Pagtudlo sa Ebanghelyo sulod sa Panimalay

Pagtudlo sa mga Anak uban sa Kaayo ug Gugma

Ang Ginoo nagmando sa mga ginikanan sa pagtudlo sa ebanghelyo ngadto sa ilang mga anak. Siya miingon:

“Tungod kay ang mga ginikanan adunay mga anak sa Zion, o diha sa bisan diin sa iyang mga istaka [stake] nga natukod, nga wala magtudlo kanila sa pagsabut sa doktrina sa paghinulsol, hugot nga pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon walo ka tuig ang panuigon, ang sala anaa sa mga ulo sa mga ginikanan.

“Kay kini mao ang balaod ngadto sa mga lumulupyo sa Zion, o diha sa bisan diin sa iyang mga istaka [stake] nga natukod.

“Ug ang ilang mga anak pagabunyagan alang sa kapasayloan sa ilang mga sala kon moabut sa walo ka tuig ang panuigon, ug makadawat sa pagpandong sa mga kamot.

“Ug sila usab motudlo sa ilang mga anak sa pag-ampo, ug sa paglakaw nga matarung sa atubangan sa Ginoo” (D&P 68:25–28).

Ang mga ginikanan motudlo inubanan sa kaayo ug gugma, maghinumdom sa tambag ni Apostol Pablo sa “pagbansay [sa ilang mga anak] ug pagpahamatngon gikan sa Ginoo” (Mga Taga-Efeso 6:4).

Pagtuon sa Kasulatan kauban ang Pamilya

Kita mahimong sama sa atong Langitnong Amahan ug makatagamtam og matang sa kinabuhi nga Iyang gipuy-an pinaagi lamang sa pagsunod sa mga balaod diin niana ang panalangin gibase (tan-awa sa D&P 130:20–21). Sa dili pa kita makasunod niana nga mga balaod, kinahanglang makahibalo kita unsa kini sila. “Malisud alang sa usa ka tawo nga maluwas diha sa pagkawalay alamag” (D&P 131:6).

Si Jesukristo mao ang atong lider ug magbabalaod. Nasayud siya sa agianan ug sa mga balaod nga angay natong sundon, ug Siya miimbitar sa matag usa kanato sa pagsunod Kaniya. Siya miingon, “Ako mao ang dalan, ug ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako” (Juan 14:6). Aron mahimong sama sa atong Langitnong Amahan ug makabalik ngadto Kaniya, kinahanglang magkat-on kita sa mga pagtulun- an ni Jesus ug mosunod niini. Ania kanato ang mga kasulatan aron sa pagtabang kanato nga makat-on mahitungod sa kinabuhi, mga pagtulun- an, ug mga kasugoan ni Jesukristo.

Ang upat ka mga libro o basahon nga gidawat sa Simbahan isip nga mga kasulatan mao ang Biblia, ang Basahon ni Mormon, Doktrina ug mga Pakigsaad, ug ang Perlas nga Labing Bililhon. Kini sila mihatag og pasabut sa mga balaod sa ebanghelyo ug sa mga sumbanan diin kita makasukod sa tanang mga hunahuna, mga binuhatan, ug mga pagtulun-an. Makatabang kini kanato nga makaton mahitungod sa kinabuhi ug mga pagtulun-an ni Jesukristo ug mohatag og mga ehemplo sa mga tawo nga adunay hugot nga pagtuo sa Dios ug misunod sa Iyang mga kasugoan.

Si Jesus mitudlo kanato sa pagsiksik ug sa pagtuon sa mga kasulatan (tan-awa sa Juan 5:39; 3 Nephi 23:1; D&P 88:118).

Ang mga pamilya kinahanglang duyog nga magtuon sa mga kasulatan kanunay aron makat-on ug makasunod sa mga pagtulun-an sa Ginoo. Kinahanglang pundukon sa mga ginikanan ang ilang mga pamilya sa regular nga oras matag adlaw aron magbasa ug maghisgot sa mga kasulatan. Ang matag sakop sa pamilya nga makabasa kinahanglang adunay kahigayunan sa pagbasa gikan sa mga kasulatan.

Usa ka sakop sa pamilya mahimong modalit og pag-ampo sa dili pa ang pagbasa sa kasulatan ug mohangyo sa Langitnong Amahan sa pagpanalangin sa matag usa nga makasabut sa unsay gibasa ug aron makaangkon og pagpamatuod kabahin niini. Ang mga pamilya mahimong mohimo sa ilang pag-ampo sa pamilya human sa pagbasa sa kasulatan.

