Դաս 211․ Եկեղեցու ղեկավարների ուսմունքները

«Ընտրություններ հավերժության համար»

Ուսումնասիրեք Եկեղեցու ղեկավարների ուսմունքները

Ամբողջ տարվա ընթացքում ուսանողները բազմաթիվ հնարավորություններ կունենան սեմինարիայում սովորելու Հիսուս Քրիստոսի Եկեղեցու վերջին օրերի ոգեշնչված ղեկավարների ուսմունքները: Այս դասում տրվում է օրինակ, թե ուսուցիչներն ինչպես կարող են օգտագործել «Ձևանմուշ․ Եկեղեցու ղեկավարների ուսմունքները» փաստաթուղթը, որպեսզի ուղղորդեն դասարանին՝ այս ուղերձներն ուսումնասիրելիս: Այս դասում օգտագործված օրինակը նախագահ Ռասսել Մ. Նելսոնի «Ընտրություններ հավերժության համար» ուղերձն է ([համաշխարհային հոգևոր հավաք չափահաս երիտասարդների համար, 15 մայիսի, 2022], broadcasts.ChurchofJesusChrist.org)։ Այս դասը կխորացնի ուսանողների հասկացողությունը սկզբունքների մասին և կօգնի նրանց պատրաստվել հավերժական կյանքին:

Հնարավոր ուսումնական վարժություններ

Նշում․ Այս դասում տրվում է օրինակ, թե ուսուցիչներն ինչպես կարող են օգտագործել «Ձևանմուշ․ Եկեղեցու ղեկավարների ուսմունքները» փաստաթուղթը, որպեսզի օգնեն ուսանողներին ուսումնասիրել Եկեղեցու ղեկավարների ուղերձները: Կարող եք հարմարեցնել այս դասի գաղափարները, օգտագործել ձևանմուշի գաղափարների տարբեր համադրություններ կամ օգտագործել ձեր սեփական գաղափարները, որոնք ավելի լավ կհամապատասխանեն ձեր ուսանողների կարիքներին:

Սկսեք դասը

Դասը սկսեք այնպես, որ այն հետաքրքրություն առաջացնի ուսանողների մոտ և օգնի նրանց մտքերն ու սրտերը նախապատրաստել ուսումնառության փորձառությանը: Կարող եք օգտագործել նախագահ Նելսոնի «Ընտրություններ հավերժության համար» ելույթից մի արտահայտություն կամ գաղափար։ Հետևյալ օրինակը ցույց է տալիս, թե ինչպես կարելի է սկսել դասը։

Գրատախտակին գրեք հետևյալ արտահայտությունը և առաջարկեք ուսանողներին մտածել իրենց ապագայի մասին այս կյանքում և հավերժության մեջ.

երիտասարդ չափահասներին ուղղված իր ուղերձում նախագահ Ռասսել Մ. Նելսոնն ասել է․

Ուզում եմ ձեզ հետ խոսել ձեր ապագայի մասին: (Ռասսել Մ․ Նելսոն, «Ընտրություններ հավերժության համար» [համաշխարհային հոգևոր հավաք չափահաս երիտասարդների համար, 15 մայիսի, 2022], broadcasts.ChurchofJesusChrist.org)

Սուրբ գրությունների ուսումնասիրության ձեր օրագրում պատասխանեք հետևյալ հարցերին.

• Ի՞նչ մտքեր ու զգացմունքներ եք ունենում, երբ մտածում եք ձեր ապագայի մասին այս կյանքում և հավերժության մեջ:

• Եթե հնարավորություն ունենայիք խոսել ձեր ապագայի մասին Աստծո մարգարեի հետ, ի՞նչ հարցեր կտայիք նրան:

Կարող եք մի քանի ուսանողի առաջարկել կիսվել, թե ինչ են գրել իրենց ուսումնական օրագրերում: Կարող եք նաև առաջարկել ուսանողներին գրատախտակին գրել իրենց ապագայի վերաբերյալ իրենց հարցերից մի քանիսը: Այդ հարցերը կօգնեն ուսանողներին պատրաստվել ուղերձի ուսումնասիրությանը:

