Lesona 27 Anomea mo le Sauniuniga o le Vasega

Mauaina o le Faamoemoe i le Malamalama ma le Ola o le Lalolagi

E ui lava tatou te mananao i o tatou olaga ia fiafia, ae o nisi taimi o lagona o le pogisa ma le faanoanoa e taatele ia i tatou uma. O nei lagona e mafai ona sau mai le agasala, fefe, masalosalo, po o le leiloa. O lagona o se vaega masani o lo tatou aafiaga i le olaga nei. A o e suesue, mafaufau pe faapefea ona e mauaina le malosi ia Iesu Keriso, o lē “o le malamalama, o le ola, ma le faamoemoega o le lalolagi” (“O Le Keriso Soifua: O Le Molimau a le Au Aposetolo,” ChurchofJesusChrist.org).

Vaega 1

E mafai faapefea e le malamalama ma le ola ua saunia e Iesu Keriso ona faamalosia ai a’u?

Na valoia e Isaia o le a avea le Mesia ma malamalama i le lalolagi (tagai Isaia 49:6; 60:1–3). Na faamautinoa mai e Iesu Keriso o Ia o le Mesia na valoiaina ina ua Ia folafola mai, “O A’u nei o le malamalama o le lalolagi; o lē mulimuli mai ia te au, e lē savali o ia i le pouliuli, a e ia te ia le malamalama o le ola” (Ioane 8:12).

Na faamatala mai e Peresitene Dallin H. Oaks, fesoasoani i le Au Peresitene Sili:

“O Iesu Keriso o le malamalama o le lalolagi auā o ia o le punavai o le malamalama e faatelevaveina ai lo tatou malamalamaaga, auā o ana aoaoga ma ana faataitaiga e faamalamalamaina ai o tatou ala, ma ona o lona mana e faaosofia ai i tatou e faia mea lelei. (“The Light and Life of the World,” Ensign, Nov. 1987, 63, 64)

Ina ua faaali atu Iesu Keriso i sa Nifae ma sa Lamana sa Ia tautino atu, “Ma faauta, o au o le malamalama ma le ola o le lalolagi” (3 Nifae 11:11, ua faaopoopo le faamamafa; tagai foi Mosaea 16:9). Na saunoa Peresitene Oaks e uiga i le matafaioi a le Faaola o le ola o le lalolagi:

O Iesu Keriso o le ola o le lalolagi ona o lona tulaga faapitoa e pei ona tā’ua i tusitusiga paia o “le fuafuaga tele ma faavavau o le laveaiga mai le oti” (2 Nifae 11:5). …

[O Ia] o le ola o le lalolagi ona o lona toetu ma lana togiola ua laveaiina ai i tatou mai le oti faaletino ma le faaleagaga. (“The Light and Life of the World,” Ensign, Nov. 1987, 64, 65)

Sa faasoa mai e Sister Sharon Eubank, Fesoasoani Muamua i le Au Peresitene Aoao o le Aualofa, se aafiaga e faapupula mai ai le tāua o le avea o Iesu Keriso ma malamalama ma le ola o ō tatou olaga:

O lo’u ofisa i le Maota o le Aualofa e i ai se vaaiga atoatoa o le Malumalu o Sate Leki. O po uma, e pei o le galuega a le uati, e ola moli o fafo o le malumalu pe a tau pogipogi. O le malumalu o se sulu e mumu tumau ma le mautinoa i fafo atu o lo’u faamalama.

I se tasi po ia Fepuari ua mavae atu, sa lē masani ai le pogisa pea o lo’u ofisa a o goto ifo le la. Ina ua ou tilotilo atu i fafo i le faamalama, sa pogisa mai le malumalu. E le’i kiina moli. Sa vave ona ou mafaufau. Sa lē mafai ona ou vaai atu i tumutumu o le malumalu sa ou vaaia i afiafi uma mo tausaga e tele.

