“Leksiyon 179—Pagpaluyo sa Atong mga Lider: Pagsunod Niadtong Gitawag sa Ginoo aron Mangulo,” Manwal sa Magtutudlo sa Seminary sa Doktrina ug mga Pakigsaad (2025)
“Pagpaluyo sa Atong mga Lider,” Manwal sa Magtutudlo sa Seminary sa Doktrina ug mga Pakigsaad
Leksiyon 179: Alang sa Kalig-on sa mga Kabatan-onan: Paghimo og mga Pagpili
Pagpaluyo sa Atong mga Lider
Pagsunod Niadtong Gitawag sa Ginoo aron Mangulo
Pwede ta nga mahimong maayo nga mga lider sa daghang paagi. Ang usa ka paagi mao ang pagkahimong maayo nga sumusunod. Nagpakita kita og hugot nga pagtuo kang Jesukristo kon atong paluyohan ang mga lider nga gitawag ilawom sa Iyang direksyon. Kini nga leksiyon gituyo aron tabangan ang mga estudyante nga makasabot sa kaimportante sa pagpaluyo niadtong gitawag sa Ginoo aron mangulo.
Posibleng mga Kalihokan sa Pagkat-on
Andam sa pagsunod
Ikonsiderar ang pagpakita sa mosunod nga senaryo aron tabangan ang mga estudyante nga mapamalandongan ang kaimportante sa pagpaluyo, o pagsuporta, niadtong gitawag sa Ginoo aron mangulo:
Hunahunaa nga nabunyagan ang imong higala wala pay usa ka tuig ang milabay ug bag-o lang gitawag aron mahimong presidente sa inyong klase o korum. Mas dugay na kang nagmatinud-anon sa ebanghelyo, ug gibati nimo nga ang imong higala dili sama ka kwalipikado kanimo o sa uban nga mahimong presidente sa klase o korum.
-
Unsaon nimo pagpahiangay ang imong panghunahuna aron mahimong usa ka matinabangon nga miyembro sa klase ug sa korum?
-
Unsay imong mahimo aron masuportahan nimo ang imong higala sa iyang calling?
Pwede nimong pangutan-on ang mga estudyante kon sila, o ilang kaila, adunay kasinatian nga susama niini. Giunsa ni nila pagtubag?
Ang usa ka pananglitan sa pagkahimong andam nga mosunod niadtong gitawag sa Ginoo mao si Hyrum Smith. Bisan pa og mas magulang siya og unom ka tuig sa iyang igsoon nga si Joseph, gisuportahan ni Hyrum si Joseph sa iyang calling.
Gipakigbahin ni Presidente M. Russell Ballard sa Korum sa Napulog Duha ka Apostoles ang mosunod mahitungod ni Hyrum:
Si [Hyrum] mitabang ug miserbisyo sa iyang igsoon, si Joseph ang Propeta, sa tibuok taas ug lisod nga proseso sa Pagpahiuli. …
Taliwala niining tanan, lig-ong mibarog si Hyrum. Nahibalo siya sa agian sa iyang kinabuhi, ug mahunahunaon siyang mipili nga sundon kini. Ngadto ni Joseph, si Hyrum nahimong kauban, tigpanalipod, tigsangkap, kasumbongan, ug sa kataposan miapil kaniya isip usa ka martir. Ang dili makiangayon nga pagpanggukod milukop kanila sa tibuok nilang kinabuhi. Bisan kon mas magulang siya, giila ni Hyrum ang balaanong katungdanan sa iyang igsoon. Samtang mihatag siya ni Joseph og kusganong tambag panagsa, kanunayng modangup si Hyrum ngadto sa iyang manghod. (M. Russell Ballard, “Hyrum Smith: ‘Firm as the Pillars of Heaven,’,’” Ensign, Nob. 1995, 6–7)
-
Unsa kaha ang nakapalisod para sa usa ka tawo nga naa sa sitwasyon ni Hyrum ang pagsunod kang Joseph isip iyang lider sa pagkapari?