Ուսումնասիրեք ուղերձը

Ուսանողների ուսումնասիրության ընթացքում խրախուսեք նրանց կենտրոնանալ իրենց գիտելիքներն ավելացնելու և Երկնային Հոր ու Հիսուս Քրիստոսի մասին իրենց վկայությունն ամրապնդելու վրա: Առաջարկեք ուսանողներին արձանագրել այն մտքերն ու զգացմունքները, որոնք իրենց ուսումնասիրության ընթացքում կարող են գալ Սուրբ Հոգուց:

Դասի այս հատվածում կօգտագործվի «Փնտրեք» գաղափարը «Ձևաթուղթ. Եկեղեցու ղեկավարների ուսմունքները» փաստաթղթի «Ուսումնասիրեք ուղերձը» բաժնից։ Այս բաժինը նախատեսված է օգնելու ուսանողներին կենտրոնանալ ելույթի ուսումնասիրության վրա:

Եթե ուսանողներին հասանելի չէ նախագահ Նելսոնի «Ընտրություններ հավերժության համար» ելույթը, կարող եք նրանց տրամադրել երեք աշխատաթերթ, որոնք պարունակում են նրա խոսքերից հատվածներ: Կարող եք ձեր դասարանը բաժանել երեք խմբի և յուրաքանչյուր խմբի հանձնարարել ուսումնասիրել աշխատաթերթերից մեկը: Կամ կարող եք տպել ամբողջական ելույթի օրինակներ, և ուսանողները կարող են փոքր խմբերով ուսումնասիրել ելույթը: Վարժությունը կատարելիս առաջարկեք ուսանողներին հետևել ստորև բերված հրահանգներին:

Նախագահ Նելսոնի «Ընտրություններ հավերժության համար» ելույթն ուսումնասիրելիս փնտրեք ճշմարտություններ, որոնք կարող են օգնել ձեզ նախապատրաստվել ձեր ապագային երկրի վրա և հավերժական կյանքին՝ Երկնային Հոր և Հիսուս Քրիստոսի հետ։ Կարող եք նաև փնտրել ուսմունքներ, որոնք կարող են պատասխանել ձեր ապագայի վերաբերյալ ձեր հարցերին, որ գրել եք ուսումնասիրության օրագրում կամ գրատախտակին:

Ընտրություններ հավերժության համար, Մաս 1

Այս երեկո իմ նպատակն է համոզվել, որ դուք հստակ գիտակցում և հասկանում եք այն ճշմարտությունը, որ այս կյանքն իսկապես այն ժամանակն է, երբ դուք պետք է որոշեք, թե դուք ինչպիսի կյանքով եք ուզում ապրել հավերժության մեջ: Հիմա է ձեր ժամանակը «պատրաստվելու համար հանդիպելու Աստծուն» [տես Ալմա 12․24, 34․32]։ …

Յուրաքանչյուր արդար ընտրություն, որը դուք կկատարեք այստեղ, հսկայական օգուտ կտա ձեզ այս կյանքում։ Բայց մահկանացու կյանքում կատարած արդար ընտրությունները աներևակայելի օգուտ կտան հավերժական կյանքում։ Եթե դուք ընտրեք ուխտեր կապել Աստծո հետ և հավատարիմ մնալ այդ ուխտերին, «[ձեր] գլխին փառք կավելացվի հավիտյանս հավիտենից» [Աբրահամ 3․26]: …

Հակառակորդը, իհարկե, չի ուզում, որ դուք նույնիսկ մտածեք վաղվա օրվա մասին, էլ չեմ խոսում հավիտենական կյանքի մասին։ Բայց խնդրում եմ, անտեղյակ կամ միամիտ մի եղեք մահկանացու կյանքի հնարավորությունների և մարտահրավերների վերաբերյալ: Դրա համար պետք է հասկանաք երեք հիմնարար ճշմարտություն, որոնք կօգնեն ձեզ նախագծել ձեր հետագա ընթացքը. …

