8.

Korama a Toeaina

8.1

Faamoemoega ma le Faatulagaga

O le Perisitua Mekisateko e fesoasoani i fanau a le Atua e sauniuni e toe foi atu i Lona afio’aga. Na te umia “ki o faamanuiaga uma faaleagaga o le ekalesia” (Mataupu Faavae ma Feagaiga 107:18).

O tofi o le Perisitua Mekisateko o le toeaina, faitaulaga sili, peteriaka, Fitugafulu, ma le Aposetolo. O le mataupu lenei o loo i ai faamatalaga e uiga i toeaina ma korama a toeaina.

8.1.1

Faamoemoega

O alii agavaa ua ta’i 18 ma matutua atu, e mafai ona mauaina le Perisitua Mekisateko ma faauuina i le tofi o le toeaina. O se alii e faauuina i lena tofi e ulu atu i se feagaiga paia e fesoasoani ai i le Atua i le faataunuuina o Lana galuega (tagai i le Mataupu Faavae ma Feagaiga 84:33–44).

O toeaina taitasi o se itutino o se vaega faatulagaina o ē umia le perisitua ua faaigoaina o se korama a toeaina. O sui auai o le korama a toeaina e galulue faatasi e fesoasoani ia faataunuuina le galuega a le Atua mo le faaolataga ma le faaeaga. Latou te fe’au’aunaa’i, faataunuu tiute faaleperisitua, fausia le lotogatasi, ma a’oa’o ma ola i a’oa’oga faavae.

8.1.2

O le avea ma tagata auai i le Korama a Toeaina

E tofu le uarota ma se korama a toeaina. E aofia ai uso nei:

• Toeaina uma i le uarota.

• Toeaina faaolioli uma i le uarota (tagai i le 8.4).

• O faitaulaga sili uma i le uarota, se’i vagana ai i latou o loo galulue nei i se au peresitene o le siteki, i se au epikopo, i fautua maualuga, po o se peteriaka. O taitai nei o sui auai o le korama a faitaulaga sili o le siteki. Mo nisi faamatalaga e uiga i le korama a faitaulaga sili o le siteki, tagai i le 6.2.1.1.

E mafai e se alii talavou ona amata auai i fonotaga a le korama a toeaina pe a atoa lona 18, tusa lava foi pe le’i faauuina o se toeaina. E fefautuaai o ia ma ona matua ma le epikopo e fai lenei faai’uga. E oo atu i le 19 tausaga pe o le a tuua foi le aiga, e pei o le alu i se iunivesite pe auauna atu i se misiona, e ao ona faauuina o ia o se toeaina pe afai o agavaa o ia. Tagai i le 10.6.

O alii ua faaipoipo e i lalo o le 18, o ni toeaina faaolioli, ma o i latou foi o ni sui auai o le korama a toeaina.

Mo faamatalaga e uiga i matua e le’i faaipoipo e i lalo o le 18 tausaga, tagai i le 38.1.5.

8.1.3

Fetuunaiga i Manaoga Faalelotoifale

O nisi uarota e toatele na’ua le aofai o i latou e umia le Perisitua Mekisateko e malolosi. Mo nei uarota, e mafai e le au peresitene o le siteki ona faatulagaina se korama faaopoopo a toeaina (tagai i le Mataupu Faavae ma Feagaiga 107:89). E tofu le korama ma lona lava au peresitene. Afai e mafai, e tatau i korama taitasi ona i ai ni sui auai e eseese tausaga o le matutua ma poto masani.

8.2

Auai i le Faatinoina o le Galuega a le Atua mo le Faaolataga ma le Faaeaga

Ua valaaulia e le Atua tagata uma e o mai ia Keriso ma auai i le faatinoina o Lana galuega mo le faaolataga ma le faaeaga e ala i le:

• Ola i le talalelei a Iesu Keriso.

• Tausiga o i latou e le tagolima.

• Valaaulia tagata uma ia talia le talalelei.

• Tuufaatasia o aiga mo le faavavau.

