29.

Amateraniro mu Itorero

29.0

Iriburiro

Abera b’Iminsi ya Nyuma baterana hamwe kugira ngo baramye, umwe yubake undi, kandi bigishe ndetse bige inkuru nziza (reba Aluma 6:6; Moroni 6:5–6). Umukiza yarasezeranyije ati: “Kuko aho babiri cyangwa batatu bateraniye mu izina ryanjye, nanjye mba ndi hagati yabo” (Matayo 18:20). Guteranira hamwe ni uburyo bumwe imitima yacu ishobora kuba “ibumbiye hamwe mu bumwe no mu rukundo” (Mosaya 18:21).

Icyakora, kugira iteraniro ntibigomba kuzigera bisimbura gukorera no gufasha abandi nk’uko Yesu Kristo yabikoze.

29.1

Gutegura no Kuyobora Amateraniro

Abayobozi bategura kandi bakayobora amateraniro uko bayobowe na Roho Mutagatifu, hakurikijwe amategeko n’ibyahishuwe by’Imana (Inyigisho n’Ibihango 20:45; reba kandi Moroni 6:9; Inyigisho n’Ibihango 46:2). Bashakisha uburyo bwo gutumira uruhare rwa Roho mu materaniro yabo.

Abayobozi bamenya neza ko umubare n’ingano y’amateraniro bitabera imitwaro abanyamuryango cyangwa imiryango yabo.

29.2

Amateraniro ya Paruwasi

29.2.1

Iteraniro ry’Isakaramentu

Intego

Kwibuka Yesu Kristo dufata ku isakaramentu. Izindi ntego zirimo kuramya, kubaka ukwizera n’ubuhamya, ndetse no kuyobora gahunda z’ishami.

Abagiramo uruhare

Abantu bose bahamagarirwa kwitabira.

Inshuro

Buri Cyumweru.

29.2.1.1

Gutegura Iteraniro ry’Isakaramentu

Ubuyobozi bwa paruwasi butegurakandi bukayobora iteraniro ry’isakaramentu. Bumenya neza ko intumbero y’iteraniro iri ku isakaramentu kandi yubaka ukwizera muri Yesu Kristo.

Iteraniro ry’Isakaramentu rimara isaha imwe. Rishobora kubamo ibikurikira:

1. Umuziki ubimburira iteraniro (reba 19.3.2 ku bw’imirongo ngenderwaho).

2. Indamutso n’ikaze.

3. Kumenyekanisha abayobozi bakuriye iteraniro cyangwa abandi bayobozi basuye.

4. Amatangazo. Aya akwiye kuba make ashoboka.

5. Indirimbo n’isengesho bitangiza. Reba 19.3.2 na 29.6.

6. Gahunda za paruwasi n’iz’urumambo, nk’izikurikira:

   • Gushyigikira no kuruhura abayobozi batumwe n’abigisha (reba 30.3 na 30.6).

   • Kwerekana amazina y’abavandimwe bagiye kwimikwa mu rwego rw’Ubutambyi bwa Aroni (reba 18.10.3).

   • Kumenyekanisha abanyamuryango ba paruwasi bashya, harimo abahindutse vuba.

7. Kwita izina no guha umugisha abana (reba 18.6). Ibi ubusanzwe bikorwa mu iteraniro ry’ukwiyiriza n’ubuhamya (reba 29.2.2).

8. Kwemeza abahindutse bashya (reba 18.8).

9. Indirimbo y’isakaramentu n’imitangire y’isakaramentu. Isakaramentu ni intumbero y’ibanze y’iteraniro. Uyu mugenzo ni amahirwe agenewe abanyamuryango kugira ngo berekeze ibitekerezo byabo ku Mukiza n’igitambo Cye ku bwabo.

   Ku bindi byerekeye gutegura, guha umugisha no gutambutsa isakaramentu, reba 18.9.

10. Ubutumwa bw’inkuru nziza no kuririmba kw’ikoraniro cyangwa undi muziki.

11. Indirimbo n’isengesho bisoza.

12. Umuziki uhumuza iteraniro.

29.2.1.4

Gutoranya Abafata ijambo

Ubuyobozi bwa paruwasi butoranya abafata ijambo ku bw’iteraniro ry’isakaramentu. Inshuro nyinshi batumira abanyamuryango ba paruwasi, harimo urubyiruko.

