Leksiyon 158: Ang Pamilya: Usa ka Pamahayag ngadto sa Kalibotan

Ang Pamahayag sa Pamilya, Bahin 1

“Ang Pamilya Mahinungdanon ngadto sa Plano sa Tiglalang”

“Ang Pamilya: Usa ka Pamahayag ngadto sa Kalibotan” maoy usa ka propetikanhong pamahayag nga gisulat aron tabangan tang masabtan ang mga pagtulun-an sa Langitnong Amahan ug ni Jesukristo bahin sa kaminyoon ug pamilya. Kini nga leksiyon gituyo aron tabangan ang mga estudyante nga mas masabtan ang importanteng papel sa mga pamilya sa plano sa Langitnong Amahan.

Posibleng mga Kalihokan sa Pagkat-on

Sa dili pa ang klase, seguroa nga naay akses ang matag estudyante sa “Ang Pamilya: Usa ka Pamahayag ngadto sa Kalibotan” sa digital format man o nakaprinta nga kopya. Mahimong adunay giapil nga kopya diha sa mga journal sa pagtuon sa mga estudyante.

“Ang pamilya mahinungdanon ngadto sa plano sa Tiglalang alang sa walay kataposan nga destinasyon sa Iyang mga anak”

Ikonsiderar ang pagpakita sa mga pulong gikan sa nag-unang ulohan nga wala mahan-ay diha sa pisara. Hatagig usa ka minuto ang mga estudyante sa pagsulay sa paghan-ay niini sa ilang mga hunahuna. Dayon dapita sila nga pangitaon ug markahan kini nga mga pulong sa kataposan sa unang parapo sa “Ang Pamilya: Usa ka Pamahayag ngadto sa Kalibotan.”

Dayon sugdi ang panaghisgot gamit ang mga pangutana nga sama sa mosunod:

• Nganong ang pamilya mahinungdanon ngadto sa plano sa Dios para sa mahangtoron nga destinasyon sa Iyang mga anak?

• Nasayod nga mag-atubang og mga pagsulay ang matag pamilya ug nga kitang tanan dili hingpit, unsay imong ipakigbahin mahitungod sa Langitnong Amahan, sa Pag-ula ni Jesukristo, ug sa plano sa kaluwasan nga makatabang sa mga tin-edyer nga nabalaka sa kahimtang sa ilang pamilya?

Ikonsiderar ang paglista sa mosunod nga mga pulong ug hugpong sa mga pulong diha sa pisara sa dili pa magsugod ang klase. Dapita ang mga estudyante nga basahon ang listahan.

• Ang kaimportante sa kaminyoon

• Diborsyo

• Abuso

• Gender nga Kailhanan

• Kaminyoon sa managsama og sekso

• Pagbaton og mga anak

• Sekswal nga mga relasyon sa gawas sa kaminyoon

• Aborsyon

• Kalipay diha sa mga pamilya

Timan-i: Samtang imong itudlo ang leksiyon karong adlawa, hinumdomi ang kasensitibo niini nga mga hilisgotan nga matubag. Pwede nimong pahinumdoman ang mga estudyante nga maningkamot nga batonan ang Kristohanon nga gugma, pagkasensitibo, ug pagsabot samtang hisgotan nila ni nga mga hilisgotan.

• Hain niini nga mga hilisgotan ang adunay mga pangutana o gikabalak-an sa mga tawo karon?

• Asa kasagaran mangita og tubag ang mga tawo bahin niini nga mga isyu?

  Ikonsiderar ang paghatag og panahon sa mga estudyante sa pagpamalandong sa ilang nasabtan niini nga mga isyu ug kon unsang mga pangutana nga tingali sila aduna.

• Nganong importanteng mahibalo kon unsay gitudlo sa Dios bahin niini nga mga hilisgotan?

Kini nga leksiyon makatabang sa mga estudyante nga makakitag mga tubag sa pipila sa ilang mga pangutana ug mga kabalaka. Dapita sila nga tinguhaon ang pagpadayag gikan sa Espiritu Santo nga mogiya nila samtang ilang tun-an ang “Ang Pamilya: Usa ka Pamahayag ngadto sa Kalibutan” karong adlawa ug sa tibuok semana.