E fuafua e taitai o le korama a toeaina ia fonotaga po o sauniga o le Aso Sa, gaoioiga, auaunaga, galuega fesoasoani, ma isi fegalegaleaiga e fesoasoani ai i le usoga ia auai i le faatinoina o le galuega a le Atua mo le faaolataga ma le faaeaga. E galulue faatasi uso o le korama a toeaina ma le Aualofa i le lotogatasi e fesoasoani ai e faataunuu lenei galuega.

Mo nisi faamatalaga e uiga i le galuega a le Atua mo le faaolataga ma le faaeaga, suesue le mataupu 1.

8.2.1

Ola i le Talalelei a Iesu Keriso

E lagolagoina e taitai o le korama a toeaina ia tagata ia ola i le talalelei a Iesu Keriso. Latou te faamamafa atu le faaaogaina o le faatuatua, salamo, faateleina o le ola-tutoatasi, ma le osia o feagaiga ma le Atua e ala i le mauaina o sauniga. O na sauniga e aofia ai faaeega paia o le malumalu. Tagai i le 1.2.1.

8.2.1.1

A’oa’oina o le Talalelei i le Aiga

Pe a oo ina a’oa’o e tagata o le au paia le talalelei ma ola ai i le aiga, e loloto lo latou liua i le Tama Faalelagi ma Iesu Keriso. E faamalosiau e taitai o le korama a toeaina le usoga e suesue i tusitusiga paia ma upu a perofeta soifua, e le tagata lava ia ma faatasi ma o latou aiga. O le Sau, Mulimuli Mai ia te A’u ma isi punaoa e mafai ona faaopoopo ia latou suesuega.

O afiafi faaleaiga o se auala taua lea e a’oa’o ai le talalelei i le aiga. E masani ona faia faalevaiaso i Aso Sa, o afiafi o Aso Gafua, po o se isi taimi. E mafai ona aofia ai tatalo, suesuega o le talalelei, molimau, pesepesega, ma gaoioiga malie.

8.2.1.2

A’oa’oina o le Talalelei i Fonotaga a le Korama

E potopoto ia korama a toeaina i Aso Sa mo faamoemoega nei:

• Faamalolosia le faatuatua.

• Fausia le lotogatasi.

• Faamalolosia aiga ma auaiga.

• Faamaopoopo taumafaiga e fesoasoani i le Atua i Lana galuega o le faaolataga ma le faaeaga i le uarota.

O sauniga e faia i Aso Sa lona lua ma le lona fa o le masina. E 50 minute le umi. O le au peresitene o le korama a toeaina e fuafuaina nei fonotaga. O se tasi o le au peresitene e taitai.

E amata le sauniga i le tatalo. Ona taitai lea e se sui o le au peresitene ia sui o le korama i le fefautuaai faatasi mo le lima i le sefulu minute e uiga i luitau talafeagai, manaoga, ma avanoa. O le taulai atu i le Faaola i lenei fautuaga o le a fesoasoani i tagata o le korama e fausia molimau, maua sauniga o le malumalu, tausia feagaiga, ma faateleina le avea ma soo. E filifili e le au peresitene o le korama a toeaina ia autu e fefautuaai ai e tusa ma manaoga o tagata o le korama.

Ona tuu atu lea o se taimi ia lava mo se a’oa’oga anoa ma talatalanoaga o le talalelei. O le taula’iga e tatau i ai i autu mai se lauga se tasi pe sili atu foi mai le konafesi aoao aupito lata mai. E filifili ma le agaga tatalo e le au peresitene o le korama a toeaina ia savali o le konafesi mo tagata o le korama e talanoaina. Latou te faia nei filifiliga e faavae i manaoga o tagata o le au paia.

E mafai ona lagiina viiga e faalautele ai se lesona.

E ao ona faai’u ia fonotaga i se tatalo.

E mafai ona tuufaatasia le korama a toeaina ma le Aualofa i nisi taimi mo se lesona i le Aso Sa. O nei fonotaga e faamaopoopoina e le au epikopo ma au peresitene o korama a toeaina ma le Aualofa.

Mo nisi faamatalaga, tagai i le “Ia Nofo ai i le Aufono.”