Նախ՝ իմացեք այն ճշմարտությունը, թե ով եք դուք: Կարծում եմ, որ եթե Տերը խոսեր ձեզ հետ այս երեկո, առաջին հերթին Նա կցանկանար համոզվել, որ դուք հասկանում եք ձեր ճշմարիտ ինքնությունը։ Իմ սիրելի ընկերներ, դուք բառացիորեն Աստծո հոգևոր զավակներն եք: Դուք այս ճշմարտությունը երգել եք՝ սովորելով «I Am a Child of God» [Hymns, հմր. 301] օրհներգի բառերը։ Բայց արդյո՞ք այդ հավերժական ճշմարտությունը դրոշմված է ձեր սրտում: Արդյո՞ք այս ճշմարտությունն օգնել է ձեզ գայթակղության բախվելիս։

Վախենամ, որ այնքան հաճախ եք լսել այս ճշմարտությունը, որ այն ավելի շուտ որպես կարգախոս է հնչում, քան աստվածային ճշմարտություն: Այնուամենայնիվ, այն, թե ինչ եք մտածում ձեր իրական ինքնության մասին, ազդում է ձեր գրեթե յուրաքանչյուր որոշման վրա, որը դուք երբևէ կկայացնեք: …

…Ո՞վ եք դուք:

Առաջին հերթին դուք Աստծո զավակն եք:

Երկրորդ՝ որպես Եկեղեցու անդամ, դուք ուխտի զավակն եք: Եվ երրորդ՝ դուք Հիսուս Քրիստոսի աշակերտն եք:

Այս երեկո ես խնդրում եմ ձեզ չփոխարինել այս երեք կարևոր և անփոփոխ որակավորումները այլ որակավորումներով, քանի որ դա կարող է խանգարել ձեր առաջընթացին կամ պիտակավորել ձեզ ըստ կարծրատիպերի, որոնք կխանգարեն ձեր հավերժական առաջընթացին: …

Կան տարբեր պիտակներ, որոնք, իհարկե, կարող են ձեզ համար շատ կարևոր լինել: Խնդրում եմ ինձ սխալ չհասկանաք։ Ես չեմ ասում, որ այլ դասակարգումներն ու որակավորումները էական չեն։ Ես պարզապես ասում եմ, որ ոչ մի որակավորում չպետք է հեռացնի, փոխարինի կամ առաջնահերթ լինի այս երեք մնայուն դասակարգումներից՝ «Աստծո զավակի», «ուխտի զավակի» և «Հիսուս Քրիստոսի աշակերտի»:

Ցանկացած որակավորում, որն անհամատեղելի է այդ երեք հիմնական դասակարգումների հետ, ի վերջո, ձեզ կհիասթափեցնի: Այլ պիտակները ժամանակի ընթացքում կհիասթափեցնեն ձեզ, քանի որ նրանք զորություն չունեն առաջնորդելու ձեզ դեպի հավերժական կյանք՝ Աստծո սելեստիալ արքայությունում: …

Սխալ մի հասկացեք․ ձեր ներուժն աստվածային է: Երբ ջանասիրաբար փնտրեք, Աստված ձեզ հուշումներ կտա, թե ով կարող եք դառնալ։ (Ռասսել Մ․ Նելսոն, «Ընտրություններ հավերժության համար» [համաշխարհային հոգևոր հավաք չափահաս երիտասարդների համար, 15 մայիսի, 2022], broadcasts.ChurchofJesusChrist.org)

Ընտրություններ հավերժության համար, Մաս 2

Երկրորդ՝ իմացեք ճշմարտությունը այն մասին, թե ինչ են ձեզ առաջարկել Հայր Աստվածը և Նրա Որդին՝ Հիսուս Քրիստոսը:

Կարճ ասած, նրանք ձեզ առաջարկել են ամեն ինչ։

Իր զավակների համար Երկնային Հոր ծրագիրը թույլ է տալիս մեզ ապրել այնտեղ, որտեղ Նա է ապրում և ապրել այնպես, ինչպես Նա է ապրում՝ ի վերջո, ավելի ու ավելի նմանվելով Իրեն: Նրա ծրագիրը բառացիորեն մեզ տալիս է ողջ հավերժության ամենաառատ օրհնությունները, այդ թվում՝ «Քրիստոսի հետ ժառանգակիցներ» դառնալու հնարավորությունը [Հռոմեացիներին 8․17]։

