Folasaga

Talofa! O le a e amata i se malaga matagofie lea o le a faafoi ai oe i tua i le talafaasolopito ma agai atu ai i luma i le faavavau.

E le i i ai lava se isi taimi muamua na sili atu ona sagisagi fiafia ai i le faia o galuega o le malumalu ma talafaasolopito o aiga. Ua sili atu le tele o malumalu ua fausiaina i le lalolagi atoa nai lo se isi lava taimi muamua. O le televave o mea faatekinolosi ua faaauau ai le faateleina o lo tatou tomai e sue ma sailiili ia faamaumauga ma fesootai atu i isi. O loo sailiili, tuufaatasia, ma lolomi ma faasalalauina e tagata i le lalolagi atoa ia talafaasolopito o aiga i lomiga ma luga o le Initoneti.

Sa saunoa Peresitene Thomas S. Monson:

“I lenei galuega, o le a le matala lava se loka e aunoa ma [le ki o le faatuatua]. Ou te molimau atu pe a tatou faia mea uma tatou te mafaia e faataunuu ai le galuega ua i o tatou luma, o le a faaavanoaina e le Alii mo i tatou le ki paia o loo manaomia e tatala ai le oa o loo tatou matuai sailia. …

“Ou uso e ma tuafafine, aua le masalosalo i le faia o galuega lelei. Afai ua e lagona e itiiti naua lau fesoasoani pe ua faatauvaa, ia manatua o le taua o agaga e sili lena i le silafaga a le Atua. O lo tatou avanoa o le saunia lea o le ala, ma ia faataunuu galuega o sauniga, pe a uma ona faia ma le faamaoni le sailiga o gafa, ina ia mafai ona saunia nei agaga mo le mamalu, o so latou avanoa paia lea” (“O Le Ki o le Faatuatua,” Liahona, Me. 1994, 5, 7).

O le faamoemoega autu o galuega o talafaasolopito o aiga o le sueina lea o igoa o tuaa ma le faatinoina o sauniga o le malumalu mo tuaa. E aofia i lenei galuega se faagasologa faigofie:

Aoina o faamatalaga e faailoa ai ou tuaa.
Faamaumauina o faamatalaga e uiga i ou tuaa e faafesootai ai i latou i aiga.
Faatinoina o sauniga o le malumalu mo ou tuaa e le i mauaina ia sauniga.

E masani lava ona tau atu le faagasologa i faamatalaga e uiga i isi o ou tuaa—o matua, fanau, ma uso, tuafafine ma tuagane o i latou ua e mauaina—ma toe amata ai foi le faagasologa.

Aoina o Faamatalaga

Faamaumauina o Faamatalaga

Faatinoina o Sauniga o le Malumalu

O le a fesoasoani lenei taiala ia te oe e faaaoga le faagasologa e sue ai ou tuaa ma faamanuiaina ai i latou e ala i sauniga o le malumalu. O le a e aoao foi e uiga i punaoa e mafai ona fesoasoani ia te oe i lenei faagasologa, e aofia ai le saite o le Initoneti o le FamilySearch, lea o loo maua i le new.familysearch.org.

Afai ua i ai sou poto masani i le faiga o galuega o le malumalu ma talafaasolopito o aiga, e mafai ona e fetuunaia lou faaaogaina o lenei taiala i lou poto masani. O gaoioiga e faatamaoaigaina ai lou poto masani ma faapea ai ma punaoa faaopoopo e suesue i ai ua fautuaina atu i le faaiuga o mataupu taitasi. E mafai foi ona e asiasi i le Help Center (Nofoaga Autu o Fesoasoaniga) i le new.familysearch.org e maua ai nisi punaoa e fesoasoani ai ia te oe e aoao atili.

Atonu e te iloa ai o lenei taiala ua na o le pau lea o le mea e te manaomia e amata ai, pe atonu e te manao i le fesoasoani faaopoopo a se fautua o talafaasolopito o aiga. E mafai e fautua o talafaasolopito o aiga ona faaaoga lenei taiala e fesoasoani ai i tagata taitoatasi ma aiga i o latou fale. O lenei taiala o le faavae foi lea mo se vasega o le Malumalu ma Talafaasolopito o Aiga lea e mafai ona aoaoina i le taimi o le Aoga Sa, e pei ona fuafuaina e taitai o le perisitua i le lotoifale.

A o e faatinoina galuega o le malumalu ma talafaasolopito o aiga, o le a faamanuiaina oe i se molimau malosi i lona taua, se agaga faafetai sili atu mo le alofa o le Alii mo Ana fanau, ma se manao uunaia e faia ia galuega o le malumalu mo ou tuaa. O le a sili atu lou malamalama i le tupuaga o lou aiga ma se faateleina o le alofa mo ou tuaa.