Abafata ijambo batanga ubuhamya bwa Yesu Kristo kandi bigisha inkuru nziza Ye bakoresheje ibyanditswe bitagatifu (reba Inyigisho n’Ibihango 42:12; 52:9).

29.2.2

Iteraniro ry’Ukwiyiriza n’Ubuhamya

Intego

Gufata isakaramentu no gukomezanya hatangwa ubuhamya bwa Yesu Kristo n’inkuru nziza Ye. Abanyamuryango bashishikarizwa kuza mu iteraniro ry’ukwiyiriza niba bashobora kwiyiriza.

Abagiramo uruhare

Abantu bose bahamagarirwa kwitabira.

Inshuro

Rimwe mu kwezi, iteraniro ry’isakaramentu aba ari iteraniro ry’ukwiyiriza n’ubuhamya. Mu busanzwe ibi aba ari ku Cyumweru cya mbere cy’ukwezi.

Mu iteraniro ry’ukwiyiriza n’ubuhamya, nta bafata ijambo babishinzwe baba bahari cyangwa umuziki watoranijwe. Ahubwo, umuntu uyobora atanga ubuhamya bugufi. Noneho agahamagarira abanyamuryango b’ikoraniro gutanga ubuhamya bwabo. Gutanga ubuhamya bivuze gutangaza ukuri kw’inkuru nziza uko uhumetswemo na Roho Mutagatifu.

29.2.3

Igiterane cya Paruwasi

Intego

Mu giterane cya paruwasi, abayobozi b’urumambo bahugura, bashyigikira, kandi bakita ku bayobozi n’abanyamuryango ba paruwasi. Abanyamuryango ba paruwasi bashyigikira abayobozi rusange n’ab’ako gace.

Abagiramo uruhare

Abantu bose bahamagarirwa kwitabira.

Inshuro

Rimwe mu mwaka ku Cyumweru kitari Icyumweru cy’ukwiyiriza.

29.2.4

Inama y’Ubuyobozi bwa Paruwasi

Intego

Kujya inama hamwe no gufata ibyemezo byerekeye ibyigwaho bireba paruwasi.

Abagiramo uruhare

Ubuyobozi bwa paruwasi, umwanditsi wa paruwasi n’umunyamabanga mukuru.

Inshuro

Mu busanzwe ni buri cyumweru.

Ibyigwaho byo kuzirikana bishobora kubamo:

• Guhuza ibikorwa by’umurimo w’agakiza n’ikuzwa muri paruwasi.

• Gukomeza abantu ku giti cyabo n’imiryango muri paruwasi—cyane cyane urubyiruko n’abana.

• Gutahura abanyamuryango bashobora kwitegura kwakira imigenzo, harimo ukwimikwa k’ubutambyi.

• Gutahura abanyamuryango bo guhamagara mu myanya ya paruwasi.

29.2.5

Inama y’Inteko ya Paruwasi

Intego

Gufasha gusohoza umurimo w’agakiza n’ikuzwa muri paruwasi (reba 1.2).

Abagiramo uruhare

• Ubuyobozi bwa paruwasi, umwanditsi wa paruwasi n’umunyamabanga mukuru wa paruwasi.

• Abayobozi b’ihuriro ry’abakuru, Umuryango w’Ihumure, Urubyiruko rw’Abakobwa, Ishuri ry’Ibanze n’Ishuri ryo ku Cyumweru.

Inshuro

Mu busanzwe ni buri cyumweru (ariko bashobora guhura gake).

Umwepiskopi ategura, agakurira, kandi akayobora amanama y’inteko ya paruwasi. Inteko ntabwo ifata ibyemezo by’ingenzi nta mwepiskopi uhari.

