Pakauna

Babaen iti panagtitinnulong nga agtrabaho, matulongan dagiti nagannak ken lider dagiti ubbing ken agtutubo a mangpapigsa iti kumbersionda, agbalinda a maikari a disipulo ni Apo a Jesucristo, ken agbalinda a a lallaki ken babbai nga addaan integridad babaen iti:

• Panagsursuro iti ebanghelio a makaparegta iti bukod a panagkumit.

• Dagiti serbisio ken aktibidad a mangpakired iti bagi ken espiritu.

• Bukod a panagdur-as a mangpataud iti makapnek a panagdur-as.

Maitunos dagiti pangiwanwan a pagbatayan ken sapasap nga akem a naibalabala iti daytoy a buklet. Awan ti uray maysa nga umno a wagas a mabalin a payaplikaran dagitoy. Available iti online dagiti sumagmamano a kapanunotan ken pagarigan iti ChildrenandYouth.ChurchofJesusChrist.org. Kalikagumanyo a manggun-od ti pammaregta tapno maammuan ti kasayaatan para iti tunggal indibidual (kitaen iti “Ibagay ken Itunos”).

Ti Tumantanor a Kaputotan

“Ti nabayagen a panggep ti Simbaan ket mangtulong kadagiti amin a miembro tapno tumibker ti pammatida iti Apotayo a Jesucristo ken iti Pannubbotna, [ken] mangtulong kadakuada a mangaramid ken mangipatungpal kadagiti katulaganda iti Dios.”

Presidente Russell M. Nelson, “Opening Remarks,” Ensign, wenno Liahona, Nob. 2018, 7

Kinuna dagiti propeta a daytoy a kaputotan dagiti ubbing ken agtutubo ket mairaman kadagiti kasayaatan nga imbaon ti Apo iti daga (kitaen iti Russell M. Nelson, “Hope of Israel,” worldwide youth devotional, Hunio 3, 2018, 16). Addaanda iti potensial a maaddaan iti dakkel nga epekto iti lubong. Naawisda a tumulong a mangummong iti Israel iti agsumbangir ti belo. Ti nangatngato, nasansantuan a wagas ti kasapulan tapno mataripato ken maisuro ida. Makatulongto daytoy a wagas kadagiti ubbing ken agtutubo:

• A maammuanda ti agnanayon a pakabigbigan ken panggepda.

• Mangpapigsa iti kumbersionda ken ni Jesucristo, mangipasagepsep kadagiti pusoda ti ebangheliona ken mangparegta kadakuada a mangpili a sumurot Kenkuana.

• Makiraman a sangsangkamaysa iti aramid ti pannakaisalakan.

• Personal a panangpadur-as nga addaan iti panangsuporta dagiti nagannak ken lider a mangtulong no kasapulan.

• Agbalin a maikari a dumar-ay iti templo ken maaddaan iti manayon a rag-o iti dana ti katulagan.

Bayat ti pannakaawat dagiti ubbing ken agtutubo iti paltiing para iti biagda, mangbuangay kadagiti relasion a naisentro iti ebanghelio, ken panangusar iti wayawaya nga agpili bayat ti panagdakkelda, agballigidanto iti panangipatungpalda kadagitoy a panggep.

Ikagumaan a Suroten ti Mangisalakan

Idi agtutubo Isuna, kasapulan ni Jesus nga ammuen ti nadiosan a kinatao ken misionna, kas met iti nasken nga aramiden ti tunggal anak ti Dios. Isu ket “dimmakkel iti kinasirib ken kinatayag, ken ti gundaway ti Dios ken kadagiti tao” (Lucas 2:52). Dimakkel Isuna iti natimbeng a wagas, ket kasta met kadagiti amin nga ubbing ken agtutubo.

Tulonganyo dagiti ubbing ken agtutubo a mangisangbay iti Mangisalakan kadagiti amin nga aspeto ti biagda—saan laeng nga iti aldaw ti Sabbath. Bayat iti panagkagumaanda nga isentro dagiti biagda ken ni Jesucristo, ikarina nga isangbayna ti Espiritu Santo a mangliwliwa ken mangiwanwan kadakuada.

Gagangay a, mangrugi iti pagtaengan ti panangsurot iti Mangisalakan. Makaipaay dagiti lider iti Simbaan iti napateg a suporta para kadagiti indibidual ken pamilia.

“Ni Jesus dimmakkel ti kinasirib ken kinatayag, ken ti gundaway iti Dios ken kadagiti tao.”

Lucas 2:52

Naisentro iti Pagtaengan

“Panawenenen para iti Simbaan a naisentro iti pagtaengan , a suportaran ti mapaspasamak iti uneg dagiti pasdek ti branch, ward, ken staketayo.”

Presidente Russell M. Nelson, “Opening Remarks,” Ensign, wenno Liahona, Nob. 2018, 7

Agplano dagiti nagannak kadagiti padas ken pannakisarita ti pamilia a mangisuro iti ebanghelio ni Jesucristo ken mangipaay kadagiti naidumduma a kasapulan ti tunggal ubing. Mapasamak daytoy bayat ti panagtitinnulong a panagtrabaho ken panagay-ayam dagiti pamilia kadagiti wagas a pakaisuruan dagiti napateg nga kabaelan, pakapapigsaan iti kinatao, ken pakaipaayan dagiti gundaway a mangpadur-as.

Mangyallukoy iti Panagdur-as

• Agkararag para iti pannarabay. Am-ammo ti Nailangitan nga Ama dagiti annakyo ken tulonganakayonto a mangisuro kadakuada.

• Tulonganyo dagiti annakyo a mangsapul ken mangbigbig iti impluensia ti Espiritu Santo.

• Yebkasyo ti ayat ken masansan a dayawenyo dagiti annakyo kadagiti panagkagumaanda nga agaramid iti nasayaat ken para kadagiti nakristianuan a kababalin a makitayo kadakuada.

• Mangsapul kadagiti gundaway a makapagserbi kadagiti dadduma kas maysa a pamilia.

Mangipaay iti Pannarabay

• Tulonganyo dagiti annakyo a mangkita no kasano a mayaplikarda ti ebanghelio kadagiti amin a tay-ak ti biagda.

• Tarabayenyo dagiti annakyo ken allukoyenyo ida a mangikeddeng kadagiti bukodda a panggep a tun-oyen ken plano.

• Tulonganyo ida a mangikeddeng kadagiti bukodda a pangrisut kadagiti parikutda.

• Mangidiaya iti suporta, tulong, ken pammaregta iti panangragpatda.

Makisarita kadagiti Lider

Makisaritakayo kadagiti mannursuro ken lider tapno maammuan no kasano ti kasayaatan a pannakasuporta dagiti annakyo. Agannadkayo a saan a madadael ti ania man a panagtalek dagiti annakyo wenno mapabainanyo ida.

Sapulen dagiti resources iti ChildrenandYouth.ChurchofJesusChrist.org.

Suportaran ti Simbaan

Naisentro iti Pagtaengan (Pamilia)

Suportaran ti Simbaan (Dagiti Lider)

Ti akem iti Simbaan ket mairaman ti panangisuro iti ebanghelio ni Jesucristo ken panangsuporta iti pagtaengan. Suportaran dagiti lider ken mannursuro dagiti nagannak babaen iti panangbuangay iti nabileg, mangtartarabay a relasion kadagiti ubbing ken agtutubo a pagserserbianda.

Makisarita kadagiti Nagannak

• Makisarita a di pormal kadagiti nagannak tapno maammuan no kasano ti panangsuportada kadagiti annakda. Mangibinglay kadagiti pagpigsaan a madlawyo.

• Saludsodenyo no ania ti namnamaenda a mapadasan ken masursuronto dagiti annakda iti klase ken kadagiti aktibidad.

No saan nga aktibo a miembro ti Simbaan dagiti nagannak:

• Ilawlawagyo kadagiti nagannak daytoy a panagkagumaan a mangsuporta kadagiti ubbing ken agtutubo, ket saludsodenyo no ania ken no kasano ti kayatda a pakairamanan dagiti annakda.

• Saludsodenyo dagiti ubbing ken agtutubo no ania a klase a suporta ti kayatda.

• Kasaritayo ti ward council maipapan iti no kasano nga iraman dagiti nagannak agingga a mabalin.

Suportaran dagiti Ubbing ken Agtutubo

• Tulonganyo dagiti ubbing ken agtutubo a mangbigbig ti impluensia ti Espiritu Santo.

• Saludsodenyo kadakuada no ania ti kayatda a masursuro ken mapadasan iti klase ken kadagiti aktibidad.

• Allukoyen ida a mangidaulo iti panagplano ken panangimaton kadagiti aktibidad.

Sapulen dagiti resources iti ChildrenandYouth.ChurchofJesusChrist.org.

Panagsursuro iti Ebanghelio

Iti Pagtaengan

Ti bukod ken sangapamiliaan a panagadal iti nasantuan a kasuratan ken panagkararag ket makatulongto kadagiti ubbing ken agtutubo a mangrikna ken mangbigbig iti impluensia iti Espiritu Santo ken mangsursuro nga agayat iti Mangisalakan. Maallukoy dagiti indibidual ken pamilia a mangusar iti Umaykayo, Sumurot Kaniak—Para kadagiti Indibidual ken Pamilia ken dagiti balikas dagiti sibibiag a propeta tapno masursuro ti ebanghelio ni Jesucristo.

Iti Simbaan

Agtataripnong dagiti ubbing ken agtutubo tapno masursuro ti ebanghelio ni Jesucristo. Masursuro dagiti ubbing ti ebanghelio babaen iti panangisuro iti klase ken iti oras ti panagkanta iti Primary. Masursuruan dagiti agtutubo iti doktrina kadagiti klase ken korum. Maawis dagiti ubbing ken agtutubo a mangibinglay iti no ania ti nasursuroda iti pagtaengan ken mangyaplikar iti ebanghelio iti biagda.

Naisentro iti Pagtaengan

• Kararag

• Panagadal iti nasantuan a kasuratan

• Family home evening

• Aldaw ti Sabbath

• Pakasaritaan ti pamilia

Suportaran ti Simbaan

• Panangisuro iti Sabbath

• Seminary

Sapulen ti resources iti ChildrenandYouth.ChurchofJesusChrist.org.

Serbisio ken dagiti Aktibidad

Iti Pagtaengan

Ti serbisio ken dagiti aktibidad ti makabuangay ti inaldaw a nalinteg a kababalin, makapapigsa iti relasion ti pamilia, makaisuro kadagiti kabaelan ti panagbiag, mangpadur-as iti nakristianuan a kababalin, ken makatulong kadagiti ubbing ken agtutubo a dumur-as. Ti serbisio ti pamilia ken dagiti aktibidad ket makaipokus kadagiti kasapulan ti indibidual ken pamilia ken makaipaay kadagiti gundaway a mangyaplikar kadagiti pagbatayan ti ebanghelio kadagiti inaldaw a padas.

Iti Simbaan

Ti masansan a serbisio ken dagiti aktibidad ket mangted kadagiti gundaway nga agguumong, mangisuro kadagiti baro a paglaingan, mangipatungpal kadagiti naririgat a trabaho, ken mangbangon kadagiti relasion a naisentro iti ebanghelio kadagiti kapatada ken lider. Nasken a makatulong dagiti aktibidad kadagiti ubbing ken agtutubo a dumur-as iti espiritual, sosial, pisikal, ken intelektual ken mangted iti napateg a serbisio kadagiti dadduma. JustServe (JustServe.org) ket maysa a napateg a resource para kadagiti gundaway nga agserbi iti komunidad.

Dagiti sabasabali nga aldaw ti aktibidad para kadagiti agtutubo ket mairaman dagiti komperensia ti For the Strength of Youth (FSY), komperensia dagiti agtutubo, kamping, ken dadduma pay a panagtitipon. Dagitoy nga aktibidad ket makatulong kadagiti agtutubo a mangpapigsa iti tarigagayda a mangsurot iti Mangisalakan, mangikkat kadakuada manipud kadagiti masansan nga ar-aramidenda, ken mangtulong kadakuada a mangkita a mairamanda iti paset iti dakdakkel a grupo ti agtutubo a mangibinglay kadagiti nalinteg a panggep a tun-oyen.

Naisentro iti Pagtaengan

• Family home evening

• Serbisio iti pamilia

• Dagiti aktibidad ti pamilia

• Ministering

Suportaran ti Simbaan

• Dagiti kapanunotan para iti serbisio ken dagiti aktibidad

• JustServe

• Dagiti Sabasabali nga aldaw (Multiday) ti aktibidad

• Dagiti naituding nga aramiden iti Ministering

Bukod a Panagdur-as

Iti Pagtaengan

Pilien dagiti ubbing ken agtutubo no ania ti mabalinda nga aramiden tapno dumur-as ken agsursuro a mangsurot iti Mangisalakan. Makatulong dagiti nagannak a mangbigbig no kasano a dumurdur-asdan ken no ania pay ti kasapulanda a mapasayaat. Amin nga aktibidad, agraman ti simbaan, pagadalan, dagiti pannakigayem, isport, arte, aramid, ken dadduma pay a pagesman ti indibidual ket makatulong kadagiti ubbing ken agtutubo a mangsurot ken ni Jesucristo.

Iti Simbaan

Ipatpateg ken pagserbian dagiti lider ti tunggal ubing ken agtutubo ken agbalinda a mannakaammo kadagiti kasapulan ken pagesmanda. Babaen kadagiti naayat a pannakilangen, makaited dagiti lider iti naidumduma ken nabileg nga impluensia a mangsuporta ken mangallukoy kadagiti ubbing ken agtutubo iti panagdur-asda.

Naisentro iti Pagtaengan

• Dagiti bukod a panggep a tun-oyen

• Dagiti panggep a tun-oyen ti pamilia

• Pannarabay

• Panangallukoy

• Ayat

Suportaran ti Simbaan

• Pannarabay

• Panangallukoy

• Dagiti kapanunotan ti panggep a tun-oyen

• Resources ti ward

Sapulen ti resources para kadagiti aktibidad ken panggep a tun-oyen iti ChildrenandYouth.ChurchofJesusChrist.org.

Itunos ken Ibagay

“Ti mensahe ti naisubli nga ebanghelio ni Jesucristo ket isu ti kabaelantayo ken nasken a namnamaentayo a pagbalinan a nasaysayaat agingga a sibibiagtayo.”

Presidente Henry B. Eyring, “Our Perfect Example,” Ensign wenno Liahona, Nob. 2009, 70

Naidumduma ti tunggal indibidual, pamilia, ken kongregasion. No ania ti kasayaatan a maaramid ti maysa ket mabalin a saan para iti dadduma. Aramidenyo no ania ti mabalin para iti pamilia, klase, korum, wenno wardyo. Pagsaritaanyo maipapan kadagiti gundaway ken pakaseknan, ken agkalikagum a manggun-d iti paltiing no kasano a maibagay daytoy nga aramid tapno makatulong kadagiti ubbing ken agtutubo a manggun-od iti nadiosan a potensialda.

Kas pagarigan, agduduma dagiti ubbing ken agtutubo no kasano ti pamay-anda iti bukod a panagdur-as: ti kita, bilang, ken, kasansan dagiti panggep a tun-oyen, kasta met no kasano ti kaadu ti kasapulanda a suporta, ket maikedeng koma kas indibidual. Maitunos met dagiti klase ken kurom tapno maited dagiti kasapulanda. Kas mainayon, mabalin met a sabasabali ti kita ken kasansan dagiti aktibidad a mayannurot kadagiti lokal a kasasaad.

• Agkalikagum a manggun-od iti paltiing

• Ited dagiti kasapulan ti indibidual

• Aramiden no ania ti nasamay

• Pagbalinen a simple

Pagtalinaeden a simple daytoy. Aramiden no ania ti nasamay.

Sapulen dagiti resources iti ChildrenandYouth.ChurchofJesusChrist.org.

Motibasion ken Pammigbig

“Masarakantayo ti pudno ken agnanayon a rag-o babaen iti panangammo ken panagtignaytayo a mayannurot iti kinapudno maipapan iti kinasiasinotayo.”

Presidente Dallin H. Oaks, “Truth and the Plan,” Ensign wenno Liahona, Nob. 2018, 25

Motibasion

Gagangay a mangtedto iti motibasion kadagiti ubbing ken agtutubo bayat ti pannakariknada a maay-ayat, dumurdur-as, sumaysayaatda ken mariknada ti Espiritu Santo iti biagda. No agbalin a narigat ti panagbalbaliw ken panagdur-as para kadakuada, allukoyen ida a mangsapul kadagiti wagas a pakaparmekanda kadagiti karit wenno balbaliwanda dagiti planoda. Ti napigsa ken addaan panagtalek a relasion kadagiti nagannak, lider, ken kapatadada ket makaited kadakuada iti pigsa nga agtultuloy a mangpadas wenno mangikarigatan.

Pannakabigbig

Bayat ti panagdur-as dagiti ubbing ken agtutubo, dayawenyo dagiti panagkagumaanda ken paregtaenyo ida. Mangted kadakuada kadagiti gundaway a mangibinglay no ania dagiti masursuroda, ken rambakanyo ti idudur-asda. Kas pangnayon, makaawat ti amin nga ubbing ken agtutubo kadagiti aytem a kas iti singsing wenno medalion a mangipalagip kadakuada a pasetda iti sangalubongan a grupo nga agkagkagumaan a mangsurot ken ni Jesucristo. Bayat ti panangipatungpal dagiti ubbing ken agtutubo kadagiti panggep a tun-oyen [goals] iti espiritual,sosial, pisikal, ken intelektual, mabalin a makaawatdanto pay kadagiti mainayon nga emblem.

• Dumngeg

• Dayawen ti panagkagumaan

• Rambakan ti panagdur-as

• Makasursuro manipud kadagiti pakaupayan

Sapulen dagiti resources iti ChildrenandYouth.ChurchofJesusChrist.org.