Samtang ang mga pamilya mobasa ug mamalandong sa mga kasulatan, gusto sila nga mahimong sama sa Manluluwas ug makakaplag og mas dakong kalipay ug kalinaw sa ilang mga kinabuhi.

Tagsa-tagsa ug kauban sa Pamilya nga mga Pag-ampo

Ang matag usa kanato kinahanglang makat-on sa pagpakigsulti sa atong Amahan sa Langit pinaagi sa pagampo. Kita gihigugma Niya ug gusto nga kita makigsulti ngadto Kaniya. Gusto Niya nga kita mopasalamat Kaniya alang sa atong mga panalangin ug mangayo sa Iyang panabang ug giya. Siya motabang kanato kon kita mangayo. Kasagaran sa mga pagampo nga gihalad uban sa atong mga ulo nga giduko ug atong mga mata nga gipiyong samtang kita magluhod, maglingkod, o magbarug.

Kinahanglang hinumduman nato ang upat ka importante nga mga baruganan kon kita mag-ampo:

Atong sugdan ang atong mga pagampo pinaagi sa pagsulti ngadto sa atong Langitnong Amahan: “Among Amahan sa Langit ..."
Atong pasalamatan ang atong Amahan sa Langit alang sa mga butang nga Iyang gihatag kanato: “Kami nagpasalamat Kanimo ..."
Atong pangayoon o hangyoon Kaniya ang panabang nga atong gikinahanglan: “Kami mangayo/ maghangyo Kanimo ..."
Atong tapuson ang atong pag-ampo pinaagi sa pangalan sa Manluluwas: “Sa pangalan ni Jesukristo, amen.”

Ang atong mga pag-ampo dili kinahanglan nga mosunod kanunay niining tanang upat ka mga lakang, pero ang pagbutang niini sa hunahuna makatabang kanato nga makat-on sa pag-ampo. Kinahanglan nga atong sugdan ug tapuson ang atong mga pag-ampo ginamit ang una ug sa katapusan nga mga lakang pero ang unsay atong isulti sa tunga-tunga mag-agad sa unsay atong gibati nga importante. Usahay gusto kita nga mogahin sa sagad sa atong pag-ampo sa pagpasalamat sa atong Langitnong Amahan. Sa ubang mga higayon mahimo nga atong igahin ang atong pag-ampo sa pagpangayo sa Iyang panabang.

Tinagsa nga mga pag-ampo

Ang matag tawo kinahanglan tagsatagsa nga mag-ampo nga dili mominos kausa sa buntag ug sa gabii. Ang mga ginikanan kinahanglang motudlo sa mga bata sa paghimo sa ilang personal nga mga pag-ampo kon makasugod na sila sa pagsulti. Ang mga ginikanan makatudlo sa ilang mga anak unsaon sa pag-ampo pinaagi sa pagluhod uban kanila ug ipasunod nila ang matag hugpong sa mga pulong. Sa dili madugay ang mga bata makahimo na sa paghatag sa ilang kaugalingong mga pag-ampo.

Mga Pag-ampo nga kauban ang Pamilya

Ang matag pamilya kinahanglan maghimo og pag-ampo sa pamilya kada adlaw. Ang tibuok pamilya mangluhod, ug ang pangulo sa pamilya mohalad sa mga pag-ampo o mohangyo sa usa ka sakop sa pamilya sa paghalad niini. Ang tanan kinahanglan nga adunay kahigayunan sa paghalad og pag-ampo. Ang gagmayng mga bata makapuli-puli uban sa ilang mga ginikanan nga motabang kanila. Ang panahon sa pag-ampo sa pamilya usa ka maayo kaayong okasyon sa pagtudlo sa mga anak kon unsaon pag-ampo ug alang sa pagtudlo sa mga baruganan sama sa hugot nga pagtuo sa Dios, pagkamapainubsanon, ug gugma.

Espesyal nga mga Pag-ampo

Ang mga ginikanan kinahanglan nga motudlo sa ilang mga anak nga ang Dios andam kanunay nga maminaw sa ilang mga pag-ampo. Dugang sa ilang kanunay nga tagsa-tagsa ug kauban sa pamilya nga mga pagampo, makaampo sila bisan kanus-a nga sila magkinahanglan og espesyal nga tabang o gusto nga mopasalamat.