O le vaaia o le pogisa i mea sa ou faamoemoe e iloa atu ai le malamalama sa faamanatu mai ai ia te a’u o se tasi o ō tatou manaoga tāua ina ia tuputupu a’e ai o le fesootai pea i le puna o le malamalama—o Iesu Keriso. O Ia o le puna o lo tatou mana, o le Malamalama ma le Ola o le Lalolagi. A aunoa ma se fesootaiga malosi ia te Ia, e amata ona tatou feoti faaleagaga. O le iloaina o lena mea, e taumafai ai Satani e faaaoga ia faatosinaga faalelalolagi ua fetaiai ma i tatou uma. E galue o ia e faaitiitia lo tatou malamalama, talepe fesootaiga, motusia le sapalai o le eletise, ma tuua ai na o i tatou i le pogisa. (“O Keriso: O Le Malamalama e Susulu i le Pogisa,” Liahona, Me 2019, 73)

Mafaufau Loloto e Sauniuni ai mo le Vasega

O a faamanuiaga ua e oo i ai i lou olaga ina ua e faia ni taumafaiga e fesootai atu i le Malamalama ma le Ola o le Lalolagi? O le a se mea e mafai ona e faia ia malosi atili ai lena fesootaiga?

Vaega 2

E faapefea e le iloaina o Iesu Keriso ona aumaia ia te a’u le faamoemoe?

O le faatinoina o le faatuatua ia Iesu Keriso o le Malamalama ma le Ola o le Lalolagi e mafai ona faamanuiaina ai o tatou olaga i le tele o auala. O se tasi o na auala o le tuuina mai lea ia i tatou o le faamoemoe.

Sa faamalamalama mai e Peresitene Dieter F. Uchtdorf, a’o avea o se fesoasoani i le Au Peresitene Sili, le auala e aumaia ai e le malamalama ma le ola o Iesu Keriso le faamoemoe:

E moni lava le malamalama o le Atua. Ua avanoa mo tagata uma! Na te avatua le ola i mea uma [tagai Mataupu Faavae ma Feagaiga 88:11–13]. Ua i ai le mana e faamāmā ai le tiga o se manua aupito loloto. E mafai ona faamaloloina le tuuatoatasi ma le gasegase o ō tatou agaga. E oo lava i taimi o faigata, na te mafai lava ona aumaia se faamoemoe susulu. (“O Le Faamoemoe o le Malamalama o le Atua,” Liahona, Me 2013, 75)

Mai le Taiala i Tusitusiga Paia tatou te faitau ai: “I la tatou gagana i aso uma, o le upu [faamoemoe] e masani ona i ai se faaiteite o le lē mautonu. Mo se faataitaiga, atonu tatou te faapea tatou te faamoemoe mo se suiga i le tau po o se asiasiga mai se uo. Peitai, i le gagana a le talalelei, o le upu faamoemoe o le mautinoa, lē maluelue, ma malosi. Ua fetalai perofeta i le mauaina o se “faamoemoe mausali” (Alema 34:41) ma se “faamoemoe ua ola” (1 Peteru 1:3)” (Taiala i Tusitusiga Paia, “Faamoemoe,” scriptures.ChurchofJesusChrist.org).

A o e mafaufau i luitau na e oo i ai, manatua na soifua le perofeta o Mamona i se aso na pulea ai e le pogisa faaleagaga le ola o sa Nifaē (tagai Mamona 1–6). I nei taimi faigata, na aoao mai ai e Mamona le auala e faateleina ai lo tatou faamoemoe.

Suesue e Sauniuni ai mo le Vasega

Faitau le Moronae 7:40–42, ma vaavaai mo le sootaga i le va o le faatuatua, faamoemoe, ma le Togiola a Iesu Keriso.

Na aoao mai Elder David A. Bednar o le Korama a Aposetolo e Toasefululua e faapea:

O le faatuatuaina ma le talitonuga ia Keriso ma se faalagolagoga naunautai i Ana galuega, alofa mutimutivale, ma le alofa tunoa e taitai atu i le faamoemoe e ala i Lana Togiola, i le Toetu ma le ola e faavavau (tagai Moronae 7:41). O lea faatuatua ma le faamoemoe e valaauliaina le filemu matagofie o le māgafagafa lelei i o tatou olaga lea tatou te naunau uma i ai. (“O Lea Na Latou Faafilemu Ai Lo Latou Matata’u,” LiahonaMe 2015, 47)

E pei o Mamona, sa soifua foi le perofeta o Eteru i se taimi faigata (tagai Eteru 11). Ma e pei foi o Mamona, na aoao mai Eteru e oo lava i taimi sili ona faigata e mafai ona tatou maua ai le faamoemoe ia Iesu Keriso.

Suesue e Sauniuni ai mo le Vasega

Faitau le Eteru 12:4, ma vaavaai pe faapefea e le faamoemoe ia Keriso ona aafia ai o tatou olaga i aso uma.

