasyon sa Langitnong Amahan?
-
Sa imong hunahuna, nganong importante nga mipili ang iyang inahan nga mopamatuod kaniya sa gugma sa Dios para kaniya?
-
Unsang mga ebidensya ang imong nakita nga midangop siya sa mga tinubdan nga balaanong gitawag? Sa imong hunahuna sa unsang paagi nakaimpluwensiya ang iyang gipili nga mga tinubdan diha sa iyang hugot nga pagtuo kang Jesukristo?
-
Ibutang nato nga wala makita niining batan-ong lalaki ang mga tubag sa pipila sa iyang mga pangutana o gikabalak-an. Unsay imong nahibaloan bahin sa Langitnong Amahan ug sa Iyang plano nga makatabang kon mahinumdoman niya?
Sulati ang blangko
Para niini nga kalihokan, ikonsiderar ang pagsulat diha sa pisara sa tulo ka dili kompleto nga mga pamahayag sa ubos.
Pagpili og usa sa mosunod nga mga pamahayag gikan sa Mahinungdanon nga Dokumento sa Doktrinal nga Kahanas ug sulayi kini og kompleto base sa imong nahinumdoman. Dayon susiha ang imong tubag gamit ang mga parapo 5–12 sa seksiyon nga “Pag-angkon og Espirituhanong Kahibalo.”
-
“Atol sa mga panahon nga dili dayon matubag ang atong mga pangutana …”
-
“Tinguhaon nato ang tabang sa Espiritu Santo aron …”
-
“Ang pagkat-on sa pag-ila ug paglikay sa dili kasaligang mga tinubdan mahimong …”
Hunahunaa kon nganong ang mga baroganan diha sa pamahayag nga imong gipili importante nga masabtan sa batan-ong lalaki ug sa iyang mga higala ug pamilya.
Dapita ang mga estudyante sa paglibot sa lawak ug ipakigbahin sa usag usa ang mga panabot. Pwede nimo silang dasigon nga magpadayon sa pagpangita og pares hangtod nga napakigbahin nila ang ilang mga hunahuna sa dili moubos sa usa ka tawo nga mipili sa opsiyon 1, mipili sa opsiyon 2, ug mipili sa opsiyon 3.
Balaanong gitudlo nga mga tinubdan
Ikonsiderar ang pagpakita sa mosunod nga mga pangutana. Dayon hatagi ang mga estudyante og igong panahon sa pagpangita og mga kasulatan ug pamahayag sa dili pa sila dapiton sa pagtubag og kusog.
Kon gikinahanglan, pwede nimong ihatag sa mga estudyante ang gisugyot nga mga kapanguhaan diha sa seksiyon nga “Dugang nga mga Kapanguhaan”.
-
Hain sa mga tudling sa doktrinal nga kahanas nga gikan sa Doktrina ug mga Pakigsaad (o uban pang basahon sa kasulatan) ang para nimo makatabang niining batan-ong lalaki?
-
Unsang mga pamahayag gikan sa mga lider sa Simbahan ang makatabang niya o sa iyang mga minahal aron tun-an?