“Dagiti Akem,” Dagiti Ubbing ken Agtutubo ti Ti Simbaan ni Jesucristo dagiti Santo iti Ud-udina nga Aldaw: Maysa a Pakauna a Pangiwanwan para kadagiti Nagannak ken Lider (2019)
“Dagiti Akem”
Dagiti Akem
Pagtaengan ken dagiti Nagannak
Ania ti akemko?
Agbalinkayo a maysa a nalinteg a pagwadan kadagiti annakyo. Suruanyo ida no kasano a dumur-as iti amin a tay-ak ti biagda. Sapulenyo dagiti wagas a pakasursuruanda iti rag-o iti panagtungpal kadagiti katulagan, panangtakuat kadagiti baro a talento, ken panagaramid kadagiti naririgat a banag. Tulonganyo ti pamiliayo a dumur-as nga umas-asideg iti Nailangitan nga Ama ken ni Jesucristo ken inaldaw nga agbiag iti ebanghelio.
Ania ti aramidek?
Ipakaammoyo kadagiti annakyo no kasano ti kadakkel ti panagayatyo kadakuada. Makiramankayo iti biagda. Nainkararagan a a bigbigenyo dagiti kasapulan ti tunggal maysa ken planuenyo ti panagadal iti ebanghelio ken dagiti aktibidad a mangipaay kadagita a kasapulan. Masansan nga ibinglayyo ti pammaneknekyo kadakuada. Kasaritayo dagiti lider maipapan no kasano a makatulongda a mangsuporta kadagiti annakyo.
Sadino ti pangrugiak?
Ituloyyo a kasarita ken denggen dagiti annakyo. Ikararaganyo no kasano a makasuportakayo kadakuada. Tulonganyo ida a mangtakuat ken mangrugi a mangitrabaho kadagiti tay-ak ti panagsursuro a paggugustoda. Irugi ken ituloyyo ti panagkararag a sangapamiliaan, panagadal iti ebanghelio, dagiti gundaway nga agserbi, ken dagiti aktibidad a mangtulong kadagiti annakyo a dumur-as.
Dagiti Lider ken Mannursuro iti Primary
Ania ti akemko?
Ayaten ken papigsaenyo dagiti ubbing. Tulonganyo dagiti nagannak a mangtulong kadagiti ubbing a mangrikna iti ayat ti Nailangitan nga Ama para kadakuada, maawatanda ti ebanghelio ni Jesucristo, mangrikna ken mangbigbig iti impluensia ti Espiritu Santo, ken agsagana a mangaramid ken mangtungpal kadagiti sagrado a katulagan.
Ania ti aramidek?
Siguraduen a dagiti klase ti Primary ken oras ti panagkanta ket mangtulong kadagiti ubbing a mangrikna iti Espiritu, mangpapigsa iti pammati, ken mangrikna iti rag-o ti ebanghelio ni Jesucristo iti biagda. Addaan kadagiti tay-ak ti panagdur-as a naisingasing iti Lucas 2:52 kas maysa a pangiwanwan, mangplano iti naragsak ken pakairamanan a serbisio ken dagiti aktibidad a mangpatibker kadagiti pamaneknek, mangpapigsa kadagiti pamilia, ken bukod a panagdur-as.
Sadino ti pangrugiak?
Kaam-ammo dagiti ubbing ken dagiti pamiliada, ken pagserbian dagiti kasapulanda. Kas maysa a panguluen ti Primary, sikakararag a saludsodenyo no kasano a makatulongkayo kadagiti mannursuroyo, lider ti musika, ken lider ti aktibidad a makatulong kadagiti ubbing a mangsurot iti Mangisalakan.
Dagiti Lider ti Young Women
Ania ti akemko?
Tulonganyo dagiti nagannak ken bishopric iti panangtarabay ken panangparegta kadagiti agtutubo a babbai tapno maawatanda ti pakabigbiganda kas annak a babbai ti Dios, agsagana para kadagiti katulagan iti templo, ken agtungpal kadagiti nadiosan a panggepda. Iwanwanyo dagiti panguluen ti klase bayat ti panangidaulo, panag-minister, ken panagserbida kadagiti miembro dagiti klaseda.
Ania ti aramidek?
Ipakitayo ti pagwadan kas maysa a disipulo ni Jesucristo. Iwanwanyo dagiti panguluen ti klase bayat ti nainkararagan a panagplano ken panangtulong a mangisuro kadagiti adalen manipud iti Umaykayo, Sumurot Kaniak—Para kadagiti Agtutubo a Babbai. Allukoyenyo ida a mangidaulo iti panagplano ken panangipatungpal iti serbisio ken dagiti aktibidad a makatulongto kadagiti agtutubo a babbai a dumur-as iti amin a tay-ak ti biagda. Mangidiaya iti nayon a suporta kadagiti agtutubo a babbai nga agkasapulan iti daytoy.
Sadino ti pangrugiak?
Saggaysaen a kaam-ammoyo dagiti agtutubo a babbai Kasaritayo dagiti agtutubo nga babbai, dagiti nagannakda, ken ti bishopric maipapan no kasano a makatulongkayo iti panangdur-as dagiti agtutubo a babbai. Agkararagkayo tapno maammuanyo no kasano a matulonganyo dagiti panguluen ti klaseyo nga agballigi kadagiti takemda [callings].
