“Lesona 18 Anomea mo le Sauniuniga o le Vasega: Mauaina o le Meaalofa Paia a le Faaola o le Alofa Tunoa,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 18 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 18 Anomea mo Sauniuniga o le Vasega
Mauaina o le Meaalofa Paia a le Faaola o le Alofa Tunoa
Pe na i ai ni taimi na e lagona ai le lotovaivai ona o au agasala, mea sese, vaivaiga, ma lē atoatoa? Pe ua e fai ifo ea ia te oe lava ni mea e pei o le “E lē lava lo“u lelei” po o le “O le a ou lē gafatiaina lava”? A o e suesue, mafaufau pe mafai faapefea e le alofa tunoa o le Alii ona laveai oe mai faitioga faaletagata lava ia, liua ou vaivaiga i malosiaga (tagai Eteru 12:27), ma faamalosia oe ia e lelei atu ma faia mea lelei e sili atu nai lo mea e te mafaia na o oe lava.
Vaega 1
Aisea ou te manaomia ai le alofa tunoa o le Faaola?
Na aoao mai le Aposetolo o Paulo, “Ou te mafaia mea uma lava i le faamalosi mai o Keriso ia te a’u” (Filipi 4:13). O lenei mana faamalosi po o le mana e mafai ai e ta’ua o le alofa tunoa ma e “faasafua mai ia i tatou e ala i le Togiola a le Alii o Iesu Keriso” (Gospel Topics, “Grace,” topics.ChurchofJesusChrist.org).
Sa faapupula mai e le Faaola lo tatou manaomia o Lona alofa tunoa i le faataoto i le vine moni.
Suesue e Sauniuni ai mo le Vasega
Faitau le Ioane 15:1–8, ma mafaufau po o a mea e mafai ona aoao mai e faatusa o i lenei faataoto ia i tatou e uiga i lo tatou manaomia o le fesoasoani a le Alii. (Manatua: O le “Teuteu” i le fuaiupu 2 e mafai foi ona faaliliuina o le “tipiese” po o le “faamamaina.” “Tumau” i le fuaiupu 4 e mafai ona faaliliuina o le “mausalī.”)
Sa saunoa Elder Jeffrey R. Holland o le Korama a Aposetolo e Toasefululua i lenei faataoto:
O le Keriso o mea uma ia i tatou ma e tatau ona tatou “tumau” ia te Ia e faavavau, ia mausali, e lē liliu, e faavavau. Aua ina ia fua mai fua o le talalelei ma faamanuia ai o tatou olaga, e tatau ona tatou pipii mau ia te Ia. … O Ia o le vine o le faapogai moni o le malosi ma na o le pau lea o le faapogai o le ola e faavavau. (“Tumau ia te A’u,” Liahona, Me 2004, 32)
O le tumau ai, po o le mausalī ai, ia Iesu Keriso e mafai ai ona tatou maua Lona alofa tunoa ina ia mafai ai ona tatou faatoilaloina le agasala ma iloa ai lo tatou gafatia atoatoa. Sa aoao mai Liae, “E lē mafai e se tagata ona mau i le afioaga o le Atua, vagana ai ua ala atu i galuega, ma le alofa mutimutivale,ma le alofa tunoa o le Mesia Paia” (2 Nifae 2:8). Ma sa molimau mai Moronae o le alofa tunoa o Keriso e mafai ai ona avea i tatou e faapei o Ia—faapaiaina, faaatoatoaina, ma paia (tagai Moronae 10:32–33).
Na aoao mai Elder David A. Bednar o le Korama a Aposetolo e Toasefululua e faapea o le alofa tunoa ua faaavanoaina e ala i le Togiola a le Faaola “e fesoasoani tatou te vaai ai ma faia ma ia lelei i auala e lē mafai ai ona tatou iloa pe faataunuuina i lo tatou gafatia faatapulaaina faaletino” (“I Le Malosi o le Alii,” Liahona, Nov. 2004, 77).
