Fatongiá

ʻApí mo e Mātuʻá

“ʻOku ʻikai ha toe ngāue te ne lakasi e fatongia fakaemātuʻa māʻoniʻoni mo moʻoní!”

Palesiteni Russell M. Nelson, “ ʻOku Fakafiefia ʻa e ʻAho Sāpaté,” Ensign pe Liahona, Mē 2015, 131

Ko e hā hoku fatongiá?

Hoko ko ha faʻifaʻitakiʻanga angamāʻoniʻoni ki hoʻo fānaú. Akoʻi kiate kinautolu ʻa e founga ke tupulaki ai ʻi he tafaʻaki kotoa pē ʻo e moʻuí. Kumi ha ngaahi founga ke tokoniʻi ai kinautolu ke nau ʻilo ʻa e fiefia ʻoku maʻu ʻi hono tauhi e ngaahi fuakavá, ʻiloʻi ha ngaahi talēniti foʻou, mo fakahoko ha ngaahi meʻa ʻoku faingataʻa. Tokoni ki ho fāmilí ke nau ʻunu ke toe ofi ange ki he Tamai Hēvaní mo Sīsū Kalaisi pea moʻui ʻaki ʻa e ongoongoleleí ʻi heʻenau moʻui fakaʻahó.

Ko e hā te u faí?

ʻAi ke ʻiloʻi ʻe hoʻo fānaú ʻa e lahi hoʻo ʻofa ʻiate kinautolú. ʻAi ke ke kau ʻi heʻenau moʻuí. Lotua ke ke ʻilo ʻenau ngaahi fiemaʻu fakafoʻituituí pea palani ke ako e ongoongoleleí mo e ngaahi ʻekitivitī ke feau ai e ngaahi fiemaʻu ko iá. Vahevahe maʻu pē hoʻo fakamoʻoní mo kinautolu. Talanoa mo e kau takí fekauʻaki mo e founga te nau lava ai ʻo tokoni ke poupouʻi hoʻo fānaú.

Te u kamata nai ʻi fē?

Hokohoko atu hoʻo talanoa pea fakafanongo ki hoʻo fānaú. Lotua ha founga te ke lava ʻo poupouʻi ai kinautolu. Tokoniʻi kinautolu ke nau ʻiloʻi pea kamata ngāue ʻi he ngaahi tafaʻaki ʻo e akó ʻoku nau mahuʻingaʻia aí. Kamata pe hokohoko atu e lotu fakafāmilí, ako e ongoongoleleí, ngaahi faingamālie ki he ngāue tokoní, mo e ngaahi ʻekitivitī ke tokoni ke tupulaki hoʻo fānaú.

• Fakahaaʻi ʻa e ʻofá

• Hoko ko ha faʻifaʻitakiʻanga

• Fekumi ke maʻu ha fakahā

• Akoʻi ʻa e ngaahi pōtoʻi ngāue ʻo e moʻuí

• Fakafiefiaʻi ‘a e tupulakí

• Fakahikihikiʻi ‘a e ngāué

Maʻu ʻa e ngaahi maʻuʻanga tokoní ʻi he ChildrenandYouth.ChurchofJesusChrist.org.

Kau Taki mo e Kau Faiako ʻo e Palaimelí

“Ko ʻetau fānaú mo hotau hakó ʻa e koloa mahuʻinga taha ʻi māmani mo langí.”

Palesiteni Dallin H. Oaks, “The Great Plan of Happiness,” Ensign, Nov. 1993, 75

Ko e hā hoku fatongiá?

‘Ofa, mo fakamālohia ʻa e fānaú. Tokoni ki he mātuʻá ʻi hono tokoniʻi e fānaú ke nau ongoʻi ʻa e ʻofa ʻa e Tamai Hēvaní kiate kinautolú, mahino ʻa e ongoongolelei ʻo Sīsū Kalaisí, ongoʻi mo fakatokangaʻi ʻa e ivi tākiekina ʻo e Laumālie Māʻoniʻoní, mo teuteu ke fakahoko mo tauhi e ngaahi fuakava toputapú.

Ko e hā te u faí?

Fakapapauʻi ʻoku tokoni ʻa e ngaahi kalasi Palaimelí mo e taimi hivá ke ongoʻi ʻe he fānaú ʻa e Laumālié, tupulaki ʻi he tuí, mo ongoʻi ʻa e fiefia ʻoku maʻu ʻi he ongoongolelei ʻo Sīsū Kalaisí ʻi heʻenau moʻuí. ʻI he ngaahi tafaʻaki ʻo e tupulaki ʻa ia ʻoku fokotuʻu atu ʻi he Luke 2:52ko ha fakahinohinó, palani ha ngāue tokoni mo ha ngaahi ʻekitivitī fakafiefia mo manakoa ʻokú ne fakatupulaki e ngaahi fakamoʻoní, fakamālohia e ngaahi fāmilí, mo fakaʻaiʻai ʻa e uouangatahá mo e tupulaki fakatāutahá.

