Usa ka Mubo nga Kasaysayan sa Simbahan sa

Pilipinas

Kinatibuk-ang Pagpasabut [Overview]

Pipila ka Pilipino ang mipasakop sa Simbahan niadtong mga 1940 ug mga 1950, apan ang misyonaryo nga buhat wala masugdi sa tinud-anay hangtud niadtong 1961. Human nianang higayuna, paspas kining milambo. Sa katapusan sa dekada, ang Simbahan anaa na sa walo ka dagkong isla. Niadtong 1973 ang unang stake sa Pilipinas giorganisar. Ang matinud-anong pagserbisyo sa mga Santos sa Ulahing mga Adlaw misangput dili lamang sa pagtukod sa unang templo sa nasud, nga gipahinungod niadtong 1984, apan sa pag-abli usab sa lokal nga missionary training center ingon man usab sa mga paningkamot sa paghubad sa mga materyal sa Simbahan ngadto sa lainlaing mga pinulongan sa Pilipinas. Niadtong mga 1990 ang mga miyembro sa Simbahan mitubo ngadto sa sobra sa ikaupat nga bahin sa usa ka milyon ka miyembro.

Ang Pilipino nga mga Santos nagtrabaho aron sa pagtukod sa ilang kinabuhi ug sa mga kongregasyon diha sa “lig-ong sukaranan sa atong Manunubos,” usa ka lig-ong pundasyon batok sa mga kalisdanan sa kalibutan (Helaman 5:12). Sa pagtinabangay sa usag usa ug sa pakigtambayayong sa mga miyembro sa Simbahan sa tibuok kalibutan, ang mga Santos sa Ulahing mga Adlaw nakahatag og kapuy-an sa ilang isigka Pilipino atol sa natural nga mga katalagman ug nakahatag og tabang human niana nga katalagman, nakapalambo og dugang nga mga kahanas aron sa pagsangkap sa ilang mga pamilya ug pagpalambo sa ilang mga komunidad, ug naningkamot sa pagpuyo isip mga ehemplo nga sama ni Kristo nga pagkamatarung ug gugma. Ang Pilipinas ang ikaupat sa kinadaghanang populasyon sa mga Santos sa Ulahing mga Adlaw kay sa bisan asa nga nasud sa kalibutan: ang mga miyembro nagsimba diha sa sobra sa 100 ka stake ug diha sa duha ka templo samtang naghulat nga mahuman ang laing lima pa.

Daklit nga mga Kamatuoran

• Opisyal nga Ngalan: Republic of the Philippines/Republika ng Pilipinas

• Kapital: Manila

• Kinadak-ang Siyudad: Siyudad sa Quezon

• Opisyal nga mga Pinulongan: Filipino ug Iningles

• Gilapdon sa Yuta: 298,170 km² (115,124 mi²)

• Area sa Simbahan: Pilipinas

• Mga Misyon: 22 (Angeles, Antipolo, Bacolod, Baguio, Butuan, Cagayan de Oro, Cauayan, Cavite, Cebu [2], Davao, Iloilo, Laoag, Legazpi, Manila, Naga, Olongapo, Quezon City [2], San Pablo, Tacloban, ug Urdaneta)

• Mga Kongregasyon: 1,218

• Mga Templo: 7 (Alabang, Bacolod, Cagayan de Oro, Cebu, Greater Manila, Manila, ug Urdaneta)