“Leksiyon 160—Ang Pamahayag sa Pamilya, Bahin 3: Kalipay diha sa Kinabuhi sa Pamilya,” Manwal sa Magtutudlo sa Seminary sa Doktrina ug mga Pakigsaad (2025)
“Ang Pamahayag sa Pamilya, Bahin 3,” Manwal sa Magtutudlo sa Seminary sa Doktrina ug mga Pakigsaad
Leksiyon 160: “Ang Pamilya: Usa ka Pamahayag ngadto sa Kalibotan”
Ang Pamahayag sa Pamilya, Bahin 3
Kalipay diha sa Kinabuhi sa Pamilya
Usa ka rason kon nganong gipadala kita sa Langitnong Amahan sa mga pamilya dinhi sa yuta mao ang pagtabang nato nga makasinati og kalipay. Sa pamahayag sa pamilya, gipadayag sa Ginoo kon unsaon nato pagkab-ot ang kalinaw ug kalipay ingon nga mga indibidwal ug mga pamilya. Kini nga leksiyon makatabang sa mga estudyante nga magamit ang mga pagtulun-an ni Jesukristo diha sa ilang mga relasyon sa pamilya.
Posibleng mga Kalihokan sa Pagkat-on
Hinungdan ug epekto
Ikonsiderar ang pagsulat sa mosunod nga dili kompleto nga hinungdan ug epekto nga kapahayag sa pisara. Kompletoha ang unang blangko gamit ang hugpong sa mga pulong nga “Pagbaton og dagkong grado.” Dayon dapita ang mga estudyante nga ibutang sa ikaduhang blangko ang hugpong sa mga pulong nga mokompleto sa pamahayag, nga sama sa “maghimo kita og homework.” Pwede nimong balikon og pipila ka beses kini nga proseso gamit ang lainlaing hugpong sa mga pulong.
“ dako og purohan nga molampos kon .”
Dapita ang mga estudyante nga basahon ang parapo 7 sa pamahayag sa pamilya, nga mangita og dinasig nga paagi sa pagkompleto sa hugpong sa mga pulong diha sa pisara. Tabangi ang mga estudyante nga mailhan ang mosunod nga kamatuoran: Ang kalipay diha sa kinabuhi sa pamilya makab-ot lang dihang natukod kini diha sa mga pagtulun-an ni Ginoong Jesukristo. Aron matabangan ang mga estudyante nga hunahunaon ang bahin sa pagkinabuhi uyon sa mga pagtulun-an ni Kristo nga modala sa kalipay diha sa kinabuhi sa pamilya, hangyoa sila nga pamalandongan ang mga pangutana nga parehas sa mosunod:
-
Sa imong hunahuna, sa unsang mga paagi madugangan sa Langitnong Amahan ug ni Jesukristo ang kalipay sa imong pamilya?
-
Sa unsang paagi ang imong mga paningkamot nga magkinabuhi uyon sa Ilang mga pagtulun-an makadugang sa maong kalipay?
Pahibaloa ang mga estudyante nga sa kataposan niini nga leksiyon, dapiton sila nga himoon ang usa sa mga pagtulun-an sa Manluluwas nga makadugang sa kalipay sa ilang pamilya. Dapita ang mga estudyante nga tinguhaon ang tabang sa Langitnong Amahan sa nahibiling bahin sa leksiyon aron mahibalo sila kon asa nga baroganan ang ilang tutokan. Dasiga ang mga estudyante nga bantayan ang bisan unsang hunahuna o pagbati nga ilang madawat gikan sa Espiritu Santo.
Ang mga pagtulun-an ni Jesukristo
Ikonsiderar ang pagbutang og litrato ni Jesukristo diha sa pisara. Hangyoa ang mga estudyante nga basahon pag-usab ang parapo 7, niining higayona markahan ang kada pagtulun-an nga makadugang sa kalipay sa pamilya. Dapita ang mga estudyante sa pagsulat sa ilang nakaplagan diha sa pisara palibot sa litrato ni Jesukristo. Dayon ang mga estudyante mahimong magrupo-grupo o magpares-pares aron kompletohon ang mosunod nga kalihokan:
-
Pagpili og pagtulun-an ni Jesukristo nga makita sa parapo 7.
-
Pangita og kasulatan o pamahayag sa lider sa Simbahan nga makatabang natong mas masabtan ang maong pagtulun-an.
-
Ihulagway kon sa unsang paagi ang pagsunod sa maong pagtulun-an makadugang sa kalipay sa mga pamilya.
Kon nagkinahanglan og tabang ang mga estudyante, pwede nimo silang dapiton nga gamiton ang Giya ngadto sa mga Kasulatan o sa pagpangita diha sa Librarya sa Ebanghelyo nga app. Ang mosunod mao ang pipila sa mga kasulatan nga makita tingali sa mga estudyante nga konektado sa parapo 7: 3 Nephi 18:15–16, 21 (pag-ampo); Moroni 7:45–48 (gugma); Doktrina ug mga Pakigsaad 58:42–43 (paghinulsol); Doktrina ug mga Pakigsaad 64:9–11 (pagpasaylo).
Kon anaa, dapita ang mga estudyante nga pangitaon ang “Kalipay diha sa Kinabuhi sa Pamilya,” nga anaa sa ChurchofJesusChrist.org, aron mapangita ang mga pagtulun-an gikan sa mga lider sa Simbahan bahin sa mga baroganan diha sa parapo 7.