Talanoa e Sauniuni ai mo le Vasega
Fesili i se uo po o se tagata o le aiga pe faapefea ona ia faamatalaina le alofa tunoa o Iesu Keriso ma pe faapefea ona ia maua Lona alofa tunoa.
Vaega 2
O le a le matafaioi a lo’u faatuatua ma le usiusitai i lo’u mauaina o le alofa tunoa o le Faaola?
Mafaufau i ata e lua o loo avatu faatasi ai. O nei ata e mafai ona faatusa i manatu e lua o le alofa tunoa paia. O nisi ua vaai i le alofa tunoa o se meaalofa ua foai fua mai e tusa lava po o a mea tatou te faia i le olaga. O isi e talitonu e mafai ona tatou maua le alofa tunoa o le Atua e ala i a tatou galuega lelei. E uiga i nei vaaiga e lua e le’i mae’a, na saunoa ai Elder Holland:
“O nisi meaalofa e maua mai le Togiola e laugatasia, e lē i’u, ma e lē faatuaoia. E aofia ai Lona totogi mo le uluai solitulafono a Atamu … [ma] le Toetu. …
“O isi itu o le meaalofa togiola a Keriso e i ai tuutuuga. E faalagolago i le filiga o le tagata i le tausiga o poloaiga a le Atua. Mo se faataitaiga, e ui o tagata uma o le aiga o tagata ua tuuina atu ma le saoloto se aoaiga mai le agasala a Atamu e ala i le leai o sa latou lava taumafaiga, e le tuuina atu ia i latou se aoaiga mai a latou lava agasala sei vagana ua latou tautino atu le faatuatua ia Keriso [ma] salamo i na agasala. …
Ua iloatino o faamanuiga e lē faatuaoia o le Togiola e le mafai ona galue ai ia maua, ae o faamanuiaga e i ai tuutuuga e le faapea foi o se mea ua alagatatau ai ona maua atoatoa. O le ola faamaoni ma le tausiga o poloaiga a le Atua, e mafai ai e se tasi ona maua avanoa faaopoopo; ae o loo tuuina mai fua foi, e le o maua tino i le na o le galueaiina. (“The Atonement of Jesus Christ,” Ensign, Mar. 2008, 36–37)
I le talanoa ai e uiga i meaalofa e i ai tuutuuga o le alofa tunoa ua maua e ala i le Togiola a le Faaola, na saunoa ai Nifae, “Ua matou iloa e faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23). O nisi ua lagona le atuatuvale i le fasifuaitau “pe a uma mea uma e mafai ona tatou faia.” Ina ia fesoasoani ia e malamalama atili i upu a Nifae, faitau faamatalaga nei a taitai o le Ekalesia:
“Ou te tomanatu lava pe o tatou faaliliuina sesē i nisi taimi le fasifuaitau “pe a uma mea uma e mafai ona tatou faia.” E tatau ona tatou malamalama o le “pe a uma” e lē tutusa ma le “ona.”
