Leksiyon 176: Alang sa Kalig-on sa mga Kabatan-onan: Paghimo og mga Pagpili

Atong Balaanong Pagkatawo ug Katuyoan

Kita Adunay Diosnong Kinaiya ug Kapalaran

Isip mga anak sa langitnong mga ginikanan, pwede kitang mahisama nila ug mapanunod kon unsay anaa nila. Kini nga mga panalangin anaa sa matag usa kanato tungod kang Jesukristo ug sa Iyang Pag-ula. Kini nga leksiyon makatabang sa mga estudyante nga mobati nga isip mga anak sa Dios, aduna silay diosnong kinaiya ug katuyoan.

Posibleng mga Kalihokan sa Pagkat-on

Kinsa ko ug unsay akong katuyoan?

Sugdi ang leksiyon pinaagi sa pagtabang sa mga estudyante nga maghunahuna kon unsa ka sayon nga malimtan ang atong balaanong pagkatawo ug bili. Mahimo nimo kini pinaagi sa pagpakigbahin sa bidyo nga “Ang Atong Tinuod nga Pagkatawo” (3:39) gikan sa time code nga 0:00 hangtod 1:14. Dapita ang mga estudyante sa paghunahuna bahin kon unsaon nato pagtan-aw ang atong kaugalingon nga sama sa maot nga itik. Dayon pwede nimong pahimoon og senaryo ang mga estudyante nga sama sa mosunod, diin mahimong bation sa usa ka tawo nga sama sa usa ka maot nga itik dihang malimot sila sa ilang balaanong pagkatawo isip anak sa Dios.

O pwede kang magsugod pinaagi sa pagpakigbahin og usa ka senaryo nga sama sa mosunod, nga ipahaom ang bisan unsang mga detalye aron mapakita ang mga gikabalak-an sa imong mga estudyante.

Si Amelia 15 anyos. Kanunay siyang mobati nga nag-inusara ug wala gitagad sa uban. Pangandoy niya nga makabaton og daghang higala ug lahi og hitsura kay kaniya. Nakita ni Amelia ang uban nga naghimog importanteng mga butang apan wala maghunahuna nga makahimo siya og bisan unsa nga importante. Nagduda siya iyang kaugalingong bili.

• Unsa ang makapalisod sa paghinumdom sa atong pagkatawo isip mga anak sa Dios?

Ipasabot nga atol niini nga leksiyon ang mga estudyante makat-on bahin sa ilang balaanong pagkatawo isip mga anak nga babaye ug mga anak nga lalaki sa Dios. Dapita sila nga maghunahuna og pipila ka paagi nga maapektohan ang ilang kinabuhi sa pagkahibalo nga sila mga anak sa Dios. Pwede nilang isulat ang ilang mga hunahuna diha sa ilang mga journal sa pagtuon. Dapita ang mga estudyante nga maminaw sa Espiritu Santo nga nagtudlo nila bahin sa ilang balaanong pagkatawo ug katuyoan.

Diosnong kinaiya ug katuyoan

Para sa mosunod nga kalihokan, pwede nimong bahinon ang klase sa gagmayng grupo. Dapita ang mga estudyante nga gamiton ang handout nga “Akong Balaanong Pagkatawo ug Katuyoan” sa pag-andam og tubag kang Amelia. Pagtudlo og lider sa grupo nga makatabang sa ilang grupo nga mahimo ang lainlaing papel. Pananglitan, ang usa ka estudyante maoy mobasa, ang lain maoy mosulat sa tubag, ug ang lain pa maoy mopresentar sa klase.

Pwedeng mangita og dugang nga mga kasulatan o mga pamahayag ang mga estudyante pinaagi sa pagpangita sa “diosnong kinaiya” o “balaanong kapalaran” diha sa Librarya sa Ebanghelyo.

Basaha ang mga kasulatan ug mga pamahayag diha sa handout. Pangitaa ang mga hugpong sa mga pulong nga sa imong hunahuna makatabang kang Amelia, ug ikonsiderar kon nganong makatabang kini.

Akong Balaanong Pagkatawo ug Katuyoan

1. Basaha kini nga pamahayag ni Elder Dieter F. Uchtdorf sa Korum sa Napulog Duha ka Apostoles, nga mangita sa mga tinguha sa Manluluwas para nimo:

Ako nagtuo nga ang Manluluwas nga si Jesukristo gusto nga inyong makita, mabati, ug mahibaloan nga Siya mao ang inyong kalig-on. Nga uban sa Iyang tabang, walay kinutoban ang unsay inyong mahimo. Nga ang inyong potensiyal walay kinutoban. Siya gusto nga kamo makakita sa inyong kaugalingon sa paagi nga Siya nakakita kaninyo. Ug kana lahi kaayo gikan sa paagi sa pagtan-aw sa kalibotan kaninyo.