Pagpanalangin sa Pagkaon

Ang mga ginikanan kinahanglang mosiguro nga ang mga sakop sa pamilya makat-on sa pagpasalamat sa Dios alang sa ilang pagkaon ug mohangyo Kaniya sa pagpanalangin niini sa dili pa sila mokaon. Ang matag tawo, lakip na ang gagmayng mga bata, kinahanglang magpuli-puli sa paghalad sa panalangin. Ang paghalad og pag-ampo alang sa pagpanalangin sa pagkaon makatabang sa mga ginikanan ug mga anak nga makat-on nga mahimong mapasalamaton sa atong Langitnong Amahan.

Family Home Evening

Ang family home evening alang sa tanan, lakip ang bag-ong naminyo nga mga magtiayon, mga amahan ug mga inahan nga adunay mga anak, naginusara nga mga ginikanan nga adunay mga anak, mga ginikanan nga walay mga anak sa ilaha, mga single adults sa mga home evening groups, ug niadtong kinsa nagpuyo nga nag-inusara o may kauban sa kwarto. Ang tanan, bisan unsa pa ang ilang mga kahimtang, mapanalanginan pinaaagi sa pagpahigayon og mga family home evenings. Ang Simbahan mihimo sa mga gabii sa Lunes nga walay laing mga kalihokan aron ang mga pamilya magkapundok alang sa family home evening.

Ang Unang Kapangulohan miingon: “Mosaad kami kaninyo og daghang mga panalangin kon kamo mosunod sa tambag sa Ginoo ug mopahigayon kanunay og mga family home evening. Nag-ampo kami kanunay nga ang mga ginikanan sa Simbahan modawat sa ilang responsibilidad sa pagtudlo ug pagpasabut sa mga baruganan sa ebanghelyo ngadto sa ilang mga anak. Hinaut nga ang Dios mopanalangin kaninyo nga magmakugihon niining labing importante nga responsibilidad” (“Message from the First Presidency,” Family Home Evening Resource Book [1983], iv).

Isip patriyarka sa iyang pamilya, ang amahan maoy mangulo sa family home evening. Kon wala ang amahan, ang inahan mao ang mangulo. Ang mga ginikanan modumala o motudlo og usa ka sakop sa pamilya sa pagpahigayon sa home evening. Sila motudlo sa leksyon o modelegar sa pagtudlo ngadto sa dagkong mga anak nga mahimo na nga makatudlo. Ang tanan nga dako na kinahanglang adunay kahigayunan sa pag-apil. Ang gagmay nga mga bata makatabang sama sa pagdumala sa musika, pagkutlo sa mga kasulatan, pagtubag sa mga pangutana, paggunit sa mga litrato, paghatag sa pabugnaw [refreshments], ug pag-ampo.

Gisugyot nga outline alang sa family home evening mosunod:

Pangbukas nga kanta (sa pamilya)
Pangbukas nga pag-ampo (sa usa ka sakop sa pamilya)
Balak o pagbasa sa kasulatan (sa usa ka sakop sa pamilya)
Leksyon (sa amahan, inahan, o sa dako-dako nga anak)
Kalihokan o kalingawan (pasiugdahan sa usa ka sakop sa pamilya ug ang ubang tanang mga miyembro sa pamilya nga moapil)
Panapos nga kanta (sa pamilya)
Panapos nga pag-ampo (sa usa ka sakop sa pamilya)
Pabugnaw [refreshments]

Ang pamilya makapahigayon og family home evening sa daghang laing mga paagi. Bisan unsa nga kalihokan nga makapahiusa sa pamilya, makapalig- on sa ilang gugma sa usag usa, makatabang kanila nga mahiduol sa Langitnong Amahan, ug makaawhag kanila nga makapuyo sa matarung nga paagi mahimong usa ka family home evening. Mga ehemplo sa maong mga kalihokan maglakip sa pagbasa sa mga kasulatan, paghisgot sa ebanghelyo, pagpakigbahin og mga pagpamatuod, paghimo og proyekto sa pagserbisyo, pagkanta-kanta, pagpiknik, pagdula og dula sa pamilya, ug pag-hiking. Ang tanang mga family home evening kinahanglang apilan og pag-ampo.