Ang pamahayag sa pamilya

Aron tabangan ang mga estudyante nga masabtan ang pipila ka rason kon nganong gidasig sa Ginoo ang pagsulat sa pamahayag sa pamilya, ikonsiderar ang pagpakigbahin sa mosunod nga pahayag nga gihimo dihang gipaila ang pamahayag.

Timan-i: Ang pulong nga hiwi nga pangatarongan nagtumong sa malimbongon nga mga pagtulun-an.

Si Presidente Gordon B. Hinckley (1910–2008) namahayag:

Uban sa daghang hiwi nga pangatarongan nga gipakatap nga maoy tinuod, uban sa daghang panglingla kabahin sa mga sumbanan ug mga hiyas, uban sa daghang pangdani ug tentasyon nga anam-anam nga nagmantsa sa kalibotan, among gibati nga mopasidaan ug mopahimangno. Sa pagpadayon niini kami sa Unang Kapangulohan ug sa Konseho sa Napulog Duha ka Apostoles karon mopagawas niini nga pamahayag ngadto sa Simbahan ug sa kalibotan isip usa ka pamahayag ug pagpalanog pag-usab sa mga sumbanan, mga doktrina, ug mga buhat nga may kalabotan sa pamilya diin ang mga propeta, mga manalagna, ug mga tigpadayag niini nga simbahan mibalik-balik sa pagpahayag niini sa tibuok kasaysayan. (Gordon B. Hinckley, “Stand Strong against the Wiles of the World,” Ensign, Nob. 1995, 100)

• Unsa ang nagpatigbabaw kanimo mahitungod kon nganong giisyu ang pamahayag sa pamilya?

Basaha ang parapo 1–3 sa pamahayag sa pamilya, nga pangitaon kon unsay gitudlo sa Dios bahin sa pipila sa mga hilisgotan nga anaa sa pisara.

Pagtutok sa mga kamatuoran nga mosangpot sa pagkakabig ug pagbaton og hugot nga pagtuo kang Jesukristo: Ang kalihokan sa ubos nagsugyot og usa ka paagi sa pagpahayag sa mga estudyante sa mga baroganan sa pagkakabig nga ilang mailhan. Alang sa tabang sa pagtudlo niini, tan-awa ang pagbansay nga nag-ulohang “Tutoki ang mga kamatuoran nga modala ngadto sa pagkakabig ug pagpalig-on sa hugot nga pagtuo diha ni Jesukristo” sa Pagpalambo sa mga Kahanas sa Magtutudlo: Itudlo ang Doktrina. Ikonsiderar ang pagpraktis sa kahanas nga “Pagsukna og mga pangutana nga makatabang sa mga estudyante sa pag-ila ug pagpahayag sa mga baroganan sa pagkakabig.”

Ikonsiderar ang pagdapit sa mga estudyante sa pagsulat og mga kamatuoran nga ilang makita tapad sa konektadong hilisgotan diha sa pisara. Pwede usab nilang ipakigbahin kon sa unsang paagi makatabang nila ang kamatuoran nga ilang gisulat aron mahisgotan ang konektadong hilisgotan.

Ang mosunod mao ang pipila ka kamatuoran nga mahimong hisgotan sa mga estudyante:

• Mahinungdanon ang pamilya sa plano sa Langitnong Amahan para sa Iyang mga anak.

• Ang pagkalalaki ug pagkababaye [gender] usa ka importante nga kinaiya sa indibidwal nga pagkatawo ug katuyoan.

• Ang plano sa Dios makahimo sa mga relasyon sa pamilya nga magpadayon human sa kamatayon.

Mahimong maayong kahigayonan nga ipakigbahin sa mga estudyante ang ilang mga panglantaw o isukna ang ilang mga pangutana.

