Leksiyon 175: Alang sa Kalig-on sa mga Kabatan-onan: Paghimo og mga Pagpili

Pagtakda og mga Tumong

Pagkahimong Mas sama sa Langitnong Amahan ug ni Jesukristo

Nagtinguha ang Langitnong Amahan nga ang tanan Niyang mga anak makaangkon og kinabuhing dayon (tan-awa sa Moises 1:39). Mouswag kita sa atong mga paningkamot nga mahimong sama sa Dios ug mobalik sa Iyang presensiya pinaagi sa pagtakda og personal nga mga tumong. Kini nga leksiyon makatabang sa mga estudyante nga epektibong makatakda og mga tumong ug makahimo og mga plano samtang naningkamot sila nga mas mahisama sa Dios uban sa Iyang tabang.

Posibleng mga Kalihokan sa Pagkat-on

Asa ka moadto? Unsaon nimo pag-adto didto?

Ipakita ang mapa sa kalibotan o mapa sa inyong lugar. Hangyoa ang mga estudyante nga ipakigbahin ang mga lokasyon nga ilang naadtoan o gustong adtoan. Hatagi og duha ka minuto ang mga estudyante sa paghimo og plano nga makatabang sa usa ka tawo nga mobiyahe paingon sa maong lokasyon. Pwedeng apil sa plano ang mga butang nga sama sa nahiangay nga paagi sa transportasyon, detalyado nga rota, ug mga galastohan. Pwedeng ipakigbahin sa mga estudyante ang ilang plano uban sa ilang pares.

• Sa unsang paagi ang paghimo og plano sa biyahe may kalabotan sa atong mortal nga mga kinabuhi?

Si Presidente M. Russell Ballard sa Korum sa Napulog Duha ka Apostoles mipakigbahin sa mosunod:

Ang masayod kon asa mo padulong ug unsaon ninyo pag-abot didto makahatag og kahulogan, katuyoan, ug kalamposan sa kinabuhi.

Ang uban maglisud sa pag-ila sa kalainan tali sa usa ka tumong ug usa ka plano hangtud nga makakat-on sila nga ang tumong usa ka destinasyon o kataposan, samtang ang plano mao ang rota aron makaabut mo didto. (M. Russell Ballard, “Mobalik ug Modawat,” Liahona, Mayo 2017, 62)

• Unsay mga katuyoan sa mga tumong ug mga plano?

  Dapita ang mga estudyante sa pagpamalandong sa ilang personal nga mga tumong ug mga plano pinaagi sa paghunahuna pag-ayo og mga pangutana nga sama sa mosunod:

• Unsa ka sagad kang magtakda og mga tumong alang sa imong kaugalingon ug maghimo og mga plano aron makab-ot kini?

• Unsa ang imong mga kalamposan ug kalisdanan?

• Asa ka naglaom nga dad-on sa imong mga tumong ug mga plano?

Sa tibuok leksiyon, awhaga ang mga estudyante sa pagtinguha sa giya sa Espiritu Santo samtang naghimo ug naningkamot sila sa ilang mga tumong ug mga plano.

Ang Dios naghatag nato og ehemplo

Samtang imong ipakita ang mosunod nga pahayag, ikonsiderar ang pagtangtang sa hugpong sa mga pulong nga “pagpahinabo sa pagka-imortal ug sa kinabuhi nga dayon sa tawo” ug ang pulong nga “kaluwasan” gikan sa unang parapo. Hangyoa ang mga estudyante nga butangan ang mga blangko sa tumong sa Dios ug sa ngalan sa Iyang plano. Dayon, pwedeng basahon sa mga estudyante ang Moises 1:39 o Alma 42:5 aron ilhon ang mga pulong nga gigamit ni Presidente Ballard. Pwede nimong ipasabot nga ang paggamit sa pulong nga “tawo” diha sa Moises 1:39 ug sa uban pang kasulatan (pananglitan sa, Genesis 1:27; Mormon 9:17) usa ka katibuk-an nga pakisayran sa mga mortal o katawhan, busa nagtumong sa mga lalaki ug mga babaye.

