Leksiyon 174: Alang sa Kalig-on sa mga Kabatan-onan

Giya sa Alang sa Kalig-on sa mga Kabatan-onan

“Ang Kamatuoran Mohimo Kaninyo nga Gawasnon”

Ang Langitnong Amahan nagmahal ug nagsalig sa nagtubo nga henerasyon. Naghatag Siya og propetikanhong giya aron tabangan ang kabatan-onan karon sa pagpalamboog hugot nga pagtuo kang Jesukristo ug sa pagpabilin diha sa dalan sa pakigsaad. Kini nga leksiyon makatabang sa mga estudyante nga modangop kang Jesukristo dihang maghimo og mga desisyon pinaagi sa paggamit sa “Alang sa Kalig-on sa mga Kabatan-onan: Usa ka Giya sa Paghimo og mga Pagpili.”

Posibleng mga Kalihokan sa Pagkat-on

Ang unang duha ka seksiyon niini nga leksiyon gidisenyo aron tabangan ang mga estudyante nga makakat-on og dugang bahin sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022) aron mas mosalig sila kang Jesukristo. Ang kataposang seksiyon naghatag og kalihokan sa pagkat-on nga nagtutok sa seksiyon diha sa booklet nga giulohan og “Ang Kamatuoran Mohimo Kaninyo nga Gawasnon” sa mga pahina 30–33. Ang mga ideya sa pagtuon og dugang nga mga hilisgotan gikan sa giya nga basahon anaa sa ubang manwal sa mga magtutudlo sa seminary. Pagdesisyon kon hain sa mga seksiyon gikan niini nga leksiyon ug kon hain sa mga hilisgotan gikan sa Alang sa Kalig-on sa mga Kabatan-onan ang labing haom sa mga panginahanglan sa imong mga estudyante.

Si Jesukristo mao ang kalig-on sa kabatan-onan

Ikonsiderar ang pagsulat sa pulong nga kalig-on diha sa pisara ug pagdapit og mga estudyante nga ipakigbahin kon kinsa o unsa ang ilang mahunahunaan kon makita nila kini nga pulong. Ipakita ang imahe ni Jesukristo, ug hisgoti ang mosunod nga mga pangutana.

• Nganong si Jesukristo ang maayo nga ehemplo sa kalig-on? Giunsa niya pagpakita og kalig-on sa tanang bahin sa Iyang kinabuhi?

• Unsa ang pipila ka mga sitwasyon nga giatubang sa mga tin-edyer diin makatabang nila ang kalig-on sa Manluluwas?

Basaha ang “Mensahe gikan sa Unang Kapangulohan” sa pahina 2 sa Alang sa Kalig-on sa mga Kabatan-onan, nga pangitaon kon sa unsang paagi nimo madawat ang kalig-on.

• Sa imong hunahuna, unsay ipasabot nga si Jesukristo mao ang “kalig-on sa kabatan-onan”?

• Sa unsang paagi ka nakadawat og tabang ug kalig-on gikan Kaniya?

Paghimo og dinasig nga mga pagpili

Dapita ang mga estudyante nga himoon ang mosunod nga kalihokan diha sa ilang mga journal sa pagtuon.

Ilista ang pipila sa importanteng mga pagpili o mga desisyon nga kinahanglan tingali nimong himoon sa mosunod nga 10 ka tuig. Tinoa kon hain niini nga mga pagpili ang adunay labing dakong epekto sa imong kinabuhi.

Mahimong hatagan og gibug-aton sa mga estudyante ang mga desisyon nga para nila adunay labing dakong epekto sa ilang kinabuhi pinaagi sa pagbadlis niini. Para sa sunod nga pangutana, pwede silang hilom nga motubag pinaagi sa pagdrowing og nawong nga nagkatawa, walay reaksyon, o nagmug-ot diha sa ilang mga journal aron ipakita kon unsa sila ka masaligon sa paghimo sa kada desisyon.

• Unsa ka kamasaligon sa paghimo niini nga mga pagpili?

• Unsa nga mga kapanguhaan ang gihatag sa Langitnong Amahan sa pagtabang kanimo aron makahimo og dinasig nga mga pagpili?

Pwedeng ipakigbahin sa mga estudyante kon sa unsang paagi makatabang nila ang Alang sa Kalig-on sa mga Kabatan-onan aron makahimo og dinasig nga mga pagpili.

Basaha ang seksiyon nga “Paghimo og dinasig nga mga pagpili” sa mga pahina 4–5 sa Alang sa Kalig-on sa mga Kabatan-onan, nga pangitaon kon unsay makatabang nimo sa mga pagpili nga anaa nimo karon ug sa umaabot.

