Leksiyon 159: “Ang Pamilya: Usa ka Pamahayag ngadto sa Kalibotan”

Ang Pamahayag sa Pamilya, Bahin 2

“Ang mga Kabataan Mao ang Panulundon sa Ginoo”

Gipahayag sa mga propeta sa Ginoo ang kaimportante sa mga anak diha sa plano sa Langitnong Amahan. Makaapil ang mga asawa ug mga bana sa plano sa Dios pinaagi sa pagbaton og mga anak sa kalibotan ug pagpadako kanila diha sa gugma ug pagkamatarong. Kini nga leksiyon makatabang sa mga estudyante nga masabtan ang kaimportante sa pagbaton ug pag-atiman sa mga anak diha sa plano sa Langitnong Amahan.

Posibleng mga Kalihokan sa Pagkat-on

Balaang direksiyon gikan sa pamahayag sa pamilya

Ikonsiderar ang pagsugod sa klase pinaagi sa pagpakigbahin sa mosunod nga senaryo o parehas niini nga pinakahaom sa mga panginahanglan sa imong mga estudyante. Pwede nimo silang parespareson aron hisgotan ang mga pangutana human sa senaryo.

Si Kristen ug ang iyang duha ka higala naghisgot bahin sa ilang mga kaugmaon ug kon unsay gusto nilang mahitabo sa ilang kinabuhi. Samtang naabot sa pamilya ang hilisgotan, miingon si Kristen nga naghinamhinam siyang maminyo ug manganak inigkahamtong niya. Usa sa iyang mga higala ang miingon, “Gusto kong maminyo, pero dili gyod ko mosulay og pagpadako og mga bata aning gubot kaayo nga kalibotan.” Ang usa ka higala miingon, “Okay ra ko manganak sa umaabot, pero morag dili ko gustong maminyo.” Human maminaw sa mga opinyon sa iyang mga higala, natingala si Kristen kon nganong lahi kaayo ang iyang pagbati bahin sa pagbaton og mga anak.

• Nganokaha nga mao kadto ang gibati sa mga higala ni Kristen?

  Hangyoa ang pipila ka pares sa mga estudyante nga ipakigbahin ang pipila sa ilang mga tubag. Pwede usab nimo silang dapiton nga ipakigbahin ang lain pa nilang mga gikabalak-an o mga pangutana bahin sa mga anak ug pagkaginikanan. Hatagi og kopya sa “Ang Pamilya: Usa ka Pamahayag ngadto sa Kalibotan” ang mga estudyante aron magamit nila kini. Dapita ang matag pares nga tun-an ang parapo 4–6, nga mangita sa mga pulong o hugpong sa mag pulong nga nagpahayag sa doktrina sa Ginoo bahin sa mga anak ug sa pagkaginikanan. Dasiga ang mga estudyante nga markahan ang makahuloganon nga mga pulong o hugpong sa mga pulong samtang magtuon sila. Kon kinahanglan, ipasabot nga ang hugpong sa mga pulong nga “pagsanay ug pagpuno sa yuta” nagtumong sa pagbaton og mga anak ug ang hugpong sa mga pulong nga “sagrado nga mga gahom sa paglalang” nagtumong sa sekswal nga mga relasyon. Ikonsiderar ang pagpangutana sama sa mosunod.

• Unsang mga kamatuoran bahin sa mga anak ug pagkaginikanan ang imong nadiskobrehan?

• Sa imong hunahuna, nganong gusto sa Ginoo nga makabaton og mga anak ang mga bana ug mga asawa kon kaya nila?

• Unsay pipila ka rason kon nganong dili gustong manganak ang magtiayon?

Sa dili pa mopadayon, pwede nimong dapiton ang mga estudyante nga irekord ang pipila sa kaugalingon nilang mga hunahuna ug mga pagbati bahin sa doktrina sa Ginoo mahitungod sa mga anak ug sa pagkaginikanan. Dasiga ang mga estudyante nga tinguhaon ang impluwensiya sa Espiritu Santo aron tabangan silang masabtan ang kaimportante sa pagbaton ug pag-atiman og mga anak ingon og bahin sa plano sa Langitnong Amahan.

