« មេរៀនទី ១៩១—សារៈសំខាន់នៃការអប់រំ ៖ ការអប់រំមានសារៈសំខាន់ណាស់ចំពោះវឌ្ឍនភាពរបស់យើង » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៥ )
« សារៈសំខាន់នៃការអប់រំ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញា សម្រាប់គ្រូបង្រៀនថ្នាក់សិក្ខាសាលា
មេរៀនទី ១៩១ ៖ ការរៀបចំខ្លួនសម្រាប់ការអប់រំ និងការងារនាពេលអនាគត
សារៈសំខាន់នៃការអប់រំ
ការអប់រំគឺសំខាន់ចំពោះវឌ្ឍនភាពរបស់យើង
ព្រះវរបិតាសួគ៌ និងព្រះយេស៊ូវគ្រីស្ទចង់ឲ្យយើងរៀន និងទទួលបានការអប់រំពេញមួយជីវិតរបស់យើង ។ ការធ្វើបែបនេះគឺសំខាន់ណាស់ចំពោះវឌ្ឍនភាពរបស់យើងនៅលើផែនដី និង ទៅដល់ភាពអស់កល្បជានិច្ច ។ មេរៀននេះអាចជួយសិស្សឲ្យយល់អំពីសារៈសំខាន់នៃការអប់រំ ។
សកម្មភាពរៀនសូត្រដែលអាចមាន
ហេតុអ្វីការអប់រំមានសារៈសំខាន់ ?
ដើម្បីជួយសិស្សចាប់ផ្ដើមគិតអំពីសារៈសំខាន់នៃការអប់រំ សូមពិចារណាចែកចាយសាច់រឿងដូចខាងក្រោម ៖
ស្រមៃថាមានសិស្សម្នាក់ឈ្មោះ សារ៉ា ដែលមិនចូលចិត្តសាលា ។ នាងគិតថាវាគឺជាការខ្ជះខ្ជាយពេលវេលា និងធ្វើឲ្យនាងមានភាពតានតឹងខ្លាំងពេក ។ លើសពីនេះទៅទៀត នាងមិនសូវមានកម្លាំងចិត្តក្នុងការរៀនទេ ព្រោះនាងមិនពូកែនៅសាលាឡើយ ។ នាងចង់ដើរលេងជាមួយមិត្តភក្តិ សម្រាកនៅផ្ទះ ឬទៅធ្វើការ ។
អញ្ជើញសិស្សឲ្យគិត តើពួកគេធ្លាប់មានការព្រួយបារម្ភដូចជា សារ៉ា ដែរ ឬទេ ។ សូមពន្យល់ថា មេរៀននេះនឹងជួយពួកគេឲ្យរៀនអំពីមូលហេតុដែលព្រះវរបិតាសួគ៌ និងព្រះយេស៊ូវគ្រីស្ទចង់ឲ្យយើងទទួលបានការអប់រំ ។
វាអាចមានប្រយោជន៍ក្នុងការរំឭកសិស្សថា ការអប់រំអាចពាក់ព័ន្ធនឹងការរៀនសូត្រដែលកើតឡើងតាមរបៀបជាផ្លូវការដូចជាសាលាជាដើម ។ ការអប់រំក៏អាចពាក់ព័ន្ធនឹងការរៀនសូត្រដែលកើតឡើងតាមរបៀបមិនផ្លូវការដែរដូចជានៅផ្ទះ ឬក្នុងសកម្មភាពប្រចាំថ្ងៃផ្សេងទៀតផងដែរ ។
នៅផ្នែកខាងលើនៃទំព័រមួយនៅក្នុងសៀវភៅកំណត់ហេតុការសិក្សារបស់អ្នក សូមបង្កើតចំណងជើងមួយថា « ហេតុអ្វីបានជាការអប់រំមានសារៈសំខាន់ ? » នៅពេលអ្នកសិក្សានៅថ្ងៃនេះ សូមស្វែងរកវិវរណៈមកពីព្រះវរបិតាសួគ៌តាមរយៈព្រះវិញ្ញាណបរិសុទ្ធ ដើម្បីមើលពីតម្លៃនៃការអប់រំក្នុងជីវិតរបស់អ្នក ។ សូមបន្ថែមការយល់ដឹង និងចំណាប់អារម្មណ៍ខាងវិញ្ញាណរបស់អ្នកទៅក្នុងបញ្ជីនៅក្នុងសៀវភៅកំណត់ហេតុរបស់អ្នក ។