Abayobozi b’imitunganyirize ya paruwasi bitabira amanama y’inteko ya paruwasi mu bushobozi bubiri:

1. Nk’abanyamuryango b’inteko ya paruwasi bafasha guhesha umugisha abanyamuryango ba paruwasi bose.

2. Nk’abahagarariye amatsinda yabo.

Iyo bateraniye hamwe, abanyamuryango b’inteko ya paruwasi baganira ibyigwaho byazabyara inyungu zivuye mu mihate ihurije hamwe y’inteko uko yakabaye. Buri munyamuryango w’inteko ashishikarizwa gusangiza abandi ibitekerezo bye n’ukumurikirwa kuri ibi byigwaho.

Mu busanzwe amanama y’inteko ya paruwasi ntabwo arenza isaha imwe. Atangirana n’isengesho na raporo ngufi ku mikoro iturutse mu manama aheruka. Umwepiskopi ashyira imbere ibyigwaho bikenewe kurusha ibindi kugira ngo bihesheumugisha abantu ku giti cyabo n’imiryango.

• Kubahiriza Inkuru Nziza ya Yesu Kristo. Gufasha abanyamuryango kubaka ukwizera, kwakira imigenzo ikiza, no kubahiriza ibihango byabo.

• Kwita ku bakennye. Gusangiza abandi ibyifashishwa n’ubuhanga kugira ngo baheshe umugisha abantu ku giti cyabo, imiryango n’abaturage. Gufasha abanyamuryango ba paruwasi guhinduka abantu bigira. (Reba igice cya 22.)

• Guhamagarira abantu bose kwakira inkuru nziza. Gusesengura iterambere ry’abarimo kwiga ibyerekeye inkuru nziza, ndetse n’abanyamuryango bashya n’abagarutse. Kuganira uburyo abanyamuryango bashobora gusangiza abandi inkuru nziza. (Reba igice cya 23.)

• Guhuza imiryango ubuziraherezo. Gusesengura iterambere ry’abanyamuryango barimo kwitegura kwakira imigenzo y’Ingoro y’Imana. Guteganya uburyo bwo gufasha abanyamuryango benshi kurushaho kuzuza ibisabwa ku bw’icyemezo ku ngoro y’Imana. Kuganira uburyo abanyamuryango bashobora kugira uruhare mu murimo w’ingoro y’Imana n’amateka y’umuryango. (Reba igice cya 25.)

Abanyamuryango b’inteko bagomba kugira ibanga ku makuru ayo ari yo yose y’ibanga cyangwa ayo kwitondera (reba 4.4.6).

29.2.6

Inama y’Inteko y’Urubyiruko rwa Paruwasi

Intego

Guomeza urubyiruko muri paruwasi. Gufasha kugira uruhare mu murimo w’agakiza n’ikuzwa (reba 1.2).

Abagiramo uruhare

• Ubuyobozi bwa paruwasi.

• Umwe mu bafasha b’umwepiskopi mu ihuriro ry’abatambyi ndetse n’abayobozi b’abigisha n’ab’abadiyakoni.

• Abayobozi b’ishuri ry’Urubyiruko rw’Abakobwa (cyangwa ubuyobozi uko bwakabaye bwose niba paruwasi ifite ishuri rimwe ry’Urubyiruko rw’Abakobwa gusa).

• Umuyobozi w’Urubyiruko rw’Abakobwa.

Inshuro

Mu busanzwe ni ngarukakwezi.

Mbere ya buri nama, umwepiskopi n’umuntu urimo kuyobora basesengura ibyigwaho biri buganirweho.

• Umurimo w’agakiza n’ikuzwa.

• Ibikenewe by’urubyiruko muri paruwasi n’uburyo bwo kubyitaho.

• Imihate yo kugera kurubyiruko rutakiza guterana cyangwa abanyamuryango bashya.

• Ibikorwa, harimo n’uburyo bwo gufasha abakennye. Igice kinini cy’umwiteguroi gikorerwa mu manama y’ubuyobozi bw’ihuriro cyangwa ubw’ishuri (reba igice cya 20).

• Ugufasha (reba igice cya 21.)

• Kwerekera ubuyobozi buhamagawe vuba bw’ihuriro n’ishuri.

29.2.8

Ingengabihe ku bw’Amateraniro yo ku Cyumweru

Amaparuwasi akoresha imwe mu ngengabihe z’amasaha abiri ku bw’amateraniro yo ku Cyumweru.