Pagpangita og uban pang balaanong mga tinubdan alang sa pagsabot

Ikonsiderar ang pagpakita sa mosunod nga tulo ka pamahayag sa kamatuoran gikan sa pamahayag sa pamilya. Ipasabot nga gamiton sa mga estudyante kini nga mga pamahayag aron magpraktis sa pagpangita og balaanong gitudlo nga mga tinubdan para sa dugang pagsabot. Pwede nimong grupohon ngadto sa tulo ka grupo ang mga estudyante, diin tun-an sa matag estudyante ang magkalahing kamatuoran. Pwedeng pilion sa mga estudyante ang ilang mga pamahayag sa mamugnaon nga paagi; pananglitan, ang kinamanghoran o ang kinatas-an sa matag grupo ang unang mamili kon unsay iyang tun-an.

• “Ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.”

• “Ang sagrado nga mga gahom sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa.”

• “Ang mga ginikanan adunay sagrado nga katungdanan sa pagmatuto sa ilang mga anak diha sa paghigugma ug sa pagkamatarung.”

  Dasiga ang mga estudyante nga gamiton ang mga kapanguhaan nga sama sa Giya ngadto sa mga Kasulatan o ang Librarya sa Ebanghelyo nga app aron makakitag dugang nga impormasyon bahin sa mga pahayag sa kamatuoran. Kon kinahanglan sila og giya, pagsugyot og mga termino nga pangitaon nga sama sa “pagsanay ug pagpuno,” “gahom sa paglalang,” o “matarong nga mga ginikanan.” Dapita sila nga mangita og mga pamahayag sa mga lider sa Simbahan, mga tudling sa kasulatan, o mga artikulo sa magasin sa Simbahan nga mas mopalawom sa ilang pagsabot.

  Dihang mahuman na sa pagpangandam ang mga estudyante, dasiga silang ipakigbahin sa ilang grupo ang ilang nakat-onan. Ikonsiderar ang pagpangutana sa pipila sa mosunod.

• Unsay imong nakat-onan niini nga mga pamahayag sa kamatuoran nga para nimo importante?

• Nganong gikinahanglan ang hugot nga pagtuo kang Jesukristo sa pagpakabuhi niini nga mga kamatuoran sa kalibotan karon?

• Unsang mga ehemplo ang imong nakita kon sa unsang paagi ang pagpakabuhi niini nga mga kamatuoran magdala sa mas dakong gugma, samtang ang pagbalewala niini nga mga kamatuoran magdala og kasakit o pagmahay?

• Unsay imong mahimo karon aron makapangandam nga matinud-anon nga magpakabuhi niini nga mga kamatuoran sa umaabot?

Mahangtorong doktrina bahin sa mga anak

Ikonsiderar ang pagpamatuod sa kaimportante sa mga anak diha sa mahangtorong plano sa Dios ug sa pagpakigbahin sa mosunod nga pamahayag.

Gipasabot ni Presidente Dallin H. Oaks sa Unang Kapangulohan ang kaimportante sa mga anak diha sa plano sa Dios.

Ang mahangtoron nga doktrina … nagahatag og talagsaon nga panglantaw bahin sa mga anak. Pinaagi niini nga panglantaw atong gitan-aw ang pagbaton ug pag-amuma sa mga anak isip kabahin sa balaanong plano. Kini usa ka malipayon ug sagrado nga katungdanan niadtong gihatagan og gahom sa pag-apil niini. Busa, kita gimandoan nga itudlo ug depensahan ang mga baroganan ug mga buhat nga naghatag og labing maayong mga kahimtang alang sa kalamboan ug kalipay sa mga anak ubos sa plano sa Dios. (Dallin H. Oaks, “Balaanong Gugma diha sa Plano sa Amahan,” Liahona, Mayo 2022, 102)

• Sa unsang paagi ang mga anak mahimong mipanalangin sa imong pamilya ug sa uban nga imong kaila?

• Sa unsang paagi ang pagbaton ug pagpadako og mga anak diha sa gugma makatabang nimo nga mas mahisama sa atong langitnong mga ginikanan?

Ikonsiderar ang pagpakita sa mosunod nga mga pangutana ug pagdapit sa mga estudyante aron hilom nga mosusi sa ilang pagsabot bahin kon unsa ang ilang nakat-onan karon.

