25.

Galuega o le Malumalu ma Talafaasolopito o Aiga i Uarota ma Siteki

25.0

Faatomuaga

O galuega o le malumalu ma talafaasolopito o aiga o auala ia mo le tuufaatasia ma le faamauina o aiga mo le faavavau (tagai i le Mataio 16:19). O lenei galuega e aofia ai le:

• Osia o feagaiga a o tatou mauaina o tatou lava sauniga i le malumalu (tagai i le Isaia 55:3; Mataupu Faavae ma Feagaiga 84:19–23).

• O le mauaina o o tatou tuaa ua maliliu ma le faatinoina o sauniga mo i latou i le malumalu ina ia mafai ai ona latou osia feagaiga ma le Atua (tagai i le Malaki 4:5–6; 1 Korinito 15:29; Mataupu Faavae ma Feagaiga 128:15–18).

• O atu e le aunoa i le maota o le Alii, i nofoaga e mafai ai, e tapuai i le Atua ma faatinoina sauniga mo Ana fanau (tagai i le Luka 24:52–53; Mataupu Faavae ma Feagaiga 109:13–14).

O loo maua nisi faamatalaga i “Malumalu” ma “Talafaasolopito o Aiga” (Gospel Topics, topics.ChurchofJesusChrist.org).

25.1

Auai o Tagata o le Au Paia ma Taitai i Galuega o le Malumalu ma Talafaasolopito o Aiga

Ua i ai i tagata o le Ekalesia le avanoa ma le tiutetauave e fesoasoani ai e tuufaatasia o latou aiga mo le faavavau. Latou te saunia i latou lava e osia feagaiga a o latou mauaina sauniga o le malumalu ma latou taumafai malosi e tausia na feagaiga.

Ua uunaia tagata o le Ekalesia e faailoa o latou tauaiga ua maliliu ae lei mauaina sauniga o le malumalu. Ona faatino ai lea e tagata o le Ekalesia ia sauniga mo na tauaiga (tagai i le Mataupu Faavae ma Feagaiga 128:18). I le lalolagi o agaga e mafai e tagata taitasi ua maliliu ona filifili e talia pe teena sauniga ua faatinoina mo i latou.

25.1.1

Tiutetauave o le Tagata Lava Ia mo le Auai Atu i le Malumalu

E filimaoti e tagata o le au paia mo i latou lava pe o afea ma pe o le a le tele e tapuai ai i totonu o le malumalu. E le faatuina e taitai se sini faafuainumera po o se faiga e lipoti ai le auai atu i le malumalu.

25.2

O Le Faatulagaina o le Galuega o Malumalu ma Talafaasolopito o Aiga i le Uarota

25.2.1

Au Epikopo

O le au epikopo e galulue faatasi ma le au peresitene o le korama a toeaina ma le Aualofa a o latou taimua i taumafaiga a le uarota mo le malumalu ma talafaasolopito o aiga. E fefautuaai faatasi e le aunoa nei taitai.

Ua i ai foi i le au epikopo ia tiutetauave nei mo le galuega mo le malumalu ma talafaasolopito o aiga i le uarota:

• E faamautinoa o loo a’oa’o atu ia a’oa’oga faavae ma faamanuiaga o galuega o le malumalu ma talafaasolopito o aiga i le lotu.

• E faamautinoa o loo faamaopoopo i le aufono a le uarota ma fonotaga a le aufono a le autalavou le galuega o malumalu ma talafaasolopito o aiga.

• E vaavaaia le faatulagaga o kosi o tapenaga mo le malumalu (tagai i le 25.2.8).

• E tuuina atu pepa faataga o le malumalu, (tagai i le mataupu 26).

25.2.2

Au Peresitene o Korama a Toeaina ma le Aualofa

O au peresitene o le korama a toeaina ma le Aualofa e taimua i taumafaiga mo malumalu ma talafaasolopito o aiga i lea aso-ma-lea-aso i totonu o le uarota (tagai i le 8.2.4 ma le 9.2.4). Latou te galulue faatasi e taitai nei taumafaiga faatasi ma le aufono a le uarota, i lalo o le faamaopoopoga a le epikopo.

