Mataupu 4

Faamaumauina o Faamatalaga o Talafaasolopito o Aiga

O Le Taua o le Tausia o Faamaumauga

I lenei mataupu o le a e aoao ai i le auala e faamaumau ai ia faamatalaga faaleaiga ua e aoina mai. O le a e iloa e sili atu ona aoga le faamaumauina o faamatalaga a o e aoina mai. O le faagasologa o le aoina mai o faamatalaga mai le tele o punavai eseese ona faamaumau lea o le a faia soo i le tele o taimi a o e taumafai e aoao e uiga i ou tuaa.

Ao mai ia Faamatalaga

Faamaumau ia Faamatalaga

Faatino ia Sauniga o le Malumalu

I le taimi o Atamu ma Eva ma a la fanau, sa latou “tausia se tusi faamanatu,” ma sa “tausia se gafa o le fanau a le Atua” (Mose 6:5, 8). O le taua o nei faamaumauga ma isi faamaumauga o loo faaalia i le poloaiga a le Alii ia Liae ma lona aiga ina ia aumai ia papatusi apamemea. Na manaomia e le aiga o Liae ia papatusi ona o loo i ai i nei faamaumauga o latou gafa ma aoaoga a perofeta. Mai ia papatusi, na aoao ai e sa Nifae a latou fanau e uiga i le talalelei faapea ma o latou tuaa. (Tagai 1 Nifae 3:3–4; 5:14–16.)

Sa aoao mai e le Perofeta o Iosefa Samita le taua o le tausiaina o faamaumauga. Na ia tautino mai: “Ia tatou tuu atu i lona malumalu paia … se tusi ua i ai talafaamaumau o o tatou tagata maliliu, lea o le a agavaa mo le talia atoatoa” (MF&F 128:24).

O faamaumauga o loo e teumaluina o soifuaga o ou tuaa ma lou lava soifuaga—e aofia ai api talaaga, talaaga faaletagata lava ia, ma isi faamaumauga o talafaasolopito o aiga—e mafai ona faamanuiaina ai ou tuaa, o fanau, tagata lautele o le aiga, ma isi.

Faaaogaina o le Saite o le Initoneti o le FamilySearch

E mafai ona tusi lima ia faamatalaga o le talafaasolopito o le aiga pe faamaumau foi i le komepiuta, ae a o le i mafai ona faia ia sauniga o le malumalu mo ou tuaa, e tatau ona taina i totonu o latou faamaumauga i le saite o le Initoneti o le FamilySearch i le new.familysearch.org. Pe a taina i totonu ia faamatalaga o le talafaasolopito o lou aiga i lenei saite, o le polokalama o le a:

• Faaalia pe o a faamatalaga ua uma ona aoina mai e uiga i lou aiga.

• Faaalia pe o a sauniga o le malumalu ua maea ona fai ma o a foi sauniga e manaomia ona faia.

• Saunia se ala mo oe e lolomi ai ia fomu o le Family Ordinance Request (Talosaga a le Aiga mo Sauniga) e mafai ona ave i le malumalu.

• Faatagaina isi tagata sailiili e faaaoga ia au faamatalaga o le talafaasolopito o lou aiga e fesoasoani ai ia i latou i a latou sailiiliga.

• Fesoasoani ia te oe e sue ma fesootai atu i isi tagata lautele o le aiga o e o loo sailia foi ou tuaa.

E mafai ona e taina i totonu au faamatalaga o le talafaasolopito o aiga i le saite o le Initoneti o le FamilySearch, pe e mafai foi ona e tuuina atu au faamatalaga tusitusia i se faufautua o talafaasolopito o aiga, e mafai ona fesoasoani ia te oe e taina i totonu ia faamatalaga pe faia foi mo oe.

Taina i Totonu o Faamatalaga e Oe Lava Ia

Afai o loo e faaaogaina le Initoneti, mulimuli i laasaga nei i le taina sa’o i totonu o au faamatalaga o le talafaasolopito o lou aiga i le saite o le Initoneti o le FamilySearch:

1. Resitala pe alu i totonu o le new.familysearch.org. Afai faatoa e faaaogaina le polokalama mo le taimi muamua, o le a e manaomia le numera o lau pepa faamaumau o le Ekalesia ma le aso o le faamauga o lou papatisoga, e faailoa ai oe.

2. Ta i totonu ia faamatalaga o le talafaasolopito o aiga ua e aoina mai, e aofia ai ia auiliiliga pe faapefea ma pe o fea foi na e maua mai ai ia faamatalaga. Faasa’o soo se faamatalaga e le sa’o atonu na maua i lau sailiiliga. O le a faailoa mai e le polokalama ia te oe mea e ta i totonu ma faailoa atu pe o manaomia nisi faamatalaga a o le i mafai ona e faatinoina ia sauniga o le malumalu mo ou tuaa.

