1828–1829

Martin Harris a Anisi Joseph

Kaeo ne nuku ewe Samoon

Ew ran, Joseph me Emma ra nom non Pennsylvania, emon chiechier itan Martin Harris a feitto an epwe churir. A wor an Martin watten atake non New York. I a sinei ussun an Joseph angang ngeni ekkewe seleich koon. I a fen anisi Joseph me mwan, me iei i a mochen an epwe sinei ika mi chommong me epwe tongeni fori an epwe aninis.

Souneng, 1:49

Joseph me Emma ra fokkun kinisou. Chommong aramas ra ekieki pwe Joseph a mwaken. A murinno an wor emon chiechian ussun Martin ewe a nuku ekkewe seleich koon pwe mi wesewesan.

Souneng, 1:49

Nupwen Joseph a chiakuni ekkewe seleich, Martin a makketiw met a apasa. Martin a fokkun meseik ren an anisi ewe Samon ren ei murinon angang.

Souneng, 1:50

Lucy, punuwen Martin ewe ese pwapwa. I ese nuku Joseph pwe a wesewesen nom ren ekkewe seleich koon. I a ekieki pwe Joseph a michieta Martin. I a mochen pwe Martin epwe niwinsefan ngeni New York o kouno ne anisi Joseph.

Souneng, 1:49–50

Nge Martin a chok sopwen ne fiti Joseph ne angang. I a ekikei pwe ika Lucy epwe tongeni aneani met ewe ra angang won, i epwe pwan nuku. I a tingorei Joseph ika mi tongeni uwei ekkewe peich ra chiakuni ngeni New York an epwe pwar ngeni punuwan ewe. Joseph a apasa pwe iotek me tingorei Kot.

Souneng, 1:50–51

Kot a ureni Joseph pwe esap mut ngeni Martin an epwe angei ekkewe peich. Martin a tingorei Joseph an epwe iotek sefan. Joseph a iotek me a angei ponuwan an iotek pwan ussun ewe chok me mwan. Nge Martin a fokkun mochen an epwe pwar ngeni punuwan ewe ekkewe peich, me Joseph a mochen anisi chiechian ewe. Joseph a ounungatin iotek. Ei fansoun Kot a ureni Joseph epwe ekiekii met epwe fori.

Souneng, 1:51

Joseph a ureni Martin pwe i a tongeni uwei ekkewe peich ngeni New York, nge i a tongeni pwarir ngeni punuwan ewe an epwe chok fat pwe ir chon ar famini. Iwe i epwe eniwini ekkewe peich non ruu wik. Martin a tipeew ngeni me a no fiti ekkewe peich.

Souneng, 1:51

Nupwen Martin a no, emon semirit a uputiw ngeni Joseph me Emma. Nge ewe semirit a mano, me Emma a poputa semwen. Emma me Josep ra fokkun netipengaw.

Souneng, 1:51–52

Joseph a oureki ussun Emma. I a pwan oureki ussun Martin. Ekkewe ruu wik a pasino, me Martin ese mo niwin sefan. Emma a pwan oureki.

Souneng, 1:52

Emma a ureni Joseph an epwe no ngeni New York an epwe kutta Martin. Joseph a churi Martin ren imwen inan me saman kewe. Nupwen Joseph a eisini Martin ussun ekkewe peich, Martin a fokkun netipengaw. I a apasa pwe ekkewe peich ra poutuno. I a fen kutta ekis meinisin nge ese tongeni kuner.

Souneng, 1:52–53

Joseph a fokkun netipengaw me nuokus. I a sinei pwe i a mwan an mut ngeni Martin an epwe angei ekkewe peich. I a niwinsefan ngeni imwan me a ureni Emma met a fis. Ewe chon nang Moronai a feitto me angei sefani ekkewe seleich koon. I a ureni Joseph pwe ika a tekisoson e aier, i epwe angei sefani ekkewe seleich me chiaku sefan.

Doctrine and Covenants 3:5–11; 10:1–3; Souneng, 1:53–54

Ren chommong wik, Joseph a ekieki ussun met mi mwan i a fori. I a iotek me tongor ren an epwe omusano. Kot a omusano i. I a ureni Joseph pwe ekkewe aramas ra sotuni ne oukano an Kot angang ra sonani. Nge ese wor emon a tongeni oukano an Kot angang. A wor an Kot kokkot an epwe sopweno An angang.

Doctrine and Covenants 3:1–10; Souneng, 1:54–55

Moronai a eniwini sefani ekkewe seleich ngeni Joseph. Kot a ureni Joseph me Martin pwe ika ra tekisoson me nuku I, repwe tongeni sopweno ne anisi An angang non chommong napanapan. Ra tongeni aninis ne wato ewe Puken Mormon ngeni ewe fonufan. Ei puk epwe anisi aramas ekis meinisin ar repwe aier me nuku non Jises Kraist.

Doctrine and Covenants 3:16–20; 5:21–35; Souneng, 1:56–57