Mataupu 2
O Le Amataina
O Fea e Maua ai le Fesoasoani
O loo tele auala e mafai ona e maua ai le fesoasoani a o e aoina ia faamatalaga o talafaasolopito o aiga. I lenei vaega o le a e aoao ai e faaaoga ia punaoa ua avanoa mo oe.
Aoina o Faamatalaga
Faamaumauina o Faamatalaga
Faatinoina o Sauniga o le Malumalu
O le mea taua e sili e mafai ona e faia o le saili atu ma mulimuli i le taitaiga a le Agaga Paia. E mafai foi ona e sailia le fesoasoani mai faufautua o talafaasolopito o aiga ma nofoaga autu o talafaasolopito o aiga. O le saite o le Initoneti o le FamilySearch o se punaoa mamana lea e mafai ona avea ma se fesoasoani sili ia te oe a o e aoina ma faamaumauina ia faamatalaga ma saunia ia igoa mo sauniga o le malumalu.
Mulimuli i le Taitaiga a le Agaga Paia
I au galuega o le malumalu ma le talafaasolopito o aiga, o le a sili atu ona e mataalia pe a e saili atu ma mulimuli i le taitaiga a le Agaga Paia.
O au taumafaiga e ao mai faamatalaga o aiga e mafai ona faatusatusa i taumafaiga a Nifae ia maua mai ia papatusi apamemea, ia sa i ai faamatalaga e uiga i lona gafa. E pei o Nifae, ua ia te oe foi le tiutetauave ia maua mai ia faamatalaga e uiga i lou aiga. E pei o Nifae, e manaomia foi ona e fetaomi atu i luma, ma le “lē muai iloa muamua o mea e tatau ona [e] faia (1 Nifae 4:6). Afai e te faalagolago ma le lotomaualalo i le Alii e saunia se ala mo oe e aoina ai faamaumauga, o le a Ia faamanuiaina oe i le faateleina o le taitaiga a le Agaga Paia.
Atonu e musuia oe e le Agaga Paia ia iloa le auala sili e amata ai au galuega o talafaasolopito o aiga, pe o ai tuaa po o gafa o aiga e taulai i ai, le mea e sue i ai faamaumauga aoga, ma pe o ai tagata o le aiga e faafesootai mo ni faamatalaga o aiga.
E mafai ona fesootai atu le Agaga Paia ia te oe e ala i le:
-
Fetalai atu i lou mafaufau ma le loto ma tuu atu ia te oe ni uunaiga po o ni manatu (tagai MF&F 8:1–2).
-
Taitaiina atu o isi e tuu atu ia te oe ni fautuaga musuia (tagai Esoto 18:13–24).
-
Fesoasoani atu ia te oe ia lagona le filemu (tagai MF&F 6:23).
-
Faamanatu atu ia te oe se mea (tagai Ioane 14:26).
Manatua ia faalagolago i le folafolaga a le Alii: “Ma o soo se mea tou te ole atu ai i le Tamā i lo’u igoa, e sa’o, ma talitonu o le a outou maua, faauta, o le a tuuina mai lava ia te outou” (3 Nifae 18:20).
Faufautua o Talafaasolopito o Aiga
E valaauina ma vaetofiaina e le epikopo po o le peresitene o le paranesi ia faufautua o talafaasolopito o aiga e fesoasoani i galuega o le malumalu ma talafaasolopito o aiga. E mafai ona aoao atu e faufautua ia vasega o talafaasolopito o aiga ma tuu atu le fesoasoani i tagata taitoatasi. E mafai ona latou fesoasoani ia te oe ina ia amataina, tali au fesili a o faagasolo, ma fesoasoani ia te oe e faaaoga le saite o le Initoneti o le FamilySearch ma isi punaoa.
Nofoaga Autu o Talafaasolopito o Aiga
Ua faatuina e le Ekalesia le faitau afe o nofoaga autu o talafaasolopito o aiga i le lalolagi atoa. O le tele o nofoaga autu ua i ai se faaputuga itiiti o punaoa ua lomia. O le tele lava o nofoaga autu ua i ai komepiuta mo le faaaogaina o le saite o le Initoneti o le FamilySearch ma isi Uepi saite o talafaasolopito o aiga. Atonu foi ua i ai ma ni masini e faitau ai ia ata mataninii.