Galulue faatasi ma se Faufautua o Talafaasolopito o Aiga

Afai e te le o mauaina le Initoneti pe le silafia foi ona faaaoga se komepiuta, e mafai ona e faamaumauina au faamatalaga o le talafaasolopito o lou aiga i ni fomu. Ona mafai lea ona e galue faatasi ma lou faufautua o talafaasolopito o aiga e ta i totonu ia faamatalaga i le saite o le Initoneti o le FamilySearch.

E faatagaina e le saite o le Initoneti o le FamilySearch oe e lolomi le pepa o le faasologa o gafa ma talafaamaumau o vaega faaleaiga mo le aiga o loo e sailia. E mafai ona fesoasoani atu lou faufautua o talafaasolopito o aiga po o le aufaigaluega i se nofoaga autu o talafaasolopito o aiga ia te oe e lolomi au faamatalaga faaleaiga mai le saite. A o e aoina ia faamatalaga faaopoopo o le talafaasolopito o aiga, e mafai ona e faamaumauina i luga o nei pepa ua lolomiina. Afai e le mafai ona e mauaina ia pepa ua lolomiina, e mafai ona e faaaogaina ia pepa o le faasologa o gafa ma talafaamaumau o vaega faaleaiga e le i faatumuina (tagai faaopoopoga A mo ni kopi o nei fomu).

Pe a uma ona e tusia au faamatalaga o le talafaasolopito o lou aiga i pepa ua lolomiina mai le saite o le Initoneti pe o luga o pepa o le faasologa o gafa ma talafaamaumau o vaega faaleaiga, ave ia fomu i lou faufautua o talafaasolopito o aiga, lea e mafai ona fesoasoani ia te oe e ta i totonu ia faamatalaga i se komepiuta. Afai e le o maua se fesootaiga o le Initoneti i la outou eria, e mafai ona fesoasoani le faufautua o talafaasolopito o aiga ia te oe e auina atu ia kopi o au fomu i se nofoaga autu o talafaasolopito o aiga po o nisi nofoaga e mafai ai ona taina i totonu ia faamatalaga i le saite o le Initoneti o le FamilySearch.

Pe Faapefea ona Faamaumau ia Faamatalaga i luga o Fomu

O pepa o le faasologa o gafa ua faaalia ai ia sootaga o aiga lautele mai tupulaga i tupulaga. Ua faaalia i le pepa o le faasologa o gafa ia tuaa tonu o se tagata e toatasi, o lona igoa o loo faamaumau i le itu tauagavale o le pepa. Faaaoga ia talafaamaumau o vaega faaleaiga ua faatumuina ma isi faamatalaga ua e aoina e faatumu ai se pepa o le faasologa o gafa.

Mulimuli i laasaga nei:

1. Tusi le igoa o le tagata muamua i le laina 1 o le pepa o le faasologa o gafa. Faatumu ia auiliiliga e uiga i le tagata. Afai sa faaipoipo le tagata, faatumu ia auiliiliga e uiga i le toalua. Faailoga ia pusa mo sauniga ua maua e le tagata. Afai o e faatumuina lau uluai pepa o le faasologa o gafa, o le a e amata tonu i le tusi o lou igoa i le laina 1.

2. Tusi ia igoa o tuaa, e amata i le tama ma le tina i le laina 2 ma le 3 o le pepa o le faasologa o gafa. Faatumu ia auiliiliga o mea na tutupu, ma faailoga ia pusa mo soo se sauniga. Faaauau lenei faagasologa mo le tele o tuaa e mafai ai. Ia mautinoa ua i ai se talafaamaumau o vaega faaleaiga mo ulugalii taitasi o loo faaalia i le pepa o le faasologa o gafa.

3. Tuu au faamatalaga fesootai i le pito i tua o le fomu. O le a faatagaina ai e lenei mea ia oe e fefaasoaai au faamatalaga o le talafaasolopito o lou aiga ma isi tagata sailiili.

O talafaamaumau o vaega faaleaiga ua faaalia ai ia faamatalaga auiliili e uiga i se iunite se tasi o se aiga. Faaaoga se talafaamaumau o vaega faaleaiga e faatulaga ai faamatalaga autu e uiga i vaega taitasi o le aiga ia ua ia te oe ia faamatalaga.

Mulimuli i laasaga nei:

1. Faamaumau ia faamatalaga e uiga i le tane ma le ava, e aofia ai o latou igoa ma le tele o aso ma nofoaga e mafai ona e faamaumauina mo mea na tutupu ua lisiina.

2. Faamaumau ia faamatalaga e uiga i tamaiti taitasi, e aofia ai le igoa, itupa, ma faamatalaga o mea na tutupu.

3. Lisi ia punavai o faamatalaga. O punavai e mafai ona aofia ai le malamalama o le tagata lava ia, meatotino a le aiga, faamaumauga o tagata lautele, faamatalaga mai saite o le Initoneti, ma faamatalaga ua lomia.

