“4. ການເປັນຜູ້ນຳ ແລະ ສະພາໃນສາດສະໜາຈັກຂອງພຣະເຢຊູຄຣິດ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“4. ການເປັນຜູ້ນຳ ແລະ ສະພາໃນສາດສະໜາຈັກຂອງພຣະເຢຊູຄຣິດ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
4.
ການເປັນຜູ້ນຳ ແລະ ສະພາໃນສາດສະໜາຈັກຂອງພຣະເຢຊູຄຣິດ
4.0
ຄຳນຳ
ໃນຖານະຜູ້ນຳໃນສາດສະໜາຈັກ, ທ່ານໄດ້ຖືກເອີ້ນໂດຍການດົນໃຈຜ່ານທາງຜູ້ຮັບໃຊ້ທີ່ມີສິດອຳນາດຂອງພຣະຜູ້ເປັນເຈົ້າ. ທ່ານມີສິດທິພິເສດຂອງການຊ່ວຍເຫລືອໃນວຽກງານຂອງພຣະບິດາເທິງສະຫວັນເພື່ອ “ເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ” (ໂມເຊ 1:39).
4.2
ຫລັກທຳຂອງການເປັນຜູ້ນຳໃນສາດສະໜາຈັກ
ໃນຊ່ວງການປະຕິບັດສາດສະໜາກິດຢູ່ໃນໂລກຂອງພຣະອົງ, ພຣະຜູ້ຊ່ວຍໃຫ້ລອດໄດ້ຈັດຕັ້ງຕົວຢ່າງຂອງການເປັນຜູ້ນຳສຳລັບສາດສະໜາຈັກຂອງພຣະອົງ. ຈຸດປະສົງຕົ້ນຕໍຂອງພຣະອົງແມ່ນເພື່ອເຮັດຕາມພຣະປະສົງຂອງພຣະບິດາເທິງສະຫວັນຂອງພຣະອົງ ແລະ ຊ່ວຍໃຫ້ຄົນອື່ນເຂົ້າໃຈ ແລະ ດຳລົງຊີວິດຕາມພຣະກິດຕິຄຸນຂອງພຣະອົງ (ເບິ່ງ ໂຢຮັນ 5:30; ໂມໄຊຢາ 15:7).
ໃຫ້ສະແຫວງຫາການນຳພາຂອງພຣະຜູ້ຊ່ວຍໃຫ້ລອດ ເພື່ອຊ່ວຍໃຫ້ທ່ານຮຽນຮູ້ ແລະ ປະຕິບັດໜ້າທີ່ການເອີ້ນຂອງທ່ານ.
4.2.1
ກຽມພ້ອມທາງວິນຍານ
ພຣະເຢຊູໄດ້ກຽມພ້ອມພຣະອົງເອງທາງວິນຍານເພື່ອເຮັດພາລະກິດຂອງພຣະອົງຢູ່ເທິງໂລກ (ເບິ່ງ ລູກາ 4:1–2). ທ່ານກຽມພ້ອມທາງວິນຍານໃນທຳນອງດຽວກັນ ໂດຍການຫຍັບເຂົ້າໃກ້ພຣະບິດາເທິງສະຫວັນຜ່ານທາງການອະທິຖານ, ການສຶກສາພຣະຄຳພີ, ແລະ ການເຊື່ອຟັງພຣະບັນຍັດຂອງພຣະອົງ.
ໃຫ້ສະແຫວງການເປີດເຜີຍເພື່ອຈະໄດ້ເຂົ້າໃຈຄວາມຕ້ອງການຂອງຜູ້ທີ່ທ່ານນຳພາ ແລະ ວິທີທີ່ຈະປະຕິບັດວຽກງານທີ່ພຣະເຈົ້າໄດ້ເອີ້ນທ່ານໃຫ້ເຮັດ.
