mwaane a taetaenikawai

8.

Aia Kooram Unimwaane

8.1

Te Kantaninga ao taian Bootaki

8.1.1

Kantaninga

Mwaane aika a tau 18 ke a ikawai riki a kona ni karekea te Nakoanibonga ae te Merekitereka ao ni katabuaki nakon te nakoa n unimwaane. Te mwaane ae katabuaki nakon te aobiti aei e rin inanon te berita ae tabu ni buoka te Atua ni kakoroa nanon Ana mwakuri (taraa Reirei ao Berita aika Tabu 84:33–44).

8.1.2

Membwatibu n te Kooram n Unimwaane

Iai te kooram n unimwaane n uoote nako. E kaainaki irouia mwaane aikai:

• Ni kabane unimwaane n te uoote.

• Mwaane ni kabane ake a kona ao n tau n riki bwa unimwaane n te uoote (taraa 8.4).

• Ni kabane ibonga aika rietata n te uoote, ma tiaki naake a beku ngkai n te beretitentii n te titeiki, n te bitiobiriki, n te kauntira ae rietaata, ke te tamanuea.

Te ataeinimwaane e kona ni waaki ni kaea te kooram n unimwaane n te tai are e koro iai 18, e ngae ngke e tuai ni katabuaki bwa te unimwaane. Ni koron 19 ke ni kitanan mwengana, ibukin te nako n reirei n te kuura ae rietata ke n nako ni mitinare, e riai ni katabuaki bwa te unimwaane ngkana e tau.

Mwaane ake a tia ni iein iaan 18 te ririki bon unimwaane aika tauraoi ao bon kaain naba te kooram n unimwaane.

8.2

Irakin Ana Mwakuri te Atua Ibukin te Kamaiuaki ao te Karietataaki

8.2.1

Maiuakinan Ana Euangkerio Iesu Kristo

8.2.1.2

Reiakinan te Euangkerio inanon Bowin Kooram

Bootaki a karaoaki n te kauoua ao te kaaua n Tabati n te namwakaina. Maanna bon 50 te miniti. Te beretitentii n te kooram n unimwaane e bairei bootaki aikai. Kaain te beretitentii e kairia.

Bootakin te kooram e riai ni maroroakinaki iai teuana ke e raka riki maroro man te maungatabu ni kabuta ae e a tibwa nako.

8.2.1.3

Waaki ni kakukurei

Beretitentii n te kooram n unimwaane a kona ni bairei waaki ni kakukurei. Angiin waaki ni kakukurei a karaoaki tiaki n tairikin te Tabati ke te Moanibong.

8.2.2

Tararuakiia Naake Iai Kainnanoia

8.2.2.1

Mwakuri n Ibuobuoki

Kaain te kooram n unimwaane a karekei mwioko n ibuobuoki mairoun te beretitentii n te kooram. Ibukin rongorongona riki tabeua, taraa mwakoro 21.

8.2.2.2

Kainnano ibukin te Tai ae Uarereke

Taari n te mwakuri n ibuobuoki a kakaea ao a tobwai kainnanoia naake a beku ibukiia. A kona membwani kainnanoa te ibuobuoki ibukin te tai ae uarereke n tain te aoraki, te bung, te mate, buan te mwakuri, ao kangaanga riki tabeua.

Ngkana e kainnanoaki, taari n ibuobuoki a butiia te beretitenti n aia kooram unimwaane ibukin te ibuobuoki.

8.2.2.3

Kainnano Aika Maan Taia ao te Riki n Toronibwai

Ngkai e tararuaaki iroun te bitiobi, te beretitentii n te kooram n unimwaane ao te Bootaki n Aine a buokiia membwa ni kainnano aika a maan taia ao n te riki n toronibwai.

Te beretitenti n aia kooram unimwaane, te beretitenti n te Bootaki n Aine, ke temanna te tia kariiri e buoka temanna ke te utu ni karaoa ana Babaire n te Riki n Toronibwai. Taari ao Aine n te mwakuri n ibuobuoki a kona naba n ibuobuoki n te babaire.

8.2.2.4

Ngkana e Mate Kaain te Uoote

Ngkana e mate kaain te uoote, te beretitentii n aia kooram unimwaane ao n te Bootaki n Aine e anga te karaunano ao te ibuobuoki. Iaan ana kairiri te bitiobi, a kona n ibuobuoki ma te taunimate.

Ibukin rongorongo riki tabeua, taraa 38.5.8

8.2.3

Kaoakiia ni Kabane Bwa Ana Karekea te Euangkerio

Te beretitenti n aia kooram unimwaane e mwiokoa te membwa n te beretitentii bwa e na kaira te mwakuri ni mitinare n te uoote. E mwakuri ma te membwa are e mwiokoaki man te beretitentii n te Bootaki n Aine ni karaoi mwakuri aikai.