Ang mosunod nga tulo ka seksiyon sa leksiyon maghisgot sa matag usa sa mga kamatuoran sa ibabaw. Depende sa panahon ug sa panginahanglan sa imong mga estudyante, pagpilig usa o kapin pa niini nga mga kamatuoran nga tutokan. O pwede nimong tun-an ang uban pang mga kamatuoran aron mas masabtan ang mga pangutana ug panginahanglan sa mga estudyante.

1. Mahinungdanon ang pamilya sa plano sa Langitnong Amahan para sa Iyang mga anak.

Ikonsoderar ang pagpares-pares sa mga estudyante. Dapita ang mga magkapares nga magpulihanay sa pagpakigbahin sa plano sa Langitnong Amahan sa kaluwasan kotob sa ilang mahimo sulod sa usa ka minuto. Dasiga ang mga estudyante nga ikonsiderar ang kinabuhi sa wala pa dinhi, mortal, ug human niini nga kinabuhi nga mga parte sa plano.

• Sa unsang paagi nakasentro ang pamilya sa plano sa Langitnong Amahan sa kaluwasan sa kinabuhi sa wala pa dinhi magpuyo sa kalibotan? Sa mortalidad? Sa atong mga kinabuhi human dinhi?

• Kon nasayod si Satanas niini bahin sa pamilya, sa imong hunahuna unsa kahay iyang tubag bahin sa mga kamatuoran bahin sa pamilya?

Aron tabangan ang mga estudyante nga mas makasabot kon nganong mahinungdanon ang pamilya sa plano sa Dios, ikonsiderar ang pagdapit nila sa pagpanukiduki sa kasulatan ubos sa “Banay” sa Giya ngadto sa mga Kasulatan. Dugang pa, pwede nimong iapod-apod ang mosunod nga pamahayag aron indibidwal nga mabasa sa mga estudyante. Ikonsiderar ang pagdasig sa mga estudyante nga markahan ang mga parte sa pamahayag nga mopatigbabaw kanila.

Si Elder D. Todd Christofferson sa Korum sa Napulog Duha ka Apostoles mitudlo:

Kay nasayod nganong mibiya kita sa presensya sa atong Langitnong Amahan ug kon unsay gikinahanglan aron makabalik ug mahimaya uban Kaniya, klaro kaayo nga walay butang kalabut sa atong panahon sa yuta nga mas importante kay sa pisikal nga pagkatawo ug espirituhanong pagkatawo pag-usab, ang duha ka kinahanglanon sa kinabuhing dayon. …

Ang pamilya nga gitukod diha sa kaminyoon sa lalaki ug babaye nagsangkap sa labing maayo nga kahimtang aron ang plano sa Dios molambo—ang kahimtang alang sa pagkatawo sa mga anak, nga moabut diha sa kaputli ug kainosente gikan sa Dios, ug ang palibot alang sa pagkat-on ug pagpangandam nga ilang gikinahanglan sa malampuson nga mortal nga kinabuhi ug kinabuhing dayon sa kalibutan nga moabut. (D. Todd Christofferson, “Nganong Kaminyoon, Nganong Pamilya,” Liahona, Mayo 2015, 51–52)

Human sa ilang panahon sa pagpangita sa mga kasulatan ug sa pamahayag, pwedeng hisgotan sa mga estudyante ang mosunod nga mga pangutana diha sa magkapares o uban ang gagmayng grupo.

• Unsay imong nakat-onan bahin kon nganong mahinungdanon ang pamilya sa plano sa Langitnong Amahan?

• Sa unsang paagi nimo nakita ang mga pamilya nga tabangan ang mga indibidwal nga mangandam “para sa malamposong mortal nga kinabuhi ug mahangtorong kinabuhi sa umaabot nga kalibotan”?

• Sa unsang paagi kining mga pagtulun-an makatabang nimo sa pagtubag sa mga pangutana ug kabalaka bahin sa kaminyoon ug pamilya?

