“Aoaoga e uiga i le Tulafono Maualuga,” Fuafuaga mo Suesuega o le Eseta (2024)
Aso Lulu, 27 Mati
Aoaoga e uiga i le Tulafono Maualuga
“O lea ou te manao ia outou atoatoa e pei lava o aʼu, po o lo outou Tamā o le o i le lagi e atoatoa.” (3 Nifae 12:48).
E faapei o soo o Iesu o e sa faapotopoto atu e faalogo i le Lauga i luga o le Mauga i Kalilaia, o tagata o e na faapotopoto atu i le malumalu i Nuumau sa ola i le tulafono a Mose. Ae a o ia aoao atu, sa valaaulia e Iesu ia tagata ia ola i se tulafono maualuga atu, ma fetalai atu, “O lea o ia mea o taimi anamua, ia sa i lalo o le tulafono, ua faataunuuina uma ia te au. Ua faate’a atu mea tuai, ma ua faafouina mea uma” (3 Nifae 12:46–47).
I le taimi o le konafesi aoao ia Aperila 2023, sa fautuaina ai i tatou e Peresitene Russell M. Nelson ia tatou ola i se auala maualuga atu ma paia atu. Sa ia aoao mai:
I le avea ai o ni soo o Iesu Keriso, e tatau ona avea i tatou o ni faaa’oa’o o le ala e fegalegalea’i ai ma isi—aemaise pe a i ai ni eseesega o o tatou manatu. O se tasi o ala aupito faigofie e faailoa ai se so’o moni o Iesu Keriso o le ala e taulimaina ai ma le agaalofa e lena tagata isi tagata. …
Na faamanino mai e le Faaola lenei mea i Ana lauga i so’o i itulagi uma e lua. “Amuia e faatupuina le filemu,” na Ia fetalai ai. …
E manino lava le savali a le Faaola: O Ona so’o moni e atia’e, siitia, faamalosiau, uunaia, ma musuia—po o le a lava le faigata o le tulaga o i ai. O soo moni o Iesu Keriso o ni tagata e faatupuina le filemu. …
… O le auala tatou te taulimaina ai le tasi ma le isi e matuā tāua lava! O le ala tatou te tautatala atu ai i isi ma e uiga i isi i le fale, i le lotu, i le galuega, ma upega tafa’ilagi e taua tele. O le asō o le a ou talosagaina ai i tatou e fegalegalea’i ma isi i se ala maualuga atu ma sili ona pa’ia. (“Ua Manaomia i Latou e Faatupuina le Filemu,” Liahona, Me 2023, 98 - 99)
Faitau ma Mafaufau loloto
A o faitauina aoaoga o loo i luga a Iesu, o le a se mea na e mafaufau i ai pe lagona le musuia e fai e mulimuli ai ia Iesu Keriso?
Maimoa
“Ua Aoao Mai Iesu Keriso i le Ala e Ola ai i le Tulafono Maualuga”
Pese
“Mulimuli Mai ia te Au,” Viiga, nu. 62.