Ang Manluluwas mopahayag, sa sigurado gayod nga paagi, nga kamo usa ka anak nga babaye o anak nga lalaki sa Makagagahom nga Dios. Ang inyong Langitnong Amahan mao ang labing mahimayaon nga binuhat sa uniberso, puno sa gugma, hingpit nga kalipay, kaputli, kabalaan, kahayag, grasya, ug kamatuoran. Ug moabot ang adlaw nga Siya gusto nga kamo mopanunod sa tanan nga Iyang gipanag-iya. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 9–10)

Basaha ang Doktrina ug mga Pakigsaad 14:7, nga mangita kon unsay gitinguha sa Langitnong Amahan nga ihatag kanimo.

---

2. Basaha kini nga pamahayag ni Sister Michelle D. Craig, kanhi Kinatibuk-ang Kapangulohan sa Young Women, nga mangita sa iyang tambag ngadto ni bisan kinsa nga mangutana bahin sa ilang balaanong bili:

Tingali ang labing importanteng butang nga klaro natong makita kon kinsa ang Dios ug kinsa gayod kita—anak nga mga lalaki ug anak nga mga babaye sa langitnong mga ginikanan nga adunay “diosnong kinaiya ug mahangtorong kapalaran” [tema sa Young Women, ChurchofJesusChrist.org]. Hangyoa ang Dios sa pagpadayag niini nga mga kamatuoran nganha kaninyo, uban sa unsay Iyang gibati mahitungod kaninyo. (Michelle D. Craig, “Mata aron sa Pagtan-aw,” Liahona, Nob. 2020, 15)

Basaha ang Doktrina ug mga Pakigsaad 18:10–13, nga mangita kon unsay gibati sa Langitnong Amahan bahin kanimo.

---

3. Basaha kini nga pamahayag ni Presidente Susan H. Porter, Kinatibuk-ang Presidente sa Primary, nga mangita kon nganong kinahanglan kitang mahibalo kon unsay gibati sa Langitnong Amahan kanato:

Kon kamo masayod ug makasabot unsa ka hingpit kamo nga gihigugma isip usa ka anak sa Dios, kini makausab sa tanan. Makausab kini unsay inyong gibati sa inyong kaugalingon kon kamo makahimo og mga sayop. Makausab kini unsay inyong bation kon mahitabo ang malisod nga mga butang. Makausab kini sa inyong pagsabot sa mga sugo sa Dios. Makausab kini sa inyong pagtan-aw sa uban ug sa inyong kapasidad sa paghimo og kalainan. (Susan H. Porter, “Ang Gugma sa Dios: Ang Labing Hingpit nga Kalipay sa Kalag,” Liahona, Nob. 2021, 33)

---

4. Basaha kini nga pamahayag ni Presidente Russell M. Nelson, nga mangita kon unsay Iyang gitudlo bahin sa mga gilaoman sa Langitnong Amahan alang sa matag usa kanato:

Ang plano sa Langitnong Amahan alang sa Iyang mga anak magtugot kanato nga magpuyo kon asa ug sa unsang paagi Siya nagpuyo ug sa kataposan anam-anam nga mamahimong mas sama Kaniya. Ang Iyang Plano literal nga mohimo sa labing buhong nga mga panalangin sa tanang kahangtoran nga maanaa alang kanato, lakip sa potensiyal alang kanato nga mamahimong “isigkamanununod uban kang Kristo.” [Mga Taga-Roma 8:17]. (Russell M. Nelson, “Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org)

Kon makaayo sa mga estudyante, pwede nimong ipatiwas og tan-aw ang bidyo nga “Ang Atong Tinuod nga Pagkatawo” (3:39) gikan sa time code nga 1:15 hangtod 3:39. Pwedeng ihunong og kadiyot sa mga estudyante ang ilang panaghisgot sa grupo aron tan-awon ang bidyo. Dayon dapita ang mga estudyante nga dugangan ang gusto nilang ipakigbahin kang Amelia.

Kon natapos na sa mga estudyante ang panaghisgot sa ilang grupo, dapita silang ireport ang ilang natun-an diha sa klase. Aron madasig ang panaghisgot sa klase, pwede nimong dapiton ang mga estudyante nga ipakigbahin ang unsay ilang nakit-an nga makahuloganon kabahin sa mga komento sa uban.