2. Ang gender maoy usa ka importante nga karakter sa indibidwal nga pagkatawo ug katuyoan.

Konsideraha ang paghatag sa mga estudyante og panahon nga indibidwal nga tun-an ang pipila sa mga kapanguhaan sa ubos. Ang mosunod nga mga pangutana makagiya nila samtang magtuon:

• Nganong ang gender usa ka importanteng karakter sa indibidwal nga pagkatawo ug katuyoan?

• Sa unsang paagi maisogon natong itudlo ang mga kamatuoran bahin sa gender samtang likayan nga mahimong dili sensitibo o walay respeto sa uban?

“Ang Mahangtoron nga Kinaiyahan ug Katuyoan sa Pagkalalaki ug Pagkababaye [Gender]” (Materyal sa Pagpangandam sa Klase sa Ang Mahangtoron nga Pamilya [2022], 29–33) (Timan-i ang tulo ka seksiyon niini nga kapanguhaan nga gisugdan og mga pangutana.)

“Transgender: Pagsabot sa imong Kaugalingon” sa “seksiyon nga Tabang sa Kinabuhi” sa Librarya sa Ebanghelyo

“Transgender: Supporting Others” sa seksiyon nga “Tabang sa Kinabuhi” sa Librarya sa Ebanghelyo

Kon walay akses ang mga estudyante niini nga mga kapanguhaan, ikonsiderar ang paghimog mga kopya sa leksiyon 7 sa manwal sa institute nga Materyal sa Pagpangandam sa Klase sa Ang Mahangtoron nga Pamilya aron tun-an sa mga estudyante alang sa klase.

Human sa igong panahon sa pagtuon sa mga estudyante, pwedeng ipakigbahin sa mga boluntaryo ang mga panabot nga ilang nakat-onan.

Ingon nga bahin sa panaghisgot, ikonsiderar ang pagpakigbahin sa pamahayag ni Presidente Russell M. Nelson nga naa sa “Dugang nga mga Kapanguhaan” ug dapita ang mga estudyante nga ipakigbahin ang kahulogan niini para nila.

Ikonsiderar ang pagpakigbahin kon sa unsang paagi napanalanginan ang imong kinabuhi pinaagi sa pagbaton og mahangtorong panglantaw bahin sa imong pagkatawo ug katuyoan.

3. Ang plano sa Dios makahimo sa mga relasyon sa pamilya nga magpadayon human sa kamatayon.

Sa dili pa basahon sa mga estudyante ang mosunod nga mga tudling, pwede nimo silang sultihan bahin sa imong kaila nga naglisod tungod sa kamatayon sa usa ka sakop sa pamilya. O pwede nimong dapiton ang mga estudyante sa paghunahuna sa ilang kaila nga nagbangutan sa kamatayon sa usa ka sakop sa pamilya.

Basaha ang 1 Mga Taga-Corinto 15:22 ug Doktrina ug mga Pakigsaad 130:2, nga mangita kon unsang paglaom ang makaplagan diha kang Jesukristo dihang mamatay ang usa ka minahal.

• Sa unsang paagi ang mga kamatuoran sa plano sa Dios niini nga mga bersikulo makahatag og kusog niadtong nag-antos sa maong pagkawala?

• Sa unsang paagi ang mga pagtulun-an sa ikatulong parapo sa pamahayag sa pamilya makaapektar sa tawong nag-antos tungod sa kamatayon sa usa ka minahal?

Aron tabangan ang mga estudyante nga masabtan ang mahangtorong kinaiyahan sa mga pamilya diha sa plano sa Dios, pwede nimong ipasalida ang biyo nga “Plan of Salvation—We’re Still a Family” (4:47), nga anaa sa ChurchofJesusChrist.org. Ikonsiderar ang pagdapit sa mga estudyante nga pamalandongan kon sa unsang paagi nakaapektar niining batan-ong lalaki ang mga pagtulun-an sa Manluluwas bahin sa pamilya.

Panapos

Sa pagtapos sa leksiyon, pwede nimong dapiton ang mga estudyante nga pamalandongan sa hilom ug irekord ang ilang mga tubag sa mosunod nga mga pangutana. Ang mga boluntaryo mahimong mopakigbahin sa ilang gisulat.