8.2.1.3

Gaoioiga

O au peresitene o korama a toeaina e mafai ona fuafuaina ia gaoioiga. E vaavaaia e le peresitene ia gaoioiga. E mafai ona fesili o ia i se fesoasoani po o se tasi sui auai o le korama e taitaia le fuafuaina ma le faafoeina o na gaoioiga (tagai i le 8.3.5). E talanoaina e au peresitene ia gaoioiga faatasi ai ma le epikopo o se vaega o la latou fuafuaga.

O gaoioiga e tatau ona faamalolosia ai manaoga o tagata o le korama e osia ma tausia feagaiga ma tuuina atu ia i latou avanoa e faapotopoto ai ma auauna faatasi ai. E tatau ona fesoasoani gaoioiga e faataunuu ai faamoemoega o korama a toeaina (tagai i le 8.1 ma le 8.1.1).

8.2.2

Tausiga o i Latou e lē Tagolima

I le avea ai ma soo o Iesu Keriso, ua i ai i sui auai o le korama a toeaina se tiutetauave e aapa atu ma le alofa ia i latou e manaomia le fesoasoani. Taitoatasi ma i le avea ai foi o se korama, latou te sailia auala e auauna atu ai i isi i le uarota ma nuu. I nofoaga e maua ai, o le JustServe.org o loo fautuaina mai ai ni avanoa mo auaunaga i nuu.

Mo nisi faamatalaga e uiga i auala e tausia ai e sui auai o le korama a toeaina ma le Aualofa i latou e lē tagolima, tagai i le 22.6.2.

8.2.2.1

Auaunaga

O le auaunaga o le tausiga lea o isi e pei ona faia e le Faaola. E maua e sui auai o le korama a toeaina ia tofitofiga o auaunaga mai le au peresitene o le korama. Mo nisi faamatalaga, tagai i le mataupu 21.

8.2.2.2

Manaoga mo se Taimi-Puupuu

O uso o auaunaga e saili ia malamalama ma tali atu i manaoga o e latou te auauna i ai. E ono manaomia e tagata se fesoasoani mo se taimi puupuu, i le taimi o ma’i, pepe fou e fanau mai, maliu, leai o ni galuega, ma isi tulaga.

Pe a oo ina manaomia, e fesili atu uso o auaunaga i le au peresitene o korama a toeaina mo se fesoasoani. Faatasi ai ma le faamaoniga a le epikopo, e mafai e le au peresitene ona tofia se taitai faamaopoopo o galuega fesoasoani e faatulagaina nei taumafaiga (tagai i le 8.3.5).

E faamaopoopo e le korama a toeaina ma le Aualofa ia taumafaiga e taulima ai manaoga mo se taimi puupuu (tagai i le 22.3.2). E mafai e le epikopo ona tuuina atu se fesoasoani mai le taulaga anapogi pe a manaomia ai.

I ni isi nofoaga, e i ai i le epikopo le filifiliga e tuu atu ai i tagata lē tagolima o le au paia se oka a le epikopo mo meaai ma isi oloa masani. E masani ona tofi e le epikopo le peresitene o le Aualofa e asiasi i tagata o le au paia ma faatumu le fomu o le oka. Peitai, e mafai foi ona ia tofia le peresitene o le korama a toeaina. E mafai ona valaaulia se fesoasoani o le au peresitene o le Aualofa po o le korama a toeaina, pe afai e le o avanoa le peresitene. E tuuina atu e le taitai ua tofia le fomu ua mae’a ona faatumu i le epikopo mo lana faamaoniga.

Mo nisi faamatalaga, tagai i le 22.6.2 ma le “Punaoa o Uelefea” i le Punaoa mo Taitai ma Failautusi.

8.2.2.3

Manaoga mo se Taimi Umi ma le Ola-Tutoatasi

E pei ona faamaopoopoina ai e le epikopo, e fesoasoani au peresitene o le korama a toeaina ma le Aualofa i tagata o le au paia o loo i ai ni manaoga mo se taimi umi ma le ola-tutoatasi. Latou te a’oa’o atu mataupu faavae o le ola-tutoatasi faaletino ma faaleagaga. Tagai i le mataupu 22 ma le “Ola-Tutoatasi” i le polokalama o le Gospel Library.