-
Unsa nga Kristohanong mga hiyas ang tingali nakatabang kang Hyrum aron andam siyang mosunod kang Joseph? (tan-awa ang Doktrina ug mga Pakigsaad 124:15).
Basaha ang Doktrina ug mga Pakigsaad 124:94–96, nga mangita kon sa unsang paagi gipanalanginan si Hyrum tungod sa iyang pagkaandam nga mosunod sa iyang manghod. (Timan-i nga ang bersikulo 94 nagtumong kang Hyrum, dili kang Joseph.)
-
Unsang mga panalangin ang imong nakaplagan niini nga mga bersikulo?
Pagpaluyo sa mga lider
Ipasabot nga usa ka paagi nga atong mapakita ang atong kaandam sa pagsunod sa atong mga lider mao ang pagpaluyo kanila. Makatabang tingali ang pagsukod kon nasabtan ba gayod sa mga estudyante kon unsay gipasabot sa pagpaluyo. Usa ka paagi nga mahimo nimo kini mao ang pagpasulat sa mga estudyante sa ilang kaugalingong pagpasabot kon unsay gipasabot sa pagpaluyo. Dayon dapita sila sa pagtandi kon unsay ilang gisulat ngadto sa kahulogan nga gikan sa Giya ngadto sa mga Kasulatan: “Sa pagsaad og pagbulig niadto nga nag-alagad sa kinatibuk-an ug lokal nga pagpangulo sa Simbahan.” (Giya ngadto sa mga Kasulatan, “Pag-uyon sa mga Pangulo sa Simbahan,” Librarya sa Ebanghelyo).
Si Presidente Henry B. Eyring sa Unang Kapangulohan mihimo sa mosunod nga obserbasyon bahin sa pagpaluyo niadtong gitawag sa Ginoo aron mangulo.
Pinaagi sa pag-isa sa inyong kamot sa pagpaluyo, naghimo kamo og saad. Naghimo kamo og usa ka saad sa Dios, kansang mga sulugoon mao kini, nga kamo mopaluyo kanila.
Kini sila dili perpekto nga mga linalang, sama ninyo. Ang pagtuman sa inyong mga saad magkinahanglan og dili matarog nga pagtuo nga ang Ginoo mitawag kanila. Ang pagtuman niadtong mga saad mosangpot usab sa mahangturon nga kalipay. (Henry B. Eyring, “Ang Kalig-on nga Naggikan sa Hugot nga Pagtuo diha sa Pagpaluyo,” Liahona, Mayo 2019, 58–59)
-
Unsaon nimo pag-summarize sa mga pagtulun-an ni Presidente Eyring?
-
Unsay iyang gitudlo bahin sa pagpapakita og hugot nga pagtuo kang Jesukristo?
Tabangi ang mga estudyante nga mailhan ang mosunod nga kamatuoran: Nagpakita kita og hugot nga pagtuo kang Jesukristo dihang atong paluyohan kadtong Iyang gitawag aron mangulo.
-
Sa imong hunahuna, nganong nagkinahanglan og hugot nga pagtuo kang Jesukristo ang pagpaluyo sa mga lider?
-
Kanus-a ka mibati nga napanalanginan tungod sa pagpili nga mopaluyo sa usa ka tawo nga gitawag sa Dios nga mangulo nimo?
Kon maglisod ang mga estudyante sa paghunahuna og pananglitan, pwede nimong ipakigbahin ang imong kaugalingong kasinatian o pagpamatuod bahin sa pagpaluyo sa usa ka tawo nga gitawag sa Dios nga mangulo kanimo.
