“Lesona 1 Anomea mo le Sauniuniga o le Vasega: Taliaina o le Valaaulia a le Faaola e Aoao Mai ia te Ia.” O Iesu Keriso ma Lana Talalelei e Faavavau Anomea a le Faiaoga (2023)
“Lesona 1 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 1 Anomea mo le Sauniuniga o le Vasega
Taliaina o le Valaaulia a le Faaola e Aoao Mai ia te Ia
Susu Maia i le O Iesu Keriso ma Lana Talalelei e Faavavau (Mataupu Faalelotu 250). Na saunoa le Au Peresitene Sili ma le Korama a Aposetolo e Toasefululua e uiga i le Faaola, “E leai lava se isi ua i ai se aafiaga matua loloto naua o i latou uma na soifua ma o le a soifua ai i luga o le fogaeleele” (“O Le Keriso Soifua: O Le Molimau a Aposetolo,” ChurchofJesusChrist.org). O lenei vasega o le a ofoina atu ia te oe le avanoa paia e aoao atili ai e uiga ia Iesu Keriso ina ia mafai ona e faateleina Lana uunaiga i lou olaga.
O anomea mo sauniuniga i lenei vasega ua mamanuina e fesoasoani ia te oe e faalatalata atili atu ai i le Faaola e ala i le faaleleia o au suesuega faale-tagata lava ia ma saunia oe ia faia ni talanoaga faagaeetia ma isi. E aofia ai mau talafeagai, faamatalaga lagolago mai taitai o le Ekalesia, ata vitio fesootai, ma valaaulia e mafaufau loloto i ai ma faaaoga mea ua e aoaoina. O lesona taitasi e i ai se vaega e tuu i le faitalia o le “Manao Atili?” lea e aofia ai punaoa faaopoopo e mafai ona fesoasoani ia te oe e aoao atili ai e uiga ma faamalosia lou faatuatua ia Iesu Keriso.
Vaega 1
E mafai faapefea e le aoaoina o Iesu Keriso ma Lana talalelei e faavavau ona suia ai lo‘u olaga?
Mafaufau faapea sa e nofo i Palesitina i le taimi o le galuega a le Alii. Ua e faalogo i le tele o mea ofoofogia e uiga i se faiaoga e igoa ia Iesu le Nasareta ma ua ia te oe se naunautaiga malosi e alu ma faalogo ia te Ia mo oe lava. O le asō ua e maua ai o Ia, o loo aoao atu e Iesu se vaega toatele o tagata. Ua Ia tautino atu le maoae o Ioane le Papatiso ma aoai tagata ona o lo latou le talitonu (tagai Mataio 11:7–24). Ona ia faia lea o se valaaulia e ono suia ai le olaga.
Suesue e Sauniuni ai mo le Vasega
Faitau le Mataio 11:28–30, ma mafaufau loloto pe na faapefea e le taliaina o lenei valaaulia ona suia pe mafai ona suia ai lou olaga.
Ua tuuina mai foi e Iesu Keriso se valaaulia faapena i o tatou aso. Ina ua uma ona molimau atu i le tau e le mafaamatalaina sa Ia totogia e togiola mo a tatou agasala ina ia mafai ai ona tatou salamo, sa fetalai le Faaola, “Aoao mai ia te au, ma faalogo mai i a‘u upu; savali i le agamalu o lo’u Agaga, ma o le a e maua le filemu ia te a‘u” (Mataupu Faavae ma Feagaiga 19:23).
E faatatau i lenei valaaulia, na aoao mai ai Elder Kim B. Clark o le Fitugafulu:
O le valaaulia a le Faaola e “aoao mai ia te au” e lua ona faauigaga e tutusa lea e fesootai i se ala matagofie i le ala a le Alii e aoao loloto ai.
O le faauigaina muamua o le “aoao mai ia te a’u” o le: Aoao ia iloa a’u.
… O le iloaina o Ia o le fanauina lea faaleagaga ia te Ia, oo i se suiga tele o le loto, ma avea o Ona atalii ma afafine. …
O le faauigaina lona lua o le “aoao mai ia te a’u” o le: Aoao mai ia te a’u.
…A o tatou tanumia i tatou lava i tusitusiga paia, tatou te aoao mai Lana faataitaiga atoatoa lelei. … E tatau ona tatou galulue ma le faatuatua ia Iesu Keriso e faia la tatou vaega, ae a o tatou faia, … ua Ia folafola mai e faalauteleina lo tatou gafatia mo le faatinoga amiotonu ma fesoasoani ia i tatou ia avea atili e faapei o Ia. (“Learn of Me” [tautalaga sa faia i faiaoga o aoga faalelotu, Ian. 26, 2018], ChurchofJesusChrist.org; faaopoopo le faamamafa)
O se tasi o auala taua e aoao ai e uiga i le Faaola o le suesue lea ma ola i Lana talalelei e faavavau. “O le upu Eleni mo le talalelei o lona uiga o le ‘tala fiafia’” (Bible Dictionary, “Gospels”). O le a la le tala fiafia o le talalelei?
Ina ua lata i le faaiuga o Lana galuega ia sa Lamana ma sa Nifae i le laueleele o Nuumau, sa faamalamalama atu ai e le Faaola i faaupuga faigofie ma manino le uiga ma le faamoemoega o Lana talalelei.
Suesue e Sauniuni ai mo le Vasega
Faitau le 3 Nifae 27:13–16, 20–21, ma vaavaai mo mafuaaga ua avea ai le talalelei ma tala fiafia.