Te u kamata nai ʻi fē?

Feinga ke ʻiloʻi ʻa e fānaú mo honau fāmilí, pea ngāue fakaetauhi ki heʻenau ngaahi fiemaʻú. ʻI hoʻomou hoko ko e kau palesitenisī ʻo e Palaimelí, kolea ʻi he faʻa lotu pe te mou lava fēfē ke tokoniʻi hoʻomou kau faiakó, kau taki ʻi he hivá, mo e kau taki ʻi he ʻekitivitií ke nau tokoniʻi e fānaú ke muimui ʻi he Fakamoʻuí.

• Akoʻi ʻa e tuʻunga fakalangí

• Fakaʻaongaʻi ʻa e ongoongoleleí

• Langaki ha ngaahi vā fetuʻutaki

• Akoʻi ʻa e ngaahi fuakavá

• Akoʻi ʻa e ngaahi pōtoʻi ngāue ʻo e moʻuí

Maʻu ʻa e ngaahi maʻuʻanga tokoní ʻi he Primary.ChurchofJesusChrist.org.

Kau Taki ʻo e Kau Finemuí

Ko ha ʻofefine ʻofeina au ʻo ha Ongomātuʻa Fakalangi pea ʻoku ʻi ai hoku natula faka-ʻOtua mo hoku ikuʻanga taʻengata.

Ko e hā hoku fatongiá?

Tokoni ki he mātuʻá mo e kau pīsopelikí ʻi hono fakahinohino mo ueʻi fakalaumālie ʻa e kau finemuí ke mahino kiate kinautolu honau tuʻunga ko e ngaahi ʻofefine ʻo e ʻOtuá, teuteu ki he ngaahi fuakava ʻo e temipalé, mo fakahoko honau ngaahi taumuʻa fakalangí. Fakahinohinoʻi ʻa e kau palesitenisī fakakalasí ʻi heʻenau tataki, ngāue fakaetauhi, pea tokoni ki he kau mēmipa ʻo ʻenau ngaahi kalasí.

Ko e hā te u faí?

Tā ha sīpinga ʻi hoʻo hoko ko ha ākonga ʻa Sīsū Kalaisí. Fakahinohino ʻa e kau palesitenisī fakakalasí ʻi hoʻo palani mo tokoni ʻi he faʻa lotu ke akoʻi ʻa e ngaahi lēsoni mei he Haʻu, ʻo Muimui ʻIate Au—Maʻá e Kau Finemuí. Fakalotolahiʻi kinautolu ke nau taki ʻi hono palani mo fakahoko ʻa e ngāue tokoní mo e ngaahi ʻekitivitī ʻe tokoni ki he kau finemuí ke nau tupulaki ʻi he tafaʻaki kotoa pē ʻo ʻenau moʻuí. Fai ha toe poupou lahi ange ki he kau finemui ʻoku nau fie maʻu iá.

Te u kamata nai ʻi fē?

Feinga ke ke ʻiloʻi fakafoʻituitui ʻa e kau finemuí. Talanoa mo e kau finemuí, ko ʻenau mātuʻá, mo e kau pīsopelikí fekauʻaki mo e founga te ke lava ʻo poupouʻi ai ʻa e tupulaki ʻa e kau finemuí. Lotua ke ʻilo ʻa e founga te ke lava ai ʻo tokoniʻi hoʻo kau palesitenisī fakakalasí ke fakahoko lelei honau ngaahi uiuiʻí.

• Akoʻi ‘a e tuʻunga fakalangí

• Fakahoko ʻa e ngāue ʻo e fakamoʻuí

• Teuteu ki he ngaahi fatongia fakalangí

• Fakatupulaki e loto vilitakí

• Akoʻi ʻa e ngaahi pōtoʻi ngāue ʻo e moʻuí

Maʻu ʻa e ngaahi maʻuʻanga tokoní ʻi he YoungWomen.ChurchofJesusChrist.org.

Kau Taki ʻo e Lakanga Taulaʻeiki Faka-ʻĒloné

• ʻI ai mo kinautolu.

• Fakafehokotaki kinautolu mo langi.

• Tuku ke nau taki.

Ko e hā hoku fatongiá?