ພຣະຜູ້ເປັນເຈົ້າໄດ້ສັນຍາວ່າຈະມອບຂອງປະທານທາງວິນຍານໃຫ້ຜູ້ທີ່ສະແຫວງຫາມັນ (ເບິ່ງ ຄຳສອນ ແລະ ພັນທະສັນຍາ 46:8).
4.2.2
ປະຕິບັດສາດສະໜາກິດຕໍ່ລູກໆທຸກຄົນຂອງພຣະເຈົ້າ
ຮັກຜູ້ຄົນທີ່ທ່ານຮັບໃຊ້ ດັ່ງທີ່ພຣະເຢຊູໄດ້ຮັກ. ອະທິຖານ “ດ້ວຍສຸດພະລັງແຫ່ງໃຈ” ເພື່ອຈະເຕັມໄປດ້ວຍຄວາມຮັກຂອງພຣະອົງ (ໂມໂຣໄນ 7:48).
ຊ່ວຍບຸກຄົນເຮັດໃຫ້ການປ່ຽນໃຈເຫລື້ອມໃສຂອງເຂົາເຈົ້າເລິກເຊິ່ງ ແລະ ເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າໃນພຣະບິດາເທິງສະຫວັນ ແລະ ພຣະເຢຊູຄຣິດ. ຊ່ວຍເຂົາເຈົ້າກຽມພ້ອມທີ່ຈະເຮັດພັນທະສັນຍາເມື່ອເຂົາເຈົ້າຮັບເອົາພິທີການຕໍ່ໄປຂອງເຂົາເຈົ້າ. ຊຸກຍູ້ເຂົາເຈົ້າໃຫ້ຮັກສາພັນທະສັນຍາທີ່ເຂົາເຈົ້າໄດ້ເຮັດ ແລະ ຮັບເອົາພອນຂອງການກັບໃຈ.
4.2.3
ສິດສອນພຣະກິດຕິຄຸນຂອງພຣະເຢຊູຄຣິດ
ຜູ້ນຳ ແລະ ຄູສອນທຸກຄົນ. ຈົ່ງພະຍາຍາມເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ ໃນຖານະຄູສອນ (ເບິ່ງ ບົດທີ 17; ການສິດສອນໃນວິທີຂອງພຣະຜູ້ຊ່ວຍໃຫ້ລອດ). ຜ່ານທາງຄຳເວົ້າ ແລະ ການກະທຳຂອງທ່ານ, ໃຫ້ສິດສອນຄຳສອນຂອງພຣະເຢຊູຄຣິດ ແລະ ຫລັກທຳພຣະກິດຕິຄຸນຂອງພຣະອົງ (ເບິ່ງ 3 ນີໄຟ 11:32–33; ຄຳສອນ ແລະ ພັນທະສັນຍາ 42:12–14).
ສິດສອນຈາກພຣະຄຳພີ ແລະ ຖ້ອຍຄຳຂອງສາດສະດາຍຸກສຸດທ້າຍ (ເບິ່ງ ຄຳສອນ ແລະ ພັນທະສັນຍາ 52:9).
ຖ້າຫາກທ່ານໄດ້ຮັບການເອີ້ນ ຫລື ການມອບໝາຍໃຫ້ຄວບຄຸມການປະຊຸມໂບດ ຫລື ກິດຈະກຳ, ຈົ່ງໃຫ້ແນ່ໃຈວ່າ ການສິດສອນນັ້ນໃຫ້ຄວາມຮູ້ ແລະ ຖືກຕ້ອງຕາມຫລັກຄຳສອນ (ເບິ່ງ ຄຳສອນ ແລະ ພັນທະສັນຍາ 50:21–23).