4. Tuu au faamatalaga fesootai i le pito i tua o le fomu. O le a faatagaina ai e lenei mea oe e fefaasoaai au faamatalaga o le talafaasolopito o lou aiga ma isi tagata sailiili.

E mafai ona fesoasoani se faufautua o talafaasolopito o aiga ia te oe e faatumu nei fomu. E mafai foi e faufautua ona fesoasoani ia te oe e ta ia faamatalaga mai au fomu i le saite o le Initoneti o le FamilySearch .

Faamatalaga e Manaomia mo Galuega o le Malumalu

A o e faamaumauina ia faamatalaga, manatua ina ia mafai ona faatinoina ni sauniga o le malumalu, e tatau ona atoa ia le itiiti ifo ma le tausaga talu ona maliu se tagata. E tatau lava ona e tuu atua le igoa ma le faaiu o lou tuaa, o se alii po o se tamaitai, ma ia lava faamatalaga e faailoa maoti ai le tagata. E mafai ona aofia i lenei faamatalaga ia aso, nofoaga, ma igoa ma sootaga o isi tagata o le aiga. Mo se faamauga i se toalua, o le a e manaomia foi le igoa ma le faaiu o le toalua. Mo se faamauga i matua, o le a e manaomia ona iloa le igoa po o le faaiu o le tama.

O Taiala mo le Tausia o Faamaumauga

A o e sueina ia tuaa, faamaumau le tele o faamatalaga e te mafaia e uiga ia i latou. Mo se faataitaiga, sue le aso, masina, ma le tausaga na tupu ai se mea, pe a mafai. E mafai e nei auiliiliga ona maua ai ni faaātaātaga e fesoasoani ai ia te oe e maua nisi faamatalaga e uiga i ou tuaa. Faaaoga ia taiala nei a o e faamaumauina ia faamatalaga o le talafaasolopito o aiga.

Igoa

Tuu i ai igoa ua atoatoa i le mea e gata ai. O lalo ifo o loo i ai ni nai faataitaiga o ni igoa atoatoa:

• Elizabeth Blackshaw

• Matthew William Harman Jr.

• Juan Angel de la Cruz Vasquez Ovalle

• Ah-Yueh Chen

Afai e te le iloa ia igoa atoa o ou tuaa, faamaumau le tele o igoa e te iloaina.

Itupa

Faailoa pe o lou tuaa o se alii po o se tamaitai.

Sootaga

Faamaumau le tele o faamatalaga e mafai e uiga i tagata o le aiga o ou tuaa. Taumafai ia faaaofia ai faamatalaga e uiga i tagata nei o le aiga o ou tuaa:

• Toalua

• Matua

• Tamaiti

• Uso/Tuagane/Tuafafine

Aso

• Taiala Lautele. Faamaumau le aso i le atoatoa e mafai ai. Mo se faataitaiga:

  • 23 Mat 1842

  • Me 1901

  Pe a e faamaumauina le aso i luga o se fomu, ia mautinoa e tusi le aso ina ia mafai ona iloagofie ma manino ai le aso ma le masina. Afai e te taina se aso i totonu o le saite o le Initoneti o le FamilySearch lea e le mafai ona faaliliuina, o le a e vaaia nisi o vaega e mafai ona e filifili i ai.

• Isi kalena. E faaliliu sa’o e le saite o le Initoneti o le FamilySearch ia aso mai kalena faa-paneta o loo faaaogaina i Saina, Iapani, ma Korea pe a e faamaumauina ia aso i mataitusi faa-Saina. Afai e le mafai ona e faamaumauina ia aso i mataitusi faa-Saina, ia faaliliu ia aso i le kalena faa-Gregorian po o le kalena o loo faaaogaina nei.

  Afai e i ai sau aso e le tutusa ma se kalena e lagolagoina e le saite o le Initoneti o le FamilySearch, e mafai ona e faaaogaina se tasi o faiga nei:

  • Pe a mafai ai, faaliliu le aso i le kalena faa-Gregorian po o le kalena o loo faaaogaina nei. Faamaumau le tausaga.

  • Afai e le mafai ona e faaliliuina le aso i le kalena faa-Gregorian, faamaumau lona uluai ituaiga.

• Aso taumate. Afai e le o iloa le tausaga tonu, e mafai ona taumateina. Faaaoga ia upu o le a o le i oo i le, tuanai le, po o le pe tusa o le e tuu i luma o le tausaga taumate. Mo se faataitaiga, atonu e na o le pau le mea e te iloa na maliu se tuaa i le taimi o le Taua Muamua o le Lalolagi. O le aso na maliu ai e mafai ona taumateina o le 1916 ma faamaumauina o le “Pe tusa o le 1916.”

• Aso fuafaatatau. O nisi aso e mafai ona taumateina mai isi aso ua iloa. Mo se faataitaiga, afai sa lua tausaga le matua o se tagata i le taimi na fai ai le faitau aofai o tagata i le 1860, e mafai ona fuafua faatatau le tausaga fanau i le 1858. Talu ai e mafai ona ese le tausaga tonu mai le tausaga fuafaatatau, faaaoga le upu pe tusa o le faatasi ma le tausaga.

• Aso e lemailoa. Afai e te le iloaina se aso, aua nei taumafai e fatu se faamatalaga. E faatagaina oe e le saite o le Initoneti o le FamilySearch e tuu ai pea le avanoa. Afai na maliu se tagata o le aiga i totonu o le 110 tausaga ua tuanai ae e le o maua se aso na maliu ai, faamaumau se aso taumate e faavae i faamatalaga sili o loo maua. O le a mafai ai e lenei mea ona faia ia sauniga o le malumalu.

Nofoaga

• Taiala lautele. Faamaumau le tele o mea e mafai ai o igoa o se nofoaga na tupu ai se mea. Afai e mafai, faamaumau uma ia tulaga o le igoa, e pei o le aai, faōaaai, itulagi, itumalo, teritori, nuu, setete, ma isi. Mo se faataitaiga:

  • Chicago, Cook, Illinois, Iunaite Setete

  • Ixhuacán de los Reyes, Veracruz, Mekisiko

  • Maugerud, Flesberg, Buskerud, Norway

  Afai e te le iloa ia tulaga uma o se igoa, o le a tuu atu e le saite o le Initoneti o le FamilySearch ia te oe se lisi atoa o igoa o nofoaga e mafai ona e filifili mai ai.

  Faaaoga ia taiala nei a o e faamaumauina ia igoa o nofoaga:

  • Faaaofia le igoa o le atunuu i soo se taimi e mafai ai.

  • Tuu se koma ma se avanoa i le va o tulaga o le igoa.

  • Faamaumau ia tulaga o le igoa o se nofoaga e pei ona i ai i la outou gagana masani. I le gagana Peretania ma isi gagana e faaaogaina le alafapeta faa-Roma, faamaumau muamua le tulaga faalemālō aupito itiiti ona faasolosolo ai lea i le tulaga aupito telē—mo se faataitaiga, amata i le igoa o le aai ma faaiu i le atunuu. Mo igoa o nofoaga e faamaumauina i tulaga o tusitusiga faa-Asia, amata i le tulaga aupito telē faalemālō ona faasolosolo atu ai lea i le tulaga aupito itiiti—mo se faataitaiga, amata i le atunuu ma faaiu i le nuu.

  • E mafai ona e sipelaina le igoa o le nofoaga i lau lava gagana po o le gagana masani a le itulagi o loo i ai le nofoaga lea.

• Nofoaga e le atoatoa igoa. Pe a le iloa uma ia tulaga o le igoa o se nofoaga, faamaumau mea o loo iloaina. O le a fesoasoani le saite o le Initoneti o le FamilySearch ia te oe e faatumu ia tulaga o avanoa. Mo se faataitaiga:

  • Ohaio, Iunaite Setete

  • Dafen, Carmarthen, Uelese

• Faapuupuuga. Pe a tusiaina ia igoa o nofoaga i luga o pepa, aua nei faapuupuuina. Afai e te faamaumauina ai i le saite o le Initoneti o le FamilySearch, o le a fesoasoani le saite ia te oe e faamanino ia igoa atoa o le nofoaga.

Galuega Faatino

• Amata le faamaumauina o faamatalaga na e aoina mai le fale. Afai e te faaaogaina le Initoneti, faamaumau sa’o ia faamatalaga i le new.familysearch.org. Afai e te le o faaaogaina le Initoneti, faamaumau ia faamatalaga i fomu.

• Faaaoga ia taiala i lenei mataupu e fesoasoani ai ia te oe e faamaumau sa’o ia igoa, aso, ma nofoaga.

• Afai o loo e auai i le vasega o le Malumalu ma Talafaasolopito o Aiga, saunia mo le vasega e sosoo ai e ala i le faitauina o le mataupu 5.

Punaoa Faaopoopo

• Spencer W. Kimball, “The Angels May Quote from It,” New Era, Feb. 2003, 32–35.

• “Tausia o Pepa o Talafaasolopito Faaleaiga,” lesona 17 i le Tamaitai Talavou Tusi Lesona 2 (1993), 63–67.

• “Talafaasolopito o Aiga ma le Tagata Lava Ia,” lesona 19 i le O Le Tamaitai o le Au Paia o Aso e Gata Ai: Tusi Lesona Autu mo Tamaitai, Vaega E (2000), 275–87.

• Preparing a Family History for Publication (36023; resource guide).