Susiha ang imong pagsabot sa mosunod nga mga pamahayag pinaagi sa pagtubag diha sa imong journal sa pagtuon gamit ang uyon kaayo, uyon, medyo uyon, o dili segurado. Isulat sa mubo kon nganong kana ang imong tubag.

• Nakasabot ko kon nganong ang sugo sa Dios nga pagdaghan ug pagpuno sa yuta nagpabilin nga ipatuman karon.

• Nakasabot ko kon nganong ang balaanong gahom sa paglalang maoy para lamang sa babaye ug lalaki nga legal nga minyo.

• Nakasabot ko kon nganong angayng padakoon sa mga ginikanan ang ilang mga anak diha sa gugma ug pagkamatarong.

Kon aduna pay dugang mga pangutana o gikabalak-an ang mga estudyante bahin sa doktrina sa Ginoo bahin sa mga anak o bahin sa balaod sa pagkaputli, dasiga silang mangutana sa mga ginikanan o mga lider sa Simbahan.

Sa pagtapos, dapita ang mga estudyante nga i-summarize ang ilang nakat-onan bahin sa kaimportante sa pagbaton ug pag-atiman og mga anak isip bahin sa plano sa Langitnong Amahan.

Dugang nga mga Kapanguhaan

Nganong importante ang pagbaton og mga anak sa plano sa Langitnong Amahan sa kalipay?

Si Presidente M. Russell Ballard sa Korum sa Napulog Duha ka Apostoles mitudlo:

Ang katuyoan sa mortalidad mao ang pagkahimong sama sa Dios pinaagi sa pag-angkon og pisikal nga lawas, mogamit sa kabubut-on, mobuhat sa mga tahas nga kanhi naa lamang sa atong langitnong mga ginikanan—mga tahas sa bana, asawa, ug ginikanan. …

Gusto sa Langitnong Amahan [nga kita] … [mosunod sa] Iyang unang sugo sa “pagsanay ug pagpuno”—dili lang sa pagtuman sa iyang plano apan sa pagpangita usab og kalipay nga Iyang gedisenyo sa plano nga ihatag ngadto sa Iyang mga anak. …

… Usa sa mahinungdanong katuyoan sa mortal nga kinabuhi mao nga mahimo natong masunod kana nga kasinatian sa pamilya nga kita mismo, dinhi niining kinabuhia isip mga ginikanan kay sa mga anak lamang. (M. Russell Ballard, “The Opportunities and Responsibilities of CES Teachers in the 21st Century” [usa ka gabii uban sa General Authority, Peb. 26, 2016], broadcasts.ChurchofJesusChrist.org)

Nganong ang seksuwal nga relasyon angay lamang tali sa minyong lalaki ug babaye?

Si Elder Dale G. Renlund sa Korum sa Napulog Duha ka Apostoles ug si Sister Ruth L. Renlund mipatin-aw sa mosunod:

Tinguha sa Langitnong Amahan nga ang sekswal nga mga relasyon sa kaminyoon gamiton sa paglalang og mga anak, ug sa pagpahayag og gugma ug paglig-on sa emosyonal, espiritwal ug pisikal nga mga koneksyon tali sa bana ug asawa. Sa kaminyoon, ang sekswal nga kasuod kinahanglan mohiusa sa asawa ug bana sa pagsalig, debosyon, ug sa konsiderasyon sa usag usa. …

Ang doktrina sa mahangtorong mga pamilya sa Ang Simbahan ni Jesukristo sa mga Santos sa Ulahing mga Adlaw talagsaon taliwala sa mga tradisyon sa Kristiyano. Wala kita gilalang sa pagdayeg, pagsimba, ug pagserbisyo lamang sa dili masabtan nga Dios. Gilalang kita sa langitnong mga ginikanan aron motubo nga mahimong sama kanila. Gilalang ang mga espiritu sa lalaki ug babaye aron mokompleto sa usag usa. Mao kana nganong ang sekso dili mag-usab-usab diha sa kahangtoran—tungod kay kini naghatag sa kapasikaran alang sa hingpit nga gasa nga mahatag sa Langitnong Amahan, ang Iyang matang sa kinabuhi.