Pagsalig kang Kristo nga paluyohan kadtong gitawag aron mangulo
Tabangi ang mga estudyante nga mas masabtan kon sa unsang paagi nga magamit sa ilang kinabuhi ang baroganan sa pagsalig kang Kristo samtang ilang paluyohan kadtong Iyang gitawag. Usa ka paagi sa pagbuhat niini mao ang pagpakita sa mosunod nga mga senaryo o paghimo og laing kahimtang nga mas nahiangay sa imong mga estudyante. Ikonsiderar ang pagdapit sa mga estudyante nga magpili og senaryo nga hunahunaon samtang ilang tun-an ang usa o daghan pang seksiyon sa handout. Mahimo usab gamiton sa mga estudyante ang senaryo sa sinugdanan sa klase.
Bag-o lang giorganisar pag-usab ang kapangulohan sa klase sa Young Women ni Amanda. Ang babaye nga gitawag aron mahimong presidente dili maayo og tinagdan kang Amanda sa miagi.
Kugihan nga misyonaryo si Josh. Bag-o lang gianunsyo sa iyang presidente sa misyon ang usa ka lagda sa misyon nga wala ganahi si Josh.
Bag-o lang gitawag isip presidente sa klase ang suod nga higala ni Jossie. Nagdahom si Jossie nga hangyoon siya sa iyang higala nga maapil sa kapangulohan, pero wala siya gidapit niini.
Gihangyo si Cade nga mangalagad isip presidente sa iyang korum. Maulawon siya ug dili ganahang magdesisyon. Nabalaka siya kon epektibo ba siya sa pagpangulo sa iyang korum ug sa kapangulohan.
Ang handout nga giulohan og “Mga Pagtulun-an bahin sa Pagpaluyo Niadtong Gitawag aron Mangulo” makatabang sa mga estudyante nga masabtan kon sa unsang paagi ang kamatuoran nga ilang nailhan magamit sa senaryo nga ilang gipili ug sa ilang kaugalingong kinabuhi.
Usa ka paagi sa pagrebyo sa handout mao ang pag-set up og mga estasyon sa tibuok lawak. Pwede liboton sa mga estudyante ang mga estasyon ug tun-an sa hilom ang kada seksiyon sa handout, nga mangita ug magrekord sa mga panglantaw nga magamit nila sa ilang senaryo. Dayon, pwedeng maggrupo-grupo o magpares-pares ang mga estudyante ug ipakigbahin ang ilang nakat-onan.
Ang laing paagi sa pagrebyo sa handout mao ang pagbahin-bahin sa mga estudyante og tinag-upat ug isangon sa matag sakop sa grupo ang usa ka seksiyon gikan sa handout. Pwedeng tun-an sa mga estudyante ang ilang seksiyon, nga pangitaon kon sa unsang paagi kini may kalabotan sa ilang senaryo. Dayon ang matag estudyante pwedeng motudlo sa ilang grupo sa ilang nakat-onan.
Mga Pagtulun-an bahin sa Pagpaluyo Niadtong Gitawag aron Mangulo
Seksiyon 1
Si Presidente Henry B. Eyring sa Unang Kapangulohan mitudlo:
Ang inyong lider sa Simbahan sa Ginoo posibleng huyang para ninyo ug tawhanon o sa inyong tan-aw lig-on ug dinasig. Sa pagkatinuod anaa sa matag lider kadto nga mga kinaiya ug daghan pa. Ang makatabang sa mga sulugoon sa Ginoo kinsa gitawag sa pagpangulo kanato mao ang atong pagtan-aw kanila sama sa pagtan-aw sa Ginoo dihang Siya mitawag kanila.