Afai e i ai se tagata po o se aiga e manaomia le fesoasoani, e fefautuaai faatasi ia peresitene o le korama a toeaina ma le Aualofa, e pei ona faamaopoopoina ai e le epikopo, e uiga i le auala e fesoasoani ai (tagai i le 22.4).

O le peresitene o le korama a toeaina, peresitene o le Aualofa, po o se isi taitai e fesoasoani i le tagata po o le aiga e atia’e se Fuafuaga mo le Ola-Tutoatasi. E mafai foi ona fesoasoani uso po o tuafafine o auaunaga i le fuafuaga. E tele taimi, e i ai tomai po o le poto masani o isi tagata o le korama a toeaina po o le Aualofa e mafai ona fesoasoani. O i latou uma e fesoasoani, latou te taulimaina faamatalaga ma le le faalauaiteleina. Mo nisi faamatalaga, tagai i le 22.3.3 ma le 22.8.

8.2.2.4

Pe A Maliu se Tagata o le Uarota

Pe a maliu se tagata o le uarota, o au peresitene o le korama a toeaina ma le Aualofa e ofoina atu le faamafanafanaga ma le lagolago. I lalo o le taitaiga a le epikopo, e mafai ona latou fesoasoani i le falelauasiga.

Afai e mafai, o tagata ua maliliu o ē sa maua faaeega paia, e falelauasi pe susunuina i laei o le malumalu. O le tino o se alii e mafai ona faaofu e lona toalua po o se alii o le aiga ua maua faaeega paia. Afai e le o avanoa se tagata o le aiga pe le manao foi e faaofu, e mafai e le epikopo ona talosaga i le peresitene o le korama a toeaina e valaaulia se alii ua maua faaeega paia e faaofu le tino pe vaaia le faaofuga. Mo nisi faamatalaga, tagai i le 38.5.10.

O au peresitene o le korama a toeaina ma le Aualofa, o uso ma tuafafine o auaunaga, ma isi e faaauau pea ona ofoina atu le faamafanafanaga ma le lagolago pe a maea le falelauasiga.

8.2.3

Valaaulia Tagata Uma e Talia le Talalelei

Ua i ai i ē umia le Perisitua Mekisateko se tiute e valaaulia tagata uma ia maua faamanuiaga o le talalelei a Iesu Keriso (tagai i le Mataupu Faavae ma Feagaiga 53:3). Latou te faia lenei mea e ala i le faasoa atu o le talalelei, faamalolosia tagata fou o le au paia, ma aapa atu ia i latou o ē ua le toaaga mai. Tagai i le 23.2 ma le 23.3.

I fonotaga a le au peresitene o le korama, e talanoaina e le au peresitene o le korama a toeaina ia auala e mafai ai e le usoga ona valaaulia tagata uma ia maua faamanuiaga o le talalelei. (Tagai i le 23.1.1, 23.1.2, ma le 23.1.3.

E tofi e le peresitene o le korama a toeaina se tasi o le au peresitene e fesoasoani e taitai taumafaiga e faasoa atu le talalelei i le uarota. E galulue faatasi o ia ma le sui ua tofia o le au peresitene a le Aualofa e faamaopoopo nei taumafaiga (tagai i le 23.6.2).

O le sui lea o le au peresitene o le korama a toeaina e mafai ona faataunuuina le matafaioi a le taitai misiona a le uarota. Afai ua valaau e le au epikopo se taitai misiona a le uarota, o le sui lea o le au peresitene e vaavaaia lana galuega. Tagai i le 23.6.1 ma le 23.6.3.

O le taitai misiona o le uarota, o sē atonu o se tasi o le au peresitene o le korama a toeaina, e taitaia fonotaga faamaopoopo faalevaiaso. O le faamoemoega o nei fonotaga o le faamaopoopoga o le valaauliaina o tagata uma ina ia maua faamanuiaga o le talalelei. O nei fonotaga e aofia ai sui ua tofia o le au peresitene o le Aualofa ma au peresitene o le korama a toeaina, faifeautalai a le uarota, se fesoasoani i le korama a ositaulaga, se tasi o le au peresitene o le vasega aupito matutua o Tamaitai Talavou, ma faifeautalai faamisiona. Tagai i le 23.4.

