Mga Ordinansa ug mga Panalangin sa Priesthood

Ang mga ordinansa sa priesthood sagrado nga mga buhat nga gihatag sa Ginoo ug gipahigayon pinaagi sa awtoridad sa priesthood. Ang mga panalangin sa priesthood gihatag pinaagi sa awtoridad sa priesthood alang sa pag-ayo, paghupay, ug pagawhag. Ang mga kaigsoonang lalaki kinsa mopahigayon sa mga ordinansa ug mga panalangin kinahanglang mag-andam sa ilang mga kaugalingon pinaagi sa pagpuyo sumala sa mga baruganan sa ebanghelyo ug maningkamot nga magiyahan sa Balaan nga Espiritu. Kinahanglan nga ilang ipahigayon ang matag ordinansa ug panalangin sa ligdong nga paagi ug motuman sa mosunod nga mga kinahanglanon; ang ordinansa kinahanglan nga:

Ipahigayon pinaagi sa pangalan ni Jesukristo.
Ipahigayon pinaagi sa awtoridad sa priesthood.
Ipahigayon uban sa bisan unsa nga gikinahanglan nga pamaagi, sama sa paggamit sa sakto nga mga pulong o paggamit sa gibalaan nga lana.
Gitugutan sa natudlo nga lider sa priesthood kinsa naghupot sa tukma nga mga yawe, kon gikinahanglan.

Ang mga ordinansa nga nagkinahanglan og pagtugot sa lider sa priesthood mao ang paghatag og pangalan ug pagpanalangin sa mga bata, pagpahigayon og mga bunyag ug kumpirmasyon, pagtugyan sa priesthood ug pag-ordinar ngadto sa usa ka katungdanan sa priesthood, pagpanalangin ug pagpasa sa sakramento ug pagpahinungod sa mga lubnganan.

Kon daghang mga kaigsoonang lalaki ang moapil sa ordinansa o sa pagpanalangin, ang matag usa gaan nga mobutang sa iyang walang kamot sa abaga sa igsoon sa iyang wala. Ang naandan nga pag-imbitar og daghang mga naghupot sa priesthood nga motabang wala gidasig.

Ang mga ordinansa ug mga panalangin nga gipasabut niini nga seksyon makatabang sa mga amahan nga moserbisyo isip mga patriyarka sa ilang mga pamilya.

Paghatag og Pangalan ug Pagpanalangin sa mga Bata

“Matag sakop sa Simbahan ni Kristo nga adunay mga anak modala kanila ngadto sa mga anciano sa simbahan, kinsa mopandong sa ilang mga kamot diha kanila sa ngalan ni Jesukristo ug mopanalangin kanila pinaagi sa iyang ngalan” (D&P 20:70). Pinasubay niini nga pagpadayag, kadto lamang takus nga mga lalaki nga naghupot sa Melchizedek Priesthood mahimong moapil sa paghatag og pangalan ug sa pagpanalangin sa mga bata. Ang ordinansa sa paghatag og pangalan ug sa pagpanalangin sa mga bata nagkinahanglan og pagtugot gikan sa nagdumala nga awtoridad.

Kon mopanalangin sa usa ka gamayng bata, ang mga lalaki nga naghupot sa Melchizedek Priesthood mag-alirong ug ilang sapwangon ang gamayng bata. Kon mopanalangin sa dagko nga mga bata, ang kaigsoonang lalaki gaan nga mopandong sa ilang mga kamot sa ulo sa bata. Ang tawo kinsa mohatag sa panalangin:

Mosangpit sa Langitnong Amahan.
Mosulti nga ang panalangin gihatag pinaagi sa awtoridad sa Melchizedek Priesthood.
Mohatag sa bata og pangalan.
Mohatag og panalangin sa priesthood sigun sa itudlo sa Espiritu.
Motapos pinaagi sa pangalan ni Jesukristo.