សិក្សាអំពីសារៈសំខាន់នៃការអប់រំ
សូមផ្ដល់ពេលវេលាដល់សិស្សដើម្បីសិក្សាបទគម្ពីរ និងសេចក្ដីថ្លែងការណ៍មកពីថ្នាក់ដឹកនាំសាសនាចក្រ ដែលបង្រៀនអំពីសារៈសំខាន់នៃការរៀនសូត្រ និង ការអប់រំ ។ សិស្សអាចសិក្សាធនធានមួយចំនួន ឬទាំងអស់ដែលមាននៅលើសំណៅចែកដែលមានចំណងជើងថា « សារៈសំខាន់នៃការអប់រំ » ។ សូមលើកទឹកចិត្តពួកគេឲ្យកត់ត្រាបញ្ជីរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេអំពីការយល់ដឹងណាមួយដែលពួកគេរកឃើញ ។
សូមពិចារណាបែងចែកសិស្សទៅជាក្រុមតូចៗ ហើយចាត់ចែងនូវបទគម្ពីរ និងសេចក្ដីថ្លែងការណ៍មួយដល់សមាជិកក្រុមនីមួយៗដើម្បីសិក្សា ។ សូមឲ្យសិស្សពន្យល់ដល់ក្រុមរបស់ពួកគេដែលនៅសល់ អំពីអ្វីដែលពួកគេបានរៀននៅក្នុងការអានដែលបានចាត់តាំងដល់ពួកគេ ។
សារៈសំខាន់នៃការអប់រំ
បទគម្ពីរ និងសេចក្ដីថ្លែងការណ៍ខាងក្រោមនេះមកពីថ្នាក់ដឹកនាំសាសនាចក្រ អាចជួយអ្នកឲ្យយល់កាន់តែច្រើនអំពីការរំពឹងទុក និងបំណងប្រាថ្នារបស់ព្រះអម្ចាស់សម្រាប់អ្នកដើម្បីទទួលបានការអប់រំ ។ ពេលអ្នកសិក្សា សូមស្វែងរកសេចក្ដីពិតអំពីសារៈសំខាន់នៃការអប់រំ ។
បទគម្ពីរដែលត្រូវសិក្សា ៖
គោលលទ្ធិ និងសេចក្តីសញ្ញា ៨៨:៧៧-៨០, ១១៨; ១៣០:១៨–១៩
ការបង្រៀនមកពីថ្នាក់ដឹកនាំសាសនាចក្រ ៖
ប្រធាន រ័សុល អិម ណិលសុន បានបង្រៀន ៖
ការអប់រំគឺជាអ្វីដែលអ្នកត្រូវទទួល ។ គ្មាននរណាផ្សេងអាចទទួលវាសម្រាប់អ្នកបានឡើយ ។ មិនថាអ្នកនៅកន្លែងណាទេ សូមបង្កើតនូវបំណងប្រាថ្នាខ្លាំងដើម្បីរៀនសូត្រ ។ ចំពោះយើងដែលជាពួកបរិសុទ្ធថ្ងៃចុងក្រោយ ការទទួលបានការអប់រំពុំមែនគ្រាន់តែជាឯកសិទ្ធិមួយប៉ុណ្ណោះទេ តែវាជាការទទួលខុសត្រូវខាងសាសនាមួយផងដែរ ។ « សិរីល្អនៃព្រះគឺជាបញ្ញា » ( គោលលទ្ធិ និងសេចក្តីសញ្ញា ៩៣:៣៦ ) ប្រាកដណាស់ ការអប់រំរបស់យើងនឹងនៅយូរអង្វែងដល់អស់កល្បជានិច្ច ។ …
ទស្សនៈរយៈពេលយូរដូច្នោះ នឹងជួយអ្នកធ្វើការជ្រើសរើសល្អពីការអប់រំ ។