Ina ia aoao atili e uiga i le mana o le faamoemoe, faitau le saunoaga lea a Peresitene Uchtdorf pe maimoa le “The Power of Hope” (2:11):

O le faamoemoe o se meaalofa a le Agaga [tagai Moronae 8:26]. …

[O le] faatuatua tumau o le a faapea ona faataunuuina ai e le Alii Ana folafolaga ia i tatou. O le mautinoa lea afai o le a tatou ola e tusa ai ma tulafono a le Alii ma upu a Ana perofeta i le taimi nei, o le a tatou maua faamanuiaga manaomia i le lumanai. O le talitonu ma le faamoemoe o le a taliina a tatou talosaga. E faaali mai i le talitonu [ia te oe lava], lagona o le a lelei mea uma, naunautai, ma le faapalepale ma le onosai.

E tusa lava po o le a le pogisa o le mataupu o ō tatou olaga i aso nei, ona o le soifuaga ma le taulaga a Iesu Keriso, e mafai ona tatou faamoemoe ma mautinoa o le iuga o le tusi o ō tatou olaga o le a sili atu nai lo ō tatou faamoemoega silisili. (“O Le Mana e Le Iu o le Faamoemoe,” Liahona, Nov. 2008, 21, 22)

Suesue e Sauniuni ai mo le Vasega

Faitau se tasi pe sili atu o tala o mau nei, pe filifili sau oe lava tala. Vaavaai mo faamaoniga o le faatuatua i le Alii e mafai ona aumaia ia i tatou le faamoemoe. Ia saunia e faasoa atu mea sa e aoaoina ma lau vasega.

• Sataraka, Mesako, ma Apeteniko: Tanielu 3:1, 6, 8, 12–14, 16–20, 23–25

• O se fafine na maua i le punatoto: Mareko 5:25–34

• Fafine na mulumuluina aao o le Faaola: Luka 7:36–50

• Aneti-Nifae-Liae: Alema 23:4–7; 24:1–27

• O tagata talitonu o sa Nifaē ma sa Lamanā sa tulimatai atu i le soifua mai o Keriso: 3 Nifae 1:4–15

Mafaufau Loloto e Sauniuni ai mo le Vasega

O le a se mea na e aoaoina e uiga i le faamoemoe mai fuaitau o mau po o fuaitau sa e suesueina? A o e sailia le meaalofa faaleagaga o le faamoemoe, o le a se mea e mafai ona e faia e valaaulia ai lenei meaalofa i lou olaga?

E Te Fia Aoao Atili? (Tuu i le faitalia)

E faapefea ona ou maua le faamoemoe ia Iesu Keriso?

I le lauga “Faamoemoeia Keriso” (Liahona, Me 2021, 53–56), sa talanoaina ai e Peresitene M. Russell Ballard o le Korama a Aposetolo e Toasefululua le auala e mafai ai ona tatou faamalosia lo tatou faamoemoe, e tusa lava pe tatou te feagai ma le faaesea ma le faanoanoa.

I le lauga “I Mala, i Manū, Iesu, Afio Mai!” (Liahona, Nov. 2019, 57–60), na saunoa ai Sister Reyna I. Aburto o le Au Peresitene Aoao o le Aualofa e uiga i le ala e mafai ai ona tatou maua le faamoemoe pe a mafatia mai le atuatuvale ma le popole.

I le faaputuga vitiō Hope Works, ua faasoa mai ai e tagata o le Ekalesia le auala na aumaia ai e le talalelei ia i latou le faamoemoe a o latou feagai ma luitau o le olaga.

O faapefea ona lagonaina le uunaiga a le Faaola e ala i le Malamalama o Keriso?

O le Malamalama o Keriso e mafai ona tuuina atu le taitaiga ma le faamoemoe i tagata uma i se lalolagi ua matuā faapogisaina. Moronae 7:12–19 ma le Mataupu Faavae ma Feagaiga 88:6–13 o loo aoao mai ai upumoni tāua e uiga i le Malamalama o Keriso.

I le vitiō “Patterns of Light: The Light of Christ” (2:33), o loo faamatala mai ai e Elder David A. Bednar le aafiaga o le Malamalama o Keriso i o tatou olaga.

Na aoao mai e Elder Timothy J. Dyches, sa avea ma Fitugafulu, mea e mafai ona tatou faia e faateleina ai le Malamalama o Keriso i o tatou olaga i le lauga “OLe Malamalama e Pipii i le Malamalama” (Liahona, Me 2021, 112–15).