Ua i ai i nei taitai tiutetauave nei:

• E fesoasoani i tagata o le au paia ia saunia mo le mauaina o sauniga ma osia feagaiga.

• Fautuaina tagata o le au paia e tapuai i totonu o le malumalu i le tele e mafai ai e o latou tulaga ona faatagaina.

• Fautuaina tagata o le au paia e aoao e uiga i o latou tuaa ma faatino ia sauniga o le malumalu mo i latou.

• Taitaia le galuega a le taitai o le malumalu ma talafaasolopito o aiga i le uarota. Afai e lei valaauina lenei taitai, o se tasi o le au peresitene o le korama a toeaina e faatinoina lenei matafaioi (tagai i le 25.2.3).

E taufai tofi e le peresitene o le korama a toeaina ma le peresitene o le Aualofa se tasi o le au peresitene e fesoasoani e taitai le galuega o le malumalu ma talafaasolopito o aiga i le uarota. E galulue faatasi sui nei e toalua o au peresitene. E auai i la’ua i fonotaga faamaopoopo o malumalu ma talafaasolopito o aiga (tagai i le 25.2.7).

25.2.3

Taitai mo Malumalu ma Talafaasolopito o Aiga a le Uarota

E feutagai le epikopo ma le peresitene o le siteki, e filimaoti ai pe valaau se taitai o le malumalu ma talafaasolopito o aiga i le uarota. O lenei tagata e tatau lava o sē e umia le Perisitua Mekisateko.

O le taitai mo le malumalu ma talafaasolopito o aiga a le uarota e lagolagoina le au peresitene o le korama a toeaina ma le au peresitene o le Aualofa i o latou tiutetauave o le malumalu ma talafaasolopito o aiga. Ua ia te ia foi tiutetauave nei:

• E taitai i fonotaga faamaopoopo o malumalu ma talafaasolopito o aiga (tagai i le 25.2.7

• E aoaoina ia faufautua mo malumalu ma talafaasolopito o aiga a le uarota. E faamaopoopoina a latou taumafaiga e fesoasoani ai i tagata o le au paia i le galuega o malumalu ma talafaasolopito o aiga.

• E galulue faatasi ma le taitai misiona a le uarota ma faifeautalai e fesoasoani ai ia i latou o loo aoaoina le talalelei, o tagata fou [o le ekalesia], ma tagata ua toe foi mai ia punouai i le galuega mo malumalu ma talafaasolopito o aiga.

25.2.4

Faufautua mo Malumalu ma Talafaasolopito o Aiga a le Uarota

O faufautua mo malumalu ma talafaasolopito o aiga a le uarota, e galulue i lalo o le taitaiga a le taitai mo le malumalu ma talafaasolopito o aiga a le uarota po o le sui o le au peresitene o le korama a toeaina o le o loo tauaveina lea matafaioi. E valaauina e le au epikopo nei tagata o le au paia e galulue. E mafai ona valaauina tagata matutua ma le autalavou.

Ua i ai i faufautua ia tiutetauave nei:

• Fesoasoani i tagata ia maua aafiaga o faamanuiaga o le iloa o o latou tuaa ma faatinoina ia sauniga o le malumalu mo i latou.

• E fesoasoani i tagata o le au paia ia saunia mo le mauaina o sauniga ma osia feagaiga o le malumalu.

• E auai i fonotaga faamaopoopo o malumalu ma talafaasolopito o aiga (tagai i le 25.2.7).

25.2.7

O Fonotaga Faamaopoopo mo Malumalu ma Talafaasolopito o Aiga a le Uarota

E faia e le aunoa ni fonotaga puupuu faamaopoopo, faasamasamanoa mo le malumalu ma talafaasolopito o aiga o le uarota. Afai ua tofia se taitai o le uarota mo malumalu ma talafaasolopito o aiga, o ia e faatautaia nei fonotaga. A leai, o se tasi o le au peresitene o le korama a toeaina e faatinoina lenei matafaioi.

