“Aron Makapadayon Kami … nga Manag-uban”

Niadtong Nobyembre 2013, si Henry Patalinghug nagtrabaho kuyog sa ubang mga Santos sa Ulahing mga Adlaw nga boluntaryong mga panday sa pagtabang sa mga tawo sa isla sa Bohol sa pagtukod og balik human sa usa ka linog nga nakahimo og dakong kadaut. Samtang anaa didto, nasayran nila nga usa ka kusog kaayong bagyo ang nagpadulong sa Pilipinas. Ang bagyo, nga nailhan nga Yolanda sa Pilipinas ug Haiyan sa internasyonal, giingon nga usa sa labing dako og kadaut sa kasaysayan sa nasud.

Ang mga Santos sa Ulahing mga Adlaw nagdali nga mitrabaho aron sa pagpangandam alang sa katalagman. Sobra sa 14,000 ka tawo ang mipasilong sa 200 ka meetinghouse nga giingon nga maagian sa gipaabut nga bagyo. Apan bisan diha sa mga miyembro sa Simbahan, lisud ang pagpahibalo sa tanan. Didto sa Tacloban, si Analyn Esperas anaa pa sa balay samtang naghulat sa iyang bana, si Gemmer, nga mopauli gikan sa trabaho sa dihang miigo ang bagyo. Ang hangin ug tubig mibungkag sa balay ug mianod ni Analyn ug sa iyang unom ka tuig nga anak nga babaye, si Annammer, ngadto sa basakan. Bisan sa hilabihan nga mga paningkamot ni Analyn nga kuptan ang iyang anak nga babaye, ang tubig mianod sa batang babaye palayo.

Ang mga Santos sa Ulahing mga Adlaw gikan sa Tacloban Philippines Stake mitabang sa pagpanglimpyo human sa makaguba nga Bagyong Haiyan, 2013

Si Gemmer sa kaulahian misiksik sa lugar nga kanhi nahimutangan sa iyang balay ug nakit-an ang lawas sa iyang anak nga babaye. Human sa paglubong kaniya, gipundok ni Gemmer ang nanglupad nga mga sin aron himoon nga temporaryong kapuy-an, apan tungod sa mga buslot sa mga sin ang balay sa mga Esperas padayon nga masudlan og hangin ug ulan. Dili sila makatulog inigka gabii hangtud nga si Joy Operio, usa ka magtatambag sa bishopric sa ilang ward, nakakita kanila ug gigiyahan sila ngadto sa meetinghouse aron makapasilong.

Ang walay kapuy-an nga mga pamilya sama sa mga Esperas miapil dayon kuyog sa ubang mga miyembro sa Simbahan sa mga paningkamot sa paghupay. Si Gemmer daling mi-enrol sa usa ka programa sa Simbahan aron mabansay ubos sa hanas na nga mga panday samtang nagtukod og balik sa iyang kaugalingong balay, unya siyam ka balay alang sa uban, gikan sa hinatag nga mga materyales. Pinaagi sa pagkompleto sa programa, nakadawat siya og sertipiko sa pagpamanday nga maoy hinungdan nga nakatrabaho siya sa nagpadayon nga mga paningkamot sa pagpangtukod og balik. Si Jenalyn Barantes, nga ang balay naguba usab, miingon, “Nakakat-on ko nga makig-ubang motrabaho kuyog niadtong mga nanginahanglan usab dinhi aron makapadayon kami … nga manag-uban.” Ang uban mitabang usab: ang Mormon Helping Hands nga mga boluntaryo sa tibuok Pilipinas, sama sa asawa ni Henry Patalinghug, nga si Russel, namutos og mga suplay alang sa mga tawo nga walay kapuy-an tungod sa bagyo. Ang Simbahan mipalit og mga suplay nga ihinabang, sulod sa Pilipinas kutob sa mahimo, ug mipadala niini sa apektadong mga lugar.

Agi og dugang sa pisikal nga kadaut nga nahimo sa bagyo, ang mga miyembro sa Simbahan naningkamot aron mabuntog ang emosyonal nga kadaut nga nahimo niini. Samtang anaa sa programa sa pagpamanday, si Gemmer midawat og usa ka calling sa Simbahan nga moserbisyo sa mga kabatan-onan sa iyang ward atol niining lisud nga panahon. Wala madugay, siya ug si Analyn mibiyahe usab ngadto sa Cebu City Philippines Temple, diin gisilyo sila ngadto sa ilang anak nga babaye. “Mihilak ko og maayo,” miingon si Gemmer, “nga masayud nga kami magkauban ni Annammer sa umaabut nga adlaw.” Atol sa pagsilyo gibati ni Analyn ang presensya sa ilang anak nga babaye diha sa lawak uban nila ug sa katapusan nakakaplag og kalinaw human sa bagyo. Ang kasinatian, miingon siya, “mibanlas sa mga urom sa akong kinabuhi.”