Pilipino nga mga Santos sa Gawas sa Nasud

Tulo lamang ka nasud—ang Estados Unidos, Mexico, ug Brazil—ang adunay mas daghan nga nagpuyo nga mga Santos sa Ulahing mga Adlaw kay sa sobra sa 750,000 nga mga miyembro sa Simbahan nga nagpuyo sa Pilipinas. Tungod kay daghan man nga mga Pilipino ang temporaryo o permanente nga namuyo sa laing nasud alang sa trabaho, ang Pilipino nga mga Santos sa Ulahing mga Adlaw nakatukod usab sa Simbahan sa tibuok kalibutan, ilabi na sa Estados Unidos ug Canada, sa Tunga-tungang Silangan, ug sa duol nga mga nasud sa Asya.

Ang Pilipino nga mga Santos sa Ulahing mga Adlaw mitampo sa ilang mga talento ngadto sa ilang gipuy-an nga mga nasud sa daghang paagi. Ang pipila, sama sa mag-aawit nga si Lani Misalucha, nahimong inila diha sa entertainment. Ang uban, sama ni Astrid Tuminez, nahimong inila isip mga iskolar ug mga lider. Daghan ang nakakita og trabaho nga anha ra magtrabaho sa balay, kasagaran nagtrabaho og taas nga oras alang sa ubang mga pamilya aron makasuporta sa ilang kaugalingong mga pamilya diha sa panimalay. Didto sa Hong Kong, ang kamatinud-anon niini nga mga Santos misangput ngadto sa importante nga mga kabag-ohan diha sa paagi sa pagdumala sa Simbahan. Tungod sa nagkalainlaing mga adlaw nga walay trabaho ang mga domestic worker, ang espesyal nga mga branch giorganisar nga magpundok atol sa semana imbis sa Dominggo. Ug bisan kon ang templo sa kasagaran sirado ma-Dominggo, ang Hong Kong China Temple abli og Dominggo kausa sa matag tulo ka bulan alang niadtong Dominggo lang ang walay trabaho ug nangandoy nga mogahin sa ilang bililhong panahon sa pagpahigayon og mga ordinansa alang sa mga mitaliwan na.