Pōpoaki mei he Kau Palesitenisī ʻUluakí

Siʻi kāinga ʻofeina,

Ko e fānau mo e toʻu tupu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e ngaahi foha mo e ngaahi ʻofefine ʻofeina kinautolu ʻo e ʻOtuá. ʻOku nau malava ke fai ha liliu lahi ʻi he māmaní.

ʻOku fakafofongaʻi ʻe he ngaahi tefitoʻi moʻoni ʻoku akoʻi ʻi he ngāue ko ʻení maʻá e fānaú mo e toʻu tupú ha founga māʻolunga mo toputapu ange ke ne fakaʻaiʻai ʻa e toʻu tangata kei tupu haké ke nau muimui ʻia Sīsū Kalaisi pea fakaʻaongaʻi ʻEne ongoongoleleí ʻi he ngaahi tafaʻaki kotoa pē ʻo ʻenau moʻuí. ʻE kau ʻi he ngāue mahuʻingá ni ʻa hono ako ʻo e ongoongoleleí, faingamālie ke ngāue tokoní, fakalakalaka fakatāutahá, mo e ngaahi ʻekitivitī fakafiefiá. ʻOku kamata ʻi ʻapi ʻa e ngāue ko ʻení. ʻOku ʻi ai ha fatongia toputapu ʻo e mātuʻá ke akoʻi ʻenau fānaú ʻi he māmá mo e moʻoní. ʻOku fakahoko ʻe he kau taki ʻo e Siasí ha poupou mo ha fakahinohino mahuʻinga ki he fānaú, toʻu tupú, mo honau fāmilí.

ʻOku mau ʻofa atu. ʻOku mau falala atu kiate kimoutolu. ‘Oku mau palōmesi atu ʻe hokohoko atu hono tāpuekina mo poupouʻi kimoutolu ʻe heʻetau Tamai Hēvaní, ʻi hoʻomou tataki mo fakahinohinoʻi ʻEne fānaú ʻi he tuí.

Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá

Vīsoné

Fakamālohia ʻa e tui ʻa e toʻu tangata kei tupu haké ki he ʻEiki ko Sīsū Kalaisí, pea tokoniʻi ʻa e fānaú, toʻu tupú, mo honau fāmilí ke nau fakalakalaka ʻi he hala ʻo e fuakavá ʻi heʻenau fehangahangai mo e ngaahi faingataʻa ʻo e moʻuí.