Si Presidente Ballard mipadayon sa pagtudlo:

Ang Dios, ang atong Langitnong Amahan, mihatag kanato sa hingpit nga ehemplo sa pagtakda og tumong ug pagplano. Ang iyang tumong mao “ang pagpahinabo sa pagka-imortal ug sa kinabuhi nga dayon sa tawo,” [Moises 1:39], ug ang Iyang pamaagi sa pagkab-ot niini mao ang plano sa kaluwasan. …

… Mituo ko nga ang usa ka importante nga yawe sa kalipay mao ang pagkat-on unsaon pagtakda ang kaugalingon natong mga tumong ug pag-establisar sa kaugalingon natong mga plano sulod sa gilatid nga mahangtorong plano sa atong Langitnong Amahan. (M. Russell Ballard, “Mobalik ug Modawat,” Liahona, Mayo 2017, 63)

• Unsay imong nakat-onan gikan niini nga pamahayag bahin sa kaugalingon nimong mga tumong ug mga plano?

  Usa sa mga kamatuoran nga pwedeng mailhan sa mga estudyante mao nga kita makasinati og kalipay pinaagi sa pagpaningkamot nga makab-ot ang personal nga mga tumong nga makatabang nato sa pagsunod sa plano sa Dios. Tabangi ang mga estudyante nga makasabot nga ang Dios mihimo niini nga posible pinaagi sa Manluluwas nga mabuhi kita hangtod sa kahangtoran, o makabaton ug imortalidad. Nagtinguha usab Siya nga mahimo kitang sama Niya ug ni Jesukristo ug mobalik sa pagpuyo uban Nila, o makabaton og kinabuhing dayon. Ang plano sa kaluwasan sa Dios naghimo niining mga panalangin nga posible.

• Ngano sa imong hunahuna nga kita makasinati og kalipay dihang tabangan kita sa atong mga tumong sa pagsunod sa plano sa Dios? (tan-awa sa 2 Nephi 2:25; Mosiah 2:41).

  Basaha ang Lucas 2:52, nga mangita sa mga paagi nga mitubo ang Manluluwas isip usa ka batan-on samtang Iyang gisunod ang plano sa Iyang Amahan.

• Nganong ang pagsunod sa ehemplo sa Manluluwas sa paglambo niini nga mga bahin mosangpot sa dugang nga kalipay?

Usa ka sundanan sa pag-uswag

Ipakita sa mga estudyante ang Personal nga Kalamboan: Giya nga Basahon sa Kabatan-onan. Ikonsiderar ang pagdapit og usa ka estudyante nga ipakigbahin kon sa unsang paagi kini magamit sa paghimo og mga tumong ug pagtukod og mga plano. Kon kinahanglan, ipasabot nga gidapit kita sa pagsunod sa ehemplo ni Jesukristo pinaagi sa pagtakda og mga tumong sa matag usa sa mosunod nga mga bahin: espirituwal, sosyal, intelektuwal, ug pisikal.

Aron maandam ang mga estudyante sa pagkab-ot sa ilang mga tumong, ikonsiderar ang pagrebyo sa seksiyon nga “Usa ka Sundanan sa Pag-uswag” diha sa Giya nga Basahon sa Kabatan-onan ([2019], 7–15) o sa paghatag sa handout nga giulohan og “Usa ka Sundanan sa Pag-uswag.” Grupoha nga nagtinag-upat ang mga estudyante, nga ang matag estudyante magtuon og lainlaing bahin sa sundanan. Dayon pwede nilang ipasabot sa ilang grupo kon unsay ilang nakat-onan.

Pwede usab ninyong tan-awon ang “Bidyo: Proseso sa Pagtakda og Tumong” (3:42), nga anaa sa ChurchofJesusChrist.org.

Usa ka Sundanan sa Pag-uswag

Diskobreha ang imong mga panginahanglan, mga gasa, ug mga talento. Sulayi ang pagpangutana og sama sa: Unsay gibati nako nga kinahanglan nakong makat-onan o mausab sa akong kinabuhi? Unsa nga mga talento o mga kahanas ang gusto nakong maangkon? Unsa nga espirituhanong pamatasan ang kinahanglan nakong mapalambo o mapausbaw? Unsaon nako pagtuman ang mga pakigsaad nga akong gihimo sa dihang gibunyagan ko? Kinsay pwede nakong serbisyohan? “Magtuon niini diha sa imong hunahuna; unya … mangutana kanako kon kini husto” (Doktrina ug mga Pakigsaad 9:8).

