Leksiyon 178: Alang sa Kalig-on sa mga Kabatan-onan: Paghimo og mga Pagpili

Patriyarkal nga mga Panalangin

“Personal nga Kasulatan Nganha Kanimo”

Daghang paagi ang atong Langitnong Amahan sa paghatag og giya ug direksiyon sa Iyang mga anak. Ang usa ka paagi nga gihimo Niya kini mao ang pinaagi sa patriyarkal nga mga panalangin. Kini nga leksiyon makatabang sa mga estudyante nga mabati ang tinguha sa Ginoo nga giyahan sila sa ilang patriyarkal nga panalangin.

Posibleng mga Kalihokan sa Pagkat-on

Direksiyon sa atong mga kinabuhi

Ikonsiderar ang pagpakita sa mosunod nga litrato o pagdrowing og litrato nga sama niini diha sa pisara.

• Unsang mga aspeto sa imong kinabuhi nga mobati tingali ka nga parehas sa gibati sa tawo niini nga litrato? Ngano man?

• Unsay makatabang nato nga makahibalo kon unsay himoon kon dili kita segurado sa direksiyon nga angay natong subayon sa kinabuhi?

Ipasabot nga gitudloan kita sa mga kasulatan og importanteng mga kamatuoran bahin sa Dios nga makatabang nato dihang nagkinahanglan kita og direksiyon.

Basaha ang Doktrina ug mga Pakigsaad 6:14; 42:61; ug 112:10, nga mangita sa mga kamatuoran nga makatabang nato dihang mag-atubang kita og dili segurado nga mga sitwasyon.

Dapita ang mga estudyante sa pagpakigbahin sa mga kamatuoran nga ilang nakaplagan. Gamit ang kaugalingon nilang mga pulong, pwede nilang ipakigbahin ang mga kamatuoran nga parehas sa:

Bisan og kapila pa kita mangutana sa Dios, Siya motudlo nato pinaagi sa Iyang Espiritu (Doktrina ug mga Pakigsaad 6:14).

Kon kita mangayo, ang Dios mopanalangin kanato og pagpadayag ug dugang nga pagpadayag (Doktrina ug mga Pakigsaad 42:61).

Ang Dios moagak kanato pinaagi sa kamot ug mohatag kanato og mga tubag sa atong mga pag-ampo (Doktrina ug mga Pakigsaad 112:10).

Pwede sab nimong hangyoon ang mga estudyante nga mopakigbahin og lain pang mga kasulatan nga ilang nahibaloan nga nagpakita sa kahinam sa Dios sa paghatag nato og giya ug direksiyon.

• Sa unsang paagi ang paghinumdom niini nga mga kamatuoran makaapekto sa imong mga pagbati o mga kinaiya ngadto sa Dios?

• Unsa ang pipila ka paagi nga naghatag kanato ang Dios og direksiyon sa atong mga kinabuhi?

Patriyarkal nga mga panalangin

Kon kinahanglan, hisgoti nga ang patriyarkal nga mga panalangin maoy usa sa paagi nga makadawat kita og direksiyon gikan sa Dios. Aron matabangan ang mga estudyante nga masukod ang ilang nahibaloan karon bahin sa patriyarkal nga mga panalangin, ikonsiderar ang pagpakita sa mosunod nga sulod ug sa paghatag og panahon sa mga estudyante nga hilom nga matubag ang mga pamahayag o diha sa ilang mga journal sa pagtuon.

Gamit ang sukdanan nga usa (dili tinuod) hangtod lima (tinuod kaayo), pamalandongi kon unsa ka tinuod ang matag mosunod nga pamahayag para nimo:

1. Nakasabot ko kon unsa gayod ang patriyarkal nga mga panalangin.

2. Nakahibalo ko sa epekto sa patriyarkal nga panalangin sa akong kinabuhi.

3. Motuo ko nga makahatag ang Dios kanako og direksiyon sa akong kinabuhi pinaagi sa akong patriyarkal nga panalangin.

Hatagi og panahon ang mga estudyante nga masulat diha sa pisara ang ilang mga pangutana bahin sa patriyarkal nga mga panalangin. Sama tingali niini ang ilang mga pangutana:

• Unsa ang patriyarkal nga panalangin?

• Sa unsang paagi ang patriyarkal nga panalangin makaapektar sa akong relasyon sa Langitnong Amahan ug kang Jesukristo?

• Unsaon nako pagpangandam para sa akong patriyarkal nga panalangin?

• Kanus-a nako pwedeng madawat ang akong patriyarkal nga panalangin?