Ikonsiderar ang pagpares-pares sa mga estudyante aron tun-an kini nga seksiyon. Pag-assign og usa ka estudyante sa matag pares nga tun-an ang unang tulo ka parapo ug ang laing pares sa pagtuon sa kataposang tulo ka parapo. Dapita sila nga markahan ang makahuloganong mga pulong ug hugpong sa mga pulong ug sa pagpakigbahin sa ilang nakat-onan ngadto sa ilang kapares.

Human maghisgot ang mga estudyante nga magkapares, ikonsiderar ang pagpahigayon og panaghisgot sa klase pinaagi sa pagpangutana sa mosunod nga mga pangutana.

• Unsay imong nakaplagan nga makatabang nimo sa paghimo og dinasig nga mga pagpili?

• Sa unsang paagi ang imong nakat-onan nakaimpluwensiya sa imong pagbati bahin sa Langitnong Amahan ug kang Jesukristo?

Awhaga ang mga estudyante nga regular nga gamiton ang mga pagtulun-an ug mga baroganan diha sa Alang sa Kalig-on sa mga Kabatan-onan samtang maghimo sila og desisyon ug maningkamot sa pagsunod sa Manluluwas. Itudlo sila ngadto sa graphic sa kataposan sa seksiyon nga “Paghimo og Dinasig nga mga Pagpili” sa pahina 5, o ipakita ang mosunod nga impormasyon aron tabangan sila nga makita kon giunsa pag-organisar ang Alang sa Kalig-on sa mga Kabatan-onan.

Ang kada hilisgotan sa Alang sa Kalig-on sa mga Kabatan-onan adunay tulo ka bahin:

1. Mahangtoron nga mga kamatuoran, o doktrina sa gipahiuli nga ebanghelyo ni Jesukristo

2. Mga imbitasyon sa paglihok niana nga mga kamatuoran

3. Gisaad nga mga panalangin nga gitanyag sa Ginoo niadtong mosunod sa Iyang mga pagtulun-an

Dapita ang mga estudyante nga pamalandongan ang bisan unsang pangutana o mga hagit nga tingali sila nanginahanglan og tabang, ilabi na samtang pamalandongan nila ang importanteng mga pagpili nga ilang himoon sa sunod nga pipila ka tuig. Hatagi sila og panahon sa pagtuon sa Alang sa Kalig-on sa mga Kabatan-onan, nga pangitaon ang mahangtoron nga mga kamatuoran, mga pagdapit, ug gisaad nga mga panalangin nga makatabang sa ilang piho nga mga kabalaka. Awhaga ang mga estudyante nga irekord ang mga panabot ug mga impresyon samtang sila nagtuon. Inigkahuman nila, dapita ang pipila nga ipakigbahin ang ilang nadiskobrehan, pero pahinumdomi sila nga dili ipakigbahin ang bisan unsa nga personal ra kaayo. Ang mosunod nga mga pangutana mahimong makatabang.

• Unsay imong nadiskobrehan o nakita nga makatabang samtang nagtuon ka?

• Sa unsang paagi ang sumbanan sa pagtuon sa mahangtorong kamatuoran, paglihok sa dinasig nga mga nga pagdapit, ug paghinumdom sa gisaad nga mga panalangin makatabang nimo sa pagbaton og kalig-on gikan kang Jesukristo aron makahimo og dinasig nga mga pagpili?

“Ang kamatuoran mohimo kaninyo nga gawasnon”

Kini nga bahin sa leksiyon nagtutok sa seksiyon nga “Ang Kamatuoran Mohimo Kaninyo nga Gawasnon” sa mga pahina 30–33 sa Alang sa Kalig-on sa mga Kabatan-onan. Pwede nimo kining itudlo inubanan sa uban pang seksiyon o kini lang usa.

Isulat sa pisara ang mga kaayohan ug mga kadaot. Ikonsiderar ang pagpakita og smartphone, laptop, o uban pang device nga dunay akses sa internet ug sa social media. Hangyoa ang mga estudyante nga ihulagway ang mga kaayohan ug mga kadaot sa paggamit sa internet ug social media dihang nangita og kahibalo. Dapita sila sa paglista diha sa pisara og kasaligan nga mga kapanguhaan nga ilang nahibaloan ug ipakigbahin kon nganong importante nga gamiton kini nga mga kapanguhaan dihang mangita sa kamatuoran.

Basaha ang Juan 8:31–32, nga pangitaon ang gitudlo ni Jesus bahin sa kamatuoran.

• Unsay imong nakat-onan?

• Sa unsang paagi ang kamatuoran maghimo kanatong gawasnon?