Umugambi 1

Iminota 60	Iteraniro ry’isakaramentu
Iminota 10	Kwerekeza mu mashuri n’amateraniro
Iminota 50	Ibyumweru byose: Ishuri ry’Ibanze, harimo ishuri ry’abana bato Icyumweru cya mbere n’icya gatatu cy’ukwezi: Ishuri ryo ku Cyumweru Icyumweru cya kabiri n’icya kane cy’ukwezi: Amateraniro y’ihuriro ry’abatambyi, ay’Umuryango w’Ihumure n’ay’Urubyiruko rw’Abakobwa Ku Cyumweru cya gatanu: amateraniro agenewe urubyiruko n’abakuze. Ubuyobozi bwa paruwasi bugena ingingo kandi bugaha umukoro abigisha.

Umugambi 2

Iminota 50	Ibyumweru byose: Ishuri ry’Ibanze, harimo ishuri ry’abana bato Icyumweru cya mbere n’icya gatatu cy’ukwezi: Ishuri ryo ku Cyumweru Icyumweru cya kabiri n’icya kane cy’ukwezi: Amateraniro y’ihuriro ry’abatambyi, ay’Umuryango w’Ihumure n’ay’Urubyiruko rw’Abakobwa Ku Cyumweru cya gatanu: amateraniro agenewe urubyiruko n’abakuze. Ubuyobozi bwa paruwasi bugena ingingo kandi bugaha umukoro abigisha.
Iminota 10	Itambuka mu iteraniro ry’Isakaramentu
Iminota 60	Iteraniro ry’isakaramentu

29.3

Amanama y’Urumambo

29.3.1

Igiterane cy’Urumambo

Umugambi

Umugambi w’ibanze w’igiterane cy’urumambo ni ugukomeza ukwizera kw’abanyamuryango muri Yesu Kristo.

Abagiramo uruhare

Abantu bose batumirirwa kwitabira iteraniro rusange. Andi materaniro agenewe abagiramo uruhare bihariye, nk’uko bisobanuwe munsi.

Inshuro

Kabiri mu mwaka.

29.3.2

Iteraniro Rusange ry’Ubutambyi bw’Urumambo

Umugambi

Guha amabwiriza no kugira inama abafite ubutambyi mu nshingano zabo.

Abagiramo uruhare

Abafite ubutambyi bose mu rumambo.

Inshuro

Rimwe mu mwaka.

29.3.3

Inama y’Imiyoborere y’Ubutambyi bw’Urumambo

Intego

Kwigisha abayobozi b’ubutambyi inshingano zabo, kongera ubushobozi bwabo, no gukomeza ukwizera kwabo.

Abagiramo uruhare

• Ubuyobozi bw’urumambo.

• Inteko nkuru.

• Abanditsi b’urumambo n’aba paruwasi (n’abanditsi bungirije uko bikenewe).

• Abanyamabanga bakuru b’urumambo n’aba paruwasi.

• Ubuyobozi bw’Urubyiruko rw’Abahungu rw’Urumambo (n’umunyamabanga niba yarahamagawe).

• Ubuyobozi bw’amaparuwasi.

• Ubuyobozi bw’ihuriro ry’abakuru n’abanyamabanga.

• Abajyanama b’ihuriro ry’Ubutambyi bwa Aroni.

Inshuro

Inama y’imiyoborere y’ubutambyi iterana nk’igice cya buri giterane cy’urumambo.

29.3.4

Amanama y’Imiyoborere y’Urumambo

Umugambi

Kwigisha abayobozi b’amatsinda inshingano zabo, kubafasha gutera imbere nk’abayobozi n’abigisha, no gukomeza ukwizera kwabo muri Yesu Kristo. Muri aya manama, kandi abayobozi bajya inama kandi bagasangizanya ibitekerezo.

Abagiramo uruhare

Ubuyobozi bwose n’abajyanama b’Umuryango w’Ihumure, Urubyiruko rw’Abakobwa, Ishuri ry’Ibanze n’Ishuri ryo ku Cyumweru by’urumambo na paruwasi. Umunyamuryango w’ubuyobozi bw’urumambo cyangwa umujyanama mukuru wabishinzwe arayitabira kandi agakurira iteraniro. Abigisha, abajyanama, abajyanama bakuru n’abanyamuryango b’ubuyobozi bwa paruwasi bashinzwe aya matsinda bashobora gutumirwa.