ចូរកុំខ្លាចក្នុងការតោងចាប់គោលដៅអ្នកឡើយ—ទោះជាសុបិនអ្នកក្ដី ! ប៉ុន្តែសូមដឹងថា គ្មានផ្លូវកាត់ណាដើម្បីបានឧត្ដមភាព និងមានសមត្ថភាពនោះទេ ។ ការអប់រំគឺខុសប្លែកពី ការប៉ងប្រាថ្នា អ្នកអាចជួយអ្នកដទៃ និង មានលទ្ធភាព អាចជួយដល់ពួកគេបាន ។ ( រ័សុល អិម ណិលសុន « What Will You Choose? » Ensign ខែមករា ឆ្នាំ២០១៥ ទំព័រ ៣២ )
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានមានប្រសាសន៍ ៖
អ្នក និងខ្ញុំនៅទីនេះនៅលើផែនដីដើម្បីរៀបចំខ្លួនសម្រាប់ភាពអស់កល្បជានិច្ច ដើម្បីរៀនអំពីរបៀបរៀនសូត្រ រៀនអ្វីដែលសំខាន់ជាបណ្ដោះអាសន្ន និងសំខាន់អស់កល្បជានិច្ច ហើយដើម្បីជួយអ្នកដទៃក្នុងការរៀនសូត្រពីប្រាជ្ញា និងសេចក្ដីពិត ( សូមមើល គោលលទ្ធិ និងសេចក្ដីសញ្ញា ៩៧:១ ) ។ ការយល់ដឹងថាយើងជានរណា យើងមកពីណា ហើយហេតុអ្វីយើងនៅលើផែនដីដែលយើងម្នាក់ៗមានទំនួលខុសត្រូវយ៉ាងខ្លាំងទាំងការរៀនដើម្បីដឹងពីរបៀបរៀន និងរៀនដើម្បីស្រឡាញ់ការរៀន ។ ( ដាវីឌ អេ បែដណា « Learning to Love Learning » Ensign ខែកុម្ភៈ ឆ្នាំ២០១០ ទំព័រ ២៧ )
ប្រធាន ខាំមៀល អិន ចនសុន ប្រធានសមាគមសង្គ្រោះទូទៅ បានបង្រៀនថា ៖
យើងគួរតែទទួលការអប់រំ និងការបណ្តុះបណ្តាលទាំងអស់ដែលយើងអាចធ្វើបានដើម្បីយើងអាចរៀបចំខ្លួនបាន ។ រៀបចំខ្លួនដើម្បីបម្រើនៅក្នុងលោកិយ និងសាសនាចក្រ ។ រៀបចំខ្លួនធ្វើជាទីប្រឹក្សា និងដៃគូដ៏ឈ្លាសវៃចំពោះស្វាមីភរិយារបស់យើង ។ រៀបចំខ្លួនធ្វើជាគ្រូបង្រៀនដ៏មានប្រសិទ្ធភាពដល់កូនៗរបស់យើង និងយុវវ័យទាំងនោះដែលយើងមានឥទ្ធិពលលើ ។ កាលណាយើងកាន់តែរៀន នោះឥទ្ធិពលកាន់តែខ្លាំងដែលយើងអាចមានសម្រាប់សេចក្តីល្អ » ។ ( ខាំមៀល អិន ចនសុន« Seek Learning by Study and by Faith » [ ការប្រជុំធម្មនិដ្ឋានទូទាំងពិភពលោក BYU–Pathway ថ្ងៃទី១៩ ខែតុលា ឆ្នាំ២០២១ ] នៅលើគេហទំព័រ byupathway.org ) ។
ចេញមកពី ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ៖
