Leksyon 162: Ang Buhi nga Kristo

Ang Buhi nga Kristo, Bahin 1

“Kami Mopamatuod, isip Iyang Tinuod nga Gi-orden nga Apostoles—Nga si Jesus Mao ang Buhi nga Kristo”

Niadtong Enero 1, 2000, ang Unang Kapangulohan ug ang Korum sa Napulog Duha ka Apostoles nag-isyu og deklarasyon nga nailhan nga “Ang Buhi nga Kristo: Ang Pagpamatuod sa mga Apostol.” Ang ilang pamatuod naghandom sa ika-2,000 nga anibersaryo sa pagkatawo sa Manluluwas. Kini nga leksiyon makatabang sa mga estudyante nga mapalawman ang ilang pagsabot kang Jesukristo.

Posibleng mga Kalihokan sa Pagkat-on

Si Jesus mao ang buhi nga Kristo

Ipakita ang litrato ni Jesukristo gikan sa sinugdanan niini nga leksiyon o lain pang litrato sa Manluluwas. Ikonsiderar ang paghatag og litrato sa kalibotan sa estudyante nga naa tunga sa lawak. Dapita ang klase nga ingnon ang maong estudyante nga moduol o mopalayo sa litrato ni Jesukristo base sa kon unsa ang ilang gibati bahin sa kahimtang sa kalibotan. Dapita sila sa pagpasabot kon nganong ingon niana ang ilang gibati.

• Nganong importante kon nagkaduol o nagkalayo ang kalibotan gikan sa Ginoo?

Paggahin og higayon sa pagpamalandong sa mosunod nga mga pangutana:

• Nganong importante para nimo kon nagkaduol o nagkalayo ka sa Ginoo?

• Unsa ang pipila sa mga paagi nga matabangan ka sa Manluluwas sa imong kinabuhi karon?

Dapita ang mga estudyante nga pagpamalandongan kining mga pangutanaha samtang magtuon sila karon ug magtinguha sa paggiya gikan sa Ginoo aron matabangan sila sa pagtubag niini.

“Ang Buhi nga Kristo”

Ipanghatag ang mga kopya sa “Ang Buhi nga Kristo: Ang Pagpamatuod sa mga Apostol” (ChurchofJesusChrist.org), o dapita ang mga estudyante nga pangitaon kini diha sa ilang mga journal sa pagtuon.

Aron tabangan ang mga estudyante nga makakat-on og dugang bahin niini nga deklarasyon, dasiga sila nga tubagon ang mga pangutana nga sama sa mosunod: Unsay imong nabantayan? Kanus-a kini naisyu? Kinsay mipirma niini? Nakaila ba ka sa mga ngalan ni bisan kinsa nga mga indibidwal nga mipirma niini?

Sa laing paagi, pwede nimong ipabasa sa usa ka estudyante ang mosunod nga konteksto nga parapo.

Isip espesyal nga mga saksi ni Kristo (tan-awa sa Doktrina ug mga Pakigsaad 107:23), ang Unang Kapangulohan ug ang Korum sa Napulog Duha ka Apostoles miisyu og deklarasyon niadtong Enero 1, 2000. Kini nga deklarasyon, nailhan nga “Ang Buhi nga Kristo: Ang Pagpamatuod sa mga Apostol,” naghandom sa ika-2,000 nga anibersaryo sa pagkatawo ni Jesukristo.

Basaha o tan-awa ang mosunod nga pamahayag ni Elder Robert D. Hales (1932–2017) sa Korum sa Napulog Duha ka Apostoles, nga pangitaon kon nganong importante kini nga deklarasyon:

Ang kalibotan nagkalayo gikan sa Ginoo nga mas paspas pa sukad. Ang kaaway ania nga binuhian sa kalibotan. Kita motan-aw, maminaw, mobasa, magtuon, ug mopakigbahin sa mga pulong sa propeta aron mapasidan-an ug maprotektahan. Sama pananglit, “Ang Pamilya: Usa ka Pamahayag ngadto sa Kalibotan” gihatag dugay na sa wala pa nato masinati ang mga hagit nga karon giatubang sa pamilya. “Ang Buhi nga Kristo: Ang Pagpamatuod sa mga Apostol” giandam nang daan alang sa panahon diin kita mas nagkinahanglan niini. (Robert D. Hales, “Kinatibuk-ang Komperensiya: Paglig-on sa Pagtuo ug Pagpamatuod,” Liahona, Nob. 2013, 7)

Dapita ang mga estudyante sa pagpakigbahin kon unsay mipatigbabaw kanila niini nga pamahayag. Pangutan-a sila kon nganong para nila ang mga pamatuod sa Apostoles bahin sa Manluluwas mas gikinahanglan tingali karon ug sa umaabot kay sa panahon nga gihatag ang deklarasyon.