4.2.4
ຄວບຄຸມດ້ວຍຄວາມຊອບທຳ
ເຈົ້າໜ້າທີ່ຄວບຄຸມແຕ່ລະຄົນຮັບໃຊ້ພາຍໃຕ້ການຊີ້ນຳຂອງບຸກຄົນທີ່ດຳລົງຂໍກະແຈຂອງຖານະປະໂລຫິດ (ເບິ່ງ 3.4.1). ໂຄງສ້າງນີ້ຈັດວາງລະບຽບ ແລະ ເສັ້ນສາຍວຽກງານຢ່າງຊັດເຈນຂອງໜ້າທີ່ຮັບຜິດຊອບ ແລະ ຄວາມຮັບຜິດຊອບ ໃນການເຮັດວຽກງານຂອງພຣະຜູ້ເປັນເຈົ້າ.
ເຈົ້າໜ້າທີ່ຄວບຄຸມສາມາດມອບໝາຍວຽກງານຊົ່ວຄາວໃຫ້ອີກຄົນໜຶ່ງເພື່ອຄວບຄຸມ.
ຜູ້ນຳທີ່ຄວບຄຸມໃນອົງການ, ການປະຊຸມ, ຫລື ກິດຈະກຳຂອງສາດສະໜາຈັກຕ້ອງແນ່ໃຈວ່າຈຸດປະສົງຂອງພຣະຜູ້ເປັນເຈົ້າບັນລຸຄວາມສຳເລັດ. ໃນການເຮັດສິ່ງນີ້, ຜູ້ນຳຈະເຮັດຕາມຫລັກທຳພຣະກິດຕິຄຸນ, ນະໂຍບາຍຂອງສາດສະໜາຈັກ, ແລະ ການຊີ້ນຳຂອງພຣະວິນຍານບໍລິສຸດ.
ການເອີ້ນ ຫລື ການມອບໝາຍເພື່ອໃຫ້ຄວບຄຸມ ບໍ່ໄດ້ເຮັດໃຫ້ບຸກຄົນທີ່ໄດ້ຮັບມັນ ສຳຄັນກວ່າ ຫລື ມີຄ່າຫລາຍກວ່າຄົນອື່ນ (ເບິ່ງ ຄຳສອນ ແລະ ພັນທະສັນຍາ 84:109–10).
ເປັນການບໍ່ເໝາະສົມທີ່ຈະປາດຖະໜາຢາກຄວບຄຸມອົງການໃດໜຶ່ງໃນສາດສະໜາຈັກຂອງພຣະຜູ້ເປັນເຈົ້າ (ເບິ່ງ ຄຳສອນ ແລະ ພັນທະສັນຍາ 121:34–37).
4.2.5
ມອບໝາຍໜ້າທີ່ຮັບຜິດຊອບ ແລະ ຮັບຮອງຄວາມຮັບຜິດຊອບ
ພຣະຜູ້ຊ່ວຍໃຫ້ລອດໄດ້ປະທານການມອບໝາຍ ແລະ ໜ້າທີ່ຮັບຜິດຊອບໃຫ້ແກ່ສານຸສິດຂອງພຣະອົງ (ເບິ່ງ ລູກາ 10:1). ພຣະອົງຍັງໄດ້ປະທານໂອກາດໃຫ້ເຂົາເຈົ້າຮັບຜິດຊອບວຽກງານທີ່ໃຫ້ເຂົາເຈົ້າເຮັດເຊັ່ນກັນ (ເບິ່ງ ລູກາ 9:10).
ໃນຖານະຜູ້ນຳ, ທ່ານສາມາດຊ່ວຍໃຫ້ຄົນອື່ນເຕີບໂຕ ໂດຍການມອບໝາຍວຽກງານໃຫ້ເຂົາເຈົ້າ. ພະຍາຍາມໃຫ້ສະມາຊິກທຸກຄົນມີສ່ວນຮ່ວມໃນວຽກງານຂອງພຣະເຈົ້າ.
