Pagpreserbar sa Kasagrado sa Templo

Niadtong 1989 ang mga Santos sa Solano nagtigum og kwarta aron mahimo ang walo ka oras nga pagbiyahe ngadto sa Manila Philippines Temple. Daghan ang nagplano sa pagdawat sa ilang kaugalingong pagtuga [endowment] sa templo; pito usab ka pamilya ang nagplano nga masilyo alang sa kahangturan. Kini nga mga miyembro nagpabiling mapasaligon sa pagbiyahe bisan kon, sa miaging semana sa wala pa ang ilang pagbiyahe, ang gobyerno mipahibalo nga misaka og 20 porsyento ang presyo sa gasolina. Bisan pa man sa pagsaka sa galastohan ug sa mga balita nga nagkagrabe ang kagubot sa Manila, molarga sila inigkagabii sa Huwebes, Nobyembre 30.

Nianang gabhiona, usa ka grupo sa mga sundalo ang milunsad og kudeta batok sa gobyerno. Sa dihang ang mga Santos sa Solano miabut sa Manila sayo sa buntag sa Disyembre 1, daghang dapit sa siyudad ang gisirad-an—apan ang presidente sa templo, mibati og kalooy, miingon sa mga Santos nga ang templo ablihan alang kanila. Ang mga kawani sa templo nag-ampo nga makapundok unta sila og igong mga ordinance worker. Wala madugay adunay pipila nga miabut, lakip na ang usa ka sister nga naglakaw og walo ka kilometro paingon sa templo human makanselar ang biyahe sa iyang bus tungod sa kagubot. Sayo sa hapon, ang mga Santos sa Solano nakadawat sa tanan nilang mga ordinansa. Samtang nagsakay sila sa ilang mga jeep sa pagbiyahe pauli, adunay mga buto-buto sa armas ug mga mortar shell nga madungog sa unahan.

Pagkagabii sa Biyernes, Disyembre 1, si Dignardino Espi, direktor sa temple security, miabut aron mobantay sa complex kuyog ang laing duha ka gwardya, sila si Remigio Julian ug Felipe Ramos. Ang palibut, nahinumdom si Espi, “puno sa tensyon” samtang ang mga balita kalabut sa panag-away tali sa mga pwersa sa rebelde ug sa gobyerno mga 400 ka metros lang ang gilay-on nagkarat-karat gikan sa gamayng radyo didto sa guardhouse. Sa tibuok gabii, ang mga gwardya nabalaka kon unsaon pagmintinar “sa kasagrado sa Templo ug sa palibut niini” kon magkaduol ang panag-away.

Pagkasunod adlaw nahitabo gayud. Sila si Espi, Julian, ug Ramos nagtan-aw samtang ang tangke sa rebelde miguba sa barikada sa gobyerno diha sa karsada nga gitung-an sa templo ug sa duol nga base militar. Ang mga tropa sa rebelde nanganaug didto sa nataran sa templo, apan si Espi mikumbinsir kanila nga mosulod sila sa mga gambalay libut sa templo imbis didto mismo sa templo. Ang gobyerno sa wala madugay mibomba sa gi-target nga mga rebelde. Si Espi mipahibalo sa mga lider sa Simbahan kalabut sa sitwasyon pinaagi sa pagtawag sa telepono ug giingnan nga himoon niyang prayoridad ang pagluwas sa iyang kaugalingon kay sa edipisyo. Wala madugay human niana, ang mga linya sa telepono giputol.

Pagka-Dominggo sa buntag ang mga gwardya nagpuasa ug nagpahigayon og usa ka miting sa pag-ampo samtang ang pagpamomba sa mga nataran sa templo nagpadayon . Ang mga miyembro sa Simbahan sa tibuok Pilipinas nagpuasa ug nag-ampo usab alang sa templo, ingon man usab ang mga lider sa Simbahan didto sa Salt Lake Temple. Hinoon, nianang gabhiona, si Espi naminaw samtang ang mga negosasyon tali sa gobyerno ug sa mga rebelde diha sa mga nataran sa templo wala mosalir. Nadungog niya ang kumander sa mga rebelde nga mimando sa iyang mga tropa sa pagpangandam alang sa pakiggubat—apan si Espi mipadayon sa pag-ampo nga mausab unta ang hunahuna nianang tawhana. “Samtang nagbantay kami sa tibuok gabii, wala kami nadungog nga bomba o buto-buto sa mga armas,” nahinumdom si Espi. “Gibati namo nga ang kalinaw mipatigbabaw sa tibuok templo ug sa mga palibut niini.”

Pagkasunod buntag nadiskubrihan ni Espi ug sa ubang mga gwardya sa templo nga ang mga rebelde hilum nga miatras atol sa kagabhion. Ang mga mortar, mga rocket, ug buto-buto sa mga armas nakahimo og dakong kadaut sa puy-anan sa mga patron, apan ang templo mismo walay kadaut nga nahitabo.