O isi e valaaulia e aofia ai:

• Sui ua tofia o au peresitene o le Aualofa ma le korama a toeaina.

• Se fesoasoani i le korama a ositaulaga.

• Se tasi o le au peresitene o le vasega aupito matutua o Tamaitai Talavou.

• Faufautua mo malumalu ma talafaasolopito o aiga.

O le faamoemoega o nei fonotaga e:

• Fuafua pe faapefea ona fesoasoani i tagata patino o le uarota ia latou galuega mo malumalu ma talafaasolopito o aiga e pei ona talosagaina mai.

E mafai ona faia nei fonotaga faafesagai pe i nofoaga vava mamao. E mafai foi ona faia le faamaopoopoga i nisi auala, e aofia ai le valaau i le telefoni, tesi, ma imeli.

25.2.8

Vasega Sauniuni mo le Malumalu

I lalo o le taitaiga a le epikopo, e mafai ona faatulaga se vasega sauniuni mo le malumalu e fesoasoani ai i tagata ia saunia e osia feagaiga a o latou mauaina sauniga o le malumalu. O nei vasega e faia i fafo mai o sauniga masani o le Aso Sa i se taimi e faigofie mo tagata o le au paia. E mafai ona faia i se falelotu po o se fale o se aiga.

O lesona ma faatonuga mo le faatulagaina o le kosi o loo maua i le Faaeeina mai Luga: Tusi Lesona a le Faiaoga o le Semina Sauniuni o le Malumalu.. O tagata auai e tuuina atu i ai kopi o le Saunia e Ulufale Atu i le Malumalu Paia. Mo suesuega a le tagata lava ia ma punaoa o lesona, tagai i le temples.ChurchofJesusChrist.org.

25.4

Punaoa o Talafaasolopito o Aiga

25.4.1

O Lo’u Aiga: O Tala e Aumai Faatasi ai i Matou

O Lo’u Aiga: O Tala e Aumai Faatasi ai i Matou e fesoasoani i tagata e iloa ai o latou tauaiga ma augatuaa ma faaputuputu o latou tala. E mafai foi ona fesoasoani lenei tamaitusi i tagata o le au paia e amata ai ona sauniuni ia igoa a le aiga mo sauniga o le malumalu.

E mafai ona sii mai le tamaitusi i le ChurchofJesusChrist.org. E mafai ona oka ia kopi o tusi i le store.ChurchofJesusChrist.org.

25.4.2

Polokalama o leFamilySearch.org ma le FamilySearch

FamilySearch.org o le uepisaite lea a le Ekalesia mo le galuega o malumalu ma talafaasolopito o aiga. E mafai ona fesoasoani i tagata faaaoga:

• E fausia ai sootaga ma faiā o gafa o aiga.

• E maua ai tuaa ma o latou tala.

• E fefaasoaai ai ma faasaoina ia tala o aiga, atapue, ma talaaga.

• E saunia ai igoa a le aiga mo sauniga o le malumalu.

O le FamilySearch Tree app ma le FamilySearch Memories app e mafai ai e tagata ona fai o latou sao i le galuega o malumalu ma taafaasolopito o aiga mai masini feavea’i.

25.5

Fautuaina Atu ma le Valaauina o Tagata Faigaluega o le Malumalu

25.5.1

Fautuaina Atu o Tagata Faigaluega o le Malumalu

O tagata ua onomea ona faigaluega i le malumalu e iloa i auala nei:

• O tagata e faailoa mai e le epikopo po o se isi taitai o le uarota

• O tagata o le au paia e talanoa atu i le epikopo e uiga i le auauna atu

• O tagata e fautuaina mai e le peresitene o le malumalu, le faatina, po o se isi taitai o le malumalu

• O tagata o le ekalesia o ē o loo sauniuni mo, pe ua faatoa taliu mai le galuega faamisiona (tagai i le mataupu 24)

O igoa o tagata ua onomea ona faigaluega i le malumalu e auina mai e faaaoga ai le Recommend Temple Worker tool. O loo avanoa lenei meafaigaluega i epikopo, peresitene o siteki, ma au peresitene o malumalu.