Naglambo Samtang Nagserbisyo sa Ginoo

Sa dihang si Nenita Reyes mipasakop sa Simbahan niadtong 1961, ang nag-unang mga kinabig mibati nga suod kaayo. Ang mga miyembro dugay nga mag-istoryahanay sa usag usa human sa pagsimba. “Gibati namo ang gugma,” nahinumdom si Nenita. “Gibati namo nga mao kini ang dapit kon asa gayud kami nahisakop.” Lingaw kaayo sila nga makig-uban sa usag usa nga gani ang mga ginikanan ug ubang mga hamtong motambong sa sinemana nga mga kalihokan sa kabatan-onan. Ang mga miyembro nahimo usab nga kabahin sa kinabuhi sa usag usa pinaagi sa pagserbisyo: sa dihang ang usa ka miyembro nasunogan og balay, ang mga miyembro sa branch mitabang niya sa pagtukod og balik.

Bisan pa sa kasuportado sa branch, si Nenita mibati og kahadlok sa dihang gitawag siya isip chorister. “Sa una nakong pagdumala sa musika, sa hymnbook ra ko magsige og tan-aw,” miingon siya, nahinumdom nga siya ug ang ubang bag-o nga mga kinabig wala maanad nga mobarug sa atubangan sa kongregasyon. “Sa hinay-hinay nabuntog ra namo kining tanan.”

Pagka-Disyembre niana, si Nenita nangulo sa usa ka grupo sa mga miyembro sa branch sa pagpanganta og pangdaygon nga mga awit. Si Ruben Gapiz, kansang iyaan usa ka miyembro, mikuyog aron motugtog sa gitara. Nasagmuyo siya sa dihang iyang nadunggan nga dili siya bayaran apan nagpabilin sa dihang iyang nasayran nga ang mga Santos manganta didto sa mga ospital ug sa gipuy-an sa mga ilo. Pagkasunod tuig niana, mipasakop siya sa Simbahan. Sila si Ruben ug Nenita sa wala madugay nahimong kinaunhang Pilipino nga magtiayon nga mga Santos sa Ulahing mga Adlaw nga gikasal sa usa ka lider sa Simbahan. Niadtong 1973 sa dihang ang unang stake sa Pilipinas gi-organisar, si Ruben gitawag nga moserbisyo sa high council, bisan og siya nabalaka kon kwalipikado ba siya, mibati nga ang usa ka tawo basin kinahanglan “nga balaan kaayo alang sa paghimo sa mga responsibilidad.”

Duha ka tuig ang milabay, miabut ang katalagman. Si Ruben nahibaloan nga adunay kanser ug gitagalan na lang og lima ka tuig nga mabuhi. “Sukad niana nga pagbisita sa opisina sa doktor, kanunay ko nga nag-ampo sulod sa akong kasingkasing,” miingon si Ruben. “Dili ko gusto nga ang akong mga anak magdako nga walay amahan.” Ang tulo ka tuig nga chemotherapy nakapaluya sa lawas ni Ruben ug maoy hinungdan nga nawad-an siya og trabaho, apan pagka-1978 nangayo siya og patriyarkal nga panalangin. “Sa katapusan sa panalangin,” nahinumdom si Ruben, ang patriyarka miingon nga si Ruben “hingpit nga makatagamtam sa unsay itanyag [kaniya] sa kinabuhi” ug mahimong lider sa Simbahan. Ang panalangin “nakapahilak kanako ug sa akong asawa,” nahinumdom si Ruben. “Nasayud ko nianang adlawa nga ang Ginoo mitubag sa akong pag-ampo.”

“Lahi na siya human niana,” miingon si Nenita. Sila si Nenita ug Ruben nagserbisyo sa mas aktibo ug andam nga paagi diha sa Simbahan samtang nagtan-aw sila sa ilang upat ka anak nga nagdako. Niadtong 1990 sila si Ruben ug Nenita gitawag ngadto sa Philippines Davao Mission, diin sila ang nagdumala sa proselytizing ug welfare nga mga misyonaryo. Nagserbisyo usab sila sa komitiba sa pagribyu sa hubad sa Basahon ni Mormon sa Tagalog. “Ang ebanghelyo mao ang tinubdan sa tanang kalipay nga among natagamtaman isip usa ka pamilya,” miingon si Nenita. “Ako nasayud gayud nga kini mao ang tinuod nga Simbahan.”