ການມອບໝາຍຈະເຮັດໃຫ້ການຮັບໃຊ້ຂອງທ່ານມີປະສິດທິພາບຫລາຍຂຶ້ນ. ຈົ່ງສະແຫວງຫາການນຳພາຂອງພຣະວິນຍານກ່ຽວກັບວ່າ ຈະມອບໝາຍສິ່ງໃດ ເພື່ອວ່າທ່ານຈະສາມາດສຸມໃຈໃສ່ວຽກງານທີ່ມີຄວາມສຳຄັນສູງສຸດ.
4.2.6
ກຽມພ້ອມຄົນອື່ນໃຫ້ເປັນຜູ້ນຳ ແລະ ຄູສອນ
ເມື່ອພິຈາລະນາວ່າໃຜຄວນຮັບໃຊ້ໃນການເອີ້ນ ຫລື ການມອບໝາຍຂອງສາດສະໜາຈັກ, ຈົ່ງເຮັດດ້ວຍການອະທິຖານ. ຈົ່ງຈື່ຈຳວ່າພຣະຜູ້ເປັນເຈົ້າຈະຮັບຮອງຜູ້ທີ່ພຣະອົງເອີ້ນ. ສິ່ງທີ່ສຳຄັນທີ່ສຸດແມ່ນວ່າ ເຂົາເຈົ້າເຕັມໃຈທີ່ຈະຮັບໃຊ້, ຈະສະແຫວງຫາຄວາມຊ່ວຍເຫລືອຈາກພຣະຜູ້ເປັນເຈົ້າດ້ວຍຄວາມຖ່ອມ, ແລະ ພະຍາຍາມມີຄ່າຄວນ.
4.2.7
ວາງແຜນການປະຊຸມ, ບົດຮຽນ, ແລະ ກິດຈະກຳດ້ວຍຈຸດປະສົງຊັດເຈນ
ໃຫ້ສະແຫວງຫາການນຳພາຂອງພຣະວິນຍານໃນການວາງແຜນການປະຊຸມ, ບົດຮຽນ, ແລະ ກິດຈະກຳທີ່ມີຈຸດປະສົງຊັດເຈນ. ຈຸດປະສົງເຫລົ່ານີ້ຄວນເພີ່ມຄວາມເຂັ້ມແຂງໃຫ້ແກ່ບຸກຄົນ ແລະ ຄອບຄົວ, ນຳເຂົາເຈົ້າໃຫ້ເຂົ້າໃກ້ຊິດພຣະຄຣິດ, ແລະ ຊ່ວຍບັນລຸວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະເຈົ້າ (ເບິ່ງ ບົດທີ 1 ແລະ 2).
4.2.8
ການປະເມີນຄວາມພະຍາຍາມຂອງທ່ານ
ທົບທວນໜ້າທີ່ຮັບຜິດຊອບ ແລະ ຄວາມເຕີບໂຕທາງວິນຍານຂອງທ່ານເປັນປະຈຳ ໃນຖານະຜູ້ນຳ. ພິຈາລະນາຄວາມເຕີບໂຕຂອງຜູ້ທີ່ທ່ານນຳພາເຊັ່ນກັນ.
ຄວາມສຳເລັດຂອງທ່ານໃນຖານະຜູ້ນຳ ສ່ວນຫລາຍຈະຖືກວັດແທກຕາມຄວາມມຸ່ງໝັ້ນຂອງທ່ານໃນການຊ່ວຍເຫລືອລູກໆຂອງພຣະເຈົ້າໃຫ້ກາຍເປັນສານຸສິດທີ່ຊື່ສັດຂອງພຣະເຢຊູຄຣິດ. ທ່ານສາມາດຮູ້ໄດ້ວ່າ ພຣະຜູ້ເປັນເຈົ້າຈະພໍພຣະໄທກັບຄວາມພະຍາຍາມຂອງທ່ານ ເມື່ອທ່ານຮູ້ສຶກວ່າພຣະວິນຍານເຮັດວຽກງານຜ່ານທາງທ່ານ.