Na aoao mai Elder Jeffrey R. Holland o le Korama a Aposetolo e Toasefululua:
“O le ‘tala e lelei’ e faapea o le oti ma seoli e mafai ona alofia, e faapea o mea sese ma agasala e mafai ona faatoilaloina, e faapea o loo i ai le faamoemoe, e faapea o loo i ai le fesoasoani, e faapea o le mea e le mafai ona fofo ua foiaina, e faapea o le fili ua uma ona faatoilaloina. O le tala e lelei e faapea o tuugamau o tagata uma o le a i ai le aso e avanoa ai, e faapea o agaga o tagata uma e mafai ona toe faamamaina, e faapea o fanau uma a le Atua e mafai ona toe foi i le Tama o lē na tuuina mai le ola. (“Galuega Faafaifeautalai ma le Togiola,“ Liahona, Mat. 2001, 8–10)
Tusi faamaumau Ou Manatu
Mafaufau i lou malamalama i le taimi nei ma le molimau ia Iesu Keriso ma Lana talalelei. O a ni sini e te manao e faatulaga e aoao atili ai e uiga ia te Ia ma Lana talalelei? O le a se mea e mafai ona e faia e faateleina ai Lana uunaiga i lou olaga? Mafaufau e tusi i lalo au sini ma iloilo e le aunoa i vaiaso a sau.
Vaega 2
E mafai faapefea ona ou faateleina lo‘u gafatia e aoao ai e uiga i le Faaola ma Lana talalelei e faavavau?
Ua tatou ola i se lalolagi ua matua mamanuina e le malamalama faalelalolagi. O le malamalama faalelalolagi e taulai atu i mataupu faalelalolagi e le o ni mea faalelotu pe faaleagaga. Mo se faataitaiga, o aoaoga faasaienitisi e maua ai le malamalama faalelalolagi. O lenei malamalama e taua ma ua taitai atu ai i atinaega ofoofogia i tekinolosi, vailaau faafomai, faatoaga, femalagaaiga, ma fesootaiga. Faatasi ai ma lenei aoaoga faalelalolagi, o loo iai se auala e sili atu ona loloto ma faaleagaga e aoao ai upumoni.
O Elder Paul V. Johnson o le Fitugafulu na iloga i le faamaioioina o le va o le aoaoina faaleagaga ma le faasaienitisi i le ala lenei:
O le aoaoina o mea faaleagaga … e manaomia ai se faiga ese nai lo le aoaoina o mea faasaienitisi. O le metotia faasaienitisi ma le atamai e fesoasoani tele, ae e le mafai lava e na mea na o ia, ona maua ai le malamalama faaleagaga. O le aoaoina o mea faaleagaga e manaomia ai le atamai, ae e le lava lena. E na o le Agaga tatou te aoao mai ai mea faaleagaga. (“A Pattern for Learning Spiritual Things” [Faasalalauga faasatelite mo Seminare ma Inisitituti o Mataupu Faalelotu, 7 Aok., 2012], ChurchofJesusChrist.org)
O le taulimaina o aoaoga faaleagaga, na faailoa mai ai e le Alii ia Iosefa Samita “ona ua lē i ai i tagata uma le faatuatua, ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118).
O le toatele o i tatou e iloa le auala e aoao ai e ala i le suesue. Ae e faapefea ona tatou aoao e ala i le faatuatua? Na faamalamalama mai e Peresitene Russell M. Nelson:
Tatou te faamalosia lo tatou faatuatua ia Iesu Keriso pe a tatou tauivi e tausia Ana poloaiga ma “manatua pea o Ia” [Moronae 4:3]. Ma le isi, e faateleina lo tatou faatuatua i taimi uma tatou te faatino ai lo tatou faatuatua ia te Ia. O le uiga lena o le aoao e ala i le faatuatua.
Mo se faataitaiga, o taimi taitasi tatou te maua ai le faatuatua ina ia usiusitai ai i tulafono a le Atua—e tusa lava pe faamāina i tatou e manatu lauiloa—po o taimi taitasi tatou te teena ai faafiafiaga po o manatu latou te viia le soliga o feagaiga, o loo tatou faatinoina lo tatou faatuatua, lea i lona taunuuga e faateleina ai lo tatou faatuatua.
Ma le isi, e fausia e ni nai mea le faatuatua tele atu i lo le faatofuina e le aunoa i le Tusi a Mamona. E leai se isi tusi ua molimau mai ia Iesu Keriso ma se mana ma le manino faapena. …
Ioe, o lo tatou saogalemu sili lava e oo mai pe a tatou lafo atu i tatou lava i le Tama Faalelagi ma Iesu Keriso! O se olaga e aunoa ma le Atua o se olaga e tumu i le fefe. O se olaga e i ai le Atua o se olaga e tumu i le filemu. E mafua lenei mea ona e oo mai faamanuiaga faaleagaga i ē faatuatua. O le mauaina o faaaliga faaletagata lava ia, o se tasi o faamanuiaga silisili o na faamanuiaga. (“Opogi le Lumanai i le Faatuatua,” Liahona, Nov. 2020, 75)
Tusi faamaumau Ou Manatu
Mafaufau i tagata i tusitusiga paia po o tagata e te iloa o e o faataitaia le mataupu faavae o le aoaoina e ala i le faatuatua. Lisi ni nai faataitaiga ina ia e saunia e faasoa atu i le vasega. E mafai foi ona e faamaumauina mea ua e aoaoina e ala i le faatinoina o le faatuatua ia Keriso.