batan-ong babaye nga nagpataas sa iyang kamot diha sa klase

15.

Mga Seminary ug mga Institute of Religion

15.0

Pasiuna

Ang mga Seminary ug mga Institute of Religion (S&I) moabag sa mga ginikanan ug sa mga lider sa Simbahan sa pagtabang sa kabatan-onan ug mga young adult nga madugangan ang ilang hugot nga pagtuo ni Jesukristo ug sa Iyang gipahiuli nga ebanghelyo.

Usa ka S&I nga representante gisangonan sa pagtudlo sa matag stake aron sa pagtabang sa mga lider nga mangalagad sa mga programa sa S&I.

15.1

Seminary

Ang seminary usa ka programa nga molungtad og upat ka tuig diin ang kabatan-onan magtuon sa ebanghelyo ni Jesukristo sumala sa makita diha sa mga kasulatan ug sa mga pagtulon-an sa mga propeta sa ulahing mga adlaw. Ang mga estudyante sa seminary sa kasagaran 14–18 anyos ang edad.

Ang bishopric, mga lider sa kabatan-onan, ug mga kapangulohan sa korum ug sa klase moawhag sa matag batan-on sa pag-apil sa hingpit sa seminary.

15.1.1

Mga Magtutudlo

Ang mga magtutudlo sa Seminary kinahanglang mga miyembro sa Simbahan kinsa adunay hugot nga pagtuo ni Ginoong Jesukristo ug pagpamatuod sa Iyang gipahiuli nga ebanghelyo. Sila kinahanglan nga nagsunod sa mga baroganan nga ilang itudlo ug maayo nga motrabaho uban sa kabatan-onan. Kon mahimo, ang mga magtutudlo kinahanglang adunay balido nga rekomend sa templo.

Ang usa ka sakop sa kapangulohan sa stake o usa ka gisangonan nga high councilor motawag, mo-set apart, ug mo-release sa mga magtutudlo sa seminary sa stake ug sa mga supervisor sa stake

Sa pagpanalipod sa mga magtutudlo ug sa mga estudyante, duha ka hamtong kinahanglan nga anaa sa gambalay o panimalay diin gitudlo ang klase sa seminary.

15.1.2

Mga Opsiyon sa Seminary

Ang seminary mas labing makatabang kon ang mga estudyante makigkita sa magtutudlo kada adlaw sa semana. Hinoon, mahimong dili kini posible tungod sa mga isyu sa seguridad, gilay-on sa pagbiyahe, ug uban pang mga hinungdan.

Ang mga lider sa Simbahan magpakitambag sa ilang representante sa S&I sa paghukom unsa nga opsiyon ang:

• Labing makatabang sa mga estudyante nga makat-on sa ebanghelyo ug motubo sa espirituwal nga paagi.

• Makapahimo sa estudyante nga luwas.

• Dili makapabug-at sa pamilya nga wala kinahanglana.

Ang mga klase kinahanglang dili himoon sa Dominggo.

15.1.3

Mga Gambalay, Ekipo, ug mga Materyal

Ang mga lider sa stake ug ward moseguro nga ang mga dapit sama sa mga meetinghouse [balay tigomanan] o mga panimalay sa mga miyembro magamit alang sa mga klase sa seminary.

Ang representante sa S&I mohatag og mga materyal alang sa mga magtutudlo ug sa mga estudyante alang sa matag klase. Ang mga estudyante kinahanglang magdala sa ilang kaugalingong mga kasulatan, na-imprinta o digital.

15.1.5

Kredito [Credit] ug Gradwasyon

Ang mga estudyante sa seminary mas makakat-on sa epektibong paagi ug makapalig-on sa ilang pagkakabig kon sila kanunay nga motambong sa klase, moapil, ug magtuon sa mga kasulatan sa gawas sa klase. Kon buhaton nila kining mga butanga, makaangkon usab sila og kredito sa seminary matag tuig ug makagradwar gikan sa seminary.

Aron makagradwar gikan sa seminary, ang usa ka estudyante kinahanglan nga makaangkon og upat ka tuig nga kredito ug makadawat og eklesiyastikanhong pag-endorso gikan sa usa ka sakop sa bishopric.

15.2

Institute

Ang institute naghimo og kada adlaw nga mga klase sa pagtuon sa ebanghelyo nga makapalig-on sa hugot nga pagtuo ug pagpamatuod diha kang Jesukristo ug sa Iyang gipahiuli nga ebanghelyo. Ang tanang young single adult nga nag-edad og 18–30 kinahanglang awhagon nga moapil sa mga klase sa institute, nag-eskwela man sila o wala.

15.3

Mga Eskwelahan sa Simbahan ug Sistema sa Edukasyon sa Simbahan [Church Educational System]

Alang sa impormasyon bahin sa elementarya ug sekondarya nga mga eskwelahan sa Simbahan, BYU–Pathway Worldwide, ug mga institusyon sa mas taas nga edukasyon, tan-awa sa CES.ChurchofJesusChrist.org. Ang impormasyon mahitungod sa pagkompleto sa eklesiyastikanhong mga pag-endorso alang sa mga estudyante aron makaeskwela niini nga mga eskwelahan gihatag usab didto.

Dugang pa, ang impormasyon mahitungod sa eklesiyastikanhong mga clearance sa pagpanarbaho pinaagi sa CES Ecclesiastical Clearance Office makita diha sa help.ChurchofJesusChrist.org.