4.3
ສະພາໃນສາດສະໜາຈັກ
ພຣະຜູ້ເປັນເຈົ້າໄດ້ແນະນຳຜູ້ນຳຂອງສາດສະໜາຈັກຂອງພຣະອົງໃຫ້ປຶກສາຫາລືນຳກັນໃນການເຮັດວຽກງານຂອງພຣະອົງ (ເບິ່ງ ຄຳສອນ ແລະ ພັນທະສັນຍາ 41:2–3). ສະພາເປີດໂອກາດໃຫ້ສະມາຊິກສະພາໄດ້ຮັບການເປີດເຜີຍ ຂະນະທີ່ພວກເພິ່ນສະແຫວງຫາທີ່ຈະເຂົ້າໃຈຄວາມຕ້ອງການຂອງລູກໆຂອງພຣະເຈົ້າ ແລະ ວາງແຜນເພື່ອສະໜອງຄວາມຕ້ອງການ.
4.4
ຫລັກທຳຂອງສະພາທີ່ມີປະສິດທິພາບ
4.4.1
ຈຸດປະສົງຂອງສະພາ
ສະພາເນັ້ນໜັກພິເສດເລື່ອງການຊ່ວຍເຫລືອສະມາຊິກໃຫ້ໄດ້ຮັບພິທີການ ແລະ ຮັກສາພັນທະສັນຍາທີ່ກ່ຽວຂ້ອງ.
4.4.2
ການກຽມພ້ອມສຳລັບການປະຊຸມສະພາ
ຝ່າຍປະທານ ແລະ ສະພາຖືກຄາດໝາຍໃຫ້ປະຊຸມກັນເປັນປະຈຳ. ຜູ້ນຳເຫລົ່ານີ້ສະແຫວງຫາການນຳພາຂອງພຣະຜູ້ເປັນເຈົ້າໃນການວາງແຜນການປະຊຸມສະພາ. ພວກເພິ່ນກໍຈະຂໍຄຳຄິດເຫັນຈາກສະມາຊິກສະພາດ້ວຍກັນ ວ່າຈະສົນທະນາເລື່ອງໃດ.
ຜູ້ນຳຈະບອກໃຫ້ສະມາຊິກສະພາຮູ້ລ່ວງໜ້າ ໃນເລື່ອງທີ່ຈະສົນທະນາ. ສະມາຊິກສະພາຈະກຽມແບ່ງປັນຄວາມຮູ້ແຈ້ງກ່ຽວກັບເລື່ອງເຫລົ່ານີ້.
4.4.3
ການສົນທະນາ ແລະ ການຕັດສິນໃຈ
ລະຫວ່າງການປະຊຸມສະພາ, ຜູ້ນຳ (ຫລື ບາງຄົນທີ່ຜູ້ນຳມອບໝາຍ) ອະທິບາຍເລື່ອງທີ່ຈະພິຈາລະນາ. ແລ້ວຜູ້ນຳຈະຊຸກຍູ້ໃຫ້ສະມາຊິກສະພາທຸກຄົນສົນທະນາກັນ, ຖາມຄຳຖາມ ແລະ ຂໍຄວາມຄິດເຫັນ.
ສະມາຊິກຈະແບ່ງປັນຄວາມຄິດເຫັນ ແລະ ຟັງກັນດ້ວຍຄວາມເຄົາລົບ. ຂະນະທີ່ພວກເພິ່ນສະແຫວງຫາທີ່ຈະຮູ້ຈັກພຣະປະສົງຂອງພຣະຜູ້ເປັນເຈົ້າ, ວິນຍານແຫ່ງການດົນໃຈ ແລະ ຄວາມເປັນໜຶ່ງຈະເກີດຂຶ້ນ.
ໃນສະພາທີ່ມີທັງຜູ້ຍິງ ແລະ ຜູ້ຊາຍ, ຜູ້ນຳຈະສະແຫວງຫາຄວາມຮູ້ແຈ້ງ ແລະ ຄວາມຄິດຈາກທັງສອງຝ່າຍ. ຜູ້ຍິງ ແລະ ຜູ້ຊາຍມັກຈະມີທັດສະນະແຕກຕ່າງກັນ ທີ່ເຮັດໃຫ້ເກີດຄວາມສົມດູນທີ່ຕ້ອງການ.
ຜູ້ນຳຈະນຳພາການສົນທະນາຂອງສະພາ. ເຖິງຢ່າງໃດກໍຕາມ, ເພິ່ນຄວນຟັງຫລາຍກວ່າທີ່ຈະເວົ້າ.
ຫລັງຈາກການສົນທະນາ, ຜູ້ນຳອາດຕັດສິນໃຈດຳເນີນການຕໍ່ ຫລື ເລື່ອນການຕັດສິນໃຈອອກໄປ ຂະນະທີ່ສະແຫວງຫາຂໍ້ມູນ ແລະ ການນຳພາເພີ່ມເຕີມ.
4.4.4
ຄວາມເປັນໜຶ່ງ
ສະມາຊິກສະພາສະແຫວງຫາທີ່ຈະເປັນໜຶ່ງໃນຄວາມປາດຖະໜາ ແລະ ຈຸດປະສົງກັບພຣະບິດາເທິງສະຫວັນ ແລະ ພຣະເຢຊູຄຣິດ. ພວກເພິ່ນພະຍາຍາມເປັນໜຶ່ງໃນການສົນທະນາ ແລະ ການຕັດສິນໃຈຂອງພວກເພິ່ນ.
4.4.5
ການປະຕິບັດ ແລະ ຄວາມຮັບຜິດຊອບ
ສະມາຊິກສະພາເຮັດໜ້າທີ່ສ່ວນໃຫຍ່ຂອງພວກເພິ່ນ ກ່ອນ ແລະ ຫລັງຈາກການປະຊຸມສະພາ. ລະຫວ່າງການປະຊຸມ, ພວກເພິ່ນຈະສະແຫວງຫາການດົນໃຈໃນການພັດທະນາແຜນ ເພື່ອປະຕິບັດຕາມການຕັດສິນໃຈ. ຜູ້ນຳສະພາຈະເຊື້ອເຊີນໃຫ້ສະມາຊິກປະຕິບັດການມອບໝາຍທີ່ກ່ຽວກັບແຜນເຫລົ່ານີ້.
ສະມາຊິກສະພາຈະລາຍງານການມອບໝາຍຂອງເຂົາເຈົ້າ. ຕາມປົກກະຕິແລ້ວ ຄວາມກ້າວໜ້າຮຽກຮ້ອງການເອົາໃຈໃສ່ຢ່າງຕໍ່ເນື່ອງ ແລະ ຕິດຕາມເບິ່ງການມອບໝາຍ.
4.4.6
ການຮັກສາຄວາມລັບ
ຜູ້ນຳມີຄວາມຮອບຄອບເມື່ອແບ່ງປັນຂໍ້ມູນສ່ວນຕົວກັບສະພາ. ໂດຍທົ່ວໄປແລ້ວ ພວກເພິ່ນຈະຂໍອະນຸຍາດຈາກສະມາຊິກກ່ອນແບ່ງປັນຂໍ້ມູນນີ້.
ສະມາຊິກສະພາບໍ່ຄວນແບ່ງປັນຂໍ້ມູນສ່ວນຕົວຢູ່ນອກສະພາ ຍົກເວັ້ນແຕ່ເປັນການຈຳເປັນໃນການປະຕິບັດການມອບໝາຍຈາກຜູ້ນຳສະພາ.
ບາງເລື່ອງຈະລະອຽດອ່ອນເກີນກວ່າທີ່ຈະນຳມາກ່າວຕໍ່ໜ້າສະພາ.