Pagtuman sa mga Responsibilidad sa Pamilya

Ang misyon sa Simbahan sa Ginoo mao ang pagtabang sa tanang mga tawo nga moduol ngadto kang Kristo. Ang mga pamilya makatabang sa pagtuman niini nga misyon kon sila:

Mosangkap sa ilang kaugalingong espirituhanon ug pisikal nga mga panginahanglan ug motabang sa pagtubag sa mga panginahanglan sa uban.
Mopakigbahin sa ebanghelyo ngadto sa uban.
Mosiguro nga ang mga sakop sa pamilya makadawat sa mga ordinansa sa templo ug motabang sa paghatag niini nga mga panalangin alang sa ilang mga katigulangan nga nangamatay na.

Espirituhanon ug Pisikal nga mga Panginahanglan

Espirituhanon nga mga Panginahanglan

Ang naunang seksyon niini nga sumbanan nga basahon, “Pagtudlo sa Ebanghelyo sulod sa Panimalay,” adunay mga impormasyon kon unsaon sa mga pamilya makasangkap sa ilang espirituhanon nga mga panginahanglan.

Pisikal nga mga Panginahanglan

Ang mga pamilya kinahanglan nga mahimong self-reliant aron sila makasangkap sa ilang kaugalingong pisikal nga mga panginahanglan ug makatabang sa uban. Aron mahimong self-reliant, ang mga sakop sa pamilya kinahanglan nga andam nga motrabaho. Ang trabaho usa ka pisikal, mental, o espirituhanon nga paningkamot. Tinubdan kini sa kalampusan, kalipay, pagtamud sa kaugalingon, ug kauswagan. Ang mga ginikanan kinahanglan nga maningkamot nga mahimong self-reliant ug kinahanglang motudlo sa ilang mga anak niini. Ang pagka-self-reliant makapahimo kanila sa pagtabang niadtong nanginahanglan.

Ang mga amahan maoy responsable sa pagsangkap sa mga gikinahanglan sa kinabuhi ug sa pagpanalipod alang sa ilang mga pamilya. Ang mga inahan maoy responsable sa pag-atiman o pagmatoto sa ilang mga anak. Ang mga ginikanan mosiguro nga ang pamilya adunay limpyo nga panimalay, maayong pagkaon, sinina, medikal ug dental nga pag-atiman, mga kahigayunan sa edukasyon, natudloan sa pagdumala sa kapanguhaan sa panalapi, ug, kon mahimo, pagbansay kon unsaon sa pagpananom sa kaugalingon niyang pagkaon. Ang mga ginikanan kinahanglang motudlo sa ilang anak unsaon sa pag-andam sa ilang pagkaon ug unsaon sa pagpreserbar niini aron magamit.

Ang mga ginikanan kinahanglang andam nga motrabaho pag-ayo alang sa paghatag niining pisikal nga mga panginahanglan. “Ug kamo dili motugot sa inyong mga anak nga sila magutman, o hubo” (Mosiah 4:14). Ang mga ginikanan kinahanglan nga magplano ug mag-andam sa pagsangkap sa mga panginahanglan sa pamilya sa panahon sa sakit, katalagman, mawad-an og trabaho, o ubang mga kalisud. Kon ang amahan maglisud sa pagsangkap sa pisikal nga mga panginahanglan sa iyang pamilya ug kon ang uban nga mga sakop sa pamilya dili makatabang, mahimo siyang mangayo og panabang sa mga lider sa priesthood.

Ang mga anak makatabang sa pagsangkap sa pisikal nga mga panginahanglan sa ilang mga pamilya pinaagi sa pagtabang sa ilang mga ginikanan sa ilang trabaho, pagtarung sa pagtuon sa eskwelahan, pag-atiman sa ilang mga sinina ug ubang mga butang, maglimpyo ug maghinlo sa ilang mga kaugalingon ug sa ilang panimalay, maningkamot nga maayo ang panglawas.

Ang mga sakop sa pamilya kinahanglan nga mopalambo sa ilang abilidad sa pagbasa, pagsulat, ug paghimo og yano nga arithmetic ug mopahimulos sa matag kahigayunan nga makaangkon og kahibalo ug mopauswag sa mga kahanas. Sila kinahanglan nga mosunod sa Pulong sa Kaalam ug mokaon sa makapahimsog nga mga pagkaon. Kon mahimo, ang mga pamilya kinahanglan nga magtipig og usa ka tuig nga suplay sa pagkaon, o kutob sa mahimo, sa importanting mga butang nga gikinahanglan aron makapatunhay sa kinabuhi. Ang mga sakop sa pamilya kinahanglang maglikay sa wala kinahanglana nga pagpangutang, magtigom alang sa umaabut, mobayad sa ilang tanang mga obligasyon, ug mogamit sa ilang mga kapanguhaan sa maalamong paagi, dili mag-usik-usik.

Ang mga ginikanan kinahanglan motudlo sa ilang mga anak nga mopakigbahin sa uban. Hapit tanan makahatag og bisan unsa, bisan unsa pa ka gamay ang anaa kanila. Usa ka paagi sa pagtabang niadtong nagkinahanglan mao ang pagpuasa matag bulan ug pag-amot ngadto sa mga halad sa puasa, nga gamiton sa pagpakaon sa gigutom, paghatag og kapasilongan sa walay mga balay, pagsinina sa hubo, ug sa paghupay sa mga masakiton. Atong mapakita ang atong gugma sa Ginoo kon kita motabang sa uban. Siya miingon, “Maingon nga gibuhat ninyo kini ngadto sa usa sa labing gamay niining akong mga igsoon, gibuhat usab ninyo kini kanako” (Mateo 25:40).