E mafai e tagata faigaluega ona aoao atu ia te oe le auala e faaaoga ai le nofoaga autu. E mafai ona latou taliina au fesili ma fesoasoani ia te oe e faaaoga ia punaoa ma oka ia ata mataninii mai le Family History Library i le Aai o Sate Leki, Iuta. Afai e manaomia ona okaina ia ata mataninii, e masani lava e atoa ni nai vaiaso e faatali ai ata.
Ina ia maua se nofoaga autu o talafaasolopito o aiga, e mafai ona e talanoa i se faufautua o talafaasolopito o aiga.
Amata i le Saite o le Initoneti o le FamilySearch
Ina ia faafaigofieina au galuega o le malumalu ma talafaasolopito o aiga, ua faatuina e le Ekalesia se saite o le Initoneti, ua maua i le new.familysearch.org. E mafai ona e aoina mai ai faamatalaga o aiga iina, faamaumau ai igoa o tuaa ma isi faamatalaga, ma saunia igoa mo galuega o le malumalu. A o e amataina au galuega o le malumalu ma talafaasolopito o aiga, o le mea muamua e tatau ona e faia o le resitala lea i le saite ma sue ai pe o a faamatalaga o i ai e uiga ia te oe ma lou aiga.
Ina ia resitalaina, e manaomia lau numera o le pepa faamaumau o le Ekalesia ma le aso na faamauina ai oe o se tagata o le Ekalesia. E mafai e la outou failautusi o le uarota po o le paranesi ona maua mai lenei faamatalaga mai lau pepa faamaumau pe mai lau pepa o le Aotelega o Faamatalaga o Sauniga o le Tagata.
Ina ia faaaogaina le saite o le Initoneti o le FamilySearch, mulimuli i laasaga nei:
-
Afai o loo e faaaogaina le Initoneti, alu i le new.familysearch.org ma resitala ai o se tagata fou e faaaogaina e ala i le taina i totonu o le numera o lau pepa faamaumau ma le aso o le faamauga e avea ma tagata o le ekalesia, e faailoa ai oe. A uma loa ona faatumu le faagasologa o lau resitala, ua mafai loa ona e amata faaaogaina le saite.
-
Afai e le o i ai sau Initoneti, e mafai ona e alu i se nofoaga autu o talafaasolopito o aiga, lea o loo maua ai le avanoa e faaaoga ai. Pe mafai foi ona e talanoa atu i se faufautua o talafaasolopito o aiga, lea atonu e mafai ona ia lolomiina mo oe soo se faamatalaga ua i ai i le saite o le Initoneti o le FamilySearch e uiga ia oe ma lou aiga. Afai e le mafai e lou faufautua o talafaasolopito o aiga ona lolomiina ia faamatalaga mo oe, e mafai ona e faamaumauina ia faamatalaga o loo i luga o talafaamaumau o vaega faaleaiga ma pepa o le faasologa o gafa. O ni faataitaiga o nei fomu o loo maua i le faaopoopoga A.
-
Faaopoopo ia faamatalaga pe sui ia faamatalaga e le sa’o i le saite. Afai e le o i ai sau Initoneti, e mafai ona e faia ni faaopoopoga ma ni faasa’oga i luga o se kopi o le faamatalaga ua lomia mai le saite po o luga o se talafaamaumau o vaega faaleaiga ma le pepa o le faasologa o gafa. Ona mafai lea ona e tuuina atu ia suiga i se faufautua o talafaasolopito o aiga, lē e mafai ona ia taina i totonu i le saite. (Tagai mataupu 4 o lenei taiala mo nisi auiliiliga e uiga i le faamaumauina o faamatalaga o talafaasolopito o aiga.
-
Saunia igoa o tuaa mo galuega o le malumalu pe afai ua lava ia faamatalaga ia te oe e uiga ia i latou e faatino ai sauniga o le malumalu. (Tagai mataupu 7 o lenei taiala mo auiliiliga e uiga i le sauniaina o igoa mo galuega o le malumalu.)
E mafai foi e le saite o le Initoneti o le FamilySearch ona fesoasoani ia te oe e faamaopoopo ia taumafaiga o talafaasolopito o aiga ma galuega o le malumalu faatasi ma isi tagata o le aiga, faafesuiai ia faamatalaga o talafaasolopito o aiga, ma sue ia tagata o aiga taumamao, aemaise lava i latou atonu ua amata ona latou sailia ou tuaa.
Asiasi i le new.familysearch.org mo nisi faatonuga auiliili i le auala e faaaoga ai le saite.