Pagpili og labing menos usa ka pangutana bahin sa patriyarkal nga mga panalangin nga gusto nimong matubag. Isulat ang imong mga pangutana sa kinatas-ang bahin sa imong journal nga pahina o sa pahina sa notes diha sa imong device. Tinguhaa ang giya sa Langitnong Amahan pinaagi sa Espiritu Santo aron tabangan ka nga makita ang mga tubag sa imong mga pangutana.

Pagtubag sa mga pangutana bahin sa patriyarkal nga mga panalangin

Hatagi og panahon ang mga estudyante nga matubag ang ilang mga pangutana bahin sa patriyarkal nga mga panalangin. Ikonsiderar ang mga panginahanglan ug mga abilidad sa imong mga estudyante sa pag-ila kon unsaon nila pagpangita sa mga tubag. Makatabang tingali para sa uban nga pangitaon ang mga tubag diha sa gagmayng grupo.

Pagpili gikan sa mosunod nga mga opsiyon aron makita ang mga tubag sa imong mga pangutana bahin sa patriyarkal nga mga panalangin:

1. Pangita sa magamit nga mga kapanguhaan diha sa Librarya sa Ebanghelyo nga app. Pananglitan, pwede nimong tun-an ang “Patriyarkal nga mga Panalangin” sa Mga Hilisgotan sa Ebanghelyo o pangitaa ang “patriyarkal nga mga panalangin” diha sa mga pakigpulong sa kinatibuk-ang komperensiya.

2. Tun-i ang usa sa mosunod nga mga pakigpulong gikan sa Abril 2023 nga kinatibuk-ang komperensiya: “Kanus-a Ka Angay nga Makadawat og Patriyarkal nga Panalangin” ni Elder Kazuhiko Yamashita (Liahona, Mayo 2023, 88–90) o “Ang Inyong Patriyarkal nga Panalangin—Dinasig nga Direksiyon gikan sa Langitnong Amahan” ni Elder Randall K. Bennett (Liahona, Mayo 2023, 42–43).

3. Tun-i ang mga pamahayag diha sa handout nga giulohan og “Pagtubag sa mga Pangutana bahin sa Patriyarkal nga mga Panalangin.”

Pagtubag sa mga Pangutana bahin sa Patriyarkal nga mga Panalangin

Si Presidente Russell M. Nelson mipakigbahin:

[Ang patriyarkal nga panalangin] bilihon. Personal kini nga kasulatan nganha kanimo. Nagdeklarar kini sa inyong espesyal nga kaliwat. Nagpahinumdom kini sa inyong koneksiyon sa nangagi. Ug kini motabang kaninyo nga matinuod ang inyong potensiyal sa umaabot. Sa literal nga paagi, makapangangkon kamo sa Ginoo alang sa katumanan niana nga mga panalangin pinaagi sa inyong pagkamatinud-anon. (Russell M. Nelson, “Thanks for the Covenant” [debosyonal sa Brigham Young University, Nov. 22, 1988], 5)

Si Elder Kazuhiko Yamashita sa Seventy mipamatuod:

Ako kanunay ug mainampoong mobasa sa akong patriyarkal nga panalangin; kanunay kining maghatag kanako og kadasig. Akong giila unsa ang gilaoman sa Ginoo kanako, ug nakatabang kini aron makahinulsol ko ug magmapaubsanon. Kon akong basahon ug pamalandongan kini, magtinguha ko sa pagpakabuhing takos sa pagdawat sa gisaad nga mga panalangin. …

… Mohatag ko sa akong pagsaksi nga ang Langitnong Amahan ug ang Iyang Hinigugma ug Bugtong Anak, nga si Ginoong Jesukristo, buhi. Sila nahigugma kanato. Ang patriyarkal nga mga panalangin sagradong mga gasa gikan Kanila. Kon kamo makadawat sa inyong panalangin, inyong maamgohan ug mabatyagan kon giunsa Nila kamo sa paghigugma ug giunsa Nila nga matutokan kamo sa tinagsa-tagsa. (Kazuhiko Yamashita, “Kanus-a Ka Angay nga Makadawat og Patriyarkal nga Panalangin,” Liahona, Mayo 2023, 90)

Si Sister Bonnie H. Cordon, kanhi Kinatibuk-ang Presidente sa Young Women, mipakigbahin:

Sa usa ka komperensiya sa FSY, nahimamat nako ang duha ka batan-ong babaye kinsa nanglimbasog. Parehas nga gihisgotan sa batan-ong mga babaye ang pagdangop sa iyang patriyarkal nga panalangin aron madiskobrehan pag-usab ang personal nga gugma ug giya sa Ginoo alang kaniya. Pangitaa ang inyong patriyarkal nga panalangin, tayhopa ang mga abog kon gikinahanglan, apan tun-i kini kanunay. Kon wala pa ka, pagkuha—sa dili madugay. Ayaw paglangan sa pagdiskobre og unsay gusto sa Ginoo nga isulti kaninyo karon mahitungod sa kon kinsa kamo. (Bonnie H. Cordon, “Duol ngadto kang Kristo ug Ayaw Pag-inusara,” Liahona, Nob. 2021, 10)

© 2023 by Intellectual Reserve, Inc. All rights reserved.

