“Lesona 23 Anomea mo le Sauniuniga o le Vasega: Ola ma le Faamoemoe a o Tatou Saunia mo le Afio Mai Faalua o Iesu Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 23 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 23 Anomea mo le Sauniuniga o le Vasega
Ola ma le Faamoemoe a o Tatou Saunia mo le Afio Mai Faalua o Iesu Keriso
O nisi tagata e vaai i le Afio Mai Faalua o le Alii ma le fefe ma le popole. O isi ua faatalitali i ai ma le fiafia. Na saunoa Mai Elder Neil L. Andersen o le Korama a Aposetolo e Toasefululua, “E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai” (“Ua Matou Tautalatala e uiga ia Keriso,” Liahona, Nov. 2020, 91). A o e suesue, mafaufau i ou lagona e uiga i le toe afio mai o Keriso ma le auala e mafai ai e le saunia ma le faatuatua ona faateleina lou faamoemoe.
Vaega 1
E faapefea e se malamalama sa’o o le Afio Mai Faalua o le Faaola ma Lona nofotupu i le meleniuma ona aumaia ia te a’u le faamoemoe ma le filemu?
A o Ia aoao atu Ona soo i luga o le Mauga o Olive, sa faaali atu e Iesu ia faailoga ma tulaga o le a muamua mai i Lona Afio Mai Faalua. Na folafola mai e le Faaola o le a i ai Keriso pepelo, perofeta pepelo, taua, tala o taua, oge, faama’i, mafuie, amioletonu, ma faailoga i le lagi (tagai Joseph Smith—Mataio 1:22–23, 28–30, 33).
E pei o soo anamua o le Alii, atonu e te lagona le atuatuvale i faailoga o Lona toe afio mai. I le 1831, na maua ai e le Perofeta o Iosefa Samita se faaaliga na tuuina mai ai le vaaiga a le Alii e uiga i nei faailoga.
Suesue e Sauniuni ai mo le Vasega
Faitau le Mataupu Faavae ma Feagaiga 45:34–35, 38–39, ma vaavaai pe o le a le auala e finagalo Iesu Keriso tatou te vaavaai ai i faailoga o Lona Afio Mai Faalua. Mātau o le fefe e pei ona faaaogaina i le fuaiupu 39 e faatatau i le migao, tapuai, ma le maofa.
E tāua le manatua o faailoga o le Afio Mai Faalua o le Alii e aofia ai foi mea na tutupu i le Toefuataiga o Lana talalelei. Mafaufau pe faapefea e le oo mai o le Tusi a Mamona, le toefuataiga o le perisitua, aposetolo ma perofeta soifua, galuega faafaifeautalai, galuega o le malumalu ma talafaasolopito o aiga, ma le faapotopotoina o Isaraelu ona saunia ai i tatou mo le toe afio mai o le Faaola (tagai Malaki 4:5–6; Faaaliga 14:6–7; 1 Nifae 21:13–26; 3 Nifae 21:1–11; Mataupu Faavae ma Feagaiga 1:14, 17–18; 65).
Ua molimau mai Peresitene Russell M. Nelson:
O lo tatou Faaola ma le Togiola, o Iesu Keriso, o le a faatinoina nisi o Ana galuega mamana i le va o le taimi nei ma le taimi e toe afio mai ai o Ia. (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96)
O le a mulimuli mai le Meleniuma i le Afio Mai Faalua. I le taimi o le Meleniuma, ‘o le a nofotupu lava Keriso i le lalolagi’ (Mataupu Faavae o le Faatuatua 1:10). O se faaaliga na maua e ala mai i le Perofeta o Iosefa Samita ua faailoa mai ai le olaga o le a i ai i le taimi o le Meleniuma.
Suesue e Sauniuni ai mo le Vasega
Faitau le Mataupu Faavae ma Feagaiga 101:26–32, 35, ma mafaufau e faailoga tulaga o le a i ai i le taimi o le Meleniuma.