Inshuro

Rimwe mu mwaka.

29.3.5

Inama y’Ihuriro ry’Abatambyi Bakuru b’Urumambo

Umugambi

Kwigisha abanyamuryango b’ihuriro inshingano zabo n’inyigisho zirebana n’ubutambyi.

Abagiramo uruhare

Abanyamuryango bose b’ihuriro ry’abatambyi bakuru b’urumambo.

Inshuro

Nibura rimwe mu mwaka.

29.3.6

Inama y’Ubuyobozi bw’Urumambo

Umugambi

Kujya inama hamwe no gufata ibyemezo byerekeye ibyigwaho bireba urumambo.

Abagiramo uruhare

Ubuyobozi bw’urumambo, umwanditsi wa paruwasi n’umunyamabanga mukuru.

Inshuro

Mu buryo buhoraho (mu busanzwe ni buri cyumweru).

29.3.7

Inama y’Inteko Nkuru

Umugambi

Kujya inama hamwe ku byerekeye umurimo w’agakiza n’ikuzwa mu rumambo (reba 1.2).

Abagiramo uruhare

• Ubuyobozi w’urumambo.

• Inteko nkuru.

• Umwanditsi w’urumambo n’umunyamabanga mukuru.

Inshuro

Kabiri mu kwezi niba bishoboka.

29.3.8

Inama y’Inteko y’Urumambo

Umugambi

Kujya inama hamwe ku byerekeye umurimo w’agakiza n’ikuzwa mu rumambo (reba 1.2).

Abagiramo uruhare

• Ubuyobozi bw’urumambo.

• Inteko nkuru.

• Umwanditsi w’urumambo n’umunyamabanga mukuru.

• Ubuyobozi bw’Umuryango w’Ihumure, ubw’Urubyiruko rw’Abakobwa, ubw’Ishuri ry’Ibanze n’ubw’Ishuri ryo ku Cyumweru by’Urumambo.

• Abayobozi b’urumambo b’urubyiruko rukuze rw’ingaragu n’ab’abakuze b’ingaragu (niba barahamagawe).

Inshuro

Buri kwezi niba bishoboka.

29.3.9

Inama y’Imiyoborere ya Komite y’Abakuze b’Urumambo

Umugambi

Bajya inama hamwe ku byerekeye ukuntu bashyigikira abayobozi ba paruwasi mu murimo w’agakiza n’Ikuzwa. Bategura uburyo bwo gufasha gushyira mu bikorwa icyerekezo cy’abayobozi b’urumambo ku bw’uyu murimo mu rumambo.

Abagiramo uruhare

• Ubuyobozi bw’urumambo.

• Ubuyobozi bw’Umuryango w’Ihumure w’Urumambo (n’umunyamabanga niba yarahamagawe).

• Abajyanama bakuru bahawe umukoro wo gukorana n’amahuriro y’abakuru.

Inshuro

Uko bikenewe.

29.3.10

Inama y’Imiyoborere ya Komite y’Urubyiruko rw’Urumambo

Umugambi

Bajya inama hamwe ku byerekeye ukuntu bashyigikira abayobozi ba paruwasi mu gushyira urubyiruko mu murimo w’agakiza n’Ikuzwa. Batunganya uburyo bwo gufasha gushyira mu bikorwa icyerekezo cy’inteko y’urumambo ku bw’urubyiruko mu rumambo.

Abagiramo uruhare

• Umunyamuryango w’ubuyobozi bw’urumambo.

• Ubuyobozi bw’Urubyiruko rw’Abahungu rw’urumambo (n’umunyamabanga niba yarahamagawe).

• Ubuyobozi bw’Urubyiruko rw’Abakobwa rw’urumambo (n’umunyamabanga niba yarahamagawe).

• Abajyanama bakuru bahawe imitunganyirize y’Urubyiruko rw’Abakobwa n’Ishuri ry’Ibanze mo umukoro.