Human ang mga estudyante makabaton og kahigayonan sa pagtuon, ikonsiderar ang pagdapit kanila nga ipakigbahin ang ilang nakat-onan pinaagi sa pagpangutana sama sa mosunod:

• Unsay imong nakat-onan gikan sa imong mga pagtuon nga para nimo labing makatabang?

• Unsa ang pipila sa mga tubag nga imong nakaplagan sa imong mga pangutana?

• Sa imong hunahuna, sa unsang paagi ang patriyarkal nga panalangin makaapektar sa imong relasyon sa Langitnong Amahan ug kang Jesukristo?

Ikonsiderar ang pagpakigbahin kon giunsa ka pagpanalangin o paggiya sa Dios pinaagi sa imong patriyarkal nga panalangin. Pwede usab nimong awhagon ang mga estudyante nga nakadawat na sa ilang patriyarkal nga panalangin sa pagpakigbahin sa ilang mga kasinatian. Seguroa nga nasabtan sa mga estudyante nga dili gayod nila ipakigbahin ang mga detalye sa ilang mga panalangin. Hinoon, angay lang nga ipakigbahin ang bahin sa ilang mga kasinatian sa pagdawat og patriyarkal nga panalangin ug sa unsang paagi kini nakapanalangin sa ilang mga kinabuhi.

Pwede usab nimong ipasalida ang usa sa mosunod nga mga bidyo, nga anaa sa ChurchofJesusChrist.org, aron ipakita ang mga pananglitan kon sa unsang paagi nadawat sa mga indibiduwal ang giya sa Dios pinaagi sa ilang patriyarkal nga mga panalangin.

• “Teritoryo sa Kaaway” (time code 0:00 hangtod 2:25) — Usa ka asoy nga gikan sa kinabuhi ni Presidente Boyd K. Packer sa Kurom sa Napulog Duha ka Apostoles (1924–2015).

• “Walay Kahadlok” (3:30) — Gihulagway sa usa ka batan-ong lalaki gikan sa Italy kon sa unsang paagi nakatabang niya ang iyang patriyarkal nga panalangin sa pagdesisyon kon moserbisyo ba siya og misyon.

Hunahunaa ang imong nakat-onan

Aron matabangan ang mga estudyante sa pagpamalandong sa ilang nakat-onan ug gibati, ikonsiderar ang pagdapit nila nga himoon ang mosunod:

Pamalandongi ang mga pag-aghat o mga impresyon nga imong nabati karon gikan sa Espiritu Santo. Sa imong journal sa pagtuon, pagsulat og pipila ka kapahayag bahin sa giya ug direksiyon sa Langitnong Amahan nga gihatag kanimo karon ug kon unsaon nimo pagsanong niadto nga mga pag-aghat.

Awhaga ang mga estudyante sa paglihok sa mga impresyon nga ilang gibati karon. Ipamatuod ang giya ug direksiyon gikan sa Langitnong Amahan nga anaa kanato pinaagi sa patriyarkal nga mga panalangin.

Dugang nga mga Kapanguhaan

Unsa ang patriyarkal nga panalangin?

Si Sister Rebecca L. Craven, kanhi sa Kinatibuk-ang Kapangulohan sa Young Women, mitudlo:

Ang patriyarkal nga panalangin mao ang usa ka dinasig nga panalangin gikan sa Langitnong Amahan gihatag pinaagi sa gi-orden nga patriyarka, kasagaran gikan sa sulod sa imong stake. Kini usa ka personal, pinadayag nga mensahe nga alang lamang kanimo. Ang imong panalangin mohatag kanimo og tambag, mga pasidaan, maymay, ug mga saad sa pagtabang sa paggiya sa imong kinabuhi. (Rebecca L. Craven, “Imong Basahon sa mga Oportunidad,” Alang sa Kalig-on sa mga Kabatan-onan, Ago. 2022, 26)

Sa unsang paagi panalanginan ko sa Langitnong Amahan pinaagi sa patriyarkal nga panalangin?