Ang kamahinungdanon kon kinsa ako ug mamahimong unsa

Ang pagsulat sa journal makatabang sa mga estudyante nga mapalawom ang ilang pagsabot ug mas mahibalo sa ilang mga gibati. Makatabang usab kini sa mga estudyante sa pagdapit sa Espiritu Santo sa pagtudlo nila. Dapita ang mga estudyante sa pagtubag sa mosunod nga mga pangutana diha sa ilang mga journal sa pagtuon.

• Unsay imong gihunahuna o gibati samtang imong gitun-an ang imong balaanong pagkatawo ug katuyoan isip anak sa Dios?

• Sa imong hunahuna, unsa kahay epekto niini sa mga desisyon nga imong himoon o sa paagi sa imong pagtratar sa uban?

• Unsang mga kasinatian ang naa nimo nga nakatabang nga mabati nimo nga anak ka sa Dios nga dunay balaanong kapalaran?

Dapita ang andam nga mga estudyante nga ipakigbahin ang ilang mga gibati ug mga kasinatian bahin sa kaimportante sa ilang diosnong kinaiya ug kapalaran.

Ikonsiderar ang pagpamatuod bahin sa balaanong pagkatawo ug katuyoan sa matag anak sa Dios.

Dugang nga mga Kapanguhaan

Sa unsang paagi posible ang pag-angkon sa akong mahangturong kapalaran?

Si Elder Gary E. Stevenson sa Korum sa Napulog Duha ka Apostoles mitudlo:

Ako modapit kaninyo sa pagduol ngadto kang Kristo (tan-awa sa Moroni 10:32). Walay posible sa mahangtorong plano sa Dios kon wala Siya, ug uban Kaniya, makab-ot ang matag maayong butang. …

… Pinaagi ni Jesukristo ug sa Iyang maulaon nga grasya, makabaton kamo og kalipay niini nga kinabuhi ug sa sunod nga kinabuhi. Makab-ot ninyo ang inyong balaanon nga kapalaran sa pagdawat sa tanan nga anaa Kaniya ug sa pagpuyo sa matang sa kinabuhi nga Siya nangulo, diin mao ang “kinabuhi nga dayon … ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7). (Gary E. Stevenson, “Inyong Balaanon nga Kapalaran,” Alang sa Kalig-on sa mga Kabatan-onan, Ene. 2022, 5)

Ang Alang sa Kalig-on sa mga Kabatan-onan: Usa ka Giya sa Paghimo og mga Pagpili mipasabot:

Kamo mga minahal nga espiritu nga anak sa Dios. Ang iyang mahinungdanon nga laraw sa kalipay nakapahimo niining posible alang kaninyo aron motubo sa espirituhanong paagi ug molambo ang inyong balaan nga potensiyal. Mao kini ang hinungdan kon nganong gipadala Niya si Jesukristo nga mamahimo nga inyong Manluluwas. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 4)

Unsa ang akong diosnong kinaiya?

“Ang Pamilya: Usa ka Pamahayag ngadto sa Kalibotan” mipahayag:

Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios. Ang pagkalalaki ug pagkababaye usa ka mahinungdanon nga kinaiya sa tagsa-tagsa sa kinabuhi nga wala pa dinhi sa yuta, sa pagkamortal, ug sa walay kataposan nga pag-ila ug katuyoan. (“Ang Pamilya: Usa ka Pamahayag ngadto sa Kalibotan,” ChurchofJesusChrist.org)

Si Elder Dale G. Renlund sa Korum sa Napulog Duha ka Apostoles mitudlo:

Kita adunay “usa ka diosnong kinaiya.” Mao kini ang mahinungdanong bahin kon si kinsa kita. Kini sa espirituhanong paagi “kaliwat,” nga napanunod gikan sa atong langitnong mga ginikanan, ug walay gikinahanglan nga paningkamot sa atong bahin. Kini ang atong labing importante nga kailhanan [identity], dili igsapayan kon giunsa nato sa pagpili ang pag-ila sa atong kaugalingon. Ang pagsabot niining mahinungdanong kamatuoran importante sa tanan apan ilabi na sa mga indibidwal nga sa kasaysayan nahisakop ngadto sa minoriya nga mga grupo sa dinaugdaug, o sa gilupig. Hinumdomi nga ang inyong labing importante nga pagkatawo may kalabotan sa inyong diosnong kinaiya isip anak sa Dios. (Dale G. Renlund, “Ang Inyong Diosnong Kinaiya ug Mahangtorong Padulngan,” Liahona, Mayo 2022, 75)

Unsay makatabang nako nga madiskobrehan ang akong diosnong kinaiya ug mahangtorong padulngan?

Si Presidente Russell M. Nelson midapit:

Pagkat-on kon kinsa gayud kamo.