8.2.4

Tuufaatasia o Aiga mo le Faavavau

E lagolago e ē umia le Perisitua Mekisateko ia tagata o le au paia i le tuufaatasia o aiga mo le faavavau. E aofia ai i lenei mea le:

• Osia o feagaiga ma le Atua e ala i le mauaina o sauniga, e aofia ai faaeega paia o le malumalu.

• Faia o galuega faalemalumalu ma talafaasolopito o aiga (tagai i le 1.2.4).

I fonotaga a le au peresitene ma le korama, e talanoaina e le au peresitene o le korama a toeaina ia auala e mafai e le usoga ona auai i le faatinoga o nei taumafaiga.

E fuafua foi e sui auai o le au peresitene ni auala e fesoasoani ai i tagata o le ekalesia ia faateleina lo latou malamalama ma le manao ia maua sauniga paia ma osia feagaiga ma le Atua i totonu o le malumalu. Latou te fautuaina uso e tapuai soo i le malumalu i nofoaga e mafai ai.

E fautuaina e le au peresitene ia uso o le korama e aoao e uiga i o latou talafaasolopito o aiga. Latou te fesoasoani i tagata fou ma tagata ua toe foi mai, o toeaina faatoa faauuina, ma faifeautalai faatoa valaauina e saili ma saunia igoa o tuaa mo sauniga o le malumalu.

E tofi e le peresitene o le korama a toeaina se tasi o le au peresitene e fesoasoani e taitai le galuega faalemalumalu ma talafaasolopito o aiga i le uarota. E galulue faatasi o ia ma le sui ua tofia o le au peresitene o le Aualofa e faamaopoopo nei taumafaiga.

O le sui lea o le au peresitene o le korama a toeaina e mafai ona faataunuuina le matafaioi a le taitai o talafaasolopito o aiga ma le malumalu a le uarota. Afai ua valaau e le au epikopo se taitai o talafaasolopito o aiga ma le malumalu a le uarota, o le sui lea o le au peresitene e vaavaaia lana galuega. Tagai i le 25.2.2.

O taitai mo malumalu ma talafaasolopito o aiga a le uarota, o se sui o le au peresitene o le korama a toeaina, e taitaia fonotaga faamaopoopo o le malumalu ma talafaasolopito o aiga mo le uarota (tagai i le 25.2.7). O nei fonotaga e faia e le aunoa. E faaaofia ai foi le sui ua tofia o le au peresitene o le Aualofa, o se fesoasoani i le korama a ositaulaga, se tasi o le au peresitene o le vasega aupito matutua o Tamaitai Talavou, ma faufautua o malumalu ma talafaasolopito o aiga.

8.3

Taitai o le Korama a Toeaina

8.3.1

Au Peresitene o le Siteki ma le Epikopo

O le peresitene o le korama a toeaina e tali tuusa’o atu i le au peresitene o le siteki. E fono e le aunoa o ia ma se sui o le au peresitene e maua mai ai faatonuga ma lipoti atu i ona tiutetauave.

E maua foi e le peresitene o le korama a toeaina le taitaiga mai le epikopo, o le taitai pulefaamalumalu i le uarota. La te fono e le aunoa. La te talanoaina a latou taumafaiga i le galuega a le Atua mo le faaolataga ma le faaeaga, e aofia ai ia galuega a uso o auaunaga. La te talanoaina foi (1) le alualu i luma ma manaoga o tagata o le uarota ma le (2) fonotaga a le korama a toeaina, a’oa’oga, ma gaoioiga.

8.3.2

Fautua Maualuga

E tofia e le au peresitene o le siteki se fautua maualuga e avea ma sui o i latou i korama taitasi a toeaina. O ona tiutetauave o loo otooto atu i le 6.5.

8.3.3

Au Peresitene o le Korama a Toeaina

8.3.3.1

Valaauina o se Au Peresitene o le Korama a Toeaina

A maea ona feutagai ma le epikopo, e valaauina e le peresitene o le siteki se toeaina po o se faitaulaga sili e avea ma peresitene o le korama a toeaina.