Niadtong Abril 2020, usa ka batan-ong babaye nga ginganlan og Laudy Ruth Kaouk ang gidapit sa pagpamulong sa kinatibuk-ang komperensiya. Siya mipamatuod:

Ako nakat-on sa pagbasa sa akong patriyarkal nga panalangin sa matag higayon nga mobati ko og kaguol o kamingaw. Ang akong panalangin nakatabang nako nga masabtan ang akong potensyal ug ang piho nga plano sa Dios alang kanako. Kini mihupay kanako ug mitabang nako nga makakita lapas sa akong kalibutanong panglantaw. Kini mipahinumdom kanako sa akong mga gasa ug sa mga panalangin nga akong madawat kon magpuyo ko nga takus. Kini mitabang usab kanako nga mahinumdom ug mobati og kalinaw nga ang Dios mohatag og mga tubag ug bag-ong mga oportunidad alang kanako sa tukma nga higayon diin kini labi nakong gikinahanglan.

Ang patriyarkal nga mga panalangin motabang sa pag-andam kanato nga makabalik og puyo uban sa atong Langitnong Amahan. Ako nakahibalo nga ang patriyarkal nga mga panalangin nagagikan sa Dios ug makatabang nato nga himoong mga kalig-on ang atong mga kahuyang. Kini dili mga mensahe gikan sa mga mananag-an; kini nga mga panalangin nagsulti kanato sa unsay angay natong madungog. Kini sama sa Liahona alang sa matag usa kanato. Kon atong unahon ang Dios ug adunay hugot nga pagtuo Kaniya, Iya kitang giyahan tadlas sa atong kaugalingon nga kamingawan. (Laudy Ruth Kaouk, “Sa Unsang Paagi ang Pagkapari Mopanalangin sa Kabatan-onan,” Liahona, Mayo 2020, 56–57)

Unsaon man nako pagdawat og patriyarkal nga panalangin?

Ang mosunod nga lagda gihulagway diha sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw:

Ang bishop o ang gisangonan nga magtatambag mo-interbiyo sa mga miyembro kinsa gusto nga modawat og patriyarkal nga mga panalangin. Kon ang usa ka miyembro takos, ang nag-interbiyo mo-isyu ug mopirma sa Rekomend sa Patriyarkal nga Panalangin. …

Human makadawat og rekomend, ang miyembro mokontak sa patriyarka aron makigsabot og adlaw sa pagdawat og patriyarkal nga panalangin. Sa adlaw sa sabot, ang miyembro kinahanglang moadto sa patriyarka uban sa usa ka mainampoong kinaiya ug magsul-ob og sinina nga pang-Dominggo. Ang mga miyembro mahimong magpuasa, apan ang pagpuasa wala kinahanglana. (Kinatibuk-ang Tamdanan nga Basahon, 18.17; 18.17.1, ChurchofJesusChrist.org) .

Dugang nga mga Kalihokan sa Pagkat-on

Paghangyo og kopya sa imong Patriyarkal nga Panalangin

Ikonsiderar ang pagtudlo sa mga estudyante kon unsaon pag-akses sa ilang patriyarkal nga mga panalangin, o mga panalangin sa namatay na nga sakop sa pamilya, sa ChurchofJesusChrist.org. Pwede nimong ipakigbahin ang mosunod nga website ngadto kanila, o ihatag kini kanila isip usa ka QR code, ug ipa-log in nila gamit ang username ug password sa ilang account sa Simbahan.

https://pb.churchofjesuschrist.org/pbrequest/home/personal

Pwede usab nimong ipakita ang mosunod nga mga instruksiyon aron magiyahan sila.

1. Adto sa ChurchofJesusChrist.org.

2. Iklik ang Akong Account ug Ward.

3. Pag-log in gamit ang imong account sa Simbahan.

4. Pilia ang Patriyarkal nga Panalangin gikan sa menu.

5. Iklik ang blue nga icon nga Akong mga Panalangin.

6. Iklik ang Hangyo og personal nga panalangin o Hangyo og panalangin sa pamilya ug kompletoha ang porma sa pagsumiter. (Kon mohangyo og panalangin sa pamilya, pangandam sa paghatag og mga ngalan ug gibanabana nga petsa sa pagkatawo.)

Pwedeng mogahin og pipila ka minuto ang mga estudyante ug mohangyo og kopya sa ilang patriyarkal nga panalangin o kopya sa namatay na nga sakop sa pamilya. Pwede nimong hisgotan sa mga estudyante kon sa unsang paagi ang pagbasa sa patriyarkal nga panalangin sa namatay na nga sakop sa pamilya makatabang nila nga mapaduol sa ilang mga katigulangan.