• Unsay imong nakat-onan karon nga nakatabang nimong mobating mas nasuod sa Langitnong Amahan ug kang Jesukristo?

• Unsay imong nakat-onan bahin sa kaimportante sa pamilya diha sa plano sa Langitnong Amahan?

Dugang nga mga Kapanguhaan

Asa ko makakat-on kon sa unsang paagi maisogong itudlo ang mga kamatuoran bahin sa sensitibong mga hilisgotan samtang gilikayan nga mahimong dili sensitibo o walay respeto sa uban?

Tan-awa ang mga seksiyon ubos sa “Si Presidente Oaks sa mga Isyu sa LGBTQ” ug “Si Elder Gilbert sa mga Isyu sa LGBTQ” sa Dallin H. Oaks and Clark C. Gilbert, “Stand Fast with Love in Proclaiming Truth” (Ensign College devotional, Mayo 17, 2022), ensign.edu.

Tan-awa ang Dallin H. Oaks ug Kristen M. Oaks, “Stand for Truth” (tibuok kalibotang debosyonal para sa mga young adult, Mayo 21, 2023), ChurchofJesusChrist.org, gikan sa time code 36:02 hangtod 38:34.

Unsa kaha kon mobati ang mga tawo nga dili sila apil sa mga pagtulun-an sa pamahayag sa pamilya?

Si Presidente Dallin H. Oaks sa Unang Kapangulohan mipakigbahin:

Ang pipila kinsa naminaw niini nga mensahe tingali nanag-ingon, “Pero unsa na man lang ko?” Nasayod kita nga daghang takos ug talagsaong mga Santos sa Ulahing mga Adlaw ang kasamtangang nagkulang sa sulundon nga mga oportunidad ug mahinungdanong mga gikinahanglan alang sa ilang pag-uswag. Ang pagkawala maminyo, pagkawalay anak, kamatayon, ug diborsyo makapakyas sa mga mithi ug nagpalangan sa katumanan sa gisaad nga mga panalangin. … Apan kini nga mga pagkawang temporaryo lamang. Ang Ginoo misaad nga sa kahangtoran walay panalangin nga ihikaw sa iyang mga anak kinsa nagsunod sa mga sugo, mga matinuoron sa ilang mga pakigsaad, ug nagtinguha sa unsay matarong. (Dallin H. Oaks, “The Great Plan of Happiness,” Ensign, Nob. 1993, 75)

Nganong mahinungdanon ang kaminyoon diha sa plano sa Dios?

Si Elder Robert D. Hales (1932–2017) sa Korum sa Napulog Duha ka Apostoles mipakigbahin:

Ang plano sa Amahan naghatag kanato og agianan aron mapanunod ang kinabuhing dayon, ang kinabuhi nga gipamunoan sa atong langitnong mga ginikanan. Diha sa plano, “diha sa Ginoo, ang babaye dili gawas sa lalaki, [ni] ang lalaki gawas sa babaye, diha sa Ginoo” [1 Mga Taga-Corinto 11:11]. Ang labing mahinungdanon sa kinabuhing dayon naglakip sa mahangtorong kaminyoon sa lalaki ug sa babaye, nga maoy mahinungdanon nga bahin sa pagkahimong sama sa atong langitnong mga ginikanan. (Robert D. Hales, “Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015, 29)

Ngano kahang daghan man kaayo ang mobatok sa pamilya?