ព្រះវរបិតាសួគ៌មានព្រះទ័យចង់ឲ្យបុត្រា និងបុត្រីរបស់ទ្រង់រៀនសូត្រជានិច្ច ។ អ្នកមានហេតុផលទាំងខាងសាច់ឈាម និងខាងវិញ្ញាណក្នុងការស្វែងរក និងការស្រឡាញ់ការរៀនសូត្រ ។ ការអប់រំមិនមែនគ្រាន់តែអំពីការរកប្រាក់ប៉ុណ្ណោះនោះទេ ។ ការអប់រំគឺជាផ្នែកមួយនៃគោលដៅដ៏អស់កល្បជានិច្ចរបស់អ្នកដើម្បីប្រែក្លាយកាន់តែដូចជាព្រះវរបិតាសួគ៌ ។…
សូមស្វែងរកឱកាសដើម្បីពង្រីកគំនិត និងជំនាញរបស់អ្នក ។ ឱកាសទាំងនេះអាចរួមបញ្ចូលការអប់រំជាផ្លូវការនៅសាលា ឬការបណ្តុះបណ្តាលវិជ្ជាជីវៈ ក៏ដូចជាការរៀនក្រៅផ្លូវការមកពីប្រភពដែលអ្នកទុកចិត្តបានផងដែរ ។ សូមយាងព្រះអម្ចាស់ឲ្យមានចំណែកនៅក្នុងការខិតខំរបស់អ្នក ហើយទ្រង់នឹងដឹកនាំអ្នក ។ នៅពេលអ្នករៀនអំពីពិភពលោកជុំវិញអ្នក សូមរៀនផងដែរអំពីព្រះអង្គសង្គ្រោះដែលបានបង្កើតពិភពលោកនេះ ។ សូមសិក្សាអំពីព្រះជន្ម និងការបង្រៀនរបស់ទ្រង់ ។ សូមធ្វើឲ្យថ្នាក់សិក្ខាសាលា ថ្នាក់វិទ្យាស្ថាន និងការសិក្សាដំណឹងល្អផ្ទាល់ខ្លួនក្លាយជាផ្នែកមួយនៃការសិក្សាពេញមួយជីវិតរបស់អ្នក ។ ( ដើម្បីកម្លាំងនៃយុវជន ៖សេចក្តីណែនាំដើម្បីធ្វើការជ្រើសរើស [ ឆ្នាំ២០២២ ] ទំព័រ ៣១ )
ប្រសិនបើអ្នកបែងចែកសិស្សជាក្រុម សូមអញ្ជើញពួកគេឲ្យចែកចាយការរកឃើញរបស់ពួកគេជាមួយសមាជិកក្នុងក្រុមរបស់ពួកគេ ។ មុនពេលពួកគេចែកចាយ សូមពន្យល់ថាជំនាញដ៏សំខាន់មួយដែលនឹងជួយពួកគេពេញមួយជីវិតរបស់ពួកគេ គឺការអាចគិតពិចារណាបាន ។ ការត្រិះរិះពិចារណាគឺសមត្ថភាពដើម្បីបង្កើតទំនាក់ទំនងរវាងគំនិត និងវាយតម្លៃ ។ សូមបង្ហាញការណែនាំខាងក្រោមនេះដើម្បីជួយសិស្សឲ្យអនុវត្តការគិតពិចារណាអំឡុងពេលពិភាក្សាក្នុងក្រុមរបស់ពួកគេ ៖
-
សង្ខេបនូវអ្វីដែលអ្នកបានរៀនមកពីបទគម្ពីរ និងសេចក្ដីថ្លែងការណ៍ដែលអ្នកបានសិក្សា ។
-
បន្ទាប់ពីសិស្សបានចែកចាយសេចក្តីសង្ខេបទាំងអស់ហើយ សូមពិភាក្សាសំណួរខាងក្រោម ។
-
តើអ្នករកឃើញភាពស្រដៀងគ្នាអ្វីខ្លះនៅក្នុងសេចក្ដីថ្លែងការណ៍ និងបទគម្ពីរដែលអ្នកបានរៀនអំពីនោះ ?
-
តើបទគម្ពីរ ឬសេចក្តីថ្លែងការណ៍ដែលអ្នកបានសិក្សាមានលក្ខណៈពិសេសខុសពីគ្នាយ៉ាងដូចម្ដេច ?
-
តើមានអ្វីនៅក្នុងសម្រង់សម្តី ឬបទគម្ពីរមួយដែលផ្ដល់ឲ្យអ្នកនូវការយល់ដឹងអំពីអ្វីមួយដែលនៅក្នុងសម្រង់សម្តី ឬបទគម្ពីរផ្សេងគ្នាដែរឬទេ ?