Աստված ամենագետ և ամենատես է։ Ամբողջ հավերժության ընթացքում ոչ ոք երբեք չի ճանաչի ձեզ և չի հոգա ձեր մասին ավելի շատ, քան Նա: Ոչ ոք երբեք ձեզ ավելի մոտ չի լինի, քան Նա: Դուք կարող եք հեղել ձեր սիրտը Նրա առաջ և վստահ լինել, որ Նա կուղարկի Սուրբ Հոգուն և հրեշտակներին՝ հոգ տանելու ձեր մասին: Նա ցույց տվեց Իր մեծագույն սերը, երբ ուղարկեց Իր Միածին Որդուն, որ մեռնի ձեզ համար՝ լինելով ձեր Փրկիչն ու ձեր Քավիչը:

Իր Քավության միջոցով Տեր Հիսուս Քրիստոսը հաղթեց աշխարհին [տես Հովհաննես 16․33, Վարդապետություն և Ուխտեր 50.41]: Հետևաբար, Նա «զորեղ է … ձեզ ամեն անարդարությունից մաքրելու» [Ալմա 7․14]: Նա կազատի ձեզ ամենադաժան փորձություններից՝ Իր ուրույն ձևով և Իր ուրույն ժամանակին: Երբ դուք հավատքով մոտենաք Նրան, Նա կառաջնորդի, կպահպանի և կպաշտպանի ձեզ: Նա կբուժի ձեր կոտրված սիրտը և կմխիթարի ձեզ ձեր նեղության մեջ [տես Ղուկաս 4․18; Ալմա 7․10–12]։ Նա ձեզ հնարավորություն կտա ստանալ Իր զորությունը: Եվ Նա ձեր կյանքում հնարավոր կդարձնի անհնարինը: …

Աստված առանձնահատուկ սեր է տածում բոլոր այն մարդկանց հանդեպ, որոնք Իր հետ ուխտ են կապում մկրտության ջրերում: Եվ այդ աստվածային սերն աճում է, երբ լրացուցիչ ուխտեր են կնքվում և հավատարմորեն պահվում: Այնուհետև՝ մահկանացու կյանքի ավարտին, մեր Երկնային Հոր հետ յուրաքանչյուր ուխտի զավակի վերամիավորումը արժեքավոր է դառնում [տես Սաղմոս 116․15]։

Նաև, Նա խորապես հոգ է տանում, որ Իր բոլոր զավակները հնարավորություն ունենան լսելու վերականգնված ավետարանի ավետիքը: Երկնային Հայրն Իր զավակներին երկիր է ուղարկել ավելի քան վեց հազարամյակների ընթացքում: Այդ մարդկանցից շատերը դեռ չեն ստացել այն արարողությունները, որոնք նրանց կարժանացնեն հավերժական կյանքին: Այդ իսկ պատճառով տաճարներն այդքան կարևոր են։ Դա է պատճառը, որ վարագույրի երկու կողմում Իսրայելի հավաքումը այսօր Երկրի վրա կատարվող կարևորագույն աշխատանքն է։ Դուք՝ իմ սիրելի գործընկերներ այս սուրբ գործում, էական դերակատարում ունեք այս հավաքման գործում, և ես շնորհակալ եմ ձեզ դրա համար։ (Ռասսել Մ․ Նելսոն, «Ընտրություններ հավերժության համար» [համաշխարհային հոգևոր հավաք չափահաս երիտասարդների համար, 15 մայիսի, 2022], broadcasts.ChurchofJesusChrist.org)

Ընտրություններ հավերժության համար, Մաս 3

Իմացեք ձեր դարձին վերաբերող ճշմարտությունը: Ճշմարտությունն այն է, որ դուք պետք է պատասխանատվություն ստանձնեք ձեր անձնական դարձի մեջ: Ոչ ոք չի կարող անել դա ձեր փոխարեն:

Այժմ, եկեք քննարկենք մի քանի հարց։ Ցանկանո՞ւմ եք խաղաղություն զգալ այն մտահոգությունների առնչությամբ, որոնք այժմ տանջում են ձեզ: Ցանկանո՞ւմ եք ավելի լավ ճանաչել Հիսուս Քրիստոսին: Ցանկանո՞ւմ եք իմանալ, թե Նրա աստվածային զորությունը ինչպես կարող է բուժել ձեր վերքերը և թուլությունները: Ցանկանո՞ւմ եք ձեր կյանքում զգալ Հիսուս Քրիստոսի Քավության քաղցր, հանգստացնող զորությունը:

Այս հարցերին պատասխանելու ձգտումը կպահանջի ջանքեր՝ մեծ ջանքեր: Ես խնդրում եմ ձեզ, որ պատասխանատվություն ստանձնեք ձեր վկայության համար։ Աշխատեք դրա համար: Պահպանեք այն։ Հոգ տարեք դրա մասին։ Զարգացրեք, որ այն աճի։ Սնուցեք այն ճշմարտությամբ։ Մի աղտոտեք այն անհավատ տղամարդկանց և կանանց կեղծ փիլիսոփայություններով, իսկ հետո զարմացեք, թե ինչու է ձեր վկայությունը նվազում:

Ամեն օր ջերմեռանդ ու խոնարհ աղոթեք: Սովորեք հնագույն և ժամանակակից մարգարեների խոսքերը: Խնդրեք, որ Տերն ուսուցանի ձեզ, թե ինչպես ավելի լավ լսեք Նրան: Ավելի շատ ժամանակ անցկացրեք տաճարում և ավելի շատ ժամանակ հատկացրեք ընտանեկան պատմության աշխատանքին:

Երբ ձեր վկայությունը դառնա ձեր առաջնահերթությունը, կտեսնեք, որ հրաշքներ են կատարվում ձեր կյանքում:

Եթե հարցեր ունենաք, իսկ ես հուսով եմ, որ կունենաք, պատասխաններ փնտրեք՝ հավատալու մեծ ցանկությամբ: Ավետարանի մասին սովորեք այն ամենը, ինչ կարող եք, և չմոռանաք առաջնորդության համար դիմել ճշմարտությամբ լի աղբյուրներին: Մենք ապրում ենք մի տնտեսության մեջ, երբ «ոչինչ ետ չի պահվի» [Վարդապետություն և Ուխտեր 121․28]: Դրանից հետո, ժամանակի ընթացքում Տերը կպատասխանի մեր բոլոր հարցերին:

Միևնույն ժամանակ, ընկղմվեք հայտնության հարուստ ջրամբարում, որը հասանելի է մեզ։ Ես խոստանում եմ, որ դա կամրապնդի ձեր վկայությունը, նույնիսկ, եթե ձեր որոշ հարցերի պատասխանները դեռևս չեն տրվել: Անկեղծ հավատքով տրված ձեր հարցերը միշտ կհանգեցնեն ավելի մեծ հավատքի և ավելի շատ գիտելիքի: …

Երբ դուք պատասխանատվություն եք ստանձնում ձեր վկայության համար և օգնում, որ այն աճի, դուք դառնում եք ավելի հզոր գործիք Տիրոջ ձեռքում: Դուք «կոգեշնչվեք արդար գործից» [Ալմա 43․45]՝ Հիսուս Քրիստոսի գործից:

Այս երկրի վրա ավելի կարևոր բան չկա, քան հավաքել Իսրայելը Նրա համար: Թող ձեր Երկնային Հայրն իմանա, որ դուք ցանկանում եք օգնել: Խնդրեք Նրան, որ ձեզ լծի այս փառահեղ գործին: Իսկ հետո նայեք կողքից և հիացեք, թե ինչ է տեղի ունենում, երբ թույլ եք տալիս, որ Աստված տնօրինի ձեր կյանքում:

