1.

Sapwelimen Koht Pilahn oh A Pwukoah Doadoahk nan Doadoahk en Komour oh Mour Soutuk

1.0

Kapehse

Komw alehdier pwukoah doadoahk en papah nan Mwomwohdiso en Sises Krais en Souleng en Imwin Rahn-akan. Kalahngan en sapwellimwomwi papah. Komw pahn kapaiada mour tohtoh oh ahneki popohl ni ahmw pahn papah kowei ni mehlel.

Pwuhk en kaweid wet pahn seweseiuk en esehla padahk mwahu kan en papah duwehte Krais oh wewehki mwahu amw pwukoah kan. Komw pahn pweida mwahu ni ahmw pahn idawehn oh peipeiante amw pwukoah doadoahk en sawas nan Mwomwohdiso ong doadoahk en Koht Sahm oh Sapwelime Iehros, Sises Krais.

1.1

Sapwelimen Koht Pilahn en Peren Soutuk

Sahm Nanleng ketkihda pilahn en peren soutuk pwe kitail en kak perepereniki Sapwellime kapai kan koaros. Sapwellime doadoahk oh lingan iei en “kapwaiada komour oh mour soutuk en aramas” (Moses 1:39).

Sises Krais me poahsoan en Sapwelimen Koht pilahn wet. Pwehki Sapwelimen Sahm Nanleng limpoak poatoapoat ong kitail, E ketkihdo Sapwellime Iehroso pwehn kapitkitail sang nan dihp oh mehla sang ni Sapwellime tohmetei (kilang Sohn 3:16). Sang ni Sapwellime Tomw, Sises Krais kasalehda me emen emen kitail me ipwidiong pohn sampah pahn iasada oh ale mour soutuk. Sapwellime Tomw pil kamengeiong kitail en kak mwakelekeldahsang nan dihp oh atail mongiong en kak weliakapwala pwe kitail en kak alehdi mour soutuk oh popohl unsek.

Pwe kitail en kak alehdi mour soutik, kitail anahne “kohdo rehn Krais, oh unsekla reh” (Moronai 10:32).

1.2

Doadoahk en Pilahn en Komour oh Mour Soutuk

Ni atail pahn kohdo rehn Krais oh sewese mehteikan ni songen mwohmwohte, kitail iangehr wia Sapwellimen Koht doadoahk en komour oh mour soutuk. Doadoahk wet e mih pahn kaweihdpen kosonned riau keieu laud iei en poakoahng Koht oh poakoahng mehn impetail kan (kilang Madiu 22:37-39).

Doadoahk en komour oh mour soutuk kin doke pwukoah kesempwal pahiou.

Doadoahk en Pilahn en Komour oh Mour Soutuk

Kitail kin kohdo rehn Krais oh sewese Sapwelimen Koht doadoahk sang ni:

• Momourki rongamwahu en Sises Krais.

• Apwalih irail me semwehmweh kan.

• Lukehiong koaros en iang alehda rongamwahuo.

• Kihpene peneinei kan ong mour soutuk.

Pwuhk en kaweid wet pahn seweseiuk en esehla soahng pahiou wet me pid duwen Sapwellimen Koht doadoahk. Ngehn Sarawi pahn kaweid uhk ni ahmw pahn wiewia ahmw pwukoah doadoahk en kapwaiada doadoahk pwukat (kilang 2 Nihpai 32:5).

1.2.1

Momourki Rongamwahu en Sises Krais

Momourki rongamwahu en Sises Krais me iangahki:

• Doadoahngki amw pwoson Krais, koluhla rahn koaros, wiewia inou sarawi kan rehn Koht ni atail ale tiahk sarawi kan en komour oh mour soutuk, oh dadaurete lel imwi sang ni atail pahn wie kolokol inou sarawi kan (kilang 3.5.1).

• Kaskuhlki oh padahngki rongamwahu en Sises Krais nan wasahn kouson akan oh nan ihmw sarawi.

• Koahiekla nan pein apwalih pein kitail oh atail peneinei kan, ni pali ngehn oh paliwar.

1.2.2

Apwalih Irail me Semwehmweh kan

Apwalih irail me semwehmweh kan me iangahki:

• Sewese oh papah emen emen irail akan, peneinei kan, oh kousapw kan.

• Ehukihong irail mehn sawas akan, me iangahki sawas sang Mwomwohdiso, ong irail me semwehmweh kan.

• Sewese mehtei kan en kak koahiekla.

1.2.3

Lukehiong Koaros en Iang Alehda Rongamwahuo

Lukehiong koaros en iang alehda rongamwahuo me iangahki:

• Iang patohng nan doadoahk en misineri en papah duwehte misineri kan.

• Sewese irail me kapw akan oh me apwtehn pwurodoh kan en kekeirda nan ahl en inouo.

1.2.4

Kihpene Peneinei kan ong Mour Soutuk

Kihpene peneinei kan ong mour soutuk me iangahki:

• Wiahda inou sarawi kan ni atail pahn ale tiahk sarawi kan en tehnpas sarawi.

• Rapahkihda kadaudokepetail akan me melahr oh wia tiahk sarawi ong irail nan tehnpas sarawi pwe irail en kak wiahda arail inou sarawi kan rehn Koht.

• Kohla ni tehnpas sarawi ansou koaros, me kak, pwe en pwongih Koht oh wia tiahk sarawi kan ong Sapwelime seri kan.

1.3

Kahrepen Mwomwohdiso

Sises Krais kawada Sapwelime Mwomwohdiso pwehn ketkihong emen emen irail kan oh peneinei kan en wia doadoahk en komour oh mour soutuk (kilang Episos 4:11-13; pil kilang 2.2 nan pwuhk en kaweid wet). Pwehn sewese kahrepe kesemwpwal wet en kak pweida, Mwomwohdiso oh kaun akan kihda:

• Mweimwei en Prihsduhd oh kih kan.

• Inou sarawi kan oh tiahk sarawi kan.

• Kaweid en Soukohp akan.

• Iren Pwuhk Sarawi kan.

• Mehn kaskuhl en rongamwahu oh sawas en padahk.

• Mehn sawas oh ekei pwukoah en kaun akan me mie.

• Pwihn en Souleng kan.

1.3.1

Mweimwei en Prihsduhd oh Kih kan

Sang ni prihsduhd, doadoahk en komour oh mour soutuk pweidahr rehn Koht. Mweimwei en prihsduhd oh kih kan me anahnepe pwehn kaweid Sapwellimen Koht doadoahk pohn sampah e kopwururpwurdo rehn Soukohp Joseph Smith (kilang Doctrine and Covenants 110:11-16; 112:30). Kih pwukat e mihmih rehn kaun akan en Mwomwohdiso rahn wet. Irail kin malipe oh kihong mweimwei rehn mehtei kan pwehn sawas nan Sapwellimen Koht doadoahk (kilang Doctrine and Covenants 107:8, 65–67).

1.3.2

Inou Sarawi Kan oh Tiahk Sarawi Kan

Nan Sapwelimen Sahm Nanleng pilahn, kitail kin wiahda inou sarawi kan ni atail kin alehda tiahk sarawi kan en komour oh mour soutuk, me duwehte pepdais (kilang Sohn 3:5; pil kilang iralaud 18 nan pwuhk en kaweid wet). Inou sarawi oh tiahk sarawi pwukat inenen kesempwal ong kitail en kak duwehla Koht oh pwurala kousonla Reh nan Sapwelime wehi (kilang Doctrine and Covenants 84:19-22).

1.3.3

Kaweid en Soukohp kan

Sang ni Sapwelime pilpildahn soukohp akan, Koht kin kasalehiong irail me mehlelo oh ketikihong irail mehn kaweid kan oh kehkehlik kan (kilang Amos 3:7; Doctrine and Covenants 1:4). Mehn kaweid wet kin sewese kitail en kak pidolong oh mihmi nan ahl me kolahng mour soutuk.

1.3.4

Iren Pwuhk Sarawih kan

Sang ni pahn kaweid pen Sapwelimen Kauno soukohp akan oh wahnpoaren kan, Mwomwohdiso wet kin doadoahngki oh kesempwaliki mahsen en Koht me sansal nan pwuhk sarawi kan. Iren pwuhk sarawi kan kin kadehde Krais, padahngki Sapwellime rongamwahu, oh sewesei kitail kakehlaka atail pwoson Ih (kilang Seikop 7:10-11; Helaman 15:7).

1.3.5

Mehn Kaskuhl Rongamwahu oh Sawas en Padahk

Mwomwohdiso wet kin utung emen emen oh peneinei kan nan arail pwukoah en esehla mehlel en rongamwahuo oh padahngki mehlel pwukat ong tohn peneinei kan oh mehtei kan (kilang Doctrine and Covenants 88:77-78, 118; pil kilang 2.2.3 nan pwuhk en kaweid wet).

1.3.6

Mehn Sawas oh Ekei Pwukoah en Kaun akan Me Mie

Sang ni pwukoah malipilip kan oh doadoahk tei kan me idihda nan Mwomwohdiso, Koht ketkihong toweh kan ahnsou mwahu en papah oh kaweihd. Mwomwohdiso kin kihda sawas ehu me kin sewese apwalih toweh kan me anahne sawas en momour en paliwar oh kihong mehtei kan sawas en maiaudahsang nan kahpwal laud kan de anahnepen sawas laud tei kan (kilang Mosiah 18:27-29).

1.3.7

Pwihn en Souleng kan

Ni arail wia pwihn en Souleng kan, toweh kan en Mwomwohdiso kin pokonpene pwehn pwongih Koht oh katkataman Sounkomouro sang ni arail kin ale kamadipw sarawi (kilang Moroni 6:406; Doctrine and Covenants 20:77). Toweh kan kin pil epwelpene oh papah emen emen (kilang Episos 2:19).

1.4

Amw Pwukoah nan Sapwellimen Koht Doadoahk

Ni ahmw wia kaun emen nan Mwomwohdiso, komw malipilipiongehr en padahk oh utung irail kan me komw pahn papah ni arail pahn loaloapwoationg nan doadoahk en komour oh mour soutuk wet (kilang 1.2). Komw ahneki pwukoah en kapwaiada pwukoah me komw mailipilipiongehr oh “padahngki mahsen en Koht ni mehlel unsek” (Seikop 1:19). Doadoahk ong Kauno nan Sapwellime mwetuwel pahn kihong komwi popohl laud (kilang Seikop 5:70-72).

En wewehki mwahu duwen Sapwellimen Koht doadoahk, dahme E ketin lukehiong komwi en wia, oh kahrepen Sapwellime Mwomwohdiso pahn sewese komwi en kak nantihong ahmw doadoahk en pweida ong wadohng aramas akan rehn Krais.

Kohdo oh kilang padahk kesempwal akan me mih nan irelaud wet. Kapakap pwehn kak rapahki en ese ia mwomwen amw pahn kak iang sawas nan Sapwellimen Koht kahrepeh kan nan mour en irail kan me komw kin papah. Koht pahn ketin kaweid komwi sang ni pepehm en kaweid kan en Ngehn Sarawi.