Tokoni ki he mātuʻá mo e kau pīsopelikí ʻi hono teuteuʻi e kau talavoú ke fakanofo ki he ngaahi lakanga ʻo e lakanga fakataulaʻeikí, ngaahi fuakava ʻo e temipalé, ngāue fakafaifekaú, mo e ngaahi fatongia fakalangí. Ueʻi fakalaumālie kinautolu ke mahino kiate kinautolu ʻenau taumuʻá mo honau tuʻunga ko e ngaahi foha ʻo e ʻOtuá. Fakahinohinoʻi ʻa e kau palesitenisī fakakōlomú ʻi heʻenau taki, ngāue fakaetauhi, mo tokoni ki he kau mēmipa ʻo ʻenau ngaahi kōlomú pea ʻi heʻenau ngāue ko ia ʻi he ouau ʻo e sākalamēnití.

Ko e hā te u faí?

Tā ha sīpinga ʻi hoʻo hoko ko ha ākonga ʻa Sīsū Kalaisí. Fakahinohinoʻi ‘a e kau palesitenisī fakakōlomú ʻi heʻenau ngāue ʻaki e ngaahi kī ʻoku nau maʻú, ngāue ʻi he ouau ʻo e sākalamēnití, pea palani ʻi he faʻa lotu mo tokoni ke akoʻi e ngaahi lēsoni mei he Haʻu, ‘o Muimui ʻIate Au—Maʻá e Kau Talavoú. Tokoniʻi kinautolu ke palani mo fakahoko ʻa e ngāue tokoní mo e ngaahi ʻekitivitī te nau tokoniʻi e kau talavoú ʻi he ngaahi tafaʻaki kotoa pē ʻo ʻenau moʻuí. Tuku ke nau taki. Fai ha toe poupou ʻoku lahi angé ki he kau talavou ‘oku nau fie maʻu iá.

Te u kamata nai ʻi fē?

Feohi mo e kau talavoú. Feinga ke ke ʻiloʻi mo ʻofa ʻiate kinautolu fakafoʻituitui. Talanoa mo e kau pīsopelikí, kau talavoú, mo ʻenau mātuʻá ke fakapapauʻi ʻa e founga te ke lava ai ke poupouʻi kinautolu ʻi heʻenau tupulaki ke hoko ʻo tatau ange mo e Fakamoʻuí. Lotua ke ʻiloʻi e founga te ke lava ai ʻo tokoniʻi hoʻo kau palesitenisī fakakōlomú ke nau ngāue ʻaki e ngaahi kī ʻoku nau maʻú mo fakahoko lelei honau ngaahi uiuiʻí.

• Akoʻi e ngaahi fatongia ʻo e lakanga fakataulaʻeikí

• Fakahoko ʻa e ngāue ʻo e fakamoʻuí

• Teuteu ki he ngaahi fatongia fakalangí

• Fakatupulaki e loto vilitakí

• Akoʻi ʻa e ngaahi pōtoʻi ngāue ʻo e moʻuí

Maʻu ʻa e ngaahi maʻuʻanga tokoní ʻi he YoungMen.ChurchofJesusChrist.org.

Kau Faiako Lautohi Faka-Sāpaté

“Fekumi ki he ʻiló, ʻio, ʻi he ako pea ʻi he tui foki.”

Tokāteline mo e Ngaahi Fuakava 88:118

Ko e hā hoku fatongiá?

Feinga ke tokoniʻi ʻa e toʻu tupú ke haʻu kia Kalaisi ʻi he ako pea muimui ki Heʻene tokāteliné. Akoʻi ʻa e toʻu tupú ke mahino, vahevahe, mo moʻui ʻaki ʻa e ongoongolelei ʻo Sīsū Kalaisí.

Ko e hā te u faí?

Tā ha sīpinga ʻi hoʻo hoko ko e ākonga ʻa Sīsū Kalaisí, pea tokoniʻi ʻa e toʻu tupú ke langaki ʻenau tuí. Fakalotolahiʻi kinautolu ke ako ʻa e folofolá ʻi ʻapi—fakafoʻituitui pea fakataha mo honau ngaahi fāmilí. Tokoniʻi kinautolu ke nau teuteu mo akoʻi ʻa e ngaahi tefitoʻi moʻoni fakatokāteliné. Fakaafeʻi kinautolu ke nau fakaʻaongaʻi ʻa e meʻa ʻoku nau akó ki heʻenau fakalakalaka fakatāutahá.

Te u kamata nai ʻi fē?

