Mataupu 1
O Le Faamoemoega o Galuega o le Malumalu ma Talafaasolopito o Aiga
O Le Fuafuaga Tele o le Fiafia
Ae e te lei fanau mai, sa e ola faatasi ma le Tama Faalelagi. Sa Ia finagalo ina ia e fiafia ma ia avea e faapei o Ia. Sa Ia faailoa mai se fuafuaga mo oe ma mo Ana fanau uma ina ia o mai i le lalolagi ma ia toe foi atu i Lona afioaga. Ua faamoemoeina lou olaga e avea o se malaga e agai atu i le aiga i le afioaga o le Atua i Lona malo selesitila.
O le a faigata lenei malaga e aunoa ma le Togiola a lo tatou Faaola o Iesu Keriso. O le Togiola a le Faaola ua mafai ai e i tatou uma ona salamo ma faamagaloina a tatou agasala ma ia toetutu ai. Tatou te maua ia faamanuiaga atoatoa o le Togiola e ala i le taliaina o sauniga o le talalelei ma osia ma tausia ia feagaiga paia ma le Atua.
O se sauniga o se faatinoga paia po o se sauniga ua faatinoina e ala i le pule o le perisitua. O nisi sauniga e taua mo le faaeaga. E aofia ai i nei sauniga le papatisoga, faamauga, faauuga i le Perisitua Mekisateko mo alii, ma sauniga o le malumalu. O le mauaina o nei sauniga e tatau ona avea ma sini a tagata uma o le Au Paia o Aso e Gata Ai. E aofia i nei sauniga taua taitasi ia feagaiga po o folafolaga e osia ma le Atua.
Sa faamalamalama mai e Peresitene Boyd K. Packer o le Korama a Aposetolo e Toasefululua le matafaioi o sauniga ma feagaiga:
“O sauniga ma feagaiga e avea ma o tatou agavaa mo le ulufale atu i le afioaga o le [Atua]. Ina ia mauaina ma le agavaa [ia sauniga ma feagaiga] o le sailiga lea i le olaga atoa; o le tausia ai pe a mavae ona maua, o le luitau lea o le olaga nei. Pe a maea ona tatou mauaina ia sauniga ma feagaiga mo i tatou lava ma mo o tatou aiga, ua noatia i tatou e faia nei sauniga suitulaga mo o tatou aiga ua maliliu, o le mea moni lava e mo le aiga atoa o tagata” (i le Lipoti o le Konafesi, Ape. 1987, 27; po o le Liahona, Iul. 1987, 24).
O Aiga e Faavavau o le Vaega o le Fuafuaga
E taua aiga i le fuafuaga o le fiafia a le Tama Faalelagi. O oe o se vaega o se aiga faalelagi ma se aiga faalelalolagi. Sa aoao mai Peresitene Gordon B. Hinckley:
“O le Atua na mamanuina le aiga. Na ia fuafua o le fiafia silisili, o mea silisili ona faamalieina o le soifuaga, o le olioli silisili, e tatau ona i ai i a tatou fegalegaleaiga faatasi faapea ai ma le popole o le tasi mo le isi, o ni tama ma tina ma fanau” (i le Lipoti o le Konafesi, Ape. 1991, 98; po o le Liahona, Iul. 1991, 80).
Ua ia te oe se malamalama o le talalelei a Iesu Keriso ma ua mauaina foi nisi o sauniga o le talalelei. Ae le o tagata uma o lou aiga ua mauaina lea lava avanoa e tasi. O le toatele o ou tuaa—ma atonu e oo lava i nisi o tagata patino o lou aiga—ua maliliu e aunoa ma le faalogo i le talalelei pe mauaina ia sauniga faaola. E tonu ma e alofa mutimutivale le Tama Faalelalgi, ma ua Ia saunia se ala mo i latou e maua ai nei faamanuiaga.
O loo nonofo ou tuaa ua maliliu i se nofoaga e ta’ua o le lalolagi o agaga. O iina latou te maua ai le avanoa e faalogo ai ma talia le talalelei a Iesu Keriso. Peitai, latou te le mafai ona mauaina ia sauniga o le talalelei mo i latou lava, ma e le mafai ona latou alualu i luma seiloga e faia e isi nei sauniga mo i latou.
O lou avanoa ma le tiutetauave o le tuu atu lea i ou tuaa o lenei meaalofa e ala i le sueina o i latou ma faamautinoa ua faatinoina ia sauniga e fai ma o latou sui i le malumalu. Ona mafai lea ona latou filifili pe talia le galuega ua faia mo i latou.
O au taumafaiga e fai ai ma sui o ou tuaa ua mamanuina e tusa ma le galuega a le Faaola, e ui lava ua na o se fuataga itiiti. Ua faatagaina e le Faaola i tatou uma ina ia toe foi atu i le afioaga o le Tama Faalelagi e ala i le Togiola, ma ia e fesoasoani i ou tuaa ia maua ia faamanuiaga o le Togiola e ala i le faia o sauniga ua avanoa mo i latou. E te faia se galuega faaola mo i latou e le mafai ona latou faia mo i latou lava.
Na aoao mai le Perofeta o Iosefa Samita e faapea o le Au Paia o Aso e Gata Ai e ao ona avea ma faaola i le Mauga o Siona. Na ia faamalamalama mai:
“E faapefea ona avea i latou ma faaola i le Mauga o Siona? E ala i le fausiaina o malumalu, faatuina o vai papatiso, ma o atu i luma ma mauaina ia sauniga uma … i luga o o latou ulu, e fai ai ma sui o o latou tuaa uma ua maliliu, ma togiola i latou ina ia mafai ona latou toetutu i le uluai toetu ma faaeaina i nofoaalii o le mamalu ma i latou” (History of the Church, 6:184; tagai foi Opetaia 1:21).
O galuega o le malumalu ma talafaasolopito o aiga e tuufaatasia ai aiga. E mafai ona faamauina ia tane ma ava, matua ma fanau e ala i sauniga paia o le malumalu. O le sini o lenei faagasologa e faapea “o le filifili atoa o le aiga o le Atua o le a sosoo faatasi ia avea ma se filifili e tasi, ma o le a avea ai i latou uma ma le aiga o le Atua ma Lona Keriso” (Joseph F. Smith, Millennial Star, Oct. 4, 1906, 629).
O Le Misiona a Elia
O ki o le sosooina po o le mana faamau o le Perisitua Mekisateko na faaee atu i luga o Elia, o se perofeta o le Feagaiga Tuai. Ua aofia i lenei perisitua le pule e faatino ai ia sauniga ia e tuufaatasia ai aiga e faavavau.
Na muai tauina mai e perofeta anamua le toe foi mai o Elia a o le i oo i le Afio Mai Faalua o Iesu Keriso. Na faasoa atu e le Alii lava Ia lenei valoaga i le au sa Nifae: “Faauta, o le a ou auina atu ia te outou Elia le perofeta ae lei oo mai le aso tele ma le matautia o le Alii; Ma o le a ia liliu loto o tamā i fanau, ma loto o fanau i o latou tamā, nei ou alu atu ma taia le lalolagi i se fetuu” (3 Nifae 25:5–6; tagai foi Malaki 4:5–6; MF&F 2:1; Iosefa Samita—Talafaasolopito 1:38–39). O lenei valoaga o se tasi foi lea o uluai savali na tuu atu e Moronae i le taulealea o Iosefa Samita.
Sa aoao mai Peresitene Henry B. Eyring o le Au Peresitene Sili:
“E taua le iloa o le mafuaaga na folafola mai ai e le Alii e auina mai Elia. O Elia o se perofeta maoae sa i ai le mana maoae na tuuina i ai e le Atua. Sa ia umia le mana silisili na tuuina mai ele Atua i Ana fanau: na ia umia le mana faamau, le mana e fusifusia ai i le lalolagi ma fusifusia ai foi i le lagi. … Ma na tausia e le Alii Lana folafolaga e auina mai Elia. Na oo mai Elia i le Perofeta o Iosefa Samita i le aso 3 o Aperila, 1836, ina ua faatoa maea lava ona faapaia le Malumalu o Katelani, le uluai malumalu na fausia ina ua maea le Toefuataiga o le talalelei” (i le Lipoti o le Konafesi, Ape. 2005, 80; po o le Liahona, Me 2005, 78).
Ina ua faaali atu Elia i le Perofeta o Iosefa Samita, sa ia faapea atu, “Faauta ua oo atoa mai le taimi … e liliu ai loto o tama i fanau, ma fanau i tama. … O lea, ua tuu atu i o oulua lima ki o lenei tisipenisione” (MF&F 110:14–16).
Talu mai lena taimi, ua faaee atu ai lava le mana faamau i alii e pei ona faatagaina ai e le Peresitene o le Ekalesia. E faaaoga e nei alii e umiaina le perisitua le mana faamau e faatino ai sauniga i le malumalu mo e o soifua ma e ua maliliu. O le toe foi mai o Elia ua faailogaina ai le amataga o se fiafia o le lalolagi atoa i sailiga o gafa lea o loo faaauau pea ona faatupulaia.
Sa aoao mai e Elder Russell M. Nelson o le Korama a Aposetolo e Toasefululua e faapea sa o mai faatasi le Agaga Paia ma Elia i lona toe foi mai:
“Na oo mai Elia e liliu loto o tama i a latou fanau ma fanau i o latou tama. Faatasi ai ma lena, ua amata ai ona faamauoaina le alofa moni i augatupulaga. O lenei toefuataiga na o mai faatasi ma le mea e ta’ua i nisi taimi o le Agaga o Elia—o se faaaliga mai o le Agaga Paia o loo molimau i le uiga paia o le aiga. O le mea lea, o tagata i le lalolagi atoa, e tusa pe o a o latou talitonuga faalelotu ua latou faaputuputuina faamaumauga o tagata o o latou aiga ua maliliu i se saoasaoa ua faateleina.
“E le i sau Elia e na ona faaosofia le sailiga mo tuaa. Ua mafai foi ona ia faafesootaia faatasi e faavavau ia aiga i tala atu o noataga o le olaga nei. E moni lava, o le avanoa mo aiga ina ia faamauina ai e faavavau o le mafuaaga moni lea mo la tatou sailiga” (i le Lipoti o le Konafesi, Ape. 1998, 43; po o le Liahona, Iul. 1998, 41).
O Faamanuiaga o Lenei Galuega
Sa faamamafa mai e Peresitene Thomas S. Monson e faapea o faamanuiaga maoae e oo mai ia i latou e auai i galuega o le malumalu:
“O aso nei, o aso o le fausiaina o malumalu. E le i i ai se taimi muamua na matua tele naua ai malumalu e fausia ma faapaia. … O le a faamanuiaina e malumalu i latou uma e auai atu ma i latou e ositaulaga mo le faamae’aina. O le a susulu le malamalama o Keriso i tagata uma—e oo lava ia i latou ua tuua lenei olaga” (i le Lipoti o le Konafesi, Ape. 1999, 76; po o le Liahona, Iul. 1999, 70).
E mafai ona faamanuiaina ma puipuia oe ma lou aiga e galuega o le malumalu ma talafaasolopito o aiga. Sa folafola mai e Peresitene Boyd K. Packer:
O le a faamanuiaina i tatou e le Alii pe a tatou auai i galuega o sauniga paia o le malumalu. O faamanuiaga iina o le a le faatapulaaina mo na o galuega tatou te faia i le malumalu. O le a faamanuiaina i tatou i a tatou galuega uma. O le a tatou agavaa ai i le gauai mai o le Alii i a tatou galuega uma faaleagaga ma faaletino. …
“O a tatou galuega i le malumalu e ufitia ai i tatou i se ufifatafata ma se puipuiga, i le avea ai ma ni tagata taitoatasi faapea ma se nuu” (The Holy Temple [1980], 182, 265).
A o e saunia le talafaasolopito o lou aiga ma alu i le malumalu mo ou tuaa, o le a e lagonaina le uunaiga sili ona mamana a le Agaga Paia i lou olaga. O le a faamalosia oe e faia ia sili atu ona mataalia lenei galuega ma isi galuega o lou olaga. A o e faia le galuega a le Alii, o le a e iloa atili ai o Ia ma avea atili ai e faapei o Ia.