Afai e lava le telē o le iunite, e fautuaina atu e le peresitene o le korama a toeaina i le peresitene o le siteki se toeaina se toatasi pe toalua po o ni faitaulaga sili e avea ma ona fesoasoani. Na te faia lenei mea i feutaga’iga ma le epikopo. O le au peresitene o le siteki e iloiloina ia fautuaga. O sui auai o le au peresitene o le siteki po o fautua maualuga e tuuina atu ia valaauga.

O fautuaga uma mo le valaauina o uso o au peresitene o korama a toeaina e manaomia ai le faamaoniga a le au peresitene o le siteki ma fautua maualuga.

O se sui o le au peresitene o le siteki e tuuina atu uso o le au peresitene o le korama a toeaina i se sauniga faamanatuga mo le lagolagoina. E mafai foi e le au peresitene o le siteki ona tofi se fautua maualuga e faia lenei mea.

E tuuina atu e se uso o le au peresitene o le korama a toeaina ia uso o e e tofia i isi valaauga o le korama mo le lagolagoina i se fonotaga a le korama (tagai i le 8.3.4 ma le 8.3.5).

O le peresitene o le siteki e vaetofiaina se peresitene o le korama a toeaina ma faaee atu ia te ia ki o lona valaauga. Mo nisi faamatalaga e uiga i ki o le perisitua, tagai i le 3.4.1. O se tasi o le au peresitene o le siteki po o fautua maualuga e vaetofiaina ia fesoasoani.

8.3.3.2

Tiutetauave

Ua i ai i le peresitene o le korama a toeaina tiutetauave nei. E lagolago atu ona fesoasoani ia te ia.

• Auauna atu i le aufono a le uarota. E avea o ia o (1) se sui auai o le aufono e fesoasoani e talanoaina manaoga i totonu o le uarota, ma sue ni vaifofo ma (2) o se sui o le korama a toeaina (tagai i le 29.2.5).

• Taitaia taumafaiga a le korama e auai i le faatinoina o le galuega a le Atua mo le faaolataga ma le faaeaga (tagai i le mataupu 1).

• Faatulaga ma vaavaaia le galuega a uso o auaunaga. E faamaopoopoa ma le au peresitene o le Aualofa ia tofitofiga o le auaunaga, ma e fono e le itiiti ifo ma le faalekuata. Sailia le faamaoniga a le epikopo mo tofitofiga o auaunaga. Faia faatalanoaga mo auaunaga e le itiiti ifo ma le faalekuata. Tagai i le mataupu 21.

• I lalo o le taitaiga a le epikopo, ia fefautuaai ma tagata matutua o le uarota (tagai i le 31.1 ma le 31.3). E na’o le epikopo e fautuaina tagata o le uarota e uiga i mataupu o le agavaa, sauaga, ma le faamaoniga e faaaoga ai tupe o le taulaga anapogi. Tagai i Punaoa mo Fautuaga. Mo faamatalaga e uiga i le sauaina, tagai i le 38.6.2.

• Faatasi ai ma le au peresitene o le Aualofa, e fesoasoani e taitai ia taumafaiga i le uarota e valaaulia ai tagata uma ia maua faamanuiaga o le talalelei (tagai i le 8.2.3 ma le 9.2.3). Vaavaaia le taitai misiona a le uarota pe afai ua valaauina se tasi.

• Faatasi ai ma le au peresitene o le Aualofa, e fesoasoani e taitai le galuega faalemalumalu ma talafaasolopito o aiga i le uarota (tagai i le 8.2.4 ma le 9.2.4). Vaavaaia le taitai o galuega faalemalumalu ma talafaasolopito o aiga pe afai ua tofia se tasi.

• E faamaopoopoa taumafaiga a le korama a toeaina e faamalolosia uso talavou matutua, o ē nofofua ma ē ua faaipoipo. E mafai ona tofia se tasi o fesoasoani e auauna atu faatasi ma talavou nofofua matutua (tagai i le 14.1.2.2).

• E feiloai taitoatasi ma uso o le korama ia le itiiti ifo ma le tasi i le tausaga. E talanoaina tiute faaleperisitua ma le soifua manuia o lea tagata o le au paia ma lona aiga.