Feinga ke faiako ʻo hangē ko ia naʻe fai ʻe he Fakamoʻuí. Feinga ke ʻiloʻi fakafoʻituitui ʻa e toʻu tupú. Lotua ke ‘iloʻi ʻa e founga te ke lava ai ke tokoniʻi kinautolu ke nau tupulaki ke hoko ʻo tatau ange mo e Fakamoʻuí. Fakamālohia ʻa e kau mēmipa ʻo e kalasí mo ʻenau mātuʻá ʻi he feinga ke ako mo akoʻi ʻa e ongoongoleleí ʻi he siasí pea ʻi honau ngaahi ʻapí.

• Langaki ʻa e fakamoʻoní

• Akoʻi ʻa e tokāteliné

• Ako e folofolá

• Langaki ha ngaahi tōʻonga māʻoniʻoni

Maʻu ʻa e ngaahi maʻuʻanga tokoní ʻi he SundaySchool.ChurchofJesusChrist.org.

Ko e Kau Pīsopelikí mo e Kau Palesitenisī Fakakōlomu mo Fakakalasí

“ʻI heʻetau kau atu ʻi hono tokoniʻi ʻo e niʻihi kehé, ʻoku siʻisiʻi ange ai ʻetau fakakaukauʻi kitautolú, pea ʻe fie [nofoʻia] ange ai e Laumālie Māʻoniʻoní kiate kitautolu.”

Palesiteni Henry B. Eyring, “Ngāue Fakaetauhi ʻi he Ueʻi Fakalaumālié ,” Liahona, Mē 2018, 64.

Ko e hā honau fatongiá?

Ko e kau pīsopelikí ko e kau palesitenisī ia ʻo e Lakanga Taulaʻeiki Faka-ʻĒloné ʻi he uōtí pea ʻoku nau fatongia ʻaki e kau finemuí mo e kau talavoú. ʻOku ngāue e kau palesitenisī fakakōlomu ʻo e Lakanga Taulaʻeiki Faka-ʻĒloné ʻaki e ngaahi kī ʻoku foaki kiate kinautolu ʻi he taimi ʻoku vaheʻi ai e kau palesiteni ʻo e kōlomú. ʻOku ngāue ʻa e kau palesitenisī fakakalasi ʻo e Kau Finemuí ʻi he mafai ʻo e lakanga fakataulaʻeiki hili hono vaheʻi kinautolu ʻe ha mēmipa ʻo e kau pīsopelikí.

Ko e hā e meʻa ʻoku nau faí?

ʻOku totonu ke feinga ʻa e kau palesitenisií ke nau hoko ko e kau ākonga moʻoni ʻa Sīsū Kalaisi ʻi heʻenau tokoni ki he mēmipa takitaha ʻo e kōlomú pe kalasí ke nau ongoʻi ʻoku ʻofaʻi kinautolu mo ʻiloʻi e fiefia hono moʻui ʻaki e ongoongoleleí. Fakatatau mo e fakahinohino ʻa e kau pīsopelikí, ʻoku tataki ʻe he kau palesitenisī fakakōlomú ʻa e kau maʻu Lakanga Taulaʻeiki Faka-ʻĒloné ʻi heʻenau ngāue ʻi he ouau ʻo e sākalamēnití. ʻOku taki e kau palesitenisī fakakōlomu mo fakakalasí fakatouʻosi ʻi hono tānaki ʻo ʻIsileli ʻi he ongo tafaʻaki ʻo e veilí pea mo hono tokangaʻi ʻo kinautolu ʻoku faingataʻaʻiá.

ʻOku nau kamata nai ʻi fē?

ʻOku ako ʻe he kau palesitenisií honau fatongiá mei he ʻEikí pea mei honau kau takí. ʻOku nau lotua e kau mēmipa ʻo e kōlomú pe kalasí mo feinga ke ʻiloʻi ʻenau ngaahi fie maʻú. ʻOku nau poupouʻi kinautolu ʻi heʻenau hoko ko e kau ākonga ʻa Sīsū Kalaisí. ʻOku nau fealēleaʻaki fakataha fekauʻaki mo e ngaahi lēsoni, ʻekitivitī, mo e ngāue tokoni te ne faitāpuekina mo fakamālohia ʻa e toʻu tupú pea ʻai ke uouangataha ʻa e ngaahi kōlomú pe kalasí.

• Ngāue Fakaetauhí

• Fealēleaʻaki fakataha

• Langaki ‘a e uouangatahá

• Fakahoko e ngaahi fatongiá

Maʻu ʻa e ngaahi maʻuʻanga tokoní ʻi he ChildrenandYouth.ChurchofJesusChrist.org.