Lesson 162: Ang Buhay na Cristo

Ang Buhay na Cristo, Bahagi 1

“Nagpapatotoo Kami, bilang Kanyang Marapat na Inordenan na mga Apostol—Na si Jesus Ang Buhay na Cristo”

Noong Enero 1, 2000, inilabas ng Unang Panguluhan at ng Korum ng Labindalawang Apostol ang isang pahayag na kilala bilang “Ang Buhay na Cristo: Ang Patotoo ng mga Apostol.” Ginunita ng kanilang patotoo ang ika-2,000 anibersaryo ng pagsilang ng Tagapagligtas. Ang lesson na ito ay makatutulong sa mga estudyante na mapalalim ang kanilang pag-unawa tungkol kay Jesucristo.

Mga Posibleng Aktibidad sa Pag-aaral

Si Jesus ang buhay na Cristo

Ipakita ang larawan ni Jesucristo sa simula ng lesson na ito o magpakita ng ibang larawan ng Tagapagligtas. Maaaring bigyan ng larawan ng mundo ang isang estudyanteng nasa gitna ng silid. Anyayahan ang klase na sabihin sa estudyanteng iyon na lumapit o lumayo sa larawan ni Jesucristo batay sa nadarama nila tungkol sa kalagayan ng mundo. Anyayahan silang ipaliwanag kung bakit ganoon ang nadarama nila.

• Bakit mahalaga kung ang mundo ay lumalapit o lumalayo sa Panginoon?

Pag-isipan sandali ang mga sumusunod na tanong:

• Bakit mahalaga sa iyo kung lumalapit o lumalayo ka sa Panginoon?

• Ano ang ilang paraan kung paano ka matutulungan ng Tagapagligtas sa buhay mo ngayon?

Anyayahan ang mga estudyante na pag-isipan ang mga tanong na ito habang nag-aaral sila ngayon at humingi ng patnubay sa Panginoon para tulungan sila na masagot ang mga ito.

“Ang Buhay na Cristo”

Magpamahagi ng mga kopya ng “Ang Buhay na Cristo: Ang Patotoo ng mga Apostol” (ChurchofJesusChrist.org), o anyayahan ang mga estudyante na hanapin ito sa kanilang study journal.

Upang matulungan ang mga estudyante na malaman ang iba pa tungkol sa pahayag na ito, hikayatin silang sagutin ang mga tanong na tulad ng sumusunod: Ano ang napansin ninyo? Kailan ito inilabas? Sino ang lumagda dito? Nakikilala ba ninyo ang pangalan ng sinuman sa mga taong lumagda dito?

Bilang alternatibo, maaari mong ipabasa sa isang estudyante ang sumusunod na konteksto ng talata.

Bilang mga natatanging saksi ni Cristo (tingnan sa Doktrina at mga Tipan 107:23), ang Unang Panguluhan at ang Korum ng Labindalawang Apostol ay naglabas ng pahayag noong Enero 1, 2000. Ginunita ng pahayag na ito, na kilala bilang “Ang Buhay na Cristo: Ang Patotoo ng mga Apostol,“ ang ika-2,000 anibersaryo ng pagsilang ni Jesucristo.

Basahin o panoorin ang sumusunod na pahayag ni Elder Robert D. Hales (1932–2017) ng Korum ng Labindalawang Apostol, at alamin kung bakit mahalaga ang pahayag na ito:

Ang mundo ay mas mabilis na lumalayo sa Panginoon higit kailanman. Ang kaaway ay pinakawalan sa lupa. Ating pinanonood, pinakikinggan, binabasa, pinag-aaralan, at ibinabahagi ang mga salita ng mga propeta upang mabigyang babala at maprotektahan tayo. Halimbawa, “Ang Mag-anak: Isang Pagpapahayag sa Mundo” ay ibinigay bago pa man natin maranasan ang mga hamon na kinakaharap ngayon ng pamilya. “Ang Buhay na Cristo: Ang Patotoo ng mga Apostol” ay inihanda noon pa bago pa natin ito kinailangang mabuti. (Robert D. Hales, “Pangkalahatang Kumperensya: Nagpapalakas ng Pananampalataya at Patotoo,” Liahona, Nob. 2013, 7)

Anyayahan ang mga estudyante na ibahagi kung ano ang pinakamahalaga para sa kanila sa pahayag. Itanong sa kanila kung bakit sa palagay nila ay maaaring mas kinakailangan ngayon at sa hinaharap ang mga patotoo ng mga Apostol tungkol sa Tagapagligtas kaysa noong ibinigay ang pahayag.

Ipaliwanag na magkakaroon ng pagkakataon ang mga estudyante sa lesson na ito na mas mapalapit sa Tagapagligtas sa pamamagitan ng pagpapalalim ng kanilang pag-unawa tungkol sa Kanya sa pamamagitan ng pahayag na ito ng propeta.

Pag-aralan ang “Ang Buhay na Cristo”

Tulungan ang mga Estudyante na Makilala si Jesucristo: Ang sumusunod na aktibidad ay naglalayong tulungan ang mga estudyante na mas makilala si Cristo. Upang malaman pa kung paano ito gawin, tingnan ang training na may pamagat na “Ituro ang tungkol sa mga titulo, tungkuling ginagampanan, at mga katangian ni Jesucristo,” na makikita sa Mga Kasanayan para sa Pag-unlad ng Guro: Magtuon kay Jesucristo. Isiping praktisin ang kasanayang “Gumawa ng mga tanong sa pagsasaliksik upang matulungan ang mga estudyante na matukoy ang mga tungkulin, titulo, katangian, at pagkatao ni Jesucristo.”

Pag-aralan ang “Ang Buhay na Cristo: Ang Patotoo ng mga Apostol,” at alamin ang mga katotohanan tungkol kay Jesucristo. Maaaring makatulong ang pagbibigay-diin sa isa o mahigit pa sa mga sumusunod:

• Ang iba’t ibang pangalan ni Jesucristo na ginamit sa dokumento

• Ang mahahalagang parirala sa dokumento para sa iyo

• Mga pahayag na nagpapakita ng nagawa ni Jesucristo para sa iyo

• Mga tungkulin at katangian ni Jesucristo

Maaaring lapitan ang bawat estudyante upang magbigay ng tulong at panghihikayat habang nag-aaral sila.

Kung kapaki-pakinabang, maaaring basahin ng mga estudyante at markahan ang kanilang kopya ng “Ang Buhay na Cristo” habang pinapanood ang sumusunod na video ng Unang Panguluhan at ng Korum ng Labindalawang Apostol na binabanggit ang mga sipi mula rito. O maaaring panoorin ng mga estudyante ang video pagkatapos ng kanilang pag-aaral para mapatibay ang kanilang natutuhan o magkaroon sila ng mga bagong kaalaman. Ang video na, “Excerpts from ‘The Living Christ: The Testimony of the Apostles’”(2:45), ay matatagpuan sa ChurchofJesusChrist.org.

Bigyan ng ilang minuto ang mga estudyante upang ibahagi ang natutuhan nila sa pag-aaral nila ng “Ang Buhay na Cristo.” Hikayatin ang mga estudyante na makinig at matuto sa isa’t isa. Maaari nilang ipaliwanag kung bakit pinahahalagahan nila ang komento ng isang kaklase o maaari din silang magtanong upang makatulong na mapalalim ang pag-unawa.

Maraming katotohanan ang matutukoy ng mga estudyante. Ang sumusunod ay ilang halimbawa:

• Sa ilalim ng patnubay ng Ama sa Langit, nilikha ni Jesucristo ang mundo.

• Inialay ni Jesucristo ang Kanyang buhay para magbayad-sala sa mga kasalanan ng buong sangkatauhan.

• Si Jesucristo ay nabuhay na mag-uli at nabubuhay ngayon.

• Si Jesucristo ang liwanag, ang buhay, at pag-asa ng mundo.

• Si Jesucristo ang daan na naghahatid sa kaligayahan sa buhay na ito at buhay na walang hanggan sa daigdig na darating.

Pumili ng isa sa mga katotohanang natukoy ninyo o ng iba tungkol kay Jesucristo na gusto mong mapag-aralan pa.

Palawakin ang ating pag-unawa sa mga katotohanan

Maaari mong basahin ang sumusunod na pahayag upang magmungkahi ng isang paraan upang mapalalim ang pag-unawa sa mga katotohanang ito.

Inanyayahan tayo ni Pangulong M. Russell Ballard ng Korum ng Labindalawang Apostol na “maaari din ninyong saliksikin ang mga banal na kasulatan upang palawakin ang inyong pang-unawa sa mga partikular na katotohanang matatagpuan sa ‘Ang Buhay na Cristo’” (M. Russell Ballard, “Makabalik at Makatanggap,” Liahona, Mayo 2017, 65).

Anyayahan ang mga estudyante na gamitin ang kanilang mga banal na kasulatan para mapalawak ang kanilang pag-unawa sa isa sa mga katotohanan tungkol kay Jesucristo. Maaari silang maghanap ng mahahalagang salita o parirala sa Gabay sa mga Banal na Kasulatan o sa Topical Guide. O maaari silang pumili ng kuwento tungkol sa Tagapagligtas na nagpapakita ng katotohanang pinili nila.

Maaari ding gawin ng mga estudyante ang sumusunod upang mapalawak ang kanilang pag-unawa:

• Maghanap sa himnaryo ayon sa paksa, at alamin kung ano ang itinuturo ng mga himno tungkol kay Jesucristo at sa Kanyang iba’t ibang tungkulin.

• Gumamit ng diksyunaryo upang alamin ang kahulugan ng mahihirap na salita.

• Maghanap ng mga pahayag ng mga lider ng Simbahan.

Maaari mong ipakita ang mga sumusunod na tagubilin na gagabay sa mga estudyante habang nag-aaral sila.

1. Isulat ang mga banal na kasulatan na pinag-aralan mo at ang mga karagdagang kaalaman na nagpapalawak ng iyong pag-unawa sa katotohanang pinili mo tungkol kay Jesucristo.

2. Isipin kung bakit mahalagang maunawaan ang katotohanang iyon tungkol kay Jesucristo.

3. Dahil si Jesus ay nabuhay na mag-uli at nabubuhay ngayon, tinutupad pa rin Niya ang katotohanang pinag-aralan mo. Isulat kung paano Niya ito ginagawa sa iyong buhay o kung paano ito makagagawa ng kaibhan sa iyo.

Maaaring isulat ng mga estudyante ang malalaman nila sa kanilang kopya ng “Ang Buhay na Cristo.“

Anyayahan ang mga estudyante na ibahagi sa iba ang natutuhan nila ngayon. Ang isang paraan ay maglibot sila sa silid para maghanap ng isang tao na hindi pa nila nakapartner kamakailan. Maaari nilang ibahagi ang natutuhan at ang mga saloobin nila tungkol dito. Pagkatapos ay maaari silang lumapit sa ibang estudyante at magbahagi muli. Maaari itong makatulong sa kanila na makilala ang mas maraming estudyante at makarinig ng iba’t ibang saloobin.

Maaari kang makinig sa mga estudyante habang ibinabahagi nila ang nalaman nila. Habang nakikinig ka, maaari mong hilingin sa ilan sa kanila na magbahagi sa buong klase. Magkakaroon sila ng pagkakataong magbahagi pa sa susunod na lesson.

• Sa inyong palagay, paano makatutulong sa atin ang mga katotohanang itinuro sa “Ang Buhay na Cristo” na maunawaan ang tungkol kay Jesucristo at mapalapit sa Kanya?

• Paano nakatutulong sa inyong buhay ang higit na pag-unawa ng tungkol sa Tagapagligtas?

Karagdagang Resources

Bakit dapat pag-aralan ang tungkol sa Tagapagligtas?

Bilang isa sa 15 natatanging saksi na lumagda sa “Ang Buhay na Cristo,” itinuro ni Pangulong Russell M. Nelson ang sumusunod:

Habang nagsisikap kayo na higit pang makaalam tungkol kay Jesucristo, hinihimok ko kayong pag-aralan ang “Ang Buhay na Cristo.”

Kapag naglaan tayo ng oras sa pag-aaral tungkol sa Tagapagligtas at sa Kanyang nagbabayad-salang sakripisyo, mahihikayat tayong makilahok sa isa pang mahalagang sangkap sa paghugot ng lakas sa Kanya: pinipili nating sumampalataya sa Kanya at tularan Siya. (Russell M. Nelson, “Paghugot ng Lakas kay Jesucristo sa Ating Buhay,” Liahona, Mayo 2017, 40)

Bakit inilabas ng Unang Panguluhan at ng Korum ng Labindalawang Apostol ang “Ang Buhay na Cristo”?

Itinuro ni Pangulong Russell M. Nelson ang sumusunod:

Ang kahalagahan ng misyon ng Tagapagligtas ay binigyang-diin ni Propetang Joseph Smith, na matatag na nagsabi na “ang mga pangunahing alituntunin ng ating relihiyon ay ang patotoo ng mga Apostol at Propeta, tungkol kay Jesucristo, na Siya’y namatay, inilibing, at muling nagbangon sa ikatlong araw, at umakyat sa langit; at ang lahat ng iba pang mga bagay na may kaugnayan sa ating relihiyon ay mga kalakip lamang nito” [Mga Turo ng mga Pangulo ng Simbahan: Joseph Smith (2007), 58].

Ang mismong pahayag na ito ng Propeta ang nagganyak sa 15 propeta, tagakita, at tagapaghayag na ilathala at lagdaan ang kanilang patotoo bilang paggunita sa ika-2,000 taong anibersaryo ng pagsilang ng Panginoon. Ang makasaysayang patotoong ito ay pinamagatang “Ang Buhay na Cristo.” (Russell M. Nelson, “Paghugot ng Lakas kay Jesucristo sa Ating Buhay,” Liahona, Mayo 2017, 40)

Paano ako mapagpapala sa pag-aaral ng “Ang Buhay na Cristo”?

Ibinahagi ni Sister Jean B. Bingham, dating Relief Society General President:

Nang pag-aralan ko ang buhay at mga turo ni Jesucristo nang may higit na pagtutuon at maisaulo ko ang “Ang Buhay na Cristo,” nag-ibayo ang pasasalamat at pagmamahal ko sa ating Tagapagligtas. Bawat pangungusap ng inspiradong pahayag na iyon ay may aral at lalo kong naunawaan ang Kanyang banal na tungkulin at misyon sa lupa. Ang natutuhan at nadama ko sa panahong ito ng pag-aaral at pagninilay ay nagpapatunay na talagang si Jesus “ang liwanag, ang buhay, at pag-asa ng mundo.” (Jean B. Bingham, “Upang ang Inyong Kagalakan ay Malubos,” Liahona, Nob. 2017, 85)

Mga Karagdagang Aktibidad sa Pag-aaral

Alternatibong opsiyon sa pag-aaral para sa “Ang Buhay na Cristo”

Upang matulungan ang mga estudyante na makita ang walang-hanggang katangian ni Jesucristo, maaaring gumuhit ng tatlong column sa pisara at lagyan ng label ang mga ito na premortal, mortal, at postmortal. Maaari mong ilagay ang mga estudyante sa mga grupo na may tigtatatlong miyembro o hatiin ang klase sa tatlong grupo, kung saan ang bawat grupo ay aatasan ng isa sa mga column. Pagkatapos ay maaaring pag-aralan ng mga estudyante ang “Ang Buhay na Cristo” para sa mga katotohanang itinuturo nito tungkol sa premortal, mortal, at postmortal na ministeryo ng Tagapagligtas.

Isang posibleng video

Kapag napag-aralan at naibahagi na ng mga estudyante ang natutuhan nila mula sa “Ang Buhay na Cristo,” maaari mong ipanood ang “Living Apostles Testify of Jesus Christ” (2:16). Makikita sa video na ito ang mga karagdagang patotoo tungkol kay Cristo mula sa mga buhay na propeta.

Ang estatuwa ni Cristo sa Paris France Temple

Upang matulungan ang mga estudyante na makita ang kahalagahan ng pagtuon ng ating buhay at pananampalataya kay Jesucristo, maaaring panoorin ang “Isang Buhay na Saksi ng Buhay na Cristo“ mula sa time code na 0:00 hanggang 0:50. Sa video na ito, ibinahagi ni Bishop Gérald Caussé, ang Presiding Bishop, ang nangyari sa isang lalaki nang ilagay ang isang estatuwa ni Cristo sa Paris France Temple. Maaaring alamin ng mga estudyante kung paano nagbago ang damdamin ng lalaki tungkol sa Simbahan nang mas naunawaan niya ang pagtuon natin kay Jesucristo.

Maaari mong talakayin kung paano makatutulong sa atin ang mga katotohanang nakapaloob sa “Ang Buhay na Cristo” na ipaliwanag sa iba ang pinaniniwalaan natin tungkol kay Jesucristo.