• A’oa’o uso o le korama i o latou tiute o le perisitua (tagai i le Mataupu Faavae ma Feagaiga 107:89). E aofia ai i lenei mea le a’oa’o atu o i latou pe faapefea ona faaaoga le perisitua i le faatinoina o sauniga ma faamanuiaga.

• Fesoasoani i tagata o le korama ia malamalama i le mana, puipuiga, taitaiga, olioli, ma le filemu lea e oo mai i le atiina ae o se sootaga o le feagaiga ma le Tama Faalelagi ma Iesu Keriso.

• Vaavaaia ma fesoasoani e faaleleia atili le a’oa’o atu i le korama (tagai i le mataupu 17).

• Fuafua ma taitai fonotaga a le korama.

• Vaavaaia gaoioiga a le korama a toeaina (tagai i le 8.2.1.3).

• Fesoasoani i alii talavou ma toeaina faaolioli e sauniuni e maua le Perisitua Mekisateko (tagai i le 8:4).

• Vaavaaia ia faamaumauga, lipoti, ma mea tautupe a le korama (tagai i le LCR.ChurchofJesusChrist.org). E mafai ona fesoasoani se failautusi (tagai i le 8.3.4).

O le au peresitene o le siteki ma se uso o le au fautua maualuga ua tofia, e a’oa’oina le au peresitene o le korama a toeaina e uiga i o latou tiutetauave ia. E mafai ona latou faia lenei mea i le taimi o fonotaga faaleautaitai perisitua a le siteki, fonotaga a le au peresitene o korama, ma asiasiga patino ma peresitene o korama a toeaina (tagai i le 29.3.3).

E ala i lona tofiga, e lagolago atu ai le peresitene o le korama a toeaina i le epikopo i le taulai atu i le autalavou ma i tiutetauave iloga a le epikopo.

8.3.3.3

Fonotaga a le Au Peresitene

E fono e le aunoa le au peresitene o le korama a toeaina ma le failautusi. O le peresitene e faatautaia nei fonotaga. O le fautua maualuga ua tofia i le korama e auai mai i lea taimi i lea taimi.

O le lisi o mataupu e talanoaina e mafai ona aofia ai aitema nei:

• Fuafua ni auala e faamalolosia ai tagata o le korama (e aofia ai toeaina faaolioli) ma o latou aiga.

• Fuafua pe faapefea ona fesoasoani e faataunuu le galuega a le Atua mo le faaolataga ma le faaeaga.

• Faamaopoopo le galuega faafaifeautalai ma le galuega mo malumalu ma talafaasolopito o aiga.

• Tali atu i fautuaga ma tofitofiga mai le epikopo ma taitai o le siteki.

• Tali atu i tofitofiga mai fonotaga a le aufono a le uarota.

• Iloilo ma le agaga tatalo ia tofitofiga o le auaunaga.

• Iloilo faamatalaga mai faatalanoaga o auaunaga. Fuafua ni auala e faailoa ai malosiaga ma fesoasoaniga e foia ai manaoga. (Tagai i le mataupu 21.)

• Mafaufau i ni uso e galulue i valaauga ma tofitofiga.

• Fuafua ia fonotaga ma gaoioiga a le korama.

8.3.4

Failautusi

Faatasi ai ma le faamaoniga a le epikopo, e mafai e se tasi o le au peresitene o le korama a toeaina ona valaau se uso o le korama e avea ma failautusi a le korama. Na te tuuina atu o ia mo le lagolagoina i se fonotaga a le korama ma vaetofiaina o ia.

O tiutetauave o le failautusi e mafai ona aofia ai mea nei:

• Saunia lisi o mataupu talanoaina mo fonotaga a le au peresitene ma fonotaga a le korama.

• Tusitusia faamatalaga o fonotaga ma tulitulitatao ia tofitofiga.

• Faatulaga taimi o faatalanoaga o auaunaga (tagai i le 21.3).

• Saunia ma auina atu ia lipoti faalekuata o le auai ma le aofai o faatalanoaga o auaunaga na fai.

• Fesoasoani e tapena se paketi faaletausaga ma tulitulitatao tupe faaalu.

8.3.5

Valaauga Faaopoopo

E mafai ona fesoasoani valaauga faaopoopo nei. E talanoaina e le epikopo ma le peresitene o le korama a toeaina pe manaomia.