Deklarasyon sa linya sa kaliwatan

Ang ubang mga estudyante maghunahuna tingali kon nganong importante nga makadawat og deklarasyon sa linya sa kaliwatan sa usa ka patriyarkal nga panalangin. Aron matabangan sila nga masabtan kon nganong importante ang ilang linya sa kaliwatan, pwede nimong ipakita ang mosunod nga pamahayag:

Samtang madawat ninyo ang deklarasyon sa linya sa kaliwatan, inyong mahibaloan nga gikan kamo sa balay ni Israel ug sa binhi ni Abraham [tan-awa sa Abraham 2:10]. Aron masabtan ang kahulogan niini, tutoki ang mga saad sa Ginoo nga gihimo ngadto sa balay ni Israel pinaagi kang Abraham.

Kadtong mga saad naglakip nga:

• “Ang iyang kaliwat modaghan pag-ayo (tan-awa sa Genesis 17:5–6; Abraham 2:9; 3:14).

• “Ang iyang binhi, o mga kaliwat, makadawat sa ebanghelyo ug makahupot sa pagkapari (tan-awa sa Abraham 2:9).

• “Pinaagi sa pagpangalagad sa iyang binhi, ‘ang tanan nga mga banay sa yuta [paga]panalanginan, gani uban sa mga panalangin sa Ebanghelyo, diin mao ang mga panalangin sa kaluwasan, gani sa kinabuhi nga dayon’ (Abraham 2:11)” [Mga Hilisgotan sa Ebanghelyo, “Pakigsaad ni Abraham,” Librarya sa Ebanghelyo].

(Kazuhiko Yamashita, “Kanus-a Ka Angay nga Makadawat og Patriyarkal nga Panalangin,” Liahona, Mayo 2023, 89)

Pwede usab basahon sa mga estudyante ang “You are part of the house of Israel” (Inspiration, ChurchofJesusChrist.org) o ang “Deklarasyon sa Linya sa Kaliwatan” (sa Mga Hilisgotan sa Ebanghelyo, “Patriyarkal nga mga Panalangin,” Librarya sa Ebanghelyo) aron makakat-on og dugang bahin sa linya sa kaliwatan.

Dayon, pwede nimong hangyoon ang mga estudyante nga ipasabot kon nganong para nila importante ng bahin sa patriyarkal nga panalangin ang deklarasyon sa linya sa kaliwatan.

Mga pananglitan diha sa kasaysayan sa Simbahan

Aron matabangan ang mga estudyante nga makita kon sa unsang paagi ang patriyarkal nga mga panalangin nakaepekto sa mga kinabuhi sa mga indibiduwal sa kasaysayan sa simbahan, ikonsiderar ang pagpakigbahin sa usa o sobra pa sa mosunod nga mga istorya. Pwede kang maghimo og mga QR code para sa kada istorya ug ipakita kini diha sa pisara. Mahimong pilion dayon sa mga estudyante nga tun-an ang usa o daghan pa sa mga asoy.

• Ang hugot nga pagtuo ni Phebe Carter Woodruff sa iyang patriyarkal nga panalangin nakatabang niya nga mopadayon bisan og wala pa niya madawat ang mga butang nga iyang gitinguha (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 262–64).

• Ang hugot nga pagtuo ug kakugi ni Connie Taylor nakapahimo niya nga makita ang katumanan sa mga saad sa iyang patriyarkal nga panalangin (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 3, Maisogon, Halangdon, ug Gawasnon, 1893–1955, 350–53, 536–37).

• Ang patriyarkal nga panalangin ni Elder Neal A. Maxwell nakatabang niya nga mobarog nga lig-on ug matinud-anon luyo sa mga peligro nga iyang giatubang samtang nakiggubat sa Ikaduhang Gubat sa Kalibotan (tan-awa sa Mga Santos, 3:465–68).

• Nausab ang kinabuhi ni Ruben Gapiz ug natubag ang iyang mga pag-ampo tungod sa iyang patriyarkal nga panalangin (tan-awa sa Global Histories, Pilipinas, “Naglambo Samtang Nagserbisyo sa Ginoo,” Librarya sa Ebanghelyo).

• Nakita ni Eva Hernández nga natuman ang usa ka saad sa iyang patriyarkal nga panalangin (tan-awa sa Global Histories, Spain, “A Blessing Fulfilled,” Gospel Library).