Si Presidente Dallin H. Oaks sa Unang Kapangulohan mitudlo:

Ang labing makapaugtas nga pagsupak ni Satanas gitumong ngadto sa unsa man ang labing importante niana nga plano sa [Dios]. Busa, naningkamot siya sa pagsupak sa kalamboan paingon sa kahimayaan pinaagi sa pagguba sa kaminyoon, dili pag-awhag sa pagbaton og mga anak, o pagpalibog sa gender. Hinoon, kita nasayod nga sa kadugayan, ang balaanong katuyoan ug plano sa atong mahigugmaon nga Langitnong Amahan dili mausab. Ang personal nga mga kahimtang mahimong mausab, ug ang plano sa Dios nagpasalig nga sa kadugayan, ang mga matinud-anon kinsa nagtuman sa ilang mga pakigsaad makabaton og oportunidad nga mahimong angayan alang sa matag gisaad nga panalangin. (Dallin H. Oaks, “Balaanong Gugma diha sa Plano sa Amahan,” Liahona, Mayo 2022, 103)

Si Elder Robert D. Hales (1932–2017) sa Korum sa Napulog Duha ka Apostoles miingon:

Ang kaminyoon ug pamilya ubos sa pag-ataki tungod kay si Satanas nasayod nga kini importante sa pag-angkon og kinabuhing dayon—ingon ka importante sama sa Paglalang, sa Pagkapukan, ug sa Pag-ula ug Pagkabanhaw ni Jesukristo. Napakyas sa paglaglag ni bisan kinsa niadtong mga haligi sa plano, si Satanas nagtinguha sa pagguba sa atong pagsabot ug paggamit sa kaminyoon ug pamilya. (Robert D. Hales, “Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015, 29)

Asa ko makakat-on og dugang bahin sa mga pagtulun-an sa Simbahan sa mga isyu sa transgender?

Tan-awa ang Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.23, ChurchofJesusChrist.org.

Sa unsang paagi ko mapanalanginan tungod sa pagtutok sa akong relasyon sa akong langitnong mga ginikanan?

Si Presidente Russell M. Nelson mipasabot:

Kinsa man kamo?

Una ug labing importante, kamo anak sa Dios.

Ikaduha, isip miyembro sa Simbahan, kamo anak sa pakigsaad. Ug ikatulo, kamo disipulo ni Jesukristo.

Karong gabhiona, mangamuyo ako kaninyo nga dili hulipan kining importante kaayo ug dili mausab nga mga timailhan og laing uban pa, tungod kay ang pagbuhat sa ingon makapugong sa inyong pag-uswag o dili makiangayong mobutang kaninyo sa usa ka naandan [stereotype] nga mahimong mopakgang sa inyong mahangtorong pag-uswag. …

Adunay nagkadaiyang timaan nga mahimong importante kaayo kaninyo, siyempre. Palihog ayaw ko saypa sa pagsabot. Wala ako nagsulti nga ang ubang mga titulo ug mga timailhan dili mahinungdanon. Ako nag-ingon lamang nga kinahanglan walay timailhan ang motangtang, mohulip, o mag-una sa prayoridad niining tulo ka malahutayon nga mga titulo: “anak sa Dios,” “anak sa pakigsaad,” ug “disipulo ni Jesukristo.” (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org)

Si Sister Joy D. Jones, kanhi Kinatibuk-ang Presidente sa Primary, mitudlo:

Ang Espiritu momatuod sa matag usa nato sa atong balaanong bili. Sa tinuod ang pagkahibalo nga ikaw [anak] sa Dios makaapekto sa matag aspeto sa imong kinabuhi ug makagiya nimo sa pagserbisyo nga imong ihatag matag adlaw. Gipasabot kini ni Presidente Spencer W. Kimball (1895–1985) gamit kining mahimayaong mga pulong:

“Ang Dios mao ang inyong Amahan. Siya naghigugma kaninyo. Siya ug ang inyong inahan sa langit mihatag og bili ninyo nga dili masukod. … Talagsaon kamo. Walay sama, gihimo sa mahangturong salabotan nga makaangkon og kinabuhing dayon.