Pagbunyag

Ubos sa direksyon sa nagdumalang awtoridad, ang usa ka takus nga priest o lalaki nga naghupot sa Melchizedek Priesthood mahimong mopahigayon sa bunyag. Sa pagbuhat niini, siya;

Mobarug diha sa tubig uban sa tawo nga bunyagan.
Alang sa kasayon ug layo sa peligro, ang iyang walang kamot mogunit sa pulso sa tawo nga bunyaganan; ang tawo nga bunyaganan mogunit sa walang pulso sa tawo nga nagpahigayon sa bunyag gamit ang iyang walang kamot.
Mopataas sa iyang tuong kamot nga pina-eskwala.
Mosangpit sa tibuok pangalan sa tawo ug moingon, “Ingon nga sinugo ni Jesukristo, ako magbunyag kanimo, sa ngalan sa Amahan, ug sa Anak, ug sa Espiritu Santo. Amen” (D&P 20:73).
Paguniti sa tawo ang iyang ilong gamit ang iyang tuong kamot alang sa kasayon; ang tawo nga nagpahigayon sa bunyag mobutang sa iyang tuong kamot sa likod sa tawo ug ipaunlod ang tawo sa hingpit, lakip na ang sinina sa tawo.
Motabang sa tawo nga mobangon gikan sa tubig.

Duha ka mga priest o lalaki nga naghupot sa Melchizedek Priesthood mosaksi sa matag bunyag aron sa pagsiguro nga kini gipahigayon sa tukma nga paagi. Ang bunyag kinahanglan nga usbon kon ang mga pulong dili ensakto sa pagkasulti sumala sa gihatag diha sa Doktrina ug mga Pakigsaad 20:73 o kon adunay parte sa lawas o sinina sa tawo ang wala maunlod sa hingpit. Ang tawo nga bunyagan ug ang tawo nga mopahigayon sa ordinansa kinahanglan nga magsul-ob og puti nga sinina nga dili sihag kon mabasa.

Pagkumpirma

Ang mga kinabig nga nag-edad og siyam o mas tigulang pa ug kadtong kinsa nag-edad og otso kansang mga ginikanan dili mga miyembro kumpirmahan diha sa sakrament miting (tanawa sa D&P 20:41). Ang otso anyos nga mga bata mahimong kumpirmahan dayon human sa bunyag sa dapit nga gibunyagan kon adunay bisan usa sa ginikanan nga miyembro sa Simbahan ug ang duha ka ginikanan mohatag sa pagtugot sa pagbunyag ug pagkumpirma. Ubos sa direksyon sa bishop o branch president, usa o daghang mga lalaki nga naghupot sa Melchizedek Priesthood mahimong mopahigayon niini nga ordinansa. Ilang ibutang ang ilang kamot nga pinagaan sa ulo sa tawo. Ang tawo nga mopahigayon sa ordinansa:

Mosangpit sa tibuok pangalan sa tawo.
Mosulti nga ang ordinansa gipahigayon pinaagi sa awtoridad sa Melchizedek Priesthood.
Mokumpirma sa tawo nga miyembro sa Ang Simbahan ni Jesukristo sa mga Santos sa Ulahing mga Adlaw.
Motugyan sa gasa sa Espiritu Santo pinaagi sa pag-ingon, “Dawata ang Espiritu santo.”
Mohatag og panalangin sa priesthood sigun sa itudlo sa Espiritu.
Motapos pinaagi sa pangalan ni Jesukristo.

Pagtugyan sa Priesthood ug Pag-ordinar ngadto sa mga Katungdanan sa Priesthood

Ang bishop o branch president modumala sa pagtugyan sa Aaronic Priesthood ug sa mga pag-ordinar ngadto sa mga katungdanan sa deacon, teacher, ug priest. Sa dili pa ang usa ka tawo ordinahan ngadto sa usa ka katungdanan sa Aaronic Priesthood, kinahanglang interbyuhon siya sa bishop o branch president ug masuta nga takus. Usab, kinahanglang paluyohan siya diha sa sakrament miting. Uban sa pagtugot sa bishop o branch president, ang usa ka priest motugyan sa Aaronic Priesthood ngadto sa laing tawo ug mo-ordinar kaniya ngadto sa katungdanan sa Aaronic Priesthood.

Ang presidente sa stake o misyon modumala sa pagtugyan sa Melchizedek Priesthood ug sa pag-ordinar ngadto sa mga katungdanan sa elder ug high priest.

Sa pagtugyan sa priesthood o pagordinar sa tawo ngadto sa katungdanan sa priesthood, usa o daghang mga lalaki nga naghupot sa gikinahanglan nga priesthood ug kinsa gitugutan sa nagdumalang awtoridad gaan nga mobutang sa ilang mga kamot sa ulo sa tawo. Ang tawo nga mopahigayon sa ordinansa:

Mosangpit sa tawo sa iyang tibuok pangalan.
Mosulti sa awtoridad (Aaronic o Melchizedek Priesthood) diin ang ordinasyon gipahigayon.
Motugyan sa Aaronic o Melchizedek Priesthood, gawas kon kini nahatag na kaniadto.
Mo-ordinar sa tawo ngadto sa usa ka katungdanan sa Aaronic o Melchizedek Priesthood ug motugyan sa mga katungod, mga gahum, ug awtoridad niana nga katungdanan.
Mohatag og panalangin sa priesthood sigun sa itudlo sa Espiritu.
Motapos pinaagi sa pangalan ni Jesukristo.