Paggahin og panahon sa paghunahuna sa mainampoong paagi kabahin niini nga mga kamatuoran:

• Kamo pinili nga anak nga lalaki o anak nga babaye sa Dios.

• Kamo gilalang diha sa Iyang panagway.

• Gitudloan kamo didto sa kalibutan sa espiritu sa pag-andam kaninyo alang sa bisan unsa ug tanang butang nga inyong masugatan atol niining ulahi nga bahin niining ulahing mga adlaw. Kana nga pagtudlo magpabilin sulod kaninyo!

(Russell M. Nelson, “Pagkahimo nga Tinuod nga mga Milenyal” [tibuok kalibotan nga debosyonal alang sa mga young adult, Ene. 10, 2016], broadcasts.ChurchofJesusChrist.org)

Dugang nga mga Kalihokan sa Pagkat-on

Mga pangutana ug mga kabalaka sa mga estudyante

Sa pagsugod sa klase, mahimong makatabang ang pagdapit sa mga estudyante nga isulat ang mga pangutana o mga kabalaka nila o sa ilang kaila bahin sa ilang balaanong pagkatawo ug katuyoan nga dili lang ibutang ang ilang mga ngalan. Pwede nimong kolektahon ang mga papel ug magpili og pipila ka pangutana nga tubagon panahon sa leksiyon.

Pagbati sa gugma sa Dios

Pipila sa mga estudyante mahimong makabenepisyo sa pagkat-on kon sa unsang paagi sila mas mobati sa gugma sa Dios para nila. Mahimong ilhon sa mga estudyante ang unsay ilang nakat-onan bahin sa gugma sa Dios gikan sa mosunod nga pamahayag ni Elder Dale G. Renlund sa Kurom sa Napulog Duha ka Apostoles.

Ikaw hinigugmang [anak sa Dios]. Walay butang nga buhaton nimo—o dili buhaton—ang makausab niana. Gimahal ka sa Dios tungod kay ikaw Iyang espiritu nga [anak]. Usahay kita mahimong dili mobati sa Iyang gugma, apan anaa kini sa kanunay. Ang gugma sa Dios hingpit. Ang atong abilidad sa pagbati niana nga gugma ang dili hingpit. (Dale G. Renlund, “Ang Inyong Diosnong Kinaiya ug Mahangtorong Padulngan,” Liahona, Mayo 2022, 70)

Pwede kang mangutana sa mga estudyante og sama niini:

• Unsay imong mahimo nga makatabang aron mabati nimo ang gugma sa Dios para nimo?

Dayon, pwede nimong ipasalida ang parte sa iyang pakigpulong human dayon niini nga pamahayag. Samtang himoon nimo kana, pwedeng ilista sa mga estudyante ang mga butang nga ilang mahimo aron mabati ang gugma sa Dios ug kon unsay angay nilang likayan. Dayon, pwedeng magpili ang mga estudyante og usa ka butang gikan sa ilang lista nga gusto nilang sugdan o hunongon sa paghimo.

Mga Bidyo

Ang mosunod nga mga bidyo makatabang sa mga estudyante nga masabtan ug mabati ang kaimportante sa ilang balaanong pagkatawo ug katuyoan.

Ang bidyo nga “Atong Balaanong Padulngan” (3:42) naglakip sa kabatan-onan nga nagpakigbahin kon sa unsang paagi ang ilang balaanong padulngan nakatabang sa ilang kinabuhi.

Ang bidyo nga “Nagdagan padulong sa Kahayag” (17:35) makatabang sa mga estudyante nga mabati ang kaimportante sa pagkahibalo sa ilang balaanong pagkatawo ug kapalaran. Pwede nimong hisgotan kon sa unsang paagi nausab ni Peter Johnson ang iyang kinabuhi pinaagi sa pagkat-on bahin kang Jesukristo ug sa iyang kaugalingon nga diosnong kinaiya ug pagkatawo.

Ang bidyo nga “Atong Mahangtorong Potensyal” (2:53) makatabang sa mga estudyante nga hisgotan kon unsay nakabalda nato gikan sa atong mahangtorong potensyal ug kon unsay atong mahimo aron mapabilin ang atong pagpunting ngadto sa Manluluwas ug kon unsay Iyang matanyag kanato.

Ang mosunod nga mga parte sa bidyo makapakita sa epekto sa paghinumdom sa atong diosnong kinaiya ug pagkatawo: “Ako Ba Anak sa Dios?” (10:24) gikan sa time code nga 2:22 hangtod 5:23 ug “Ang Pinili nga Henerasyon” (11:23) gikan sa time code nga 5:41 hangtod 7:13.