Pagplano aron sa paglambo. Sulayi ang pagpangutana og sama sa: Nganong importante man kini kanako? Sa unsang paagi kini makatabang kanako nga mahimong mas sama kang Jesukristo? Unsa nga mga buhat ang akong himoon aron makab-ot kini? Mabahin-bahin ba nako kini nga mga buhat ngadto sa gagmay nga mga lakang? Unsa nga mga plano ang mahimo nako karon aron sa pagbuntog sa mga hagit nga akong giatubang? “Ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).

Pamalandongi kon unsay imong nakat-onan. Sulayi ang pagpangutana og sama sa: Sa unsang paagi ako miuswag? Unsaon nako sa paggamit ang akong nakat-onan aron sa pagserbisyo sa uban? Sa unsang paagi ang akong mga gibuhat nakatabang kanako nga mas mapaduol sa Manluluwas? Unsaon nako nga padayong mouswag niini nga aspeto? “Pamalandongi ang alagianan sa imong mga tiil” (Proverbio 4:26).

Buhata aron mouswag diha sa hugot nga pagtuo. Kon maglisod ka sa pag-uswag, sulayi ang pagpangutana og sama sa: Unsay misalir? Ngano man? Unsay wala mosalir? Nganong wala man? Unsa pa ang akong masulayan? Asa ko makakuha og dugang nga mga ideya? Mabahin-bahin ba nako ang akong tumong ngadto sa gagmay nga mga lakang o mga buhat? Unsaon nako sa pagkat-on gikan sa wala damhang mga babag? “Sa pagkatinuod Ako moingon, [ikaw] kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa [imong] kaugalingon nga gawasnon nga kabubut-on” (Doktrina ug mga Pakigsaad 58:27).

• Unsa nga mga pangutana ang imong gibati nga makatabang samtang naningkamot ka nga makab-ot ang imong mga tumong ug mga plano? Ngano man?

• Sa unsang paagi kini nga sundanan makatabang nimo sa imong mga pagpaningkamot nga mahimong mas sama sa Langitnong Amahan ug ni Jesukristo?

• Sa unsang paagi matabangan ka sa Langitnong Amahan ug ni Jesukristo sa imong mga pagpaningkamot?

Diskobreha, planoha, buhata ug pamalandongi

Hatagi og panahon ang mga estudyante nga matrabaho ang ilang personal nga mga tumong. Ipakita ang mosunod nga mga instruksiyon:

Pilia ang ulohan nga labing naghulagway nimo, ug kompletoha ang usa o kapin pa sa nahiangay nga mga instruksiyon. Tinguhaa ang tabang sa Espiritu Santo ug gamita ang “Usa ka Sundanan sa Pag-uswag” (makita diha sa Giya nga Basahon sa Kabatan-onan o sa handout).

• Wala ko naghimo og piho nga mga tumong o mga plano.

• a. Diskobreha kon unsay kinahanglan nimong trabahoon sa usa o kapin pa sa mosunod nga mga bahin: espirituwal, sosyal, intelektuwal, pisikal.

  b. Pahimo og mga plano nga makatabang nimo sa pagkab-ot niini nga mga tumong.

  c. Irekord ang imong mga tumong ug mga plano diha sa imong Giya nga Basahon sa Kabatan-onan o journal sa pagtuon.

• Naa koy mga tumong ug mga plano nga gipaningkamotan nako nga makab-ot.

• a. Kon angay, gamita ang oras sa klase sa pagbuhat sa pipila sa imong mga plano ug mga tumong.

  b. Pamalandongi ang unsay imong nakat-onan ug ang kalamboan nga imong nahimo samtang milihok ka sa imong mga tumong ug mga plano.

  c. Irekord ang imong mga gihunahuna ug ipahiangay ang imong mga tumong o mga plano kon gikinahanglan diha sa imong Giya nga Basahon sa Kabatan-onan o journal sa pagtuon.