“Kinahanglan dili na kamo magduha-duha bahin sa inyong bili isip usa ka indibidwal. Ang tibuok tuyo sa plano sa ebanghelyo mao ang paghatag og oportunidad sa matag usa ninyo nga makaabot sa inyong hingpit nga potensyal, nga mao ang mahangturong kauswagan ug sa posibilidad sa pagkadios” [“Privileges and Responsibilities of Sisters,” Ensign, Nob. 1978, 105]. …

… Samtang bayawon kita sa Manluluwas ngadto sa mas taas nga lugar, mas klaro natong makita dili lang kon kinsa kita apan kita usab mas mahiduol ngadto Kaniya nga sukad atong mahunahuna. (Joy D. Jones, “Bili nga dili Masukod,”Liahona, Nob. 2017, 14, 15)

Dugang nga mga Kalihokan sa Pagkat-on

Alternatibo nga pagsugod

Ikonsiderar ang pagsugod sa klase pinaagi sa pagpakigbahin sa mosunod nga senaryo:

Samtang nagsiksik sa online alang sa usa ka kalihokan sa klase, nakakita si Lydia og pipila ka mga artikulo nga milantugi nga ang tradisyonal nga pamilya (usa ka minyo nga lalaki ug babaye nga may mga anak) wala na kinahanglana sa katilingban. Sa panahon sa klase pipila ka adlaw ang milabay, nakaamgo si Lydia nga siya nag-inusara sa pagpaninguha og depensa sa importansya sa tradisyonal nga pamilya. Daghan sa iyang kauban sa klase mibutang og gamay o walay paghatag og prayoridad sa kaminyoon o sa pagbaton og mga anak. Ngadto kanila, ang kaminyoon ug mga anak babag sa indibidwal nga katumanan sa usa ka tawo. Kini nga kasinatian maghatag kang Lydia og pipila ka makatugaw nga mga pangutana ug mga pagbati.

Pwede nimong dapiton ang mga estudyante nga analisahon ang senaryo gamit ang mga pangutana nga parehas sa mosunod:

• Unsa kaha ang mga pangutana o mga pagbati nga anaa si Lydia?

• Unsay imong nahibaloan bahin sa plano sa Langitnong Amahan nga makatabang kang Lydia?

Pwedeng pangitaon sa mga estudyante ang kamatuoran bahin niini nga hilisgotan samtang ilang tun-an ang “Ang Pamilya: Usa ka Pamahayag ngadto sa Kalibotan” sa tibuok semana.

“Ang matag usa hinigugmang espiritu nga anak nga lalaki o babaye sa langitnong mga ginikanan.”

Aron dugang mahisgotan kini nga ideya gikan sa pamahayag sa pamilya, pwede nimong dapiton ang mga estudyante nga susihon kon unsay ilang gibati bahin ilang pagkatawo ingon anak sa langitnong mga ginikanan. Ikonsiderar ang pagpakigbahin sa mga pamahayag ni Presidente Russell M. Nelson ug Sister Joy D. Jones gikan seksiyon nga “Dugang nga mga Kapanguhaan.” Pwede kang mangutana sa mga estudyante og parehas sa mosunod:

• Unsa may mipatigbabaw kaninyo gikan niini nga mga pahayag?

• Unsay nakatabang ninyo nga magmapasalamaton sa inyong pagkatawo isip anak nga lalaki o anak nga babaye sa langitnong mga ginikanan?

• Sa unsang paagi ang pagtutok sa atong dapit diha sa pamilya sa Dios makatabang sa usa ka tawo nga nag-antos sa lisod nga mga kahimtang dinhi sa yuta?

Pwede kang modangop ngadto sa leksiyon 176, “Among Balaang Pagkatawo ug Katuyoan,” ingon og dugang nga kapanguhaan.

Pag-angkon og espirituhanong kahibalo

Aron mas maugmad ang bisan unsang seksiyon niini nga leksiyon, pwede nimong dapiton ang mga estudyante nga maggrupo-grupo nga tinagutlo. Pwedeng basahon sa matag estudyante ang usa sa mga baroganan sa pag-angkon og espirituhanong kahibalo (mga parapo 5–12 sa Mahinungdanon nga Dokumento sa Doktrinal nga Kahanas [2023]). Pwedeng mangitag mga panglantaw ang mga estudyante nga makatabang nila nga mas masabtan ang usa sa seksiyon sa leksiyon karong adlawa.