Human sa igo nga panahon, dapita ang mga grupo sa pagpakigbahin sa klase sa ilang nakaplagan. Samtang nakigbahin ang mga grupo, hangyoa sila nga isulat sa pisara ang pakisayran sa kasulatan o parte sa pamahayag sa lider sa Simbahan nga nakatabang nila aron masabtan ang pagtulun-an ni Jesukristo.
Dayon magamit nimo ang mga pangutana sama sa mosunod aron tabangan ang mga estudyante nga pamalandongan ug hisgotan kon sa unsang paagi makaapektar sa mga pamilya ang mga pagtulun-an ni Jesukristo.
-
Hain sa mga pagtulun-an ni Jesukristo diha sa pisara ang adunay epekto sa kalipay nga imong gibati diha sa imong pamilya?
-
Hain sa maong mga pagtulun-an ang gusto nimong mas tutokan sa imong pamilya? Ngano man? Unsaon nimo ni pagpatuman diha sa imong pamilya?
-
Hain niini ang gusto nimong tutokan sa imong umaabot nga pamilya? Ngano man?
-
Hain sa mga pagtulun-an sa Manluluwas ang makatabang sa usa ka pamilya nga nakigbisog sa dili pagsinabtanay, panaglalis, o nadaot nga mga relasyon?
-
Samtang hisgotan sa mga estudyante ang nag-unang pangutana, pwede nimo silang tultolan sa mga baroganan sa “hugot nga pagtuo, pag-ampo, paghinulsol, pagpasaylo, pagtahod, gugma, [ug] kaluoy” diha sa parapo nga ilang gitun-an. Pagpamatuod sa tinguha sa Manluluwas nga mopasaylo, moayo, ug mopalambo sa mga indibiduwal ug mga relasyon sa pamilya. Ang atong mga paningkamot ug mga tinguha nga maghinulsol ug mopasaylo sa uban makadapit sa impluwensiya sa Iyang pagpang-ayo sa atong mga kinabuhi ug mga relasyon.
Nagkadakong kalipay
Sa dili pa dapiton ang mga estudyante nga gamiton ang usa sa mga pagtulun-an sa Manluluwas diha sa kaugalingon nilang pamilya, tabangi silang ikonsiderar ang mga paagi nga magamit ang Iyang mga pagtulun-an sa lainlaing sitwasyon sa pamilya. Ikonsiderar ang pagsulat og pipila ka lainlaing sitwasyon sa pamilya diha sa pisara nga masabtan tingali sa imong mga estudyante diha sa klase. Ang mga ehemplo mahimong maglakip sa mosunod:
-
Tibuok pamilya aktibo sa Simbahan.
-
Ang ubang sakop sa pamilya nga dili miyembro.
-
Diborsyodo nga mga ginikanan.
-
Pamilya nga usa ray ginikanan.
Ikonsiderar ang paghangyo sa mga estudyante nga ipakigbahin ang mga tubag sa mosunod nga mga pangutana para sa kada sitwasyon sa pamilya diha sa pisara:
-
Hain sa piho nga mga baroganan gikan sa parapo 7 sa pamahayag sa pamilya ang imong ikarekomendar sa usa ka tin-edyer niini nga sitwasyon?
-
Sa unsang paagi magamit sa usa ka tin-edyer nga aduna niini nga sitwasyon sa pamilya ang mga baroganan nga imong gipili?
Ikonsiderar ang pagpakita sa mosunod nga pamahayag:
Si Elder David A. Bednar sa Korum sa Napulog Duha ka Apostoles mitudlo:
Bisan unsang daotan nga mga butang ang nahitabo sa inyong pamilya, ako mopamatuod ug mosaad nga ang Ginoong Jesukristo mao ang tinubdan sa pagkaayo, pagbag-o, ug pagpahiuli nga inyong gikinahanglan. …
Uban sa tabang sa Ginoo, makahimo kamo og mahangtorong pamilya, bisan kon dili kamo gikan sa matang sa Santos sa Ulahing mga Adlaw nga panimalay nga usahay ipakita diha sa mga hapin sa Liahona o Ensign nga mga magasin. Palihug hinumdomi kanunay: kini magsugod diha kaninyo! (David A. Bednar, “Usa ka Lig-on nga Sumpay” [tibuok kalibotan nga debosyonal alang sa mga young adult, Sep. 10, 2017], broadcasts.ChurchofJesusChrist.org)
-
Unsay mipatigbabaw nimo gikan sa pamahayag ni Elder Bednar? Ngano man?
Dapita ang mga estudyante nga mopili og usa sa mga pagtulun-an ni Jesus gikan sa pamahayag sa pamilya nga gibati nila nga nag-aghat nila sa paggamit aron mapauswag ang kalipay sa kaugalingon nilang mga pamilya. Hatagi sila og panahon nga mamalandong ug isulat diha sa ilang mga journal sa pagtuon ang usa ka plano sa pagsugod, pagpadayon, o pagpauswag sa pagpakabuhi uyon niana nga pagtulun-an. Kon naa pay panahon, dapita ang pipila ka estudyante nga ipakigbahin ang nabati nilang nadasig nga buhaton.
Ikonsiderar ang pagpakigbahin sa imong pagsaksi sa gahom ni Jesukristo nga nagpalambo sa kalipay sa mga pamilya niadtong naningkamot sa pagpakabuhi uyon sa Iyang mag pagtulun-an.