Dagiti Lider dagiti Agtutubo a Lallaki
Ania ti akemko?
Tulonganyo dagiti nagannak ken bishopric iti panangisagana kadagiti agtutubo a lallaki para iti ordenasion kadagiti saad [office] iti priesthood, katulagan iti templo, mision, ken nadiosan nga akem. Paregtaenyo ida a makaawat iti panggep ken pakabigbiganda kas annak a lallaki ti Dios. Iwanwanyo dagiti panguluen ti korum bayat ti panangidaulo, panag-minister, ken panagserbida kadagiti miembro dagiti korumda.
Ania ti aramidek?
Ipakitayo ti pagwadan kas maysa a disipulo ni Jesucristo. Iwanwanyo dagiti panguluen ti korum bayat ti nainkararagan a panagplano ken panangtulongda a mangisuro kadagiti adalen manipud iti Umaykayo, Sumurot Kaniak—Para kadagiti Agtutubo a Lallaki. Tulonganyo ida a mangplano ken mangipatungpal iti serbisio ken dagiti aktibidad a mangtulongto kadagiti agtutubo a lallaki a dumur-as iti amin a tay-ak ti biagda. Palubosanyo ida a mangidaulo. Mangidiaya iti nayon a suporta kadagiti agtutubo a lallaki nga agkasapulan iti daytoy.
Sadino ti pangrugiak?
Mangbubos iti oras a kadua dagiti agtutubo a lallaki. Saggaysaen a kaam-ammo ken ayatenyo ida. Kasaritayo ti bishopric, dagiti agtutubo a lallaki, ken dagiti nagannakda tapno maikeddeng no kasano a makasuportakayo kadakuada bayat iti panagdur-asda nga agbalin nga ad-adda a kas iti Mangisalakan. Agkararagkayo tapno maammuanyo no kasano a makatulongkayo kadagiti panguluen ti korumyo a dumur-as kadagiti takemda [callings].
Dagiti Mannursuro iti Sunday School
Ania ti akemko?
Ikagumaanyo a tulongan dagiti agtutubo nga umasideg ken ni Cristo babaen iti panagsursuro ken panagsurot iti doktrinana. Suruanyo dagiti agtutubo a makaawat, mangibinglay, ken agbiag iti ebanghelio ni Jesucristo.
Ania ti aramidek?
Ipakitayo ti pagwadan kas maysa a disipulo ni Jesucristo, ken mangtulong kadagiti agtutubo a mangpapigsa iti pammatida. Allukoyenyo ida a mangadal kadagiti nasantuan a kasuratan iti pagtaengan—agmaymaysa ken kadua dagiti pamiliada. Tulonganyo ida nga agsagana ken mangisuro kadagiti pagbatayan ti doktrina. Awisenyo ida a mangyaplikar iti no ania ti nasursuroda iti bukodda a panagdur-as.
Sadino ti pangrugiak?
Ikagumaanyo ti mangisuro a kas iti inaramid iti Mangisalakan. Saggaysaenyo a kaam-ammo dagiti agtutubo. Agkararagkayo tapno maammuanyo no kasano a makatulongkayo kadakuada a dumur-as tapno agbalinda nga ad-adda a kas iti Mangisalakan. Papigsaenyo dagiti miembro ti klase ken nagannakda iti panagkalikagumda a makasursuro ken mangisuro ti ebanghelio iti simbaan ken iti pagtaenganda.
Ti Bishopric ken Panguluen ti Klase ken Korum
Ania ti akemda?
Ti bishopric ti panguluen iti Aaronic Priesthood iti ward ken akinrebbeng kadagiti agtutubo a babbai ken agtutubo a lallaki. Agtrabaho dagiti panguluen ti korum iti Aaronic Priesthood nga addaan kadagiti tulbek a maitalek kadakuada no mai-set apart dagiti presidente ti korum. Agtrabaho dagiti panguluen ti klase ti Young Women babaen iti turay ti priesthood kalpasan a sinet-apart ida ti maysa a miembro ti bishopric.
Ania ti aramidenda?
Nasken nga ikagumaanan dagiti panguluen nga agbalinda a pudno a disipulo ni Jesucristo bayat ti panangtulongda a marikna ti tunggal miembro ti klase ken korum a maipatpategda ken matakuatanda ti rag-o ti panagbiag iti ebanghelio. Babaen iti panangiturong iti bishopric, mangidauloda iti klase ken korum iti panagguummong ti Israel iti agsumbangir ti belo ken iti panangaywan kadagiti agkasapulan.
Sadino ti pangrugianda?
Masursuro dagiti panguluen dagiti pagrebbenganda manipud iti Apo ken manipud kadagiti liderda. Ikararaganda dagiti miembro ti klase wenno korum ken ammuenda dagiti kasapulanda. Mangsuportada kadakuada iti panagbalinda a disipulo ni Jesucristo. Aggiinnumanda maipapan no ania kadagiti adalen, aktibidad, ken serbisio ti mangbendision ken mangpatibker kadagiti agtutubo ken mangyeg iti panagkaykaysa iti klase wenno korumda.