Aso Tofi, 28 Mati

Tasi le Lafu ma le Leoleo Mamoe e Tasi

“Ua i ai ia te au ni isi mamoe e le o i lenei lotoa; e ao foi ona ou aumai i latou, ma o le a latou faalogo i lo’u leo; ma o le a tasi le lafu, ma tasi le leoleo mamoe (3 Nifae 15:21).

Sa ta’u atu e Iesu Keriso ia sa Nifae o i latou o “mamoe” sa ia faasino i ai ina ua Ia aoao atu i Ierusalema, “Ua ia te au foi ni isi mamoe e le o i lenei lotoa; e ao foi ona ou aumai i latou” (3 Nifae 15:21). Na tautino mai ma le alofa e Iesu e faapea “o le a tasi le lafu, ma tasi le leoleo mamoe” ma valoia le faapotopotoina o Isaraelu i aso e gata ai.

O se tasi o auala e mafai ona tatou fesoasoani ai i le faapotopotoina o Isaraelu o le faasoa atu lea o le savali o le Tusi a Mamona, e pei ona valaaulia ai i tatou e fai e Elder Ronald A. Rasband:

Aʼu uo pele, i le avea ai o se Aposetolo a le Alii, ou te valaaulia outou e mulimuli i lo tatou perofeta pele, o Peresitene Nelson, i le faalolovaia o le lalolagi i le Tusi a Mamona. Ua matua tele naua le manaomia; ua manaomia lo tatou gaoioi nei loa. Ou te folafola atu o le a e auai i “le galuega aupito sili i le lalolagi,” o le faapotopotoina o Isaraelu,a o musuia oe e aapa atu ia i latou o e ua “taofia mai le upumoni ona ua latou le iloa le mea e maua ai.” Latou te manaomia lau tautinoga ma le molimau pe na faapefea ona suia e lenei tusi lou olaga ma faalatalata atili ai oe i le Atua, Lona filemu, ma Ana “tala o le olioli tele.”

Ou te molimau atu e faapea e ala i le mamanu paia na saunia ai le Tusi a Mamona i Amerika anamua ia oo mai e folafola atu le afioga a le Atua, ia aumaia agaga i le Alii o Iesu Keriso ma Lana talalelei toefuatai “i le asō.” (“O Le Aso Nei,” Liahona, Nov. 2022, 27)

Faitau ma Mafaufau loloto

• 3 Nifae 15:11–24

• 3 Nifae 16

O ai e mafai ona e faasoa atu i ai le talalelei a Iesu Keriso i lenei vaitau o le Eseta? E mafai ona faia lenei mea e ala i se faatinoga faigofie o le agalelei, faasoa atu o se savali faagaeetia, po o le valaaulia o se tasi e tapuai faatasi ma oe i lenei Aso Sa o le Eseta.

Maimoa

“Ua Molimau Mai Iesu Keriso i le Tasi le Lafu ma le Leoleo Mamoe e Toatasi”

Pese

“Pele i le Leoleo Mamoe,” Viiga, nu. 135