A o e mafaufau i le toe afio mai o le Faaola ma Lona nofotupu i le meleniuma, mafaufau pe faapefea ona faatatau le fautuaga lenei mai ia Elder Ronald A. Rasband o le Korama a Aposetolo e Toasefululua i lou olaga:
Po o le a lava le tele o le amioleaga ma vevesiga ua faatumulia ai le lalolagi, ua folafola mai ia i tatou e ala i lo tatou faamaoni i aso taitasi ia Iesu Keriso le “[filemu] mai le Atua, o loo silisili lava i mea uma e manatu i ai” [Filipi 4: 7]. Ma pe a afio mai Keriso i le mana ma le mamalu atoa, o le a muta le amioleaga, fouvale, ma faiga lē tonu. …
… Ioe, ua tatou ola i taimi faigata, ae pe a tatou tumau ai i luga o le ala o feagaiga, e lē tatau ona tatou fefefe. Ou te faamanuiaina outou a o outou faia, o le a outou lē atuatuvale i taimi ua tatou ola ai po o faafitauli e oo mai ia te outou. … Ou te faamanuiaina outou ina ia talitonu i folafolaga a Iesu Keriso, o loo soifua o Ia, ma o loo Ia vaavaaia i tatou, popole mo i tatou, ma tu i o tatou autafa. (“Aua Le Atuatuvale,” Liahona, Nov. 2018, 19, 21)
Mafaufau Loloto e Sauniuni ai mo le Vasega
O a ni ou mafaufauga ma lagona a o e vaai faalemafaufau i le toe afio mai o le Faaola ma Lona nofotupu i le meleniuma? E faapefea e le taulai atu i le Faaola ona faateleina ou lagona o le faamoemoe ma le filemu a o e feagai ma luitau o aso e gata ai?
Vaega 2
E faapefea ona ou saunia lelei a’u lava ma isi mo le toe foi mai o le Alii?
E tusa ai ma faailoga o le Afio Mai Faalua (tagai Mataio 24), na aoao atu ai e le Faaola le faataoto i taupou e toasefulu. O lenei faataoto e faatatau i tu ma aga o faaipoipoga a Iutaia. O le faatoafaiava, faatasi ai ma uo mamae, e o atu i le po i le fale o le faatoanofotane mo le sauniga o le faaipoipoga. A maea le sauniga, ona faagasolo lea o le pati o le faaipoipoga i le fale o le faatoafaiava mo se tausamiga. O valaaulia o le faaipoipoga na auai i le solo e tatau ona ave a latou lava lamepa e faailoa ai o i latou o se vaega o le pati o le faaipoipoga.
Na aoao mai Peresitene Dallin H. Oaks o le Au Peresitene Sili o le faatoafaiava e faatusa ia Iesu Keriso, ma o taupou o tagata o Lana Ekalesia (tagai “Sauniuniga mo le Afio Mai Faalua,” Liahona, Me 2004, 8).
Suesue e Sauniuni ai mo le Vasega
Faitau le Mataio 25:1–13, ma manatunatu i au sauniuniga mo le toe afio mai o le Alii. (Manatua: O le Faaliliuga a Iosefa Samita o le Mataio 25:12 e faitauina “Tou te le iloa au” nai lo le “Ou te le iloa outou.”) E mafai foi ona e maimoa i le vitiō “They That Are Wise” (mai le taimi 0:00 i le 5:46) po o le “The Ten Virgins” (1:40).
Na fetalai mai le Alii e uiga ia i latou na saunia mo le tausamaaga: “O i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a lē tatuuina i latou i lalo ma lafo i le afi, ae o le a latou gafatia le aso.” (Mataupu Faavae ma Feagaiga 45:57).
Na saunoa foi Peresitene Nelson e uiga i le tāua o le avea o le Agaga Paia ma o tatou taiala:
I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia. …
Ou te aioi atu ia te outou ia faateleina lo outou gafatia faaleagaga e maua ai faaaliga. (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96)
Tusi Faamaumau Ou Manatu
Tusi faamaumau lau tali i le fesili lenei mai ia Peresitene Oaks: “Afai sa tatou iloa o taeao le aso tatou te faafetaia’i ai i le Alii—e ala i lo tatou oti faafuasei, po o Lona tu faafuase’i mai foi—o le a [sau] mea e fai i le aso?” (“Sauniuniga mo le Afio Mai Faalua,” Liahona, Me 2004, 9).