• Faiaoga o le korama a toeaina e faiaoga i fonotaga a le korama i Aso Sa

• Se taitai faamaopoopo mo galuega fesoasoani e fesoasoani e fuafua ma faatino ia galuega i tagata e manaomia (tagai i le 8.2.2.2). E mafai foi ona valaau ni fesoasoani ma ni sui auai o le komiti.

• Se taitai faamaopoopo mo gaoioiga e fesoasoani e fuafua ma faatino ia gaoioiga a le korama a toeaina (tagai i le 8.2.1.3). E mafai foi ona valaau ni fesoasoani ma ni sui auai o le komiti.

• Failautusi fesoasoani e fesoasoani i le failautusi o le korama a toeaina

• Failautusi mo auaunaga e faatulagaina ia faatalanoaga o auaunaga ma fesoasoani e tapena ia lipoti faalekuata.

Afai e manaomia nei valaauga ma ni isi, e fautua atu e le au peresitene o le korama ia uso e galulue. Latou te faia nei fautuaga i le au epikopo. Afai e faamaonia e le au epikopo, e valaauina i latou e se tasi o le au peresitene o le korama. Na te tuuina atu i latou mo le lagolagoina i se fonotaga a le korama ma vaetofiaina i latou.

Pe a manaomia, e mafai e le au peresitene o le korama a toeaina ona tofia ni uso e fesoasoani i taumafaiga a le korama a toeaina i isi auala. O uso e i ai tofiga mo se taimi puupuu, e le tau manaomia ona valaau ma vaetofia.

8.4

Fesoasoani i Toeaina Faaolioli e Sauniuni mo le Mauaina o le Perisitua Mekisateko

O se toeaina faaolioli, o se tamatane e auai i le Ekalesia, e le’i mauaina le Perisitua Mekisateko ma (1) ua 19 tausaga pe matua atu pe (2) e i lalo ifo o le 19 tausaga ma ua faaipoipo.

O le fesoasoani i toeaina faaolioli e sauniuni mo le mauaina o le Perisitua Mekisateko, o se tasi lea o faamuamua aupito maualuga a le au peresitene o le korama. E tuu atu e le au peresitene i toeaina faaolioli ia avanoa e galulue ai ma faasoa mai o latou malosiaga. O uso o auaunaga tuuto e tatau ona tofia i toeaina faaolioli.

O le au peresitene o le korama ma uso o auaunaga latou te a’oa’oina ia toeaina faaolioli e uiga:

• I le tautoga ma le feagaiga o le perisitua (tagai i le Mataupu Faavae ma Feagaiga 84:33–44).

• I tiute o se toeaina, e aofia ai le tiute o le auauna atu (tagai i le Mataupu Faavae ma Feagaiga 20:38–45; 42:44; 107:11–12). I toeaina faaolioli o ē o loo avea ma a’oa’o po o ositaulaga ua mafai ona auauna atu o ni uso o auaunaga.

• I faamoemoega o sauniga ma faamanuiaga o le perisitua ma le auala e faatinoina ai (tagai i le mataupu 18).

• I le auala e galulue faatasi ai alii ma tamaitai e faataunuu le galuega a le Atua.

Mo faamatalaga e uiga i nei autu, tagai i le “Perisitua Mekisateko,” “Perisitua,” ma le “Tamaitai i le Ekalesia” (Autu ma Fesili, topics.ChurchofJesusChrist.org).

E mafai ona faia lea a’oa’oga mo tagata taitoatasi, po o se vasega e faia i fafo atu o sauniga masani i Aso Sa.

A ua filimaoti loa e le epikopo ma le peresitene o le siteki faapea ua saunia ma agavaa se toeaina faaolioli, e mafai loa ona faauuina o ia o se toeaina i le Perisitua Mekisateko.

8.5

Tagata e i Ai Manaoga Faapitoa

O le au peresitene o le korama a toeaina e tuu atua se tausiga faapitoa i tagata o le au paia e i ai manaoga faapitoa. Mo faamatalaga e uiga i le fesoasoani i nei tagata, tagai i le disability.ChurchofJesusChrist.org; tagai foi i le 38.8.27 i le tusitaulima lenei.