Sakrament

Ang sakrament usa ka sagrado kaayo nga ordinansa. Ang pagkalawat sa sakrament maghatag og kahigayunan sa paghinumdom sa kinabuhi, mga pagtulun-an, ug Pag-ula ni Jesukristo. Panahon kini sa pagbag-o sa mga pakigsaad nga gihimo uban sa Ginoo sa panahon sa bunyag (tan-awa sa Mosiah 18:8–10).

Ang mga teacher ug mga priest mahimong moandam sa sakrament; ang mga priest mopanalangin niini; ug ang mga deacon, mga teacher, ug mga priest mahimong mopasa niini. Ang mga kaigsoonang lalaki nga naghupot sa Melchizedek Priesthood mahimong moandam, mopanalangin, ug mopasa sa sakrament pero sa kasagaran buhaton lamang kini kon gamay ra kaayo ang mga igsoon sa Aaronic Priesthood ang anaa. Kon ang tawo nakabuhat og seryoso nga kalapasan, kinahanglan nga dili siya moandam, mopanalangin, o mopasa sa sakrament hangtud iyang nahinulsulan ug nasulbad ang problema uban sa iyang bishop o branch president.

Kadtong moandam, mopanalangin, o mopasa sa sakrament nangalagad niini nga ordinansa ngadto sa uban alang sa Ginoo. Ang matag usa nga naghupot sa priesthood kinahanglang mohimo sa iyang buluhaton inubanan sa maligdong, matinahuron nga kinaiya. Kinahanglan nga maayo ang iyang sinina, limpyo, ug ligdong ang pagsinina. Ang personal nga hitsura kinahanglan nga magpakita sa ka sagrado sa ordinansa.

Ang mga kaigsoonang lalaki nga mag-andam sa sakrament kinahanglang mobuhat niini sa dili pa magsugod ang sakrament. Ilang ibutang ang wala pa napikas-pikas nga pan sa limpyo nga mga tray sa pan ug mobutang sa mga kopa sa sakrament nga adunay preskong tubig sa lamesa sa sakrament. Ilang tabunan ang pan ug tubig sa limpyo, puti nga panapton.

Sa panahon sa himno sa sakrament, kadtong anaa sa lamesa sa sakrament mokuha sa panapton gikan sa mga tray sa pan ug mopikas-pikas sa pan ngadto sa gagmay nga mga piraso. Inig ka human sa himno, ang tawo nga mopanalangin sa pan moluhod ug mohalad sa pag-ampo sa sakrament alang sa pan. Ang mga kaigsoonang lalaki mopasa dayon sa pan ngadto sa nanambong sa matinahuron ug hapsay nga paagi. Ang nagdumalang awtoridad sa miting unang modawat sa sakrament. Kon ang tanan nga nanambong nakakalawat na sa pan, kadtong nagpasa mouli sa ilang mga tray ngadto sa lamesa sa sakrament. Kadtong nanalangin sa sakrament motabon pag-usab sa tray pagkahuman gayud sa pagpasa sa pan.

Kadtong anaa sa lamesa sa sakrament mokuha sa panapton nga nagtabon sa mga tray sa tubig. Ang tawo nga mopanalangin sa tubig moluhod ug mohalad sa pag-ampo sa sakrament alang sa tubig. Dayon ang mga kaigsoonang lalaki mopasa sa tubig ngadto sa mga nanambong. Ang mga tray iuli ngadto sa lamesa sa sakrament ug tabunan pag-usab. Ang mga kaigsoonang lalaki kinsa mipasa ug mipaambit sa sakrament molingkod sa ilang mga lingkuranan uban sa kongregasyon.

Ang sakrament alang sa mga miyembro sa Simbahan, lakip sa mga bata. Ang tawo nga nagdumala sa miting kinahanglang dili mopahibalo nga kini ipasa sa mga miyembro lamang, kinahanglang walay himoon sa pagpugong sa dili mga miyembro sa pagkalawat niini.