Human sa igong panahon, dapita ang pipila ka estudyante nga ipakigbahin ang mga tumong nga ilang nahimo o mga kalamposan ug mga hagit nga ilang nasinati samtang naningkamot nga makab-ot ang ilang mga tumong.

Dapita ang mga estudyante sa paglihok sa ilang mga tumong. Ipasabot nga ang pagtrabaho sa mga tumong maoy usa ka buhat sa hugot nga pagtuo. Ipamatuod nga nahibalo si Jesukristo sa atong mga kalig-on ug mga kahuyang. Tabangan kita Niya nga molampos kon modangop kita Kaniya.

Dugang nga mga Kapanguhaan

Nangong importante ang pagtakda og mga tumong?

Si Presidente Dallin H. Oaks sa Unang Kapangulohan mitudlo:

Ang pag-uswag sa espirituwal, sosyal, pisikal, ug intelektuwal nga paagi maoy parte sa kinatibuk-an nga gusto sa Langitnong Amahan nga inyong mabatonan ug motabang ninyo nga makab-ot. Hinumdomi nga kining mortal nga kasinatian mao ang kasinatian diin kita makakat-on aron mahimong unsay gusto sa Dios nga atong Langitnong Amahan nga kita mamahimo ug unsay gihimo Niya nga posible pinaagi sa paghatag kanato sa Iyang Bugtong Anak, kansang Pag-ula nagseguro kanato sa pagka-imortal ug naghatag nato og oportunidad alang sa kinabuhing dayon. (Dallin H. Oaks, “You Can Do This,” New Era, Apr. 2020, 14)

Unsay makatabang nako nga matuman ang akong mga tumong?

Si Presidente M. Russell Ballard sa Korum sa Napulog Duha ka Apostoles mitudlo:

Ang mga eksperto sa pagtakda og tumong nagsulti kanato nga kon mas yano ug mas direkta ang tumong, mas epektibo kini. Kon mapaubsan nato ang usa ka tumong ngadto sa klaro nga imahe o usa o duha ka epektibo ug simbolikanhong mga pulong, kana nga tumong mahimo dayon nga kabahin kanato ug makagiya hapit sa tanan natong hunahunaon ug buhaton. Mituo ko nga dunay duha ka pulong nga, niining konteksto, nagsimbolo sa mga tumong sa Dios alang kanato ug sa atong labing importante nga mga tumong alang sa atong kaugalingon. Ang mga pulong mao ang mobalik ug modawat.

Ang pagbalik ngadto sa Iyang presensya ug pagdawatsa mahangtorong mga panalangin nga moabut gumikan sa paghimo ug pagtuman sa mga pakigsaad mao ang labing importante nga mga tumong nga atong matakda. (M. Russell Ballard, “Mobalik ug Modawat,” Liahona, Mayo 2017, 63)

Aron makakat-on og dugang bahin sa mga baroganan sa epektibong pagtakda og tumong, ikonsiderar ang pagtuon sa tibuok pakigpulong ni Presidente Ballard nga “Mobalik ug Modawat.”

Dugang nga mga Kalihokan sa Pagkat-on

Ehemplo sa usa ka propeta

Ikonsiderar ang pagpakita og hulagway ni Joseph Smith diha sa Sagradong Kakahoyan. Dapita ang mga estudyante sa pag-ila sa mga baroganan sa pagtakda og mga tumong diha sa ehemplo ni Joseph.

• Unsang mga baroganan ang imong nakita diha sa ehemplo ni Joseph Smith nga mahimong magamit sa pagtakda og mga tumong? (tan-awa sa Joseph Smith—Kasaysayan 1:8–14, 18).

• Unsaon nato paggamit kini nga mga baroganan sa atong kaugalingong mga paningkamot aron makab-ot ang atong mga tumong?