Ipasabot nga makabaton og kahigayonan ang mga estudyante nga mas maduol sa Manluluwas sa leksiyon karong adlawa pinaagi sa pagpalawom sa ilang pagsabot bahin Kaniya pinaagi niining propetikanhong deklarasyon.

Tun-i ang “Ang Buhi nga Kristo”

Tabangi ang mga Estudyante nga Makaila ni Jesukristo: Ang mosunod nga kalihokan gidesinyo sa pagtabang sa mga estudyante nga mas makaila ni Kristo. Aron makakat-on pa og dugang kon unsaon kini paghimo, tan-awa ang pagbansay nga giulohan og “Pagtudlo mahitungod sa mga titulo, mga tahas, ug mga hiyas ni Jesukristo,” nga makita sa Pagpalambo sa mga Kahanas sa Magtutudlo: Pagtutok diha ni Jesukristo. Ikonsiderar ang pagpraktis sa kahanas nga “Paghimo og masusihon nga mga pangutana aron matabangan ang mga estudyante nga mailhan ang mga tahas, mga titulo, mga hiyas, ug mga kinaiya ni Jesukristo.”

Tun-i ang “Ang Buhi nga Kristo: Ang Pagpamatuod sa mga Apostol,” nga pangitaon ang mga kamatuoran bahin kang Jesukristo. Makatabang tingali ang pag-highlight sa usa o daghan sa mosunod nga makatabang:

• Ang lainlaing ngalan ni Jesukristo nga gigamit diha sa dokumento

• Unsa sa imong pamati ang importanteng hugpong sa mga pulong diha sa dokumento

• Mga pamahayag nga nagpakita sa unsay gihimo ni Jesukristo para nimo

• Mga tahas ug mga hiyas ni Jesukristo

Ikonsiderar ang pagbisita sa tagsa-tagsa ka estudyante aron matanyagan sila og tabang ug pagdasig samtang nagtuon sila.

Kon makatabang, pwedeng magsunod ang mga estudyante ug markahan ang ilang kopya sa “Ang Buhi nga Kristo” samtang nagtan-aw sa mosunod nga bidyo sa Unang Kapangulohan ug sa Korum sa Napulog Duha ka Apostoles nga nag-recite sa mga kinutlo gikan niini. O pwedeng tan-awon sa mga estudyante ang bidyo human sa ilang pagtuon aron masuportahan ang ilang nakat-onan o aron makakuha og bag-ong mga panabot. Ang bidyo nga, “Mga kinutlo gikan sa ‘Ang Buhi nga Kristo: Ang Pagpamatuod sa mga Apostol’” (2:45), anaa sa ChurchofJesusChrist.org.

Hatagig og pipila ka minuto ang mga estudyante sa pagpakigbahin sa unsay ilang nakat-onan samtang gitun-an nila “Ang Buhi nga Kristo.” Dasiga ang mga estudyante sa pagpaminaw ug pagkat-on gikan sa usag usa. Pwede nilang ipasabot kon nganong gihatagan nila og bili ang komento sa usa ka klasmeyt o bisan mangutana aron matabangan nga molawom ang pagsabot.

Dunay daghang kamatuoran nga pwedeng mailhan sa mga estudyante. Ang mosunod mao ang pipila ka mga pananglitan:

• Ubos sa direksyon sa Amahan, gilalang ni Jesukristo ang kalibotan.

• Gihatag ni Jesukristo ang Iyang kinabuhi aron sa pagtubos sa mga sala sa tanang katawhan.

• Si Jesukristo nabanhaw ug buhi karon.

• Si Jesukristo mao ang kahayag, ang kinabuhi, ug ang paglaom sa kalibotan.

• Ang paagi ni Jesukristo mao ang dalan paingon sa kalipay dinhi niini nga kinabuhi ug sa kinabuhing dayon sa kalibotan nga moabot.

Pagpili og usa sa mga kamatuoran nga nailhan nimo o sa uban bahin kang Jesukristo nga gusto nimong tun-an pa.

Pagpalapad sa atong pagsabot sa mga kamatuoran

Pwede nimong basahon ang mosunod nga pahayag sa pagsugyot og usa ka paagi nga mas mapalawman ang pagsabot niini nga mga kamatuoran.

Si Presidente M. Russell Ballard sa Korum sa Napulog Duha ka Apostoles nagdapit nato nga “ikonsiderar ang pagsiksik sa mga kasulatan sa pagpalambo sa [atong] panabot bahin sa piho nga mga kamatuoran nga makita diha sa ‘Ang Buhi nga Kristo’” (M. Russell Ballard, “Mobalik ug Modawat,” Liahona, Mayo 2017, 65).

Dapita ang mga estudyante sa paggamit sa ilang mga kasulatan sa pagpalapad sa ilang pagsabot sa usa sa mga kamatuoran bahin kang Jesukristo. Pwede nilang tan-awon ang mahinungdanong mga pulong o hugpong sa mga pulong diha sa Giya ngadto sa mga Kasulatan o Topical Guide. O pwede silang mopili og istorya bahin sa Manluluwas nga nagpakita sa kamatuoran nga ilang gipili.

Pwede usab himoon sa mga estudyante ang mosunod aron mapalapad ang ilang pagsabot:

• Pangitaa ang libro sa mga himno base sa hilisgotan, nga pangitaon kon unsa nga mga himno ang nagtudlo bahin kang Jesukristo ug sa lainlain Niyang mga tahas.

• Paggamit og diksyonaryo aron masabtan ang lisod nga mga pulong.

• Pangita og mga pamahayag sa mga lider sa Simbahan.

Pwede nimong ipakita ang mosunod nga mga instruksiyon aron magiyahan ang mga estudyante samtang nagtuon.

1. Isulat ang mga kasulatan nga imong gitun-an ug ang dugang nga mga panglantaw nga nagpalapad sa imong pagsabot sa kamatuoran nga imong gipili bahin kang Jesukristo.

2. Pamalandonga kon nganong importante nga masabtan ang maong kamatuoran bahin kang Jesukristo.

3. Tungod kay si Jesus nabanhaw ug buhi karon, gituman gihapon Niya ang kamatuoran nga imong gitun-an. Isulat kon giunsa kini Niya paghimo diha sa imong kinabuhi o kon sa unsang paagi kini maghimo og kalainan diha kanimo.

Pwedeng isulat sa mga estudyante ang ilang nakaplagan diha sa ilang kopya sa “Ang Buhi nga Kristo.”

Dapita ang mga estudyante sa pagpakigbahin sa ilang nakat-onan karon ngadto sa uban. Ang usa ka paagi mao ang paglibot nila sa klasrom aron mangita og usa ka tawo nga wala pa nila makatrabaho bag-ohay lang. Pwede nilang ipakigbahin ang ilang nakat-onan ug mga hunahuna bahin niini. Dayon pwede silang mangita og laing estudyante ug magpakigbahin na usab. Makatabang tingali kini nila nga mas mailhan ang daghang estudyante ug makadungog og lainlaing mga panghunahuna.

Ikonsiderar ang pagpaminaw sa mga estudyante samtang ilang gipakigbahin ang ilang nakaplagan. Samtang naminaw ka, pwede nimong hangyoon ang pipila nila nga magpakigbahin ngadto sa tibuok klase. Duna silay kahigayonan sa pagpakigbahin og mas daghan pa diha sa mosunod nga leksiyon.

• Sa imong hunahuna, sa unsang paagi ang mga kamatuoran nga gitudlo diha sa “Ang Buhi nga Kristo” makatabang nato nga masabtan ug mas maduol kang Jesukristo?

• Sa unsang paagi nga ang mas maayong pagsabot sa Manluluwas makatabang nimo diha sa imong kinabuhi?

Dugang nga mga Kapanguhaan

Nganong magtuon bahin sa Manluluwas?

Isip usa sa 15 ka espesyal nga mga saksi nga mipirma sa “Ang Buhi nga Kristo,” gitudlo ni Presidente Russell M. Nelson ang mosunod:

Samtang magtinguha kamo nga mas makat-on pa mahitungod ni Jesukristo, moawhag ako kaninyo sa pagtuon sa “Ang Buhi nga Kristo.”

Samtang kita mopundar og panahon sa pagkat-on mahitungod sa Manluluwas ug sa Iyang maulaong sakripisyo, maagni kita sa pag-apil sa laing importanteng elemento sa pag-access sa Iyang gahom: mopili kita sa pagbaton og pagtuo diha Kaniya ug mosunod Kaniya. (Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40)

Unsay mitultol sa Unang Kapangulohan ug sa Korum Sa Napulog Duha ka Apostoles sa pag-isyu sa “Ang Buhi nga Kristo”?

Si Presidente Russell M. Nelson mitudlo sa mosunod:

Ang kaimportante sa misyon sa Manluluwas gipasabot ni Propeta Joseph Smith, kinsa kusganong mideklarar nga “ang sukaranan nga mga baruganan sa atong relihiyon mao ang pagpamatuod sa mga Apostoles ug mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabutan sa atong relihiyon sumpay lamang niini” [Mga Pagtulun-an sa mga Presidente sa Simbahan: Joseph Smith (2007), 49].

Kini gayod nga pamahayag sa Propeta ang nagdasig sa 15 ka propeta, manalagna, ug tigpadayag sa pag-isyu ug pagpirma sa ilang pagpamatuod sa paghandom sa ika-2,000 nga anibersaryo sa pagkatawo sa Ginoo. Kana nga makasaysayanong pagpamatuod giulohan og “Ang Buhi nga Kristo.” (Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 40)

Sa unsang paagi ko mapanalanginan pinaagi sa pagtuon sa “Ang Buhi nga Kristo”?

Si Sister Jean B. Bingham, kanhi Kinatibuk-ang Presidente sa Relief Society mipakigbahin:

Samtang akong natun-an ang kinabuhi ug mga pagtulun-an ni Jesukristo nga mas may tumong ug mipasalig sa “The Living Christ” sa panumdoman, ang akong pasalamat ug gugma alang sa atong Manluluwas mitubo. Ang tanang kapahayag [sentence] nianang dinasig nga dokumento naglangkob og wali ug nakapadugang sa akong pagsabot sa Iyang balaang mga tahas ug yutan-ong misyon. Unsay akong nakat-unan ug gibati sulod niining panahon sa pagtuon ug paghunahuna naghimatuod nga si Jesus sa tinuoray “mao ang kahayag, ang kinabuhi, ug ang paglaom sa kalibotan.” (Jean B. Bingham, “Nga ang Imong Hingpit nga Kalipay Mapuno,” Liahona, Nob. 2017, 85)

Dugang nga mga Kalihokan sa Pagkat-on

Alternatibong opsiyon sa pagtuon para sa “Ang Buhi nga Kristo”

Aron tabangan ang mga estudyante nga makita ang mahangtorong kinaiyahan ni Jesukristo, ikonsiderar ang pagdrowing og tulo ka kolum diha sa pisara ug pagmarka niini og premortal, mortal, ug postmortal. Pwede nimong grupohon og tinagtulo ang mga estudyante o bahina ang klase og katulo, nga ang matag ikatulo mokuha og usa sa mga kolum. Dayon, pwedeng tun-an sa mga estudyante ang “Ang Buhi nga Kristo” para sa mga kamatuoran nga gitudlo niini bahin sa premortal, mortal, ug postmortal nga pagpangalagad sa Manluluwas.

Usa ka posible nga bidyo

Human matun-i ug mapakigbahin sa mga estudyante ang ilang nakat-onan gikan sa “Ang Buhi nga Kristo,” pwede nimong ipasalida ang “Pagpamatuod sa Buhing mga Apostoles kang Jesukristo” (2:16). Gipakita niini nga bidyo ang dugang nga mga pagpamatuod kang Kristo gikan sa buhing mga propeta.

Ang estatwa ni Kristo diha sa Paris France Temple

Aron tabangan ang mga etsudyante nga makita ang kaimportante sa pagsentro sa atong kinabuhi ug hugot nga pagtuo diha kang Jesukristo, ikonsiderar ang pagtan-aw sa “Usa ka Buhi nga Saksi sa Buhi nga Kristo” gikan sa time code 0:00 hangtod 0:50. Niini nga bidyo si Bishop Gérald Caussé, ang Tigdumalang Bishop, mipakigbahin kon unsay nahitabo sa usa ka tawo samtang gibutang ang estatwa ni Kristo diha sa Paris France Templo. Pwedeng pangitaon sa mga estudyante kon sa unsang paagi nausab ang pagbati sa tawo bahin sa Simbahan dihang mas nasabtan niya ang bahin sa atong pagpunting kang Jesukristo.

Pwede nimong hisgotan kon sa unsang paagi ang mga kamatuoran nga naa sa “Ang Buhi nga Kristo” makatabang nato sa pagpasabot ngadto sa uban sa atong gituohan bahin kang Jesukristo.