Inshuro

Uko bikenewe.

29.3.11

Inama y’Inteko y’Abepiskopi b’Urumambo

Umugambi

Gusangiza abandi ubunararibonye no gusubiza ibibazo byerekeranye by’umwihariko n’abepiskopi.

Abagiramo uruhare

Abepiskopi n’abayobozi b’ishami bose mu rumambo ni abanyamuryango b’iyi nteko. Umuyobozi w’urumambo ashobora guhitamo kwitabira amwe cyangwa amanama yose. Umwanditsi w’urumambo na we aritabira kugira ngo yandike imikoro n’ibyemezo.

Inshuro

Nibura buri gihembwe.

29.5

Imihango y’Ugushyingura n’Andi Materaniro ku bwa ba Nyakwigendera

29.5.1

Amahame Rusange

Intego y’ingirakamaro y’amateraniro y’Itorero ku bwa ba nyakwigendera ni uguhamya iby’umugambi w’agakiza, by’umwihariko Impongano n’Umuzuko by’Umukiza. Aya materaniro akwiye kuba ubunararibonye bw’icyubahiro, bw’ibya roho.

Abayobozi b’Itorero ntabwo bakwiye gushyiramo imigenzo y’andi madini cyangwa amatsinda mu materaniro y’Itorero ku bwa ba nyakwigendera.

29.5.2

Gutanga Ubufasha ku Muryango

Nk’abigishwa ba Yesu Kristo, abayobozi n’abanyamuryango b’Itorero “barirana n’abarira …, kandi bahumuriza abakeneye ihumure” (Mosaya 18:9). Iyo umunyamuryango apfuye, umwepiskopi asura umuryango kugira ngo awuhe ihumure.

Umwepiskopi atanga ubufasha buturutse mu banyamuryango ba paruwasi, harimo ihuriro ry’abakuru n’Umuryango w’Ihumure.

29.5.4

Amateraniro y’umuhango w’Ugushyingura (Aho byemewe n’Umuco)

Umuhango w’ugushyingura uyobowe n’umwepiskopi, haba ari mu nyubako y’Itorero cyangwa ahandi, ni iteraniro ry’Itorero n’umurimo w’iyobokamana. Ukwiye kuba umwanya w’ibya roho.

Imihango y’ugushyingura igomba gutangirira ku gihe. Muri rusange, ntabwo ikwiye kurenza isaha 1.5, nk’ubupfura ugaragariza abitabiriye.

Imirimo y’umuhango w’ugushyingura ntabwo mu busanzwe ikorwa ku Cyumweru.

29.6

Amasengesho mu Materaniro y’Itorero

Amasengesho mu materaniro y’Itorero akwiye kuba magufi, yoroheje, kandi ayobowe na Roho. Buri munyamuryango uwo ari we wese wabatijwe ashobora gutanga isengesho ritangiza cyangwa rihumuza. Abana batarabatizwa bashobora gusengera mu Ishuri ry’Ibanze.

29.7

Kurebera Amateraniro kuri Murandasi no Kuyakorana Ikoranabuhanga

Umwepiskopi, nk’umwihariko, ashobora gutanga uburenganzira bwo kurebera amateraniro y’isakaramentu kuri murandasi n’imihango y’ugushyingura n’amakwe bibera mu rusengero.

Ukurebera iteraniro ry’isakaramentu kuri murandasi ntabwo bikwiye kubamo imitangire y’isakaramentu.

Ku bw’amanama amwe n’amwe, umwepiskopi cyangwa umuyobozi w’urumambo ashobora guha uburenganzira abanyamuryango badashobora kwitabira imbonankubone kugiramo uruhare hakoreshejwe ikoranabuhanga. Ayamateraniro ashobora kubamo:

• Amanama y’imiyoborere, nk’amanama y’ubuyobozi cyangwa ay’inteko.

• Amateraniro y’Umuryango w’Ihumure n’ay’Urubyiruko rw’Abakobwa.

• Amasomo y’Ishuri ryo ku Cyumweru.

• Amasomo y’Ishuri ry’Ibanze n’igihe cyo kuririmba.