Pagpakigbahin sa Ebanghelyo

Ang Ginoo, pinaagi sa Iyang mga propeta sa ulahing mga adlaw, mitudlo nga ang matag miyembro sa Simbahan adunay responsibilidad sa pagpakigbahin sa ebanghelyo ngadto sa uban. “Ang matag tawo nga napasidan-an magpasidaan sa iyang silingan” (D&P 88:81). Si Alma, usa ka propeta sa Basahon ni Mormon, mipasabut nga kon kita nabunyagan kinahanglan nga kita andam nga “mobarug ingon nga mga saksi sa Dios sa tanan nga mga panahon ug sa tanan nga mga butang, ug sa tanan nga mga dapit” (Mosiah 18:9).

Ang mga sakop sa pamilya kinahanglang mobuhat kutob sa ilang mahimo sa pagtabang sa ilang mga paryente, mga kahigalaan, ug mga silingan nga makat-on mahitungod sa ebanghelyo ni Jesukristo ug sa mga panalangin nga ikahatag niini sa ilang mga kinabuhi. Pinaagi sa pagpakigbahin sa ebanghelyo, ang mga ginikanan ug mga anak makapalig-on sa ilang kaugalingong mga pagpamatuod ug makadala sa mga panalangin sa ebanghelyo ngadto sa uban. Ang mga pamilya makahimo sa:

Pagpakita og maayong ehemplo pinaagi sa pagsunod sa tanang mga kasugoan (tan-awa sa Mateo 5:16).
Pagmapasalamaton sa ilang pagpamiyembro sa Simbahan (tan-awa sa Mga Taga Roma 1:16) ug pagpahibalo sa ubang mga tawo nga sila mga miyembro.
Pagpangutana sa mga kaila kon gusto ba sila nga masayud pa mahitungod sa Simbahan.
Paghangyo sa Ginoo sa pagtabang kanila nga mopili og usa ka pamilya o indibidwal kinsa andam sa pagpaminaw sa ebanghelyo.
Pagpaila sa pamilya o indibibwal ngadto sa Simbahan sa pipila ka paagi, sama sa pag-imbitar kanila ngadto sa usa ka family home evening o sa usa ka miting o kalihokan sa Simbahan, mohatag kanila og mga libro sa Simbahan o pampleta nga mabasa, o makigsulti kanila mahitungod sa mga panalangin sa ebanghelyo.
Pag-imbitar sa pamilya o indibidwal ngadto sa ilang panimalay aron matudloan sa mga misyonaryo.

Ang mga ginikanan adunay responsibilidad sa pag-andam sa ilang mga kaugalingon ug sa ilang mga anak nga moserbisyo og full-time nga mga misyon. Sa pag-andam sa mga bata, ilabi na sa mga anak nga lalaki, ang mga ginikanan kinahanglang motudlo sa ebanghelyo sulod sa panimalay, maghimo og personal ug pamilya nga pagtuon sa kasulatan ug mga pagampo, ug maghisgot kanunay kabahin sa mga responsibilidad ug mga panalangin sa pagpakigbahin sa ebanghelyo. Sila makatudlo sa ilang mga anak nga magtigum og kwarta alang sa mga misyon, motrabaho pag-ayo, mahimong self-reliant, ug mohigugma ug moserbisyo sa ubang mga tawo.

Mga Ordinansa sa Templo alang sa Buhi ug sa mga Patay

Sa mga templo, ang takus nga mga miyembro sa Simbahan makadawat og sagrado nga mga ordinansa ug makigsaad uban sa Dios. Moapil usab sila sa buhat sa ordinansa alang sa ilang nangamatay nga mga katigulangan. Kon mahimo, ang amahan ug inahan kinahanglang makakuha og temple recommend gikan sa ilang mga lider sa priesthood ug moadto sa templo aron modawat sa ilang kaugalingong mga ordinansa sa templo. Kon dili sila makaadto sa templo, kinahanglang maningkamot sila nga mahimong takus sa temple recommend.

Ang mga pamilya adunay sagrado nga responsibilidad sa pagsiguro nga ang mga ordinansa sa templo gipahigayon alang sa ilang mga katigulangan nga namatay nga wala pa makadawat niini. Ang mga miyembro sa Simbahan nga nakadawat sa ilang kaugalingong mga ordinansa kinahanglang mobalik ngadto sa templo kanunay sigun sa itugot sa panahon, kwarta, ug templo sa pagpahigayon sa mga ordinansa alang sa ilang mga katigulangan.

Ang mga amahan ug mga inahan kinahanglan mangolekta og sinulat nga mga rekord sa importante nga mga hitabo sa ilang mga kinabuhi ug sa mga kinabuhi sa ilang mga anak, lakip na sa mga sertipiko sa mga panalangin; mga bunyag, mga ordinasyon, mga kaminyoon; ug mga kamatayon; importante nga mga sulat; mga litrato; mga ginunting gikan sa peryodiko; ug susama nga mga butang. Kinahanglan sila nga mohimo sa ilang kaugalingong personal nga mga kasaysayan ug kinahanglang moawhag sa matag sakop sa pamilya sa paghimo og personal nga kasaysayan. Kinahanglan ilang tabangan ang gagmayng mga bata nga mosugod sa ilang personal nga mga kasaysayan.

Ang mga pamilya kinahanglang mangolekta og mga impormasyon kabahin sa ilang mga katigulangan ug iapil kini sa mga kasaysayan sa pamilya. Kinahanglan ilang sugdan kini pinaagi sa paghipos og mga impormasyon sa ilang labing bag-o nga upat ka mga henerasyon.