Ang mga leksyon sa family home evening mahimong ibase sa mga kasulatan; mga pulong sa mga propeta sa ulahing mga adlaw, ilabi na sa mga pakigpulong sa kinatibuk-ang komperensya; ug personal nga mga kasinatian ug mga pagpamatuod. Daghang mga leksyon kinahanglang isentro sa pagkatawo, kinabuhi, mga pagtulunan, ug sa Pag-ula sa Manluluwas. Ang Mga Baruganan sa Ebanghelyo, Mga Sukaranan sa Ebanghelyo, Matinud-anon sa Tinuhoan [True to the Faith], Alang sa Kalig-on sa Kabatan-onan, ug ang mga magasin sa Simbahan nga adunay mga istorya o artikulo ug uban pang mga impormasyon sa daghang mga hilisgutan nga mahimong kabahin sa mga leksyon sa family home evening.

Gisugyot nga mga hilisgutan sa panaghisgutan alang sa home evening mosunod:

Ang Plano sa Kaluwasan
Ang kinabuhi ug mga pagtulun-an ni Jesus
Paghinulsol
Pag-ampo
Pagpuasa
Ang Pulong sa Kaalam
Ang sumbanan sa moralidad sa Ginoo
Ang kahulugan sa sakramento
Ikapulo
Pasalamat
Pagkamatinuoron
Pagtahud sa Dios ug pagtahud sa Iyang mga nilalang
Pagpangandam alang sa bunyag, ordinasyon sa priesthood, o kaminyoon
Pagpangandam sa pagsulod sa templo
Pagbasa sa mga kasulatan
Pagbalaan sa adlawng Igpapahulay
Pagpasaylo sa uban
Pag-angkon ug pagpakigbahin og pagpamatuod
Pagpakigbahin sa ebanghelyo ngadto sa uban.
Pagtipig og mga family history
Pagsabut ug pagdawat sa kamatayon
Pagsulbad sa mga problema sa pamilya
Pagdumala sa mga panalapi sa pamilya
Pagdawat og trabahoon sa balay
Pagpasalamat ug paglingaw-lingaw sa musika

Mga Holiday ug Espesyal nga mga Okasyon

Ang mga holiday ug espesyal nga mga okasyon, sama sa Pasko; Pasko sa Pagkabanhaw; ang anibersaryo sa pagpahiuli sa priesthood; mga komperensya; paglarga sa misyon sa usa ka sakop sa pamilya; o sa pagkatawo, bunyag, o ordinasyon sa usa ka sakop sa pamilya, mahimong usa ka maayo kaayo nga kahigayunan sa pagtudlo sa mga kamaturoan sa ebanghelyo.

Ikapulo [Tithing] ug mga Halad

Ang Ginoo misugo sa Iyang mga katawhan sa pagsunod sa balaod sa ikapulo ug magpakatakus sa gisaad nga mga panalangin (tan-awa sa Malaquias 3:8–11).

Usa ka maayo kaayong panahon alang sa mga ginikanan sa pagtudlo sa balaod sa ikapulo ug mga halad mao ang panahon nga sila mobayad sa ilang kaugalingon. Ang mga bata maimpluwensya sa unsay ilang nakita nga gibuhat sa ilang mga ginikanan. Ang mga bata nga nagdawat og allowance kinahanglang mobayad sa ikapulo niini. Ang matag bata kinahanglan nga adunay lain-laing mga sudlanan alang sa kwarta: usa para sa ikapulo, usa para sa misyon, ug ang usa para sa kwarta nga gastuhon. Sa matag higayon nga ang mga bata makadawat og kwarta, kinahanglang makat-on sila sa paghipos sa 10 porsyento niini ngadto sa sudlanan sa ikapulo pag-una, dayon gamay nga kantidad ngadto sa sudlanan para sa misyon, ug ang balanse ngadto sa sudlanan sa kwarta nga gastuhon.

Inig bayad sa mga bata sa ikapulo, ang mga ginikanan kinahanglang motudlo kanila sa pagsulat sa tithing slip, isulod kini sa sobre uban sa kwarta, ug ihatag o ipadala ang sobre ngadto sa usa ka sakop sa bishopric o kapangulohan sa branch. Ang mga pamilya nga nagpuyo sa layo nga dapit kinahanglang mohatag sa ikapulo ngadto sa ilang natudlo nga lider sa priesthood.

Paghisgut-hisgot Panahon sa Pagpangaon

Ang panahon sa pagpangaon usa ka maayong okasyon sa paghisgot mahitungod sa ebanghelyo. Ang gagmayng mga bata gustong mangutana ug motubag og mga pangutana sa ebanghelyo. Kon sila wala masayud sa mga tubag, ang amahan o inahan makahatag og mubo nga mga tubag ug makatudlo sa ebanghelyo. Dili kada pagpangaon nagkinahanglang maghisgot sa ebanghelyo, pero ang ingon nga paghisgut-hisgot makaduha o makatulo ka higayon sa kada semana makatabang sa pamilya nga makat-on sa ebanghelyo.