Ang Ginoo hingpit nga nagtan-aw sa Iyang mga sulugoon. Nakita Niya ang ilang potensyal ug ang ilang umaabut. Ug nasayod Siya kon sa unsang paagiha mausab ang ila gayod nga kinaiyahan. Nasayod Siya kon unsaon nila nga mausab pinaagi sa ilang kasinatian uban sa mga tawo nga ilang gipangulohan. …
… Kon kamo adunay hugot nga pagtuo nga ang Ginoo naggiya sa Iyang Simbahan pinaagi sa pagpadayag ngadto niadtong dili perpekto nga mga sulugoon nga Iyang gitawag, ang Ginoo moabli sa mga bintana sa langit ngadto kanila, ingon usab Siya diha kaninyo. (Henry B. Eyring, “Ang Ginoo Mangulo sa Iyang Simbahan,” Liahona, Nob. 2017, 83–84)
Seksiyon 2
Si Brother Stephen W. Owen, kanhi Kinatibuk-ang Presidente sa Young Men, miingon:
Dunay mga panahon sa inyong kinabuhi nga tawagon mo nga mangulo. Sa ubang higayon, gilauman nga kamo mosunod. Apan ang akong mensahe kaninyo karon mao nga bisan unsa pa ang inyong calling, kanunay kamo nga usa ka lider, ug kanunay kamo nga usa ka sumusunod. Ang pagpangulo usa ka pagpahayag sa pagkadisipulo—kini ang pagtabang sa uban nga moduol kang Kristo, nga mao ang buhaton sa tinuod nga mga disipulo. Kon maninguha mo nga mahimong sumusunod ni Kristo, nan makatabang mo sa uban nga mosunod Kaniya ug mahimo mong usa ka lider.
Ang inyong abilidad nga mangulo wala maggikan sa pagkamahigalaon nga tawo, mga kahanas nga modasig, o gani sa talento nga mamulong sa publiko. Nagagikan kini sa inyong pasalig nga mosunod ni Jesukristo. (Stephen W. Owen, “Ang Labing Bantugan nga mga Lider Mao ang Labing Bantugan nga mga Sumusunod,” Liahona, Mayo 2016, 75)
Seksiyon 3
Basaha ang mosunod nga mga bersikulo:
Doktrina ug mga Pakigsaad 107:22 (Matikdi ang mga paagi nga kini nga bersikulo nagtudlo kanato sa pagpaluyo sa Unang Kapangulohan. Hunahunaa kon sa unsa nga mga paagi nga kini nga pagpaluyo magamit usab sa ubang calling.)
Exodo 17:9–12 (Matikdi kon sa unsang paagi gipaluyohan si Moises samtang nakig-away ang Israel sa katawhan sa Amalek.)
Seksiyon 4
Si Brother Stephen W. Owen, kanhi Katibuk-ang Presidente sa Young Men, mitudlo:
[Si Jesukristo] ang labing bantogan nga lider tungod kay Siya ang labing bantogan nga sumusunod—Iyang gisunod ang Iyang Amahan sa hingpit nga paagi, sa tanang butang. (Stephen W. Owen, “Ang Labing Bantugan nga mga Lider Mao ang Labing Bantugan nga mga Sumusunod,” Liahona, Mayo 2016, 75)
Samtang imong basahon kini nga mga bersikulo, matikdi ang mga paagi nga gisunod ni Jesus ang Iyang Amahan ug ang mga paagi nga nalig-on si Jesus samtang Iya kining gibuhat.
Pagpamalandong sa imong nakat-onan
Ikonsiderar ang pagdapit sa mga estudyante nga ipakigbahin sa usa ka kapares o grupo nga para nila importanteng mahibaloan sa kabatan-onan sa Simbahan gikan sa leksiyon karong adlawa ug kon ngano.
Human makabaton og higayon ang mga estudyante sa pagpakigbahin, dapita sila nga pamalandongan ang mosunod nga mga pangutana ug mahimong bukas sa mga impresyon nga ila tingaling madawat gikan sa Espiritu Santo:
-
Unsa kamaayo nimong gipaluyohan kadtong gihangyo sa Ginoo nga imong sundon?
-
Sa unsang paagi ka makapakita og hugot nga pagtuo sa Manluluwas aron mas mapaluyohan kadtong gitawag aron mangulo?
Pwede nimong taposon ang leksiyon pinaagi sa pagpakigbahin kon sa unsang paagi ka napanalanginan pinaagi sa pagpakita og hugot nga pagtuo kang Jesukristo samtang imong gipaluyohan ang mga lider sa Simbahan.