Taraa 23.5.1ao 23.5.3

8.2.4

Katiteuanakiia Utu n Akea Tokina

Te beretitenti n aia kooram unimwaane e mwiokoa te membwa n te beretitentii bwa e na ibuobuoki ni kaira te mwakuri n te tembora ao n rongorongon te utu n te uoote. E mwakuri ma te membwa are e mwiokoaki man te beretitentii n te Bootaki n Aine ni karaoi mwakuri aikai.

Taraa 25.2.2

8.3

Taan kairiiri n Aia Kooram Unimmwaane

8.3.1

Beretitentii n te Titeiki ao Bitiobi

Te beretitenti n te kooram n unimwaane e bon kaineti mwiin tabena nakon te beretitentii n te titeiki. E reitaki n tainako ma kaain te beretitentii ni karekea te kaetieti ao te ribooti iaon tabena.

Te beretitenti n aia kooram unimwaane e karekea naba te kairi mairoun te bitiobi, are bon te aobitia n tararua n te uoote. A kaitibo n te tai ae mwaiti.

8.3.2

Te Kauntira ae Rietaata

Te beretitentii n te titeiki e mwiokoa temanna te kauntira ae rietaata bwa e na tei ibukiia i nanon aia kooram unimwaane. A kabwarabwaraaki tabena inanon 6.5.

8.3.3

Beretitentii n te Kooram ni Unimwaane

8.3.3.1

Wetean te Beretitentii n Aia Kooram Unimwaane

Imwin te marooro ma te bitiobi, te beretitenti n te titeiki e wetea te unimwaane ke te ibonga ae rietata bwa e na beku bwa te beretitenti n aia kooram unimwaane.

Ngkana e a tau buburan te iunite, te beretietenti n te kooram n unimwaane e anga aran temana ke uoman unimwaane ke ibonga aika rietata nakon te beretitenti n te titeiki bwa a na beku bwa ana kauntira.

8.3.3.2

Taabe

Aikai taben te beretitenti n aia kooram unimwaane. E na buokaki irouia ana kauntira.

• Ngaia kaain kauntiran te uoote.

• E kaira ana waaki te kooram n te mwakuri ni kamaiu ao te karietataaki (taraa mwakoro 1).

• E bairei ao n tararua aia ibuobuoki taari n ibuobuoki.

• Iaan ana kairiiri te bitobi, marooro ma te membwa ae ikawai n te uoote.

• E babairei mwakuri ma kaain te kooram n unimwaane ni kakorakoraia taari, ake a tuai n iein ao ake a tia.

• E reitaki ma kaain te kooram n tatabemaniia tao teuana n te ririki.

• E reireiniia kaain te kooram tabeia n te nakoanibonga (taraa Reirei ao Berita aika Tabu 107:89). Kanoan aei bon reiakinaia bwa a na kanga ni kamwakura aia nakoanibonga ni karaoan otenanti ao kakabwaia.

• E tararuai rekootin te kooram, ribooti, ao te mwane (taraa LCR.ChurchofJesusChrist.org

8.3.3.3

Bowin te Beretitentii

Te beretitentii n aia kooram unimwaane ao te tia koroboki e mwaiti aia tai ni bowi. Te beretitenti e kairi bowi aikai. Te kauntira ae rietaata are mwiokoaki nakon te kooram aei e iri naba.

E kona ni kakanoa te akenta ni bwaai aikai:

• Babaire ni kakorakoraia kaain te kooram (ao naake a tauraoi) ao aia utu.

• Karaoan te mwakuri ni mitinare ao te mwakuri n te tembora ao te mwakuri n rongorongon te utu.

• Karaoi taabe man kauntiran te uoote.

• E rinanoi rongorongon intawaiu ibukin te mwakuri n ibuobuoki.

• E taraia taari ake a kona ni beku n nakoa ao n taabe.

• Bairei bootaki n te kooram ao waaki ni kakukurei.

8.3.4

Tia koroboki

N ana kariaia te bitiobi, kaain te beretitentii n aia kooram unimwaane e kona ni wetea kaain te kooram bwa te tia koroboki n te kooram.

8.4

Buokaia Unimwaane Aika Tauraoi ni Karekea te Nakoanibonga ae te Merekitereka

Te mwaane ae tauraoi n riki bwa te unimwaane bon kaain te Ekaretia ae te mwaane ae e tuai n reke irouna te Nakoanibonga ae te Merekitereka ao (1) bon 19 ana ririki ke raka riki (2) e uarereke iaan 19 te ririki ma e a tia ni mare.

Buokaia mwaane ake a tauraoi n riki bwa unimwaane ni katauraoi ni karekea te Nakoanibonga ae te Merekitereka bon teuana ana moanibwai te beretitentii n te kooram.