Pangpakatulog nga mga Istorya

Tungod kay ang kadaghanan sa mga bata ganahan sa pangpakatulog nga mga istorya, makahatag kini og maayo kaayo nga kahigayunan sa pagtudlo sa ebanghelyo pinaagi sa pag-istorya o pagbasa sa mga istorya gikan sa mga kasulatan, mga gimantala sa Simbahan, o personal nga mga kasinatian. Ang mga istorya kabahin sa pagkamatinuoron, ug pagkamabination magtudlo og importante nga mga baruganan sa ebanghelyo.

Duyog nga Magtrabaho

Daghang mga kahigayunan sa pagtudlo sa ebanghelyo moabut samtang ang mga pamilya duyog nga magtrabaho diha sa panimalay. Samtang manglimpyo sa balay o magtrabaho sa nataran o tanaman, pananglit, ang mga ginikanan kinahanglang abtik sa mga kahigayunan sa paghisgot mahitungod sa ebanghelyo. Ang usa ka bata sa kasagaran mangutana. Ang mga ginikanan kinahanglang mogahin og panahon sa paghatag og yano nga mga tubag. Ang mga komentaryo sama sa “Maayo kaayo ka nga motrabaho. Nakasiguro ko nga ang Langitnong Amahan malipay gyud nimo” o “Tan-awa ang maanindot nga mga panganud nga gihimo sa Langitnong Amahan” makahatag sa mga bata og pagbati nga mapasalamaton sa atong Langitnong Amahan ug sa kasiguroan nga Siya tinuod.

Mga Konseho sa Pamilya

Ang mga ginikanan mahimong mopatawag sa mga sakop sa pamilya sa usa ka konseho sa pamilya. Ang mga pamilya makagamit niini nga mga konseho sa paghimo og mga tumong, pagsulbad sa mga problema sa pamilya, paghisgot sa mga panalapi, paghimo og mga plano, pagsuporta ug paglig-on sa usag usa, pagpadayag og pagpamatuod, ug sa pag-ampo alang sa usag usa. Ang konseho mahimong himoon bisan kanus-a kon gikinahanglan. Ang mga ginikanan mahimong maghimo og konseho sa pamilya matag Dominggo o kalabut sa family home evening. Ang pagtahud sa mga opinyon ug mga pagbati sa uban importante sa kalampusan sa mga konseho sa pamilya.

Pribado nga mga Interbyu

Nakita sa daghang mga ginikanan nga ang kanunay, pribado nga mga interbyu sa kada anak makatabang kanila nga masuod ngadto sa ilang mga anak, makaawhag kanila, ug motudlo kanila sa ebanghelyo. Ang ingon niini nga mga interbyu mahimong pormal o dili pormal ug mahimong himoon kanunay.

Ang ginikanan kinahanglang mopadayag og gugma ug pagsalig sa anak, ug ang anak kinahanglan adunay kahigayunan sa pagpadayag sa iyang mga pagbati mahitungod sa bisan unsa nga mga hilisgutan, problema, o kasinatian. Ang ginikanan kinahanglang maminaw pag-ayo ug kinahanglang dawaton ang mga problema ug mga tinagoan sa anak sa seryosong paagi. Ang ginikanan ug ang anak mahimong duyog nga mag-ampo. Ang mga problema nga motumaw gikan sa interbyu nga naglakip sa ubang mga sakop sa pamilya mahimong hisgutan sa sunod nga family home evening.

Mga Kalihokan sa Pamilya

Ang mga ginikanan kinahanglan nga magplano kanunay og panahon nga ang tibuok pamilya magkadungan sa pagbuhat og mga butang. Mga piknik, kamping, mga proyekto sa pamilya, trabaho sa balay ug sa tugkaran, swimming, pag-hiking, ug maayo nga salida sa sine ug ubang kalingawan maoy pipila sa daghang mga kalihokan nga makalingaw sa mga pamilya.

Ang pamilya nga managkauban nga malingaw sa mga kalihokan mobati og mas dako nga gugma ug panag-uyon. Ang mga anak mas andam nga maminaw sa ilang mga ginikanan ug mosunod sa ilang tambag kon sila mobati nga suod ngadto kanila. Ang mga ginikanan makahimo sa pagtudlo sa ebanghelyo sa mas epektibo nga paagi.