Aron kita makaamgo niini nga panalangin, misugo ang Langitnong Amahan nga ang sekswal nga kasuod itagana alang sa kaminyoon tali sa lalaki ug babaye. … Dili nato makab-ot ang matang sa kinabuhi nga gitagamtam sa atong Langitnong Amahan pinaagi sa atong kaugalingon o kon wala ang usa ka hingpit nga pasalig sa pagkamaunongon sulod sa kaminyoon sa atong bana o asawa sumala sa plano sa Dios. …

… Ang sekswal nga relasyon maoy “usa sa dakong pagpahayag sa atong balaanong kinaiya” [David A. Bednar, “Kita Nagtuo sa Pagkaputli,” Liahona, Mayo 2013, 42]. Ang atong husto nga pagpahayag sa sekswalidad naghimong posible nga matuman ang plano sa Dios sa yuta ug sa kahangtoran, sa pagpasarang kanato nga mahimong sama sa atong Langitnong Amahan. Ang Dios nagsaad og kinabuhing dayon alang sa matinud-anon nga naglakip og mahangtoron nga kaminyoon, mga anak, ug sa tanang uban nga mga panalangin sa usa ka mahangtoron nga pamilya. (Dale G. Renlund ug Ruth Lybbert Renlund, “Ang Balaanong mga Katuyoan sa Sekswal nga Kasuod,” Liahona, Ago. 2020, 15–17)

Unsay gitudlo sa mga propeta bahin sa pagkabalaan sa kinabuhi kon bahin sa aborsyon?

Ang mga lider sa Simbahan mihatag sa mosunod nga mga instruksiyon:

Ang Ginoo misugo, “Dili kamo … magpatay, ni magbuhat sa bisan unsa nga butang nga sama niini” (Doktrina ug mga Pakigsaad 59:6). Ang Simbahan supak sa pinili nga aborsyon alang sa personal o sosyal nga kasayon. Ang mga miyembro kinahanglan nga dili mopaubos, mopahigayon, makigsabot, mobayad, mouyon, o moawhag og aborsyon. Ang bugtong posible nga eksepsiyon mao kon:

• Ang pagmabdos miresulta tungod sa paglugos o pakighilawas sa duol nga kabanay [incest].

• Ang usa ka takos nga doktor motino nga ang kinabuhi o panglawas sa inahan seryoso nga nameligro.

• Ang usa ka takos nga doktor motino nga ang puya adunay grabe nga mga depekto nga ang bata dili mabuhi human sa pagkatawo.

Bisan pa niini nga mga eksepsiyon dili awtomatik nga makatarunganon ang aborsyon. Ang aborsyon usa ka seryoso kaayo nga butang. Kinahanglan nga ikonsiderar lamang kini human nga ang mga tawo nga responsable nakadawat og kompirmasyon pinaagi sa pag-ampo. Ang mga miyembro makigtambag sa ilang mga bishop isip kabahin niini nga proseso. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.1, ChurchofJesusChrist.org)

Asa ko makakat-on pa og dugang bahin sa mga kamatuoran nga gitudlo diha sa pamahayag sa pamilya?

Ang mosunod maoy pipila sa mga pakigpulong nga pwede nimong tun-an:

• Dallin H. Oaks, “Mga Ginikanan ug mga Bata,” Liahona, Nob. 2018, 61–67

• David A. Bednar, “Kita Nagtuo sa Pagkaputli,” Liahona, Mayo 2013, 41–44

• Neil L. Andersen, “Mga Bata,” Liahona, Nob. 2011, 28–31

Dugang nga mga Kalihokan sa Pagkat-on

Pagpadakog mga bata diha sa pagkamatarong ug paghatag sa ilang mga panginahanglan

Kon makabenepisyo ang mga estudyante gikan sa pagkat-on og dugang bahin sa sugo sa Ginoo para sa mga ginikanan sa pagpadako sa ilang mga anak diha sa gugma ug pagkamatarong, ikonsiderar ang mosunod nga ideya.