Իմ սիրելի երիտասարդ ընկերներ, ես սիրում եմ ձեզ: Ես շնորհակալ եմ ձեզ։ Ես հավատում եմ ձեր ներուժին։ Որպես Տիրոջ մարգարե՝ ես օրհնում եմ ձեզ, որ իմանաք ճշմարտությունը ձեր ով լինելու մասին, և արժևորեք ճշմարտությունն այն մասին, թե իրականում ինչ փառահեղ ներուժ ունեք: Ես օրհնում եմ ձեզ, որ պատասխանատվություն ստանձնեք ձեր վկայության համար։ Եվ օրհնում եմ ձեզ, որ ունենաք ցանկություն և ուժ՝ պահելու ձեր ուխտերը:

Եթե դա անեք, ես խոստանում եմ, որ դուք կզգաք հոգևոր աճ, վախից ձերբազատում և այնպիսի վստահություն, որը դժվար թե հիմա պատկերացնեք: Դուք դրական ազդեցություն թողնելու ուժ կգտնեք, որը վեր կլինի ձեր բնական կարողություններից։ Եվ ես խոստանում եմ, որ ձեր ապագան ավելի ոգևորիչ կլինի, քան այն, ինչին այժմ կարող եք հավատալ: (Ռասսել Մ․ Նելսոն, «Ընտրություններ հավերժության համար» [համաշխարհային հոգևոր հավաք չափահաս երիտասարդների համար, 15 մայիսի, 2022], broadcasts.ChurchofJesusChrist.org)

Առաջարկեք ուսանողներին խորհել իրենց սովորածի մասին, որը կարող է օգնել իրենց նախապատրաստվել իրենց ապագա կյանքին երկրի վրա և հավերժական կյանքին: Նրանք կարող են նաև խորհել, թե ապագայի վերաբերյալ իրենց հարցերից որոնք են պատասխան ստացել և ինչպես: Խնդրեք մի քանի ուսանողի կիսվել, թե ինչպես են իրենց հարցերը պատասխան ստացել:

Խորացրեք ձեր հասկացողությունը

Դասի այս հատվածում կօգտագործվի «Ստեղծեք որևէ բան» գաղափարը «Ձևաթուղթ. Եկեղեցու ղեկավարների ուսմունքները» փաստաթղթի «Խորացրեք ձեր հասկացողությունը» բաժնից։

Այս բաժնի նպատակն է օգնել ուսանողներին խորհել և քննարկել նախագահ Նելսոնի «Ընտրություններ հավերժության համար» ելույթը։

Խորհեք այն գաղափարների մասին, որոնք դուք ձեռք եք բերել նախագահ Նելսոնի ուղերձն ուսումնասիրելիս: Ստեղծեք որևէ բան, որը կարող է օգնել ձեզ հիշել այն, ինչ սովորել եք, կամ որը կարող է ոգեշնչել ուրիշներին նախապատրաստվել բովանդակալից ապագային և հավերժական կյանքին: Ստորև բերված են մի քանի օրինակներ, թե ինչ կարող եք ստեղծել.

• Նկար

• Բանաստեղծություններ

• Մեմ

• Գրառում սոցիալական ցանցերում

  Հնարավորության դեպքում դուք կարող եք տրամադրել թուղթ և այլ անհրաժեշտ պարագաներ: Երբ ուսանողներն ավարտեն, կարող եք առաջարկել նրանցից մի քանիսին կիսվել իրենց ստեղծածով: Երբ նրանք կիսվեն, կարող եք տալ նմանատիպ հարցեր.

• Նախագահ Նելսոնի ուղերձի ո՞ր մասն է ոգեշնչել ձեզ ստեղծել դա: Ինչո՞ւ դա ձեզ ոգեշնչեց:

• Այդ ուղերձը հիշելն ինչպե՞ս կարող է ուղղորդել ձեզ ներկայումս և ապագայում:

• Ինչպե՞ս կարող է ձեր ստեղծագործությունը մղել մարդուն դիմելու Երկնային Հորը և Հիսուս Քրիստոսին:

Կարող եք կիսվել ձեր վկայությամբ նախագահ Նելսոնի ուղերձից այն ճշմարտությունների մասին, որոնք ձեզ ոգեշնչել են: Խրախուսեք ուսանողներին գործել համաձայն այն հուշումների, որոնք իրենք, հնարավոր է, զգացել են: