Magpunting kang Jesukristo

Pagtudlo mahitungod sa mga titulo, mga tahas, ug mga hiyas ni Jesukristo.

Pangita og mga simbolo nga nagpamatuod kang Jesukristo.

Kahanas: Paghimo og makapasiksik nga mga pangutana aron matabangan ang mga estudyante sa pagtino sa mga tahas, mga titulo, mga simbolo, mga hiyas, ug mga kinaiya ni Jesukristo.

Pagpasabot

Samtang maninguha kita nga matabangan ang mga estudyante sa pagsiksik ni Jesukristo diha sa mga kasulatan, sila makaila ug mohigugma Kaniya. Usa ka paagi sa paghimo og makapasiksik nga pangutana nga makatabang sa mga estudyante sa pagtino og usa ka tahas, titulo, simbolo, hiyas, o kinaiya ni Jesukristo mao ang paglakip sa mosunod diha sa imong pangutana: (1) ang tudling sa kasulatan, (2) unsa ang gusto nimo nga tinguhaon sa estudyante (mga tahas, mga titulo, mga simbolo, mga hiyas, o mga kinaiya ni Jesukristo), ug (3) unsaon sa mga estudyante sa pagdiskobre niini nga mga butang sa ilang kaugalingon. Kini nga mga pangutana kinahanglang ipaila sa dili pa nimo ipabasa sa mga estudyante ang tudling sa kasulatan aron andam ang mga estudyante sa pagdiskobre sa unsay ilang makat-onan mahitungod ni Jesukristo.

Modelo

Rebyoha ang mosunod nga mga pangutana, ug bantayi kon giunsa niini paglakip sa tudling sa kasulatan, unsa ang tinguhaon sa mga estudyante, ug unsaon sa mga estudyante sa pagdiskobre niini sa ilang kaugalingon:

• Samtang inyong basahon ang istorya sa maayong Samarianhon diha sa Lucas 10:25–37, unsa nga balaanon nga mga hiyas ni Jesukristo ang imong makita?

• Samtang magtuon kamo sa Doktrina ug mga Pakigsaad 29:1–8, pangita og tulo ka lainlain nga mga titulo ug mga tahas ni Jesukristo nga mahinungdanon sa unsay inyong gikinahanglan karon sa inyong kinabuhi.

• Samtang inyong basahon ang Mga Buhat 3:1–7, unsa ang inyong mabantayan mahitungod ni Pedro nga magpahinumdom kaninyo ni Jesukristo?

Iklik dinhi aron makakita og bidyo niini nga modelo.

Pagpraktis

Basaha ang mosunod nga mga bersikulo, ug alang sa matag hut-ong sa mga bersikulo pagsulat og usa ka makapasiksik nga pangutana nga makatabang sa mga estudyante nga makadiskobre sa mga tahas, mga titulo, mga simbolo, mga hiyas, ug mga kinaiya ni Jesukristo.

• Genesis 45:3–5

• Doktrina ug mga Pakigsaad 45:7–9

• 1 Nephi 3:1–7

Hisgoti o Pamalandongi

• Unsa ang imong nakat-onan mahitungod sa pagkahimong usa ka Kristohanon nga magtutudlo gikan niini nga kasinatian?

• Sa unsa nga paagi kini makatabang sa atong mga estudyante ug sa mga panaghisgot sa lawak klasehanan nga mas motutok pa kang Jesukristo?

Iapil

Gamit ang unsay imong nakat-onan sa pagpraktis, paghunahuna mahitungod sa mga kahimtang ug mga panginahanglan sa imong mga estudyante samtang magtuon ka aron mangandam sa imong nga leksiyon niining semanaha. Gamit ang usa ka tudling sa kasulatan diha sa imong leksiyon, pagsulat og usa ka makapasiksik nga pangutana nga makatabang sa mga estudyante nga makadiskobre sa mga tahas, mga titulo, mga simbolo, mga hiyas, ug mga kinaiya ni Jesukristo aron matabangan sila nga motutok Kaniya. Isulat ang mga pangutana nga moabot kanimo ug, kon ikaw aduna pay panahon, praktisa ang pagpangutana niadto nga mga pangutana ngadto sa usa ka tawo sa dili pa ikaw mangutana ni bisan kinsa diha sa klase. Kini motabang kanimo sa pagpalambo sa imong pangutana sa dili pa nimo kini gamiton sa imong mga estudyante.

Gusto pa og Dugang?

• Chad H Webb, “Kami Naghisgot kang Kristo, Kami Nalipay diha kang Kristo” (Tinuig nga sibya sa pagbansay sa Seminaries and Institutes of Religion, Hunyo 12, 2018), broadcasts.ChurchofJesusChrist.org