Human matun-i ang parapo 6 sa pamahayag sa pamilya, ipasabot nga sa sayong bahin niini nga dispensasyon gibadlong sa Manluluwas ang Propeta Joseph Smith ug ubang mga lider sa Simbahan tungod sa wala pag-atiman sa ilang mga pamilya sa hustong paagi. Dapita ang mga estudyante sa pagbasa sa Doktrina ug mga Pakigsaad 93:40–50, nga mangita kon unsay gitudlo sa Ginoo. Hangyoa ang mga estudyante nga ipakigbahin ang ilang nadiskobrehan. Ipasabot nga bisag responsibilidad sa mga ginikanan ang pagpadako sa mga bata diha sa pagkamatarong anaa sa mga ginikanan, makatabang ang mga anak sa ilang mga ginikanan sa pagtuman sa mga sugo sa Ginoo. Ikonsiderar ang pagpangutana og sama sa mosunod:

• Unsaon nimo pagsuporta sa imong mga ginikanan sa ilang balaanong responsibilidad sa pagpadako sa imong pamilya diha sa “kahayag ug kamatuoran”? (Doktrina ug mga Pakigsaad 93:40).

• Unsa ang pipila ka paagi nga mga tin-edyer mahimong mas “labaw nga makugihon ug magpakabana diha sa panimalay”? (Doktrina ug mga Pakigsaad 93:50).

Human matubag sa mga estudyante ang nag-unang mga pangutana, ikonsiderar ang pagbahin-bahin nila sa gagmayng grupo aron maghunahuna og dugang mga paagi nga makatabang sila sa ilang mga ginikanan. Ang mosunod mao ang pipila sa mga responsibilidad sa mga ginikanan nga apil diha sa pamahayag sa pamilya. Ikonsiderar ang paghatag sa kada grupo og usa ka hilisgotan nga hisgotan:

• Paghatag sa pisikal ug espirituwal nga panginahanglan sa ilang mga anak.

• Pagtudlo sa ilang mga anak nga higugmaon ug alagaran ang usag usa.

• Pagtudlo sa ilang mga anak sa pagtuman sa mga sugo sa Dios.

• Pagtudlo sa ilang mga anak nga magmasulundon sa balaod sa pagkalungsoranon.

Human sa igong panahon ang mga estudyante nga maghunahuna, dapita silang ipakigbahin ang pipila sa ilang mga ideya. Ikonsiderar ang paglista sa ilang mga tubag diha sa pisara. Taposa pinaagi sa pagsukna sa mosunod nga mga pangutana:

• Sa unsang paagi ang pagsuporta sa imong mga ginikanan sa ilang mga responsibilidad nga hinatag sa Ginoo kanila mag-andam nimo para sa matarong nga pagkaginikanan sa umaabot?

May Tulubagon sa Atubangan sa Dios

Aron tabangan ang mga estudyante nga masabtan ang balaanong mga obligasyon sa mga ginikanan ug mga sakop sa pamilya atubangan sa Dios, ikonsiderar ang pagpangutana nila kon nakasulay ba sila nga gipabantayan og yaya dihang milakaw ang ilang mga ginikanan. Pwede pod kang mangutana kon nakabantay ba sila sa mga anak sa ubang pamilya. Dapita ang mga estudyante sa paglista diha sa pisara sa mga kinaiya o hiyas nga pangitaon sa mga ginikanan dihang magpili og yaya sa ilang mga anak.

• Sa imong hunahuna, nganong pangitaon sa ginikanan ang yaya nga kasaligan ug responsable?

• Nganong dako ang gidahom sa Dios niadtong nagserbisyo isip yutan-ong mga tig-atiman alang sa Iyang mga espiritung mga anak?

Dapita ang mga estudyante nga basahon ang parapo 8 sa pamahayag sa pamilya ug ipakigbahin ang bisan unsang pagbati o mga panabot nga ilang nakuha gikan niini. Pamatud-i nga gimahal pag-ayo sa Dios ang tanan niyang anak ug nagtinguha nga molungtad sa kahangtoran ang atong mga relasyon sa pamilya.

Gimahal sa Langitnong Amahan ug ni Jesukristo ang tanang bata

Aron tabangan ang mga estudyante nga mabati ang pagmahal sa Langitnong Amahan ug ni Jesukristo para sa mga bata, ikonsiderar ang pagpasalida sa bidyo sa Basahon ni Mormon nga “Jesus Christ Prays and Angels Minister to the Children” (5:52). Dapita ang mga estudyante nga irekord ang mga panabot ug impresyon samtang nagtan-aw ug mangandam sa pagpakigbahin. Kon wala ang bidyo, ikonsiderar ang pagbasa niini nga asoy uban sa mga estudyante 3 Nephi 17:11–25.