Ang mga pag-ampo sa sakrament kinahanglan nga klaro ang pagkalitok, sakto, ug uban sa kaligdong. Kon ang tawo nga mopanalangin sa sakrament makahimo og sayop sa mga pulong ug dili mokorihir niini sa iyang kaugalingon, ang bishop o branch president mohangyo kaniya sa pag-usab sa pag-ampo ug sa paghalad niini sa saktong paagi.

Ang pag-ampo sa pan mosunod:

“O Dios, ang Amahan sa Kahangturan, kami mangayo kanimo pinaagi sa ngalan sa imong Anak, nga si Jesukristo, sa pagpanalangin ug pagbalaan niining pan ngadto sa mga kalag sa tanan niadto kinsa moambit niini; nga sila unta mokaon agi og handumanan sa lawas sa imong Anak, ug mosaksi nganha kanimo, O Dios, ang Amahan sa Kahangturan, nga sila andam sa pagdala nganha kanila sa ngalan sa imong Anak, ug sa kanunay mohinumdom kaniya ug maghupot sa iyang mga sugo diin siya mihatag kanila, nga sila unta sa kanunay makabaton sa iyang Espiritu uban kanila. Amen” (D&P 20:77 ug Moroni 4).

Ang pag-ampo sa tubig mosunod:

“O Dios, ang Amahan sa Kahangturan, kami mangayo kanimo pinaagi sa ngalan sa imong Anak, nga si Jesukristo, sa pagpanalangin ug pagbalaan niining [tubig] ngadto sa mga kalag sa tanan niadto kinsa moinom niini; nga sila unta mohimo niini agi og handumanan sa dugo sa imong Anak, nga gipaagas alang kanila, nga sila unta mosaksi nganha kanimo, O Dios, ang Amahan sa Kahangturan, nga sila sa kanunay mahinumdom kaniya, nga sila unta makabaton sa iyang Espiritu uban kanila. Amen” (D&P 20:79 ug Moroni 5).

Ang sakrament kinahanglan nga hipuson gikan sa lamesa pagkahuman gayud sa miting. Ang bisan unsa nga pan nga nahiblin mahimong kaunon.

Ang pagpanalangin ug pagpasa sa sakrament nagkinahanglan og pagtugot gikan sa nagdumalang awtoridad.

Pagbalaan sa Lana

Usa ka lalaki o (daghan) nga naghupot sa Melchizedek Priesthood mobalaan sa lunsay nga lana sa oliba alang sa balaan nga katuyoan niini sa pagdihog sa masakiton o may balatian. Ang tawo kinsa mobalaan sa lana:

Mogunit sa abli nga sudlanan sa lana sa oliba.
Motawag sa atong Langitnong Amahan.
Mosulti nga siya naglihok pinaagi sa awtoridad sa Melchizedek Priesthood.
Mobalaan sa lana (dili sa sudlanan) ug mogahin niini alang sa pagdihog sa masakiton ug may balatian.
Motapos pinaagi sa pangalan ni Jesukristo.

Pagpangalagad ngadto sa Masakiton

Ang mga lalaki lamang nga naghupot sa Melchizedek Priesthood ang mahimong mangalagad sa masakiton o may balatian. Sa kasagaran, duha o daghan ang mangalagad, pero ang usa ka tawo mahimong mohimo niini. Kon walay gibalaan nga lana, ang usa ka tawo nga naghupot sa Melchizedek Priesthood mahimong mohatag og panalangin pinaagi sa awtoridad sa priesthood.

Ang usa ka amahan nga naghupot sa Melchizedek Priesthood kinahanglang mangalagad sa masakiton nga mga sakop sa iyang pamilya. Mahimo siyang mohangyo og laing tawo nga naghupot sa Melchizedek Priesthood sa pagtabang kaniya.

Ang pagpangalagad sa masakiton adunay duha ka mga bahin: (1) pagdihog [anointing] sa lana ug (2) pagsilyo sa pagdihog.

Pagdihog [Anointing] sa Lana

Usa ka tawo nga naghupot sa Melchizedek Priesthood modihog sa tawo nga masakiton. Sa pagbuhat niini, siya:

Mobutang og tinulo sa gibalaan nga lana sa ulo sa tawo.
Gaan nga mopandong sa iyang mga kamot sa ulo sa tawo ug motawag sa tawo sa iyang tibuok nga pangalan.
Mosulti nga siya nagdihog sa tawo pinaagi sa awtoridad sa Melchizedek Priesthood.
Mosulti nga siya nagdihog sa lana nga gibalaan alang sa pagdihog ug pagpanalangin sa masakiton ug may balatian.
Motapos pinaagi sa pangalan ni Jesukristo.

Pagsilyo sa Pagdihog

Sa kasagaran, duha o daghang mga lalaki nga naghupot sa Melchizedek Priesthood gaan nga mopandong sa ilang mga kamot sa ulo sa tawo nga masakiton. Usa sa mga lalaki mosilyo sa pagdihog. Sa pagbuhat niini, siya:

Motawag sa tawo sa iyang tibuok pangalan.
Mosulti nga siya nagsilyo sa pagdihog pinaagi sa awtoridad sa Melchizedek Priesthood.
Mohatag og panalangin sa priesthood sigun sa itudlo sa Espiritu.
Motapos pinaagi sa pangalan ni Jesukristo.

Mga Panalangin sa Amahan ug Ubang mga Panalangin sa Kahupayan ug Tambag

Ang mga panalangin sa Amahan ug ubang mga panalangin sa priesthood ihatag aron sa paghatag og direksyon ug kahupayan sigun sa itudlo sa Espiritu.

Ang usa ka amahan nga naghupot sa Melchizedek Priesthood mahimong mohatag sa mga panalangin sa amahan ngadto sa iyang mga anak. Ang mao nga mga panalangin espesyal nga makatabang kon ang mga anak mobiya sa panimalay, sama sa pageskwela o paglarga sa misyon, o kon magsugod na sila og trabaho, magminyo, mosulod sa pagserbisyo sa military, o nag-atubang sa dili kasagaran nga personal nga mga hagit. Kini nga mga panalangin mahimong usa ka dako nga kalig-on sa pamilya. Ang usa ka pamilya mahimong morekord sa panalangin sa amahan alang sa mga rekord sa pamilya, pero dili kini ipreserbar sa mga rekord sa Simbahan. Ang mga ginikanan kinahanglang moawhag sa mga anak sa pagpangayo og mga panalangin sa amahan sa panahon sa panginahanglan.

Ang takus nga mga lalaki nga naghupot sa Melchizedek Priesthood makahatag usab og mga panalangin sa kahupayan ug tambag ngadto sa ilang mga asawa, sa mga sakop sa kabanay, ug sa uban nga mohangyo kanila.

Sa paghatag og panalangin sa amahan o ubang mga panalangin sa kahupayan ug tambag, ang usa ka tawo nga naghupot sa Melchizedek Priesthood, nag-inusara o kauban sa usa o daghang takus nga mga lalaki nga naghupot sa Melchizedek Priesthood, gaan nga mopandong sa iyang mga kamot sa ulo sa tawo nga modawat sa panalangin. Walay lana ang gikinahanglan sa mao nga mga panalangin. Ang tawo nga mohatag sa panalangin:

Motawag sa tawo sa iyang tibuok pangalan.
Mosulti nga siya naghatag sa panalangin pinaagi sa awtoridad sa Melchizedek Priesthood.
Mohatag og panalangin sa priesthood sigun sa itudlo sa Espiritu.
Motapos pinaagi sa pangalan ni Jesukristo.

Pagpahinungod sa mga Lubnganan

Ang usa ka tawo nga mopahinungod sa lubnganan kinahanglang naghupot sa Melchizedek Priesthood ug kinahanglan nga gitugutan sa opisyal sa priesthood kinsa nagdumala sa tulumanon.

Sa pagpahinungod sa lubnganan, siya:

Motawag sa Langitnong Amahan.
Mosulti nga siya mipahinungod sa lubnganan pinaagi sa awtoridad sa Melchizedek Priesthood.
Mopahinungod ug mobalaan sa dapit nga gilubngan isip pahulayang dapit alang sa lawas sa namatay.
Kon angay, mag-ampo nga ang dapit pagabalaanon ug panalipdan hangtud sa Pagkabanhaw.
Mohangyo sa Ginoo sa paghupay sa pamilya ug mosulti og uban pang mga hunahuna sigun sa itudlo sa Espiritu.
Motapos pinaagi sa pangalan ni Jesukristo.

Kon gusto ang pamilya, ang usa ka tawo (mas maayo nga usa ka tawo nga naghupot sa Melchizedek Priesthood) mahimong modalit og pag-ampo daplin sa lubnganan kay sa usa ka pagpahinungod nga pag-ampo.