Ngaahi Faingamālie Ngāue Tokoní
Talateu
ʻOku lahi ha ngaahi founga ke kau ai ʻi homou koló, mei he fakahinohino mo e ngaahi tohi fakamoʻoní, ki hono tokoniʻi e niʻihi kehé ke nau teuteú. Ko ha niʻihi ʻeni ʻo ha ngaahi founga ke kamata ai:
ʻE Founga Fēfē Haʻaku Lava ʻo Kau?
JustServe: Ko e JustServe ko ha tokoni ia kuo fokotuʻutuʻu ki he kau ngāue tokoní mo e ngaahi koló. ʻO fakafou ʻi he JustServe, ʻe lava ʻe he kau ngāue tokoní mo e ngaahi kautaha mei he tui fakalotu kotoa pē ʻo kumi mo tuku hake ʻa e ngaahi ngāué. ʻE lava heni ʻa e kau ngāue tokoní ke tokoni ʻi he ngaahi koló, fetuʻutaki mo e ngaahi kautaha ʻoku ofi mai haʻanau kau ngāue tokoní, mo ʻoange ha faingamālie ki he koló ke nau ngāue fakataha ai ʻi he ngaahi ngāue ʻoku nau tokanga ki aí.
FEMA (US pē): Ko e Federal Emergency Management Agency (FEMA) ko ha maʻuʻanga fakamatala ia ki he tangataʻi fonua mo e kau ngāue ki he meʻa fakatuʻupakeé ke nau teuteu, tokoni, mo fakaakeake mei he ngaahi meʻa fakatuʻupakeé. Te ke lava ʻi he FEMA, ke teuteu ki he ngaahi meʻa fakatuʻupakeé, kumi ha ngaahi faingamālie ke tokoni ai, pea mo maʻu ha tokoni ki ha meʻa fakatuʻupakē, kapau ʻoku taau.
Kau Ngāue Tokoni ʻi ha Meʻa Fakatuʻupakeé: Ko e kau ngāue tokoni ko ʻeni mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku nau nofotaha pē ki he fakamaʻa ʻi he hili ʻo ha ngaahi fakatamakí. ʻOku fakafekauʻaki ʻa e kau ngāue tokoni ko ʻení ʻo fakafou ʻi he kau taki fakalotofonua ʻo e Siasí. Ko e hū ki he ngaahi feituʻu ʻo e fakatamakí ʻoku puleʻi ia ʻe he kau ʻōfisa fakapuleʻanga fakalotofonua ʻoku nau tokangaʻi e malu ʻa e kakaí. ʻOku ngāue ʻa e kau taki ʻo e Siasí mo e kau taki fakapuleʻanga fakalotofonuá ke fakapapauʻi ʻoku nau ngāue ʻi ha ngaahi feituʻu ʻoku ʻatā ʻa e hū ki aí.
CERT (US pē): ʻOku hanga ʻe he Community Emergency Response Team (CRT), ʻo akoʻi ʻa e kau mēmipa ʻo e koló fekauʻaki mo e ngaahi poto ʻi he teuteu ki he ngaahi meʻa fakatuʻupakeé, hangē ko e malu ʻi ha vela, ngaahi taukei kumi mo fakahaofí, fokotuʻutuʻu ʻo e timí, mo e ngāue fakafaitoʻo ʻi ha fakatamaki. ʻOku fakaʻatā ʻe he ako ko ʻení ʻa e kau mēmipá ke nau tokoni ki honau koló ʻi he taimi ʻoku hoko ai ha ngaahi fakatamaki.
Vakai ki he FEMA CERT Training ki he fakahinohinó mo ha ngaahi maʻuʻanga tokoni makehe.