សេចក្តីពិតអំពីសារៈសំខាន់នៃការអប់រំ
សូមផ្តល់ឱកាសឲ្យសិស្សចែកចាយសេចក្ដីពិតដែលពួកគេបានរកឃើញចេញពីការសិក្សា និងការពិភាក្សារបស់ពួកគេ ។ អ្នកអាចសរសេរនៅលើក្ដារខៀននូវសំណួរមកពីដើមមេរៀនថា « ហេតុអ្វីបានជាការអប់រំមានសារៈសំខាន់ ? » ហើយឲ្យសិស្សសរសេរសេចក្ដីពិតដែលពួកគេបានរៀនជុំវិញសំណួរនេះ ។ សិស្សអាចរចែកចាយសេចក្តីពិតស្រដៀងគ្នាដូចខាងក្រោម ៖
-
ការអប់រំជួយយើងរៀបចំខ្លួនសម្រាប់ការបម្រើនៅក្នុងនគររបស់ព្រះ ( សូមមើល គោលលទ្ធិ និងសេចក្តីសញ្ញា ៨៨:៧៧-៨០ ) ។
-
ព្រះអម្ចាស់បញ្ជាឲ្យយើងស្វែងរកការរៀនសូត្រ ( សូមមើល គោលលទ្ធិ និងសេចក្តីសញ្ញា ៨៨:១១៨ ) ។
-
ចំណេះដឹង និងបញ្ញាដែលយើងបាននៅក្នុងជីវិតនេះ នោះនឹងនៅជាប់នឹងយើងក្នុងដំណើររស់ឡើងវិញ ( សូមមើល គោលលទ្ធិ និងសេចក្តីសញ្ញា ១៣០:១៨-១៩ ) ។
-
ការអប់រំអាចរៀបចំយើងឲ្យក្លាយជាអ្នកមានឥទ្ធិពលល្អប្រសើរនៅក្នុងពិភពលោក ( សូមមើល ខាំមៀល អិន ចនសុន » Seek Learning by Study and by Faith » [ ការប្រជុំធម្មនិដ្ឋានទូទាំងពិភពលោក BYU–Pathway ថ្ងៃទី១៩ ខែតុលា ឆ្នាំ២០២១ ] នៅលើគេហទំព័រ byupathway.org ) ។
សូមពិចារណាពិភាក្សាអំពីការយល់ដឹងរបស់សិស្សអំពីសេចក្ដីពិតដែលពួកគេបានស្វែងរកតាមរយៈការសួរសំណួរដូចខាងក្រោម ៖
-
តើសេចក្តីពិតណាមួយដែលអ្នកបានរកឃើញដែលមានអត្ថន័យបំផុតសម្រាប់អ្នក ? ហេតុអ្វី ?
-
តើអ្នកគិតថាការអប់រំអាចមានឥទ្ធិពលចំពោះទំនាក់ទំនងរបស់អ្នកជាមួយនឹងព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្ដេច ?
-
តើអ្នកបានមើលឃើញពរជ័យនៃការទទួលបានការអប់រំក្នុងជីវិតរបស់អ្នក ឬជីវិតរបស់អ្នកដទៃដោយរបៀបណា ?
ចូរពន្យល់វាតាមពាក្យសម្ដីរបស់អ្នកផ្ទាល់
សូមរំឭកសិស្សអំពីសាច់រឿងអំពី សារ៉ា មកពីខាងដើមនៃមេរៀននេះ ។ បន្ទាប់ពីចែកចាយសេចក្ដីណែនាំខាងក្រោមនេះ សូមឲ្យសិស្សមានពេលវេលាដើម្បីកត់ត្រាចម្លើយនៅក្នុងសៀវភៅកំណត់ហេតុការសិក្សារបស់ពួកគេ ។
ដោយប្រើអ្វីដែលអ្នកបានរៀន និងទទួលបានអារម្មណ៍នៅថ្ងៃនេះ សូមបង្កើតជាការឆ្លើយតបមួយដែលអ្នកអាចចែកចាយជាមួយ សារ៉ា ដែលអាចជួយនាងឲ្យយល់កាន់តែច្បាស់អំពីសារៈសំខាន់នៃការអប់រំ ។ នៅក្នុងការឆ្លើយតបរបស់អ្នក សូមដាក់បញ្ចូលសេចក្ដីយោងយ៉ាងហោចណាស់មួយទៅបទគម្ពីរ ឬសេចក្ដីថ្លែងការណ៍មកពីអ្នកដឹកនាំសាសនាចក្រម្នាក់ ។ អ្នកក៏អាចដាក់បញ្ចូលទីបន្ទាល់របស់អ្នក ឬពិពណ៌នាអំពីបទពិសោធន៍ដែលអ្នកមានបានផងដែរ ។
សូមពិចារណាផ្តល់ឱកាសដល់សិស្សចែកចាយចម្លើយរបស់ពួកគេជាមួយដៃគូ ។ សិស្សពីរបីនាក់ដែលស្ម័គ្រចិត្តក៏អាចឡើងចែកចាយការឆ្លើយតបរបស់ពួកគេជាមួយថ្នាក់ទាំងមូលបានដែរ ។
សូមបញ្ចប់មេរៀនដោយអញ្ជើញសិស្សឲ្យចែកចាយនូវអ្វីដែលពួកគេបានរៀន ហើយមានអារម្មណ៍ថាពួកគេចង់ចងចាំ ។ ពួកគេអាចកត់ត្រាចម្លើយរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ សូមពិចារណាចែកចាយទីបន្ទាល់របស់អ្នកអំពីសារៈសំខាន់នៃការអប់រំ ។