Mga ehemplo sa pagtakda og tumong

Aron tabangan ang mga estudyante nga mapalawom ang ilang pagsabot sa sundanan sa pag-uswag, ikonsiderar ang pagtan-aw sa usa sa mosunod nga mga pananglitan sa “Bidyo: Mahimo ni Nimo Kini sa Tagsa-tagsa” (6:34), nga anaa sa ChurchofJesusChrist.org. Dapita ang mga estudyante nga pangitaon kon giunsa pagsunod sa mga batan-on ang sundanan sa pag-uswag.

• Gisag-ulo ni Ashley ang “Ang Buhi nga Kristo: Ang Pagpamatuod sa mga Apostoles” (tan-awa gikan sa time code nga 0:00 hangtod 1:55).

• Kada adlaw mag-jogging si Eli (tan-awa gikan sa time code nga 1:55 hangtod 3:28).

• Gisiksik ni McKenna ang iyang family history (tan-awa gikan sa time code nga 3:28 hangtod 6:34).

Himoang sentro sa imong mga plano ang Manluluwas

Ikonsiderar ang pagpaambit niini nga pamahayag ni Presidente Russell M. Nelson:

Samtang mohimo mo og mga tumong aron motubo sa kaalam ug gidak-on ug kahimut-an sa Dios ug sa tawo, palihog ibutang sa sentro sa inyong mga plano ang Manluluwas. Pangutan-a kanunay ang inyong kaugalingon, ug pangutan-a sa mainampoong paagi ang inyong Amahan sa Langit, “Unsay akong mabuhat aron mahimong mas mahisama ni Jesukristo?” Kon buhaton ninyo kini matag adlaw, ang mga milagro mahitabo. (Russell M. Nelson, sa usa ka video message nga gipakigbahin sa Face to Face with Elder Gerrit W. Gong [tibuok kalibotang brodkast sa kabataan ug kabatan-onan, Nob. 17, 2019], broadcasts.ChurchofJesusChrist.org)

• Sa unsang paagi ang pagsentro kang Jesukristo diha sa mga plano makaimpluwensiya sa mga tumong nga atong gitakda?

Dapita ang mga estudyante nga mainampoong ikonsiderar kon unsaon pagpabiling nakasentro si Jesukristo sa ilang mga plano aron makab-ot ang ilang mga tumong.

Mubo og tagal sa panahon ug taas og tagal sa panahon nga mga tumong

Ikonsiderar ang pagpakigbahin niini nga pamahayag ni Presidente M. Russell Ballard sa Korum sa Napulog Duha ka Apostoles:

Ang maalamong pagtakda og plano naglakip sa pagsabut nga ang short-term nga mga tumong epektibo lamang kon moresulta kini sa klarong nasabtan nga longer-term nga mga tumong. (M. Russell Ballard, “Mobalik ug Modawat,” Liahona, Mayo 2017, 63)

Hatagi ang mga estudyante og listahan sa taas og tagal sa panahon nga mga tumong nga naa tingali sa usa ka tawo, sama sa mosunod. Pwede usab maghimo ang mga estudyante og kaugalingon nilang listahan sa long-term nga mga tumong.

• Pagserbisyo og full-time nga misyon.

• Pagminyo diha sa templo.

• Pag-eskuwela sa kolehiyo.

• Pagtrabaho diha sa napili nga karera.

Dapita ang mga estudyante sa paghimo og mga pananglitan sa mubo og tagal sa panahon nga mga tumong nga makatabang sa usa ka tawo nga makab-ot kini nga taas og tagal sa panahon nga mga tumong. Pananglitan, kon ang tawo adunay taas og tagal sa panahon nga tumong nga magserbisyo og usa ka misyon, maghimo tingali sila og mubo og tagal sa panahon nga mga tumong sa pagtigom og kwarta o pagbasa sa tibuok Basahon ni Mormon.

Librarya sa Ebanghelyo nga app

Ang Librarya sa Ebanghelyo nga app naglangkob og daghang kapanguhaan nga makatabang sa kabatan-onan nga nagtrabaho sa ilang mga tumong, naglakip sa mga ideya, usa ka dapit sa pagrekord, ug mga notipikasyon. Ikonsiderar ang pagdapit sa usa ka estudyante nga pamilyar sa app nga ipakigbahin sa klase kon unsaon kini paggamit sa paghimo ug pagsubay sa personal nga mga tumong.