E lē faaolaina i tatou “ona” o mea uma e mafai ona tatou faia. Pe ua faia ea e se tasi o i tatou mea uma e mafai ona tatou faia? Pe o faatali ea le Atua seia maea uma a tatou taumafaiga ona faatoa Ia faasalāvei mai lea i o tatou olaga i Lona alofa tunoa laveai? …
Ou te talitonu sa iloa e Nifae o le alofa tunoa o le Faaola ua faataga ai ma ua mafai ai e i tatou ona faatoilalo le agasala [tagai 2 Nifae 4:19–35; Alema 34:31]. O le mafuaaga lea na matuā galue maelega ai Nifae e faatauanau lana fanau ma ona uso “ia talitonu ia Keriso, ma ia faalelei ma le Atua” [2 Nifae 25:23]. (Dieter F. Uchtdorf, “O Le Meaalofa o le Alofa Tunoa,” Liahona, Me 2015, 110)
Tatou te lē manaomia ona ausia nisi o tulaga o tomai po o ni lelei a o le’i fesoasoani mai le Atua—e mafai ona avea fesoasoaniga faalelagi mo tatou i itula uma o aso uma, e tusa lava po o fea o tatou i ai i le ala o le usiusitai. … O la’u aioi faigofie o le fai lea o lou lava tiutetauave ma alu e galue ina ia i ai se mea e fesoasoani mai ai le Atua ia i tatou. (D. Todd Christofferson, “Saoloto e Faavavau, e Galue mo i Latou Lava,” Liahona, Nov. 2014, 19)
O le meaalofa a le Faaola o le alofa tunoa ia i tatou e lē faapea e faatapulaaina i le taimi e “uma” ai mea uma e mafai ona tatou faia. E mafai ona tatou maua Lona alofa tunoa a o lei faia, a o faagasolo, ma le mavae ai o le taimi tatou te faia ai a tatou lava taumafaiga. (Bruce C. Hafen, The Broken Heart: Applying the Atonement to Life’s Experiences (1989), 155–56.
Mafaufau Loloto e Sauniuni ai mo le Vasega
O a nisi o manatu sesē ua e faalogo i ai e uiga i le alofa tunoa o le Faaola? E mafai faapefea e mea o loo e aoaoina e uiga i le alofa tunoa ona faamanuiaina ai oe ma isi e te iloa?
Vaega 3
E mafai faapefea e le alofa tunoa o le Faaola ona suia lo’u olaga?
Ua oo Iesu Keriso i tiga uma, faaosoosoga, lē atoatoa, ma vaivaiga o le olaga faaletino, o lea ua Ia silafia le ala e fesoasoani ai ia i tatou (tagai Eperu 2:18; 4:15; Alema 7:11–12; Mataupu Faavae ma Feagaiga 62:1). Ona o Iesu Keriso o se Faaola naunau ma gafatia, ua mafai ai ona tatou “faalatalata atu ma le faamalosi i le nofoalii o le alofa tunoa, ina ia alofaina ai o i tatou, ia maua ai foi le alofa tunoa e fesoasoani mai i ona aso e tatau ai” (Eperu 4:16).
Suesue e Sauniuni ai mo le Vasega
Mafaufau i mea e mafai ona e aoaoina e uiga i le sailia po o le mauaina o le alofa tunoa o le Alii mai se tasi pe sili atu o tala o mau nei.
-
Eteru 12:23–28: Ua popole Moronae i ona vaivaiga i le tusitusi.
-
2 Nifae 4:17–26, 30–33: Ua popole Nifae e uiga i ana agasala.
-
Mosaea 24:8–16: O loo tauivi le nuu o Alema i le faatagataotauaina.
-
Mose 6:27, 31–32; 7:10–13: Ua lagona e Enoka le lē agavaa e talai atu ma vavalo atu.
-
2 Korinito 12:7–10: O loo tautala Paulo e uiga i se “mea matuitui i le tino,” o se tala faatatau o loo ta’u mai ai se vaivaiga sa nofo ma ia lea na atuatuvale ai o ia.
Ao e faitau, mafaufau i fesili nei:
-
Na faapefea ona faaalia le alofa tunoa?
-
O le a le mea na fai e le tagata (po o tagata) e valaaulia pe faalagolago ai i le alofa tunoa o le Alii?
-
E mafai faapefea ona ou faaaogaina lenei tala i lo’u olaga?
Tusi Faamaumau Ou Manatu
Mafaufau ma tusifaamaumau se taimi e te lagona ai e pei ua e mauaina le alofa tunoa o le Alii. Ia manatua o le tele o taimi, e oo mai le alofa tunoa i ni auala laiti ma faatauvaa. Ia saunia e faasoa atu se faataitaiga i le vasega.