  Ikonsiderar ang pagbahin-bahin sa mga estudyante sa gagmayng grupo. Hatagi og usa ka papel ang kada grupo. Dapita sila nga maghunahuna og kasaligan nga senaryo nga naglakip sa mga tin-edyer nga may kalabotan sa mga hilisgotan sa seksiyon nga “Ang Kamatuoran Mohimo Kaninyo nga Gawasnon” sa mga pahina 30–33. Pananglitan, ang senaryo mahimong maghulagway og usa ka tawo nga makakita sa bili sa pagkat-on sa kamatuoran, usa ka tawo nga nanlimbasog sa pagkinabuhi uban ang integridad, o usa ka tawo nga mahadlok sa paghisgot sa iyang hugot nga pagtuo ngadto sa uban. Human masulat sa mga grupo ang ilang senaryo, dapita sila nga magbaylo og papel sa ubang grupo.

  Dapita ang mga estudyante sa pagbasa sa mga parapo 1–4 sa seksiyon nga “Ang Kamatuoran Mohimo Kaninyo nga Gawasnon” sa pahina 31 ug sa pag-ila og usa ka baroganan. Pwede nilang mailhan ang usa ka baroganan nga sama sa mosunod: Ang pagkat-on ug pagsunod pinaagi sa mahangtorong mga kamatuoran makatabang nato nga mahimong mas sama sa Langitnong Amahan ug makakaplag og kalinaw ug kalipay niini nga kinabuhi.

• Sa unsang paagi ang pagkat-on ug pagsunod sa mahangtorong mga kamatuoran makatabang nato nga mahimong mas mahisama sa Langitnong Amahan? Sa unsang paagi si Jesukristo makatabang kanimo niini nga proseso?

• Kanus-a ka o ang usa ka tawo nga imong kaila nakasinati og kalinaw ug kalipay tungod sa pagsunod sa mahangtorong mga kamatuoran sa ebanghelyo sa Manluluwas?

  Hangyoa ang mga estudyante nga magsulat og usa ka tubag sa tawo nga naa sa senaryo gamit ang mahangtorong mga kamatuoran, mga pagdapit, ug gisaad nga mga panalangin nga gitudlo sa seksiyon nga “Ang Kamatuoran Mohimo Kaninyo nga Gawasnon” sa mga pahina 30–33. Dapita ang pipila ka grupo nga ipakigbahin ang senaryo nga ilang nadawat ug sa unsang paagi nila gigamit ang impormasyon sa Alang sa Kalig-on sa mga Kabatan-onan aron makatabang.

  Sa pagtapos, ikonsiderar ang pagdapit sa mga estudyante nga tubagon ang mosunod nga pangutana diha sa ilang mga journal.

• Unsa nga mga kausaban ang imong mahimo sa imong kinabuhi tungod sa unsay imong nakat-onan ug gibati karon?

Samtang ang mga estudyante nagtuon sa “Ang Kamatuoran Mohimo Kaninyo nga Gawasnon” sa mga pahina 30–33 o uban pang seksiyon sa Alang sa Kalig-on sa mga Kabatan-onan, tingali gibati nila ang panginahanglan sa paghimo og pipila ka kausaban sa ilang kinabuhi. Dapita ang mga estudyante nga pangitaon ang seksiyon nga “Si Jesukristo Motabang Kaninyo” sa mga pahina 6–9, nga pangitaon kon sa unsang paagi sila makadawat og kalig-on gikan kang Jesukristo aron mausab.

Dugang nga mga Kapanguhaan

Unsay gibati sa Manluluwas bahin sa mga batan-on karon?

Si Presidente Russell M. Nelson mipahayag:

Minahal kong mga batan-ong kaigsoonan, apil kamo sa labing maayo nga gipadala sa Ginoo sukad dinhi sa kalibotan. Aduna kamoy kapasidad nga mahimong mas lantip ug mas maalamon ug adunay mas dakong epekto sa kalibotan kay sa nangaging henerasyon! (Russell M. Nelson ug Wendy W. Nelson, “Paglaum sa Israel” [tibuok kalibotan nga debosyonal alang sa mga kabatan-onan, Hunyo 3, 2018], ChurchofJesusChrist.org)

Si Elder Dieter F. Uchtdorf sa Korum sa Napulog Duha ka Apostoles mipamatuod:

Minahal nga batan-ong mga higala, kon ang Manluluwas ania karon, unsa kaha ang Iyang isulti kaninyo?

Ako nagtuo nga Siya mosugod sa pagpadayag sa Iyang dakong gugma alang kaninyo. Siya mahimong mosulti niini, apan kini usab modagayday pag-ayo—bisan gikan sa Iyang presensiya—nga dili masaypan, kusganon nga mabati gayod ninyo ang Iyang gugma alang kaninyo! …

Ako nagtuo nga ang Manluluwas nga si Jesukristo gusto nga inyong makita, mabati, ug mahibaloan nga Siya mao ang inyong kalig-on. Nga uban sa Iyang tabang, walay kinutoban ang unsay inyong mahimo. Nga ang inyong potensiyal walay kinutoban. Siya gusto nga kamo makakita sa inyong kaugalingon sa paagi nga Siya nakakita kaninyo. Ug kana lahi kaayo gikan sa paagi sa pagtan-aw sa kalibotan kaninyo. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 9)

Sa unsang paagi makatabang nako ang Alang sa Kalig-on sa mga Kabatan-onan sa pagsunod kang Jesukristo?

Si Elder Dieter F. Uchtdorf sa Korum sa Napulog Duha ka Apostoles mitudlo:

Kon kamo adunay importante nga mga pagpili nga himoon, si Jesukristo ug ang Iyang gipahiuli nga ebanghelyo mao ang labing maayong pagpili. Kon kamo adunay mga pangutana, si Jesukristo ug ang Iyang gipahiuli nga ebanghelyo mao ang labing maayong tubag. Kon kamo mobati nga naluya, si Jesukristo ang inyong kalig-on. …

Aron klaro kaayo, ang labing maayong giya nga posible ninyong maangkon sa paghimo og mga pagpili mao si Jesukristo. Si Jesukristo mao ang kalig-on sa kabatan-onan.

Mao nga ang katuyoan sa Alang sa Kalig-on sa mga Kabatan-onan mao ang pagtudlo ninyo ngadto Kaniya. Kini nagtudlo kaninyo sa mahangtoron nga mga kamatuoran sa Iyang gipahiuli nga ebanghelyo—mga kamatuoran mahitungod kon kinsa kamo, kinsa Siya, ug unsa ang inyong mahimo uban sa Iyang kalig-on. Kini nagtudlo kaninyo kon unsaon sa paghimo og matarong nga mga pagpili base niadtong mahangtorong mga kamatuoran.

Importante usab nga makahibalo unsa ang dili mahimo sa Alang sa Kalig-on sa mga Kabatan-onan. Kini dili mohimo og mga desisyon alang ninyo. Kini dili mohatag ninyo og “oo” o “dili” mahitungod sa matag pagpili nga mahimo ninyong atubangon. Ang Alang sa Kalig-on sa mga Kabatan-onan nagtutok sa pundasyon alang sa inyong mga pagpili. Kini nagtutok sa mga mithi, mga baroganan, ug doktrina imbes sa matag piho nga kinaiya. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 10–11)

Dugang nga mga Kalihokan sa Pagkat-on

Mga tudling sa kasulatan para sa kada hilisgotan

Samtang ang mga estudyante magkat-on og lainlaing hilisgotan diha sa Alang sa Kalig-on sa mga Kabatan-onan, dapita sila nga pangitaon ang kaubang mga tudling sa kasulatan alang sa dugang pagsabot. Pwedeng ipasabot sa mga estudyante kon sa unsang paagi ang doktrina nga gitudlo niini nga mga tudling sa kasulatan makatabang sa mga tin-edyer nga mas makasunod ni Jesukristo ug magpabilin sa dalan sa pakigsaad.

Usa ka kahoy sa pagdesisyon

Aron ipaila sa mga estudyante ang hilisgotan nga “Paghimo og Dinasig nga mga Pagpili” diha sa Alang sa Kalig-on sa mga Kabatan-onan, ikonsiderar ang pagdapit nila sa pagsulat sa pipila ka importanteng mga desisyon nga tingali ilang himoon sa mosunod nga mga tuig. Pwede silang maghimo og usa ka kahoy sa pagdesisyon pinaagi sa pagpili og usa o sobra pa sa ilang mga desisyon ug pagdrowing og mga sanga nga mokonektar sa orihinal nga pagpili. Makatabang kini sa mga estudyante nga mahunahuna ang mga sangpotanan sa ilang mga pagpili. Pananglitan, pwedeng pilion sa usa ka estudyante ang “pagserbisyo og full-time nga misyon” isip ilang nag-una nga pagpili. Apil sa potensyal nga mga sanga alang niana nga pagpili naglakip sa “mas lig-on nga pagkakabig ngadto sa Manluluwas ug sa Iyang ebanghelyo,” “mas masaligon nga makig-istorya sa uban,” “mas maayo nga batasan sa pagtuon,” “nagkadako nga gugma alang sa mga anak sa Dios,” ug “mas dakong kalipay ug katagbawan diha sa pagserbisyo.” Human mahimo sa mga estudyante ang ilang mga kahoy sa pagdesisyon, dapita sila nga tun-an ang seksiyon nga “Paghimo og Dinasig nga mga Pagpili” sa mga pahina 4–5, nga pangitaon ang